‘18 నెలలు ప్రయత్నించినా పిల్లలు కలగలేదు’.. మగవాళ్లలో సంతానలేమి సమస్యలను పెద్దగా పట్టించుకోరెందుకు

కరోనా మహమ్మారి 2020 మధ్యలో ప్రపంచాన్ని స్తంభింపజేసింది. ఈ సమయంలో బ్రిటన్‌లో నివసించే ల్యూక్, ఆయన భార్య.. ఒక బిడ్డను కనాలని నిర్ణయించుకున్నారు.

''నేను టీనేజర్‌గా ఉన్నప్పుడు ఒక విషయాన్ని మాత్రం చాలా గట్టిగా చెప్పారు. కండోమ్ లేకుండా సెక్స్ చేయొద్దని, లేదంటే నీవల్ల ఎవరైనా అమ్మాయి గర్భవతి అవుతారని అన్నారు. కానీ, మీ వయసు పెరుగుతున్న కొద్దీ, అంతా సజావుగా జరుగుతుందని ఆశిస్తారు. అలా జరగనప్పుడు, ఏం చేయాలో, ఎక్కడికి వెళ్లాలో మీకు తెలియదు'' అని ల్యూక్ అన్నారు.

18 నెలల పాటు ప్రయత్నించినా బిడ్డను కనే విషయంలో వారు సక్సెస్ కాకపోవడంతో.. ఈ దంపతులు తమ ఫ్యామిలీ డాక్టర్‌ను కలిశారు. మరిన్ని పరీక్షల కోసం ఒక ఆస్పత్రికి, ఫెర్టిలిటీ సెంటర్‌కు పంపించారు ఆ డాక్టర్.

ఆ తర్వాత ఏడాది మొత్తం దృష్టంతా తన భార్యపైనే ఉన్నట్లు ల్యూక్ చెప్పారు. అన్ని మెడికల్ అపాయింట్‌మెంట్లు కూడా ఆమె పేరుపైనే ఉండేవి. ఆయన ఏదైనా డాక్యుమెంట్లు నింపాల్సి వచ్చినప్పుడు కూడా, ఆమె సమాచారం ఫైల్‌లో ఉన్నప్పటికీ, వాళ్ళు ఆయన భార్యనే సంప్రదించేవారు.

"అంతిమంగా, ఇది మహిళల సమస్య అనే భావనతోనే మొత్తం వ్యవస్థ పనిచేస్తుంది. పురుషుల విషయాన్ని పూర్తిగా విస్మరిస్తారు" అని ఆయన అన్నారు.

ఏడాది పైబడిన తర్వాత, ఒక ఇన్‌ విట్రో ఫెర్టిలైజేషన్ (ఐవీఎఫ్) విఫలమయ్యాక.. ఈయన వీర్యంలో ఏదైనా సమస్య ఉండొచ్చని ల్యూక్‌కు చెప్పారు.

''ఈ విషయం ఇప్పుడు నాకు చెబుతున్నారా? అని అనుకున్నాను. ఈ ప్రక్రియలో నన్ను కేవలం ఒక ప్రేక్షకుడిగా చూడకుండా, చాలా ముందే నా ఆరోగ్యానికి సంబంధించిన కొన్ని అంశాలను వారు చెక్ చేసి ఉంటే బాగుండేది" అని ల్యూక్ అన్నారు.

సుమారు ప్రతి ఆరు జంటలలో ఒక జంట ఇన్‌ఫెర్టిలిటీతో (సంతానలేమితో) బాధపడుతున్నారు. ఇందులో సగం కేసులలో పురుషులలోనే సమస్య ఉంటోంది.

కేవలం వారివల్లే లేదా మహిళల సమస్యలతో కలిసి సంతానలేమి సమస్యను ఎదుర్కొంటున్నారు.

బ్రిటన్‌కు చెందిన నేషనల్ ఇన్‌స్టిట్యూట్ ఫర్ హెల్త్ అండ్ కేర్ ఎక్స్‌లెన్స్ (ఎన్‌ఐసీఈ)కి చెందిన వైద్య మార్గదర్శకాల ప్రకారం, 12 నెలల పాటు గర్భ నిరోధకాలు ఉపయోగించకుండా లైంగికంగా కలిసినా ప్రెగ్నెన్సీ రాకపోతే అలాంటి జంటలను ఒక గ్రూప్‌గా అంచనా వేయాలి. మహిళలతో పాటు పురుషులకు కూడా అదనపు పరీక్షలు నిర్వహించాలి.

అయితే, సంతానలేమికి సంబంధించిన వ్యాధుల నిర్ధరణ, చికిత్స చర్చల విషయానికి వస్తే పురుషులను తరచూ విస్మరిస్తారని నిపుణులు పేర్కొన్నారు.

యూనివర్సిటీ కాలేజీ లండన్‌కు చెందిన ప్రొఫెసర్ పౌలా గ్రేస్ నేతృత్వంలో 2019లో జరిగిన ఒక అధ్యయనంలో, చాలా మంది పురుషులు సంతానోత్పత్తి ప్రక్రియలో మరింత చురుకుగా పాల్గొనాలని కోరుకుంటున్నప్పటికీ, తమ అభిప్రాయాలను ఎవరూ పట్టించుకోవడం లేదని వారు తరచూ భావిస్తున్నట్లు తేలింది.

''కొన్ని సంతానోత్పత్తి సర్వీసుల్లో మగవారిని చేర్చరు. దాంతో మగవారు తక్కువగా భాగస్వాములవుతారు. ఇది వారికి ఆసక్తి లేదనే భావనను మరింత బలపరుస్తుంది. 'మనం మగవారిని పక్కన పెట్టే వాతావరణాన్ని సృష్టించాం, కానీ వారు ముందుకు రావడం లేదని మళ్లీ వారిపైనే నిందలు వేస్తున్నాం' అని ఆమె అన్నారు.

దీనివల్ల కేవలం మగవారిపైనే కాదు, ''భావోద్వేగాల నిర్వహణ, ప్రణాళిక, ఆందోళన, నిర్ణయాలు తీసుకునే విషయాల్లో'' ఎక్కువ భారాన్ని మోయాల్సి వచ్చే మహిళలపై కూడా ప్రభావం చూపుతుందని గుర్తుంచుకోవాలి.

దీనివల్ల సమస్యలను ఆలస్యంగా గుర్తించి, పరీక్షలను, చికిత్సలను తీసుకోవడం కష్టతరమవుతుంది. దంపతులు గర్భం దాల్చడానికి మరింత కష్టతరమైన మార్గాన్ని, ఖర్చులను భరించాల్సి వస్తుంది.

అయితే, ఒక పురుషుడికి సమస్య ఉండవచ్చని చెప్పినప్పుడు, ఈ వ్యవస్థ వారికి అదనపు మద్దతును ఎలా అందించగలదు? పురుషులు సంతానోత్పత్తి గురించి మరింత బహిరంగంగా మాట్లాడటానికి, సహాయపడటానికి ఇంకా ఏమి చేయవచ్చు?

'వ్యవస్థాగత నిర్లక్ష్యం'

1978లో ఇన్ విట్రో ఫెర్టిలైజేషన్ (ఐవీఎఫ్) ద్వారా మొదటి శిశువు జన్మించినప్పటి నుంచి, బయోలాజికల్ కారణాల వల్ల సంతానోత్పత్తి చికిత్సలు ప్రధానంగా మహిళలపైనే దృష్టి సారించాయి.

ఐవీఎఫ్‌లో అండాలను ఉత్పత్తి చేయడానికి అండాశయాలను ప్రేరేపిస్తారు. వాటిని సేకరించి ప్రయోగశాలలో ఫలదీకరణం చేస్తారు. అలా ఏర్పడిన పిండాన్ని గర్భాశయంలోకి ప్రవేశపెడతారు.

దీనికి విరుద్ధంగా, చాలా మంది పురుషులు కేవలం స్పెర్మ్ శాంపుల్‌ను ఇచ్చి, ఆ ప్రక్రియ దానికంతట అది జరిగే వరకు వేచిచూస్తారు.

ఈ అసమానతే ఫెర్టిలిటీ కేర్ అభివృద్ధి చెందిన విధానాన్ని ప్రభావితం చేసిందని మాంచెస్టర్ యూనివర్సిటీ ఆండ్రాలజీ (పురుష సంతానోత్పత్తి ఆరోగ్యానికి సంబంధించిన వైద్య విభాగం) ప్రొఫెసర్ అలన్ పేసీ అన్నారు.

ఫెర్టిలిటీ యూనిట్లు, క్లినిక్‌లకు సాధారణంగా మహిళల సంతానోత్పత్తి ఆరోగ్యంపై శిక్షణ పొందిన గైనకాలజిస్ట్‌లే నేతృత్వం వహిస్తుంటారని, దీనివల్ల పురుషుల సంతానోత్పత్తిని తరచూ రెండో ప్రాధాన్యాంశంగా మాత్రమే చూసే అవకాశం ఉందని ఆయన చెప్పారు.

విధాన స్థాయిలో కూడా ఇలాంటి అసమానతలే ఉన్నాయని తెలిపారు.

ఒక దశలో ల్యూక్ తన వృషణాలకు ఆల్ట్రాసౌండ్ స్కాన్ చేయించారు. కానీ, ఏడాది దాటినా ఆయనకు ఎటువంటి సమాధానం రాలేదు. ఆయన గుర్తు చేసిన తర్వాత మాత్రమే ఆస్పత్రి నుంచి రిపోర్టులు వచ్చాయి.

ఒక పరీక్షలో ఆయనకు వరికోసెల్ (వృషణాశయంలోని (స్క్రోటమ్‌లోని) సిర ఉబ్బడం, ఇది వీర్య కణాల నాణ్యతను ప్రభావితం చేస్తుంది) ఉన్నట్లు తేలింది.

ఆయన దానికి చికిత్స తీసుకున్నారు, కానీ ఆ దంపతులకు సంతానలేమి సమస్యలు కొనసాగాయి.

జీవనశైలి, ఆహార విషయాల్లో వివరణాత్మకంగా, వ్యక్తిగతంగా సలహా పొందడానికి ల్యూక్‌కు మరో తొమ్మిది నెలలు పట్టింది.

ఒక ప్రైవేట్ రీప్రొడక్టివ్ మెడిసిన్ స్పెషలిస్ట్ వద్ద కన్సల్టేషన్‌ కోసం ఆయన చెల్లింపులు చేశారు.

''ఇది చాలా క్లిష్టమైన, ఒంటరిగా ఎదుర్కొన్న అనుభవం'' అని ల్యూక్ గుర్తు చేసుకున్నారు.

ప్రస్తుతం ల్యూక్, ఆయన భార్య ఐసీఎస్ఐ టెక్నాలజీ వాడుతూ మరో ఐవీఎఫ్ సైకిల్ చికిత్స తీసుకుంటున్నారు.

ఈ విధానంలో.. ల్యాబోరేటరీలో ఒక అండాన్ని వేలాది వీర్యకణాలతో కలిపి ఫలదీకరణం చేయడానికి బదులుగా, ఒక అధునాతన సూదిని ఉపయోగించి ఒకే ఒక వీర్యకణాన్ని నేరుగా అండంలోకి ప్రవేశపెడతారు.

''పరిస్థితి క్రమంగా మారడం మొదలైంది'' అని నిపుణులు అన్నారు. ''ఇప్పుడు పరిస్థితులు సరైన దిశలో వెళ్తున్నాయి. కానీ, ఇంకా చాలా వెనకాలే ఉన్నాం'' అని యూనివర్సిటీ కాలేజీ లండన్ హాస్పిటల్స్, లండన్‌లో క్లీవ్‌ల్యాండ్ క్లినిక్ కన్సల్టెంట్ యూరాలజికల్ సర్జన్ ప్రొఫెసర్ హుస్సేన్ అల్నాజ్జర్ అన్నారు.

ఉదాహరణకు.. సీమెన్ అనాలసిస్‌లో ఏదైనా సమస్య ఉన్నట్లు తేలితే, మహిళలు వైద్యుడిని సంప్రదించడానికి ముందే మగవారు నిపుణుడిని సంప్రదించడం ఇప్పుడు సర్వసాధారణం అవుతోంది.

"పరిస్థితులు మారుతున్నాయని చెప్పేదానికి అర్థం ఇదే. కానీ, అది నెమ్మదిగా జరుగుతోంది. మొత్తం మీద చూస్తే, సంతానలేమి విషయంలో మొదట పరీక్షలు చేయించుకునే వారిలో ఇప్పటికీ అత్యధిక శాతం మహిళలే ఉన్నారు" అని ఆమె పేర్కొన్నారు.

బ్రిటన్‌లోని నార్త్ యార్క్‌షైర్‌కు చెందిన 34 ఏళ్ల జేమ్స్ వంటి మగవారికి, ఈ నెమ్మదైన మార్పే వారి అనుభవాన్ని తీర్చిదిద్దింది.

జేమ్స్, ఆయన భార్య పిల్లల్ని కనడానికి చాలా ఇబ్బందులు పడినప్పటికీ.. తన భాగస్వామి అన్ని రకాల పరీక్షలు చేయించుకుంటుండగా, ఆయన మాత్రం నెలల తరబడి ఏమీ పట్టించుకోకుండా ఉండిపోయారు.

"ప్రతిరోజూ, నేను ఆ క్షణం గురించి, వృథా అయిన సమయం గురించి ఆలోచిస్తాను" అని ఆయన అన్నారు.

సెమెన్ అనాలసిస్ రిపోర్టు వచ్చినప్పుడు, జేమ్స్ ఒక కన్‌స్ట్రక్షన్ సైటులో పనిపై ఇంటికి చాలా దూరంలో ఉన్నారు.

''ఆయన వీర్యకణాలు బలహీనంగా, నెమ్మదిగా కదిలేవిగా ఉన్నాయి'' అని ఆయనకు రిపోర్టు ద్వారా తెలిసింది.

ఆ రోజు దాదాపు మూడు గంటల పాటు ఇంటికి తిరిగి చేసిన ప్రయాణం "చాలా బాధాకరంగా, గందరగోళంగా" సాగిందని జేమ్స్ గుర్తు చేసుకున్నారు.

శారీరకంగా పూర్తి పరీక్షలు చేయించుకునేందుకు, అడ్వాన్స్‌డ్ హార్మోన్ పరీక్షలు చేయించుకోవడానికి మరో రెండు సంవత్సరాలు పట్టింది. దీనికోసం ఒక ప్రైవేట్ యూరాలజిస్ట్‌ను సంప్రదించాల్సి వచ్చింది.

సంవత్సరాల తరబడి ప్రయత్నించినా, పలుమార్లు ఐవీఎఫ్ చికిత్స చేయించుకున్నా, ఆ దంపతుల సంతాన సాఫల్య చికిత్స విఫలమైంది.

'' మగవారి సంతానలేమి సమస్యను తరచూ మగతనం, పౌరుషంతో ముడిపెడుతుంటారు. కొందరు పురుషులు ఈ సమస్యను అంగీకరించడానికి, దాని గురించి మాట్లాడటానికి ఇది మరింత కష్టతరం చేస్తుంది. 'ఒక బార్బెక్యూ పార్టీలో మహిళలందరూ ఒకవైపు చేరి ఐవీఎఫ్ గురించి మాట్లాడుకుంటుంటే, పురుషులందరూ మరొకవైపు ఫుట్‌బాల్ గురించి మాట్లాడుకోవడం' విన్నాను'' అని ప్రొఫెసర్ పేసీ గుర్తు చేసుకున్నారు.

తన ఫెర్టిలిటీ సమస్యలు తన మగతనానికి సవాలుగా జేమ్స్ చూడలేదు.

''నువ్వు, నీ భాగస్వామి మాత్రమే దీన్ని డీల్ చేయాల్సి ఉంటుంది. మీరొక ఏకాకిగా ఒక ద్వీపంలో ఉన్నట్లు అనిపిస్తుంది. ఎవరి దగ్గరకు వెళ్లాలో, ఎవరితో మాట్లాడాలో, ఏం చెప్పాలో మీకు తెలియదు'' అని ఆయన అన్నారు.

యూకే చట్టం కింద.. ఫెర్టిలిటీ క్లినిక్స్ చికిత్సకు ముందు కచ్చితంగా కౌన్సిలింగ్ ఇవ్వాలి. కానీ, ఇది ఉచితం కానవసరం లేదు.

మహిళల కోసం ఉన్న సహాయక బృందాలతో పోలిస్తే మగవారి కోసం చాలా తక్కువ సహాయ బృందాలు ఉన్నాయని యూకేలోని సంతానోత్పత్తి నియంత్రణ సంస్థ హెచ్‌ఎఫ్ఈఏ పేర్కొంది. అయితే, ఈ పరిస్థితి మారుతున్నట్లు సూచించే సంకేతాలు కనిపిస్తున్నాయి.

షాన్ గ్రీన్‌వేకి 2018లో అజూస్పెర్మియా ఉన్నట్లు తేలింది. అంటే ఆయన వీర్యంలో ఎలాంటి వీర్య కణాలు లేని పరిస్థితి. దీనికి గల కారణం తెలియలేదు.

కానీ, యుక్త వయసులో ఉన్నప్పుడు గవదబిళ్లలు బారిన పడ్డారు. ఈ వైరస్‌ పురుషుల సంతానలేమితో ముడిపడి ఉంది. ఒంటరిగా చాలా బాధను భరించానని షాన్ చెప్పారు. స్పెర్మ్ డొనేషన్ ద్వారా ఆయన, తన భార్య గర్భందాల్చడానికి సహకరించారు.

''ఎవరి నుంచి మద్దతు వచ్చేది కాదు. వ్యక్తిగత కోణం నుంచి ఎవరూ దాని గురించి మాట్లాడలేదు. అందుకే, తన కథను పంచుకుందాం'' అని షాన్ అనుకున్నారు.

తన స్నేహితుడైన 40 ఏళ్ల సియారన్ హ్యానింగ్‌టన్‌తో కలిసి, సంతానలేమి సమస్యలున్న పురుషుల కోసం వాట్సాప్ గ్రూపులు, ఫేస్‌ టూ ఫేస్ చర్చలతో కూడిన 'పాడ్‌కాస్ట్ ఫర్ మెన్' అనే ఒక సపోర్టు నెట్‌వర్క్‌ను ఏర్పాటు చేశారు.

వారు పురుషుల ఫెర్టిలిటీపై జరుగుతున్న ప్రస్తుత చర్చ అంశాన్ని, సుమారు దశాబ్దం క్రితం మానసిక ఆరోగ్యంపై జరిగిన చర్చ అంశంతో పోలుస్తున్నారు.

ఇది ఇప్పటికీ నిషిద్ధమైన విషయంగానే పరిగణిస్తుండటంతో, నెమ్మదిగా దీనిపై మరింత చర్చ బహిరంగంగా జరుగుతోంది.

తనకు ఎదురైన ఈ పరిస్థితిని ఎదుర్కొని, జీవనశైలిని మార్చుకునేందుకు కనీసం రెండు సంవత్సరాలు పట్టిందని సియారన్ చెప్పారు.

ఏడుసార్లు ఐవీఎఫ్ చికిత్స చేయించుకుని.. రెండుసార్లు గర్భస్రావం అయిన తర్వాత, సియారన్ భార్య జెన్నిఫర్ చివరకు ఒక అబ్బాయికి, ఒక అమ్మాయికి జన్మనిచ్చారు.

ఒత్తిడి, సరిగ్గా నిద్రలేకపోవడం, పొగ తాగడం, మద్యపానం, ఆహారపు అలవాట్లు అన్ని కూడా వీర్యకణాల నాణ్యతను దెబ్బతీయొచ్చని అధ్యయనాలు చెబుతున్నాయి.

అయితే, స్వల్పకాలంలో జరిగే చిన్న మార్పులు పెద్ద స్థాయిలో గణనీయమైన ప్రభావాన్ని చూపించే అవకాశం లేదని ప్రొఫెసర్ పేసీ పేర్కొన్నారు.

''ఏ జీవనశైలి అయినా నిలకడగా ఉండాలి'' అని చెప్పారు. ఎందుకంటే, వీర్యకణాల ఉత్పత్తికి మూడు నెలలు పడుతుందని, శుక్రవారం రాత్రి తాగడం మానేస్తే, సోమవారం ఉదయం కల్లా మెరుగుదలను ఆశించవద్దని చెప్పారు.

పురుషులలో సంతానలేమి అనేది ఊబకాయం, ధూమపానం నుంచి హార్మోన్ల అసమతుల్యత వరకు అనేక రకాల ఆరోగ్య సమస్యలకు సూచికగా ఉంటుందని చెప్పడానికి ఆధారాలు పెరుగుతున్నాయని బ్రిటిష్ అసోసియేషన్ ఆఫ్ యూరాలజికల్ సర్జన్స్ ప్రతినిధి, ప్రొఫెసర్ అల్నాజ్జర్ అన్నారు.

''ఆరోగ్యకరమైన పురుషునికి మెరుగైన సంతానోత్పత్తి ఆరోగ్యం ఉంటుంది. అయితే, స్పెర్మ్ టెస్ట్‌లో ఏదైనా తేడా వస్తే, మరింత వైద్య పరీక్షలు అవసరమని సూచించే మొదటి సంకేతం ఇదే కావొచ్చు'' అని ఆయన చెప్పారు.

అందుకే, పురుషుల సంతానలేమిని కేవలం గర్భధారణకు సంబంధించిన సమస్యగా చూడకూడదు. దీనిని, పురుషుల ఆరోగ్యానికి సంబంధించిన ఒక ముఖ్యమైన సంకేతంగా, అలాగే ముందస్తు హెచ్చరికగా, చికిత్సకు ఒక అవకాశంగా చూడాలని నేను భావిస్తున్నా" అని ఆయన పేర్కొన్నారు.

( బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)