Canada: Aabbe lagu soo oogay dacwad kadib markii uu dilay carruurtiisa

Dalka Canada, magaalada Calgary: Waalid ayaa lagu soo oogay dacwad dil darajada koowaad ah kadib markii uu dilay laba carruurtiisa ah.

Maydka wiil shan jir ah iyo gabadh saddex jir ah oo uu dhalay ayaa Khamiistii laga helay gudaha baabuur yaallay waqooyi-galbeed magaalada Calgary.

Ninkan oo 37 jir ah ee eedaysanaha ah ayaa la sheegay inuu subaxnimadii Jimcaha ka soo muuqday maxkamadda magaalada Calgary, sida ay booliisku sheegeen.

Maxkamaddu waxay dalbatay in aan warbaahinta lagu shaacin magacyada eedaysanaha iyo carruurta dhibbanayaasha ah, sidaas darteed warbaahinta CBC ma aysan soo bandhigin aqoonsigooda.

Booliiska magaalada ayaa bayaan ay soo saareen Jimcihii ku sheegay in dhacdadan ay tahay "mid aad u naxdin leh oo aan la qiyaasi karin."

Wuxuu sii raaciyay: "Dhacdooyinka sidan oo kale ah ma saameeyaan oo keliya qoysaska iyo bulshada, balse waxay sidoo kale saameyn qoto dheer oo waarta ku yeeshaan dadka goobta ku sugnaa, booliiska baaraya dhacdooyinka, iyo sidoo kale kuwa ugu horreeya ee ka jawaaba xaaladaha degdegga ah."

Eedaysanaha ayaa Khamiistii qiyaastii 10-kii subaxnimo wacay booliiska, isaga oo u sheegay inuu dilay carruurtiisa isla markaana u sheegay halka uu joogo.

Markii booliisku gaareen goobta uu tilmaamay, waxay heleen baabuur taagan, waxayna xireen eedaysanaha ka hor inta aysan helin maydadka carruurta, kadib markii uu qirtay falka.

Sarkaalka ka tirsan waaxda ka hortagga dambiyada qoyska, Sarjeen Mark Raine, ayaa warbaahinta u sheegay in qoyska dhibbanayaasha ay ahaayeen lammaane sharci ah muddo lix sano ah ka hor inta aysan si rasmi ah u kala tegin sannad ka hor.

Intii ay wada noolaayeen waxaa jiray khilaafyo, waxaana booliiska afar jeer loogu yeeray gurigooda, hase yeeshee khilaafkaasi ma gaarin heer dacwad maxkamadeed, ayuu sharxay Sarjeen Mark Raine.

Eedaysanaha ayaa Arbacadii qiyaastii 5-ta galabnimo carruurta ka qaaday hooyadood isagoo sheegay inuu soo wareejinayo magaalada, balse markii uu dib u soo celin waayay waqtigii loo ballamay, ayay hooyadu la xiriirtay booliiska.

Sarjeen Mark Raine ayaa sheegay in inkastoo booliisku marar badan isku dayeen inay wacaan eedaysanaha si ay ula xiriiraan, uusan ka jawaabin.

Booliisku waxay ogaadeen in labada carruur ah la dilay intii u dhaxaysay habeenkii Arbacada iyo waaberigii Khamiista, kadib baaritaan lagu sameeyay maydadka carruurta.

Booliisku waxay sidoo kale sheegeen in eedaysanaha mar kale maxkamad la soo taagi doono Isniinta soo socota.

Dadka deegaanka oo aad uga naxay dhacdadan ayaa isugu soo baxay si ay u muujiyaan murugadooda.

Gaar ahaan, bulshada Eritreeyaanka ee ku nool Calgary ayaa isugu timid kaniisaddii ay qoyskaasi tegi jireen oo ku taalla waqooyi-galbeed magaalada, iyagoo halkaas ku muujiyay baroor-diiq iyo tacsi, sidoo kalena taageero niyadeed u fidiyay hooyada carruurta dhibbanayaasha ah.

Nin deggan Calgary, oo lagu magacaabo Abba Goitom Mengesha, ayaa warbaahinta CBC u sheegay in dilka carruurta uu argagax weyn ku abuuray bulshada deegaanka.

"Arrintan oo kale hore loogama arag bulshadeenna; waxa dhacay aad ayaan uga naxnay," ayuu yiri.