Athchuinge ag iarraidh casg buileach air Sealg a' Ghuga ga cumail fosgailte

Cho-dhùin comataidh aig Pàrlamaid na h-Alba gun athchuinge a tha ag iarraidh nach bi cead tuilleadh aig muinntir Nis a dhol a-mach a shealg a' ghuga a dhùnadh.

Bha buill Comataidh nan Aththuingean a' beachdachadh air an tagradh aig Rachel Bigsby gum bu chòir sguir den t-seann chleachdadh gu tur.

Tha an t-iarrtas, taobh a-muigh aig an neach-dhealbh fiadh-bheatha air taic mhòr fhaighinn bho dhaoine a tha a' seasamh chòraichean bheathaichean, a' bhuidheann Protect the Wild nam measg.

Tha an cleachdadh air a dhìon fon lagh, ach feumaidh na sealgairean cur a-steach airson cead a dhol a Shùlasgeir a h-uile bliadhna.

Dhiùlt NàdarAlba sealg na bliadhna-sa a cheadachadh san Ògmhios leis nach urrainn dhaibh a bhith cinnteach nach toireadh an t-sealg droch bhuaidh air àireamh nan sùlairean san eilean bheag chreagach mu 40 mìle iar-thuath air ceann a tuath Leòdhais.

Ge-tà, thàinig e am follais tro iarrtas Achd Saorsa an Fhiosrachaidh gun robh cuid de dh'oifigich na buidhne riaghaltais air moladh roimhe cead a thoirt 500 eun a mharbhadh.

Tha deasbad sradagach air a bhith ann sna beagan mhìosan a dh'fhalbh eadar luchd-taice na seilge agus an fheadhainn a tha na h-aghaidh.

Tha muinntir Nis a' cumail a-mach gu bheil an t-sealg mar phàirt den dualchas aca, ach tha luchd-strì den bheachd gur e "spòrs fhuilteach" a th' innte.

Tha còrr is 110,000 ainm air an athchuinge air an robh a' chomataidh a' beachdachadh Diardaoin.

Dh'iarr BPA nan Eilean Siar, Dòmhnall MacFhionghain, air na buill an athchuinge a dhùnadh.

Thuirt e: "Tuigidh mi draghan an athchuingiche ach chan urrainn dhomh gun feairt a thoirt air an iomairt san fharsaingeachd a rinn dubh-chàineadh air coimhearsnachd Nis.

"Rinn iad dealbh dhiubh mar dhaoine mì-adhartach agus rinn seo lèireadh air tòrr den luchd-bhòtaidh."

Ge-tà, mhol ball an SNP Dàibhidh Torrance an athchuinge a chumail fosgailte leis gu bheil na h-uimhir de dh'ùidh innte air feadh na dùthcha.

Chuir Devon Docherty bho Protect the Wild fàilte air co-dhùnadh na comataidh.

Thuirt i: "Tha cead aig Dòmhnall MacFhionghain bruidhinn às leth muinntir na roinne-pàrlamaid aige ach tha ceist orm carson nach eil e a' riochdachadh bheachdan luchd-bhòtaidh nach eil ag aontachadh gum bu choir dhan t-sealg a dhol air adhart agus a dh'iarr air bruidhinn air an son."

Thèid an tuilleadh fianais a-nise a chruinneachadh mun chuspair bhon athchuingiche, NàdarAlba agus eileanaich.

Beachdaichidh a' chomataidh cuideachd air cuireadh a thugadh dhaibh a dhol dha na h-eileanan mar phàirt den obair aca.