అసదుద్దీన్ ఒవైసీ గడ్డంపై సమాజ్వాది పార్టీ నాయకుడు ఆజం ఖాన్ చేసిన విమర్శలేంటి.. లఖ్నవూ బిర్యానీ తిని హైదరాబాద్ తిరిగి వెళ్లిపోవాలని ఎందుకన్నారు?

ఫొటో సోర్స్, ANI
జైలు నుంచి బుధవారం(నవంబర్ 18) విడుదలైన తర్వాత సమాజ్వాదీ పార్టీ సీనియర్ నాయకుడు అజం ఖాన్ తీవ్ర స్వరం వినిపిస్తున్నారు.
ఒకవైపు ప్రభుత్వంపై విమర్శలు గుప్పిస్తూనే, మరోవైపు రాజకీయ ప్రత్యర్థులపైనా వ్యంగ్యాస్త్రాలు సంధించారు.
ఏఐఎంఐఎం అధినేత, హైదరాబాద్ ఎంపీ అసదుద్దీన్ ఒవైసీని ఆయన లక్ష్యంగా చేసుకుని విమర్శలు చేశారు.
తన ప్రత్యర్థులకు ఒవైసీ సహాయం చేస్తున్నారని ఆజం ఖాన్ ఆరోపించారు.
అజం ఖాన్ విడుదల సందర్భంగా ఒవైసీ ఆయనకు అభినందనలు తెలిపారు.
దీనిపై ఆయన స్పందన కోరగా ఆజం ఖాన్ వ్యంగ్యంగా సమాధానమిచ్చారు.
'ఆయన (ఒవైసీ) చేసిన ప్రార్థన నా శత్రువులకు మందులా పనిచేసింది' అని అన్నారు.
అసదుద్దీన్ ఒవైసీ, ఆజాద్ సమాజ్ పార్టీ (కాన్షీరాం) అధ్యక్షుడు చంద్రశేఖర్ ఆజాద్ ఈ నెల12న ఉత్తర్ప్రదేశ్లో కొత్త కూటమి 'సామాజిక్ పరివర్తన్ మోర్చా'ను ప్రకటించారు.

సామాజిక్ పరివర్తన్ మోర్చా తరఫున చంద్రశేఖర్ ఆజాద్ను ముఖ్యమంత్రి అభ్యర్థిగా ఒవైసీ ప్రకటించారు.
ఈ రెండు పార్టీలు కలిసి ఉత్తరప్రదేశ్లోని మొత్తం 403 అసెంబ్లీ స్థానాల్లో పోటీ చేయనున్నాయి.
ఈ కూటమిని బీజేపీ నేతృత్వంలోని ఎన్డీఏ కంటే, సమాజ్వాదీ పార్టీ-కాంగ్రెస్తో కూడిన ఇండియా కూటమికి ఎక్కువ సవాలుగా రాజకీయ వర్గాల్లో భావిస్తున్నారు.
వచ్చే ఏడాది ప్రారంభంలో ఉత్తరప్రదేశ్లో అసెంబ్లీ ఎన్నికలు జరగనున్నాయి. ఎన్నికలకు ముందు ఏర్పడిన ఈ కొత్త రాజకీయ కూటమి కాంగ్రెస్, సమాజ్వాదీ పార్టీలను ఇబ్బందికి గురిచేస్తున్నట్టు కనిపిస్తోంది. దీనికి కారణం ముస్లిం ఓటు బ్యాంకు.
ఈ రెండు పార్టీలు, కూటములు కొంతవరకు ఈ ఓటు బ్యాంకుపైనే ఆధారపడి ఉన్నాయి. బహుశా అందుకే కాంగ్రెస్ నేతలు, ఒవైసీ మధ్య కూడా మాటల యుద్ధం పెరిగింది.

ఫొటో సోర్స్, ANI
ఒవైసీ గురించి ఆజం ఖాన్ అసలేమన్నారు?
ఆజం ఖాన్ ఉత్తరప్రదేశ్లో సమాజ్వాదీ పార్టీకి చెందిన ప్రభావవంతమైన ముస్లిం నాయకుడిగా గుర్తింపు పొందారు. కొన్ని దశాబ్దాలుగా ఆయన రాజకీయాల్లో ఉన్నారు.
అందుకే అజం ఖాన్ వ్యాఖ్యలను రాజకీయ విశ్లేషకులు నిశితంగా గమనిస్తున్నారు. ముస్లిం ఓట్లను తమవైపు తిప్పుకొనే ప్రయత్నాల్లో భాగంగానే వీటిని చూస్తున్నారు.
జైలు నుంచి విడుదలైన రెండో రోజు ఆజం ఖాన్ను జర్నలిస్టులు ఒక ప్రశ్న అడిగారు.
''హైదరాబాద్కు చెందిన మౌలానా అసదుద్దీన్ ఒవైసీ ఎన్నికల సభ కోసం రాంపూర్ వచ్చారు. అక్కడ ఆయన చాలా వ్యాఖ్యలు చేశారు. దీనిపై మీరేమంటారు?'' అని ప్రశ్నించారు.
"ఇంకా ఎన్నికలకు చాలా సమయం ఉంది. ఆయన బారిస్టర్ (న్యాయవాది) మాత్రమే. మౌలానా కాదు. గడ్డం పెంచుకున్నంత మాత్రాన ఎవరూ మౌలానా అయిపోరు. అలాగే గడ్డం పెంచుకున్నంత మాత్రాన ఎవరూ సాధువు కూడా అయిపోరు. మౌలానా కావాలంటే మౌలవియత్ డిగ్రీ ఉండాలి. ఫత్వా జారీ చేయాలంటే ముఫ్తీ డిగ్రీ ఉండాలి" అని అన్నారు.
ఒవైసీ మీ కోసం ప్రార్థించానని చెప్పారని ఓ జర్నలిస్ట్ చెప్పగా
"అందుకు నేను ఆయనకు కృతజ్ఞుడిని. నా ఇల్లు నాలుగు అడుగుల దూరంలోనే ఉంది. ఉచితంగా ఫోన్ చేసుకునే సదుపాయం కూడా ఉంది. ఇంటికి ఫోన్ చేసి నా భార్యను నా క్షేమసమాచారాలు అడిగి ఉండవచ్చు. మా ఇంటికి వచ్చి ఉండవచ్చు. అది ప్రార్థన కాదు. నా శత్రువులకు ఇచ్చిన మందు" అని ఆజం ఖాన్ సమాధానమిచ్చారు.
''మా ప్రాంతంలో హైదరాబాదీ బిర్యానీని ఇష్టపడరు. మా దగ్గర పలావ్, మటన్ బిర్యానీని ఇష్టపడతారు" అని కూడా ఆయన వ్యాఖ్యానించారు.
ఒవైసీ, చంద్రశేఖర్ ఆజాద్ పార్టీల మధ్య ఏర్పడిన కూటమిపై వ్యాఖ్యానించడానికి ఆయన నిరాకరించారు.

ఫొటో సోర్స్, facebook.com/PartyAIMIM
వచ్చేది ఎన్నికలు కాదు...విప్లవం
జైలు నుంచి విడుదలవుతూ ఆజం ఖాన్ ఎన్నికల వాతావరణంపై కొన్ని వ్యాఖ్యలు చేశారు.
"ఎన్నికలు జరగవు.. విప్లవం వస్తుంది. మార్పు కాదు.. ఒక సునామీ వస్తుంది. ఇకపై ప్రజలు మతం పేరుతో, కులం పేరుతో కొట్టుకోరు. సమస్యల ఆధారంగా పోరాటం జరుగుతుంది.
రాజ్యాంగం కోసం, చట్టం కోసం ప్రాణాలు ఇవ్వడానికి మాలాంటి వాళ్లు గతంలో సిద్ధంగా ఉన్నారు. ఇప్పటికీ సిద్ధంగా ఉన్నారు. భవిష్యత్తులోనూ సిద్ధంగానే ఉంటారు" అని అన్నారు.
ఒవైసీపై ఆజం ఖాన్ వ్యాఖ్యలపై ఉత్తరప్రదేశ్ కాంగ్రెస్ స్పందించింది.
"ఆజం ఖాన్ చేసిన వ్యాఖ్యలను మనస్ఫూర్తిగా స్వాగతించాలి. బీజేపీ ఆయనను జైలులో ఉంచింది. అయినప్పటికీ ఆయన వైఖరిలో ఎలాంటి మార్పు రాలేదు. ఆజం ఖాన్ జిందాబాద్" అని ఉత్తరప్రదేశ్ కాంగ్రెస్ అధికార ప్రతినిధి సురేంద్ర రాజ్పుత్ అన్నారు.
"మీరు ఒవైసీకి ఆయన స్థానం ఏమిటో చూపించారు. భారతీయ జనతా పార్టీకి మద్దతుగా హైదరాబాద్ నుంచి వచ్చినవాళ్లు తమ సామాన్లు సర్దుకోవాలి. లఖ్నవూ బిర్యానీ, పలావ్, దమ్ పలావ్ రుచి చూసి తిరిగి హైదరాబాద్ వెళ్లిపోవాలి" అని వ్యాఖ్యానించారు.
పశ్చిమ ఉత్తరప్రదేశ్కు చెందిన కాంగ్రెస్ ఎంపీ ఇమ్రాన్ మసూద్ ఒవైసీ గడ్డంపై ఆజం ఖాన్ చేసిన వ్యాఖ్యలను ఖండించారు.
"గడ్డం అనేది గౌరవించాల్సిన విషయం. కొందరు గడ్డం పెంచుకుంటారు, మరికొందరు పెంచుకోరు. కానీ మనం గడ్డం గురించి వ్యాఖ్యలు చేయకూడదు" అని అన్నారు.
చంద్రశేఖర్ పార్టీతో కలిసి కొత్త కూటమిని ఏర్పాటు చేసిన అసదుద్దీన్ ఒవైసీ సమాజ్వాదీ పార్టీపైనా విమర్శలు గుప్పించారు.
నవంబర్ 16న ఆయన ‘ఎక్స్’లో ఒక పోస్టు చేశారు.
" దళితులు, ముస్లింలు బీజేపీని ఓడించగలిగే పార్టీకి ఓటు వేయాలని ఇప్పుడు అఖిలేశ్ యాదవ్ కూడా చెప్పారు. బీజేపీని అడ్డుకునే అసలైన శక్తి ఇప్పుడు 'సామాజిక్ పరివర్తన్ మోర్చా'కే ఉంది. ఎందుకంటే అనేక ఎన్నికల్లో బీజేపీని అడ్డుకోవడంలో సమాజ్వాదీ పార్టీ విఫలమైంది'' అని ఆయన ఆరోపించారు.
మేరఠ్లోని కేసర్గంజ్ మసీదు వివాదం విషయంలోనూ సమాజ్వాదీ పార్టీని ఒవైసీ లక్ష్యంగా చేసుకున్నారు.
"కేసర్గంజ్ మసీదు సమస్యను ఎంఐఎం లేవనెత్తింది. మీ ఓట్లతో గెలిచి పదవుల్లోకి వచ్చినవాళ్లు ఆ తర్వాత మూగవాళ్లలా ఉండిపోతారు. ఎందుకంటే అఖిలేశ్ యాదవ్ మౌనంగా ఉండాలని వారికి చెప్పారు.
కానీ ఇక్కడి నుంచి సామాజిక్ పరివర్తన్ మోర్చా ఎమ్మెల్యే గెలిస్తే ఈ అంశంపై మాట్లాడాలని వాళ్లకు చెబుతాం" అని అన్నారు.

ఫొటో సోర్స్, ANI
బీజేపీని ఎందుకు ప్రశ్నించరు?
సమాజ్వాదీ పార్టీ ఒవైసీకి కొన్ని ప్రశ్నలు సంధించింది.
"బీజేపీని ఉద్దేశించి ఒవైసీ ఎప్పుడూ ఎలాంటి ప్రశ్నలు వేయరు" అని సమాజ్వాదీ పార్టీ రాష్ట్ర అధికార ప్రతినిధి ఫఖ్రుల్ హసన్ చాంద్ నవంబర్ 15న అన్నారు.
ఏ రాష్ట్రంలో బీజేపీ ప్రతిపక్షంలో ఉంటుందో అక్కడ అధికారంలో ఉన్న ప్రభుత్వాన్ని ఒవైసీ పార్టీ ప్రశ్నిస్తుందని, అదే బీజేపీ అధికారంలో ఉన్న రాష్ట్రాల్లో మాత్రం ప్రతిపక్షాలను ప్రశ్నిస్తుందని ఆయన ఆరోపించారు.
"కనీసం ఒక్క ప్రశ్న అయినా బీజేపీని అడిగే ధైర్యం చూపించండి. మీ కూటమి బంధం దిల్లీతో ముడిపడి ఉంది కాబట్టి బీజేపీని ఒక్క ప్రశ్న కూడా అడగరా? కనీసం ఉత్తరప్రదేశ్ ముఖ్యమంత్రినైనా ఒక ప్రశ్న అడగండి" అని అన్నారు.
"ఇంకెంతకాలం ప్రతిపక్షాలనే ప్రశ్నిస్తారు? కూటములు ఏర్పాటు చేసి ప్రతిపక్షాలను ఇంకెంతకాలం బలహీనపరుస్తారు?" అని ప్రశ్నించారు.
ఉత్తరప్రదేశ్లోని యోగి ప్రభుత్వంలో మంత్రి, సుహేల్దేవ్ భారతీయ సమాజ్ పార్టీ అధినేత ఓం ప్రకాశ్ రాజ్భర్ ఆజం ఖాన్పై విమర్శలు చేశారు.
"ఉత్తరప్రదేశ్లోని ముస్లింలందరూ ఒక ముస్లిం వ్యక్తి ముఖ్యమంత్రి కావాలని కోరుకుంటున్నారని ఆజం ఖాన్కు చెప్పాలనుకుంటున్నాం. బిర్యానీ, హైదరాబాదీ విషయాలను పక్కన పెట్టండి. ఆజం ఖాన్కు నిజంగా ధైర్యం ఉంటే ఈసారి ఒక ముస్లిం వ్యక్తి ముఖ్యమంత్రి అవుతారని అఖిలేశ్తో చెప్పాలి. ఒవైసీ కనీసం తన సామాజిక వర్గానికి చెందిన ప్రజలు విద్య, ఆరోగ్యం, ఉపాధి, ఉద్యోగాల గురించి అవగాహన పెంచుకునేలా రాష్ట్రవ్యాప్తంగా పర్యటిస్తున్నారు. కానీ మీరు మాత్రం వారిని బానిసలుగా మార్చి అఖిలేశ్కు అప్పగిస్తున్నారు" అని రాజ్భర్ విమర్శించారు.

ఫొటో సోర్స్, Getty Images
ముస్లిం ఓట్లే లక్ష్యం
ఒవైసీపై ఆజం ఖాన్ విమర్శలు సమాజ్వాదీ పార్టీకి ప్రయోజనం కలిగించవచ్చని ఉత్తరప్రదేశ్ రాజకీయాలను నిశితంగా గమనించే సీనియర్ జర్నలిస్ట్ శరత్ ప్రధాన్ అభిప్రాయపడ్డారు.
"కొంతకాలంగా ఆజం ఖాన్ జైలులో ఉన్నారు. ఆ సమయంలో ఒవైసీ రాజకీయాల్లో ముందుండి తన ప్రభావాన్ని పెంచుకుంటున్నారు. ఇప్పుడు ఆజం ఖాన్ జైలు నుంచి బయటకు రావడంతో ఒవైసీని లక్ష్యంగా చేసుకుని విమర్శలు చేయడం ప్రారంభించారు" అని బీబీసీ ప్రతినిధి ప్రేరణతో లఖ్నవూలో మాట్లాడిన శరత్ ప్రధాన్ అన్నారు.
ఆజం ఖాన్ ఉత్తరప్రదేశ్లో సమాజ్వాదీ పార్టీకి చెందిన ప్రభావవంతమైన ముస్లిం నాయకుడని ఆయన అన్నారు.
ఆజం ఖాన్ లేకపోవడంతో సమాజ్వాదీ పార్టీ ముస్లిం ఓటు బ్యాంకులో ఒవైసీ గణనీయమైన చీలిక తీసుకొచ్చారని చెప్పారు.
చెల్లాచెదురైన తన ఓటు బ్యాంకును తిరిగి సంపాదించుకునే అవకాశం ఆజం ఖాన్ ఇప్పుడు బయటకు రావడంతో సమాజ్వాదీ పార్టీకి లభించిందని అన్నారు.
"ఇప్పుడు అఖిలేశ్ యాదవ్కు ఒక అవకాశం ఉంది. తన రాజకీయ వ్యూహాన్ని జాగ్రత్తగా ముందుకు తీసుకెళ్తూ ఒవైసీని ఎదుర్కొనే బాధ్యతను ఆజం ఖాన్కు అప్పగించవచ్చు.
ముస్లింలను సమాజ్వాదీ పార్టీ కేవలం కార్యక్రమాల్లో తివాచీలు పరచడానికి మాత్రమే ఉపయోగించుకుంటోందని ఒవైసీ చాలాకాలంగా చెబుతున్నారు. ముస్లింలకు అర్హత ఉన్న అవకాశాలు, పదవులు ఇవ్వడం లేదని విమర్శిస్తున్నారు. దీనివల్ల సమాజ్వాదీ పార్టీకి చాలా నష్టం కూడా జరిగింది" అని చెప్పారు.
కొంతకాలంగా ఆజం ఖాన్ ఎదుర్కొన్న పరిణామాల కారణంగా ముస్లింలలో ఆయన పట్ల ఒక రకమైన సానుభూతి ఏర్పడిందని ఆయన అన్నారు.
ఈ సానుభూతి తమకు రాజకీయంగా ప్రయోజనం కలిగిస్తుందని సమాజ్వాదీ పార్టీ భావిస్తోంది.
"ఇప్పుడు అసెంబ్లీ ఎన్నికలు దగ్గరపడుతున్నాయి. ఆజం ఖాన్ బహిరంగ సభలు నిర్వహించినప్పుడు ప్రజల్లో ఆయనపై ఉన్న సానుభూతి మరింత పెరుగుతుంది" అని అన్నారు.
సీనియర్ జర్నలిస్ట్ సునీత కూడా ఇదే అభిప్రాయాన్ని వ్యక్తం చేశారు.
"ముస్లిం సమాజంలోని ఒక వర్గంలో ఆజం ఖాన్పై సానుభూతి ఉంది. దీని వల్ల ఆయనకు రాజకీయంగా ప్రయోజనం కలగొచ్చు" అని ఆమె అన్నారు.
"అసదుద్దీన్ ఒవైసీ, ఆజాద్ సమాజ్ పార్టీకి చెందిన చంద్రశేఖర్ ఆజాద్ కూటమి ఏర్పాటు చేసిన తర్వాత ముస్లిం, దళిత ఓట్లలో కొంత భాగం వారి వైపు వెళ్లవచ్చని అందరూ భావించారు. కానీ ఇప్పుడు ఆజం ఖాన్ విడుదలయ్యారు. ఆయన ఇకపై స్వేచ్ఛగా రాజకీయాలు చేయగలరు. బహిరంగ సభలు నిర్వహించవచ్చు, ప్రజల్లోకి వెళ్లవచ్చు, తన అభిప్రాయాలను చెప్పవచ్చు" అని అభిప్రాయపడ్డారు.

ఫొటో సోర్స్, ANI
అయితే ఒవైసీ కంటే చంద్రశేఖర్ ఆజాద్ వల్లే సమాజ్వాదీ పార్టీకి ఎక్కువ నష్టం జరిగే అవకాశం ఉందని శరత్ ప్రధాన్ అభిప్రాయపడ్డారు.
"చంద్రశేఖర్ను తమ కూటమిలోకి తీసుకోకపోవడం సమాజ్వాదీ పార్టీ చేసిన తప్పు.
చంద్రశేఖర్, అఖిలేశ్ మధ్య రెండుసార్లు సమావేశం జరగాల్సి ఉంది. కానీ కూటమి ఏర్పాటు విషయంలో చర్చలు ముందుకు సాగలేదు.
దళిత యువతలో చంద్రశేఖర్ ప్రభావం ఉంది. దీనివల్ల సమాజ్వాదీ పార్టీకి నష్టం కలగవచ్చు" అని అన్నారు.
2024ఎన్నికల్లో కూడా చంద్రశేఖర్ కొన్ని చిన్న ప్రాంతాల్లోనే అయినప్పటికీ తన ప్రభావాన్ని చూపించారు.
ఈసారి కూడా అలాంటి ప్రభావం చూపించే అవకాశం ఉందని విశ్లేషకులు భావిస్తున్నారు.
ఒవైసీ రాజకీయ ప్రభావాన్ని తగ్గించడంలో ఆజం ఖాన్ కీలక పాత్ర పోషించవచ్చని సునీత అభిప్రాయపడ్డారు. అయితే ఈసారి తన వ్యాఖ్యల విషయంలో ఆజం ఖాన్ కొంత జాగ్రత్తగా వ్యవహరించే అవకాశం ఉందని ఆమె అన్నారు.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్,ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)


























