'பெண் வயிற்றுக்குள் 13 பேனா, 5 கரண்டி, ஒரு மெழுகுவர்த்தி..' - வெளியே எடுத்த மருத்துவர் கூறியது என்ன?

ஒரு பெண்ணின் வயிற்றில் 13 பேனாக்கள், 5 மரக் கரண்டிகள் மற்றும் ஒரு மெழுகுவர்த்தி இருந்தன. அவற்றில் ஒரு பேனா 25 சென்டிமீட்டர் நீளமானது.

மருத்துவர்கள் அவை அனைத்தையும் வெற்றிகரமாக அகற்றி, அந்தப் பெண்ணின் உயிரைக் காப்பாற்றினர்.

ஆனால், இவை அனைத்தும் ஒரு பெண்ணின் வயிற்றுக்குள் எப்படி சென்றன என்பதுதான் இங்கு கேள்வி.

பொதுவாக, நமக்குப் பிடிக்காத ஏதாவது ஒன்றைச் சாப்பிட்டால் மட்டுமே கடுமையான வயிற்றுவலி அல்லது வயிற்றுப்போக்கு ஏற்படும்.

ஆனால், வயிற்றுக்குள் இத்தனை பொருட்கள் இருந்த நிலையில் அந்தப் பெண் எதிர்கொண்ட பிரச்னை என்ன?

அறுவை சிகிச்சை செய்த மருத்துவர்கள், அவற்றை வயிற்றில் இருந்து எப்படி அகற்றினார்கள் என்பதை பிபிசியிடம் தெரிவித்தனர்.

உண்மையில் என்ன நடந்தது?

விரிவாகப் பார்க்கும் போது, ஆந்திர மாநிலம் நரசராவ்பேட்டை பகுதியைச் சேர்ந்த 33 வயதான திருமணமான பெண், இடது பக்க மார்பில் கடுமையான வலி ஏற்பட்டதாகக் கூறியதைத் தொடர்ந்து, அவரது குடும்பத்தினர் அவரை பல்நாடு மாவட்டம் நரசராவ்பேட்டையில் உள்ள மாதாஸ்ரீ தனியார் மருத்துவமனையில் அனுமதித்தனர்.

மருத்துவர்கள் உடனடியாக அவருக்கு இசிஜி மற்றும் எண்டோஸ்கோபி பரிசோதனைகளை மேற்கொண்டனர்.

இசிஜி பரிசோதனையில் அனைத்தும் இயல்பாக இருந்ததாகவும், ஆனால் எண்டோஸ்கோபி பரிசோதனையின் போது அவரது வயிற்றில் பேனாக்கள், கரண்டிகள், மெழுகுவர்த்திகள் போன்ற சில பொருட்கள் இருப்பது கண்டறியப்பட்டதாகவும் மருத்துவர் ராமச்சந்திர ரெட்டி பிபிசியிடம் தெரிவித்தார்.

அவருக்கு உடனடியாக சி.டி ஸ்கேன் செய்து, அதை உறுதி செய்த பின்னர், எண்டோஸ்கோபி மற்றும் லேப்ராஸ்கோபி அறுவை சிகிச்சை செய்யத் திட்டமிட்டதாக மருத்துவர் ராமச்சந்திர ரெட்டி தெரிவித்தார்.

இந்த அறுவை சிகிச்சையின் மூலம் அனைத்து பேனாக்கள், மெழுகுவர்த்திகள் மற்றும் மரக் கரண்டிகள் அகற்றப்பட்டதாக அவர்கள் தெரிவித்தனர்.

சிறு குழந்தைகள் பயன்படுத்தும் 25 சென்டிமீட்டர் நீளமுள்ள ஒரு பேனாவால் அந்தப் பெண்ணின் வயிற்றில் துளை ஏற்பட்டது. இதனால் 'நியூமோமீடியாஸ்டினம்' (Pneumomediastinum) எனப்படும் பாதிப்பு ஏற்பட்டது.

வலி ஏற்பட்டதால் அந்தப் பெண் தங்களிடம் வந்ததாக அவர்கள் கூறினர்.

பின்னர், லேப்ராஸ்கோபி மூலம் அந்தப் பெண்ணின் வயிற்றில் இருந்த பொருட்கள் அகற்றப்பட்டதாக மருத்துவர் ராமச்சந்திர ரெட்டி தெரிவித்தார்.

மொத்தம் 13 பேனாக்கள், ஒரு மெழுகுவர்த்தி மற்றும் 5 மரக் கரண்டிகள் அகற்றப்பட்டதாக அவர்கள் தெரிவித்தனர். தற்போது அவரது உடல்நிலை சீராக இருப்பதாக அவர் கூறினார்.

இதுபோன்ற பிரச்னை பொதுவாக மனநலப் பிரச்னைகளால் பாதிக்கப்பட்டவர்களுக்கு ஏற்படும்.

மனநலப் பிரச்னை உள்ளவர்களைப் பார்த்துக் கொள்வதும், அவர்கள் மாத்திரைகளை எடுத்துக் கொள்கிறார்களா என்பதை கண்காணிப்பதும் பெற்றோரின் பொறுப்பு என்று மருத்துவர் ராமச்சந்திர ரெட்டி தெரிவித்தார்.

அறுவை சிகிச்சை செய்யப்பட்ட அந்தப் பெண், ஒரு வருடத்திற்கு முன்பு நான்கு பேனாக்களை விழுங்கியதாகவும், அறுவை சிகிச்சை செய்து அவை அகற்றப்பட்டதாகவும் சமீபத்தில் தெரிவித்தார்.

அவர் மனநலப் பிரச்னைகளால் பாதிக்கப்பட்டிருந்ததால், மனநல மருத்துவரிடம் பரிந்துரைக்கப்பட்டதாகவும், தற்போது சிகிச்சை பெற்று வருவதாகவும் மருத்துவர் ராமச்சந்திர ரெட்டி குறிப்பிட்டார்.

மன அழுத்தத்தால் பாதிக்கப்பட்ட நோயாளிகள் மட்டுமே இதுபோன்ற செயல்களைச் செய்வார்கள் என்றும் மருத்துவர்கள் விளக்கம் தந்தனர்.

25 சென்டிமீட்டர் நீளமுள்ள ஒரு பொருள் வயிற்றுக்குள் செல்வது மிகவும் அரிதானது என்றும், தனது பணி வாழ்வில் இவ்வளவு பெரிய பேனாவை ஒருவர் விழுங்கியதைப் பார்ப்பது இதுவே முதல் முறை என்றும் அவர் கூறினார்.

அந்தப் பெண் தனது தந்தையுடன் சண்டையிட்டதால், இந்தப் பொருட்களை விழுங்கியதாக மருத்துவர் கூறினார்.

எனினும், ஜீரணிக்க முடியாத தலைமுடி போன்ற பொருட்களைப் பலர் சாப்பிடுவதாகவும், இதுபோன்ற பாதிப்புகள் 'ட்ரைக்கோபீசோயர்' (Trichobezoar) என்று அழைக்கப்படுவதாகவும் ராமச்சந்திர ரெட்டி விவரித்தார்.

சில ரத்தசோகை நோயாளிகளும், உணவுக் கோளாறு உள்ளவர்களும் அரிசி மற்றும் பருப்பு போன்றவற்றைச் சாப்பிடுவதாகக் கூறுகின்றனர்.

எனினும், மனநலப் பாதிப்பு உள்ளவர்கள் மட்டுமே பேனா போன்ற பொருட்களை விழுங்குவதாக அவர் கூறினார்.

விழுங்கும்போது குடலில் துளை ஏற்படாமல் இருந்தால், குடல் அடைப்பு ஏற்பட்டு வாந்தி வரும். போல்ட் மற்றும் பேனா போன்ற கூர்மையான பொருட்கள் குடலில் துளையை ஏற்படுத்தக்கூடும்.

சிறிய பொருட்கள் மலம் கழிக்கும்போது வெளியேறிவிடும் என்று அவர் விளக்கினார். சிறு குழந்தைகள் தெரியாமல் சிறிய பொருட்களை விழுங்கினாலும் யாரிடமும் தெரிவிப்பதில்லை என்றும், அவை மலம் கழிக்கும்போது வெளியேறிவிடும் என்றும் அவர் விளக்கினார்.

குடலில் துளை ஏற்பட்டால், சில நோயாளிகளுக்கு தொற்று ஏற்பட்டு, 'செப்டிக் ஷாக்' நிலைக்குச் செல்லக்கூடும் என்றும், இது உயிருக்கு ஆபத்தை ஏற்படுத்தக்கூடும் என்றும் அவர்கள் தெரிவித்தனர்.

குண்டூரைச் சேர்ந்த மருத்துவர் சாய் கிருஷ்ணா பிபிசியிடம் கூறுகையில், இதுபோன்ற சம்பவங்கள் அவ்வப்போது நடப்பதாகவும், இதில் 90 சதவீத சம்பவங்கள் மனநலப் பிரச்னை உள்ள நோயாளிகளிடம் ஏற்படுவதாகவும் தெரிவித்தார்.

இதுபோன்ற சில நோயாளிகள் அனைத்துப் பொருட்களையும் ஒரே நேரத்தில் விழுங்குவதில்லை என்றும், சில சமயங்களில் அவர்கள் விழுங்கிய அனைத்துப் பொருட்களும் வயிற்றிலேயே தங்கிவிடும் என்றும் அவர் கூறினார்.

இந்தப் பொருட்கள் வயிற்றில் சிக்கிக்கொண்டால் மட்டுமே வலி ஏற்படும் என்றும், அவற்றை உடனடியாக வயிற்றில் இருந்து அகற்ற எண்டோஸ்கோபி மற்றும் லேப்ராஸ்கோபி போன்ற அறுவை சிகிச்சைகள் மேற்கொள்ளப்படுவதாகவும் அவர் குறிப்பிட்டார்.

சமீபத்தில், ஒரு நோயாளியின் வயிற்றில் இருந்து 20 பேட்டரிகளை அகற்றியதாக அவர்கள் தெரிவித்தனர்.

விழுங்கப்பட்ட பின்னர், இந்தப் பொருட்கள் சில நேரங்களில் பல மாதங்களுக்குப் வயிற்றிலேயே தங்கிவிடும் என்றும், வயிற்றுக்குள் சென்ற பின்னர் அவை குடலுக்குள் செல்வதில்லை என்றும் அவர்கள் கூறினர்.

அவ்வாறு சென்றால், எக்ஸ்ரே பரிசோதனை செய்து அறுவை சிகிச்சை மேற்கொள்ள வேண்டியிருக்கும்.

இதுபோன்ற சம்பவங்களில் அறுவை சிகிச்சையின் போது லேப்ராஸ்கோபி மேற்கொள்ளப்படும்.

ட்ரைக்கோபீசோயர் பாதிப்பு ஏற்பட்டால், தலைமுடி வயிற்றுக்குள் தங்கிவிடும் என்றும், அதை அறுவை சிகிச்சை மூலம் அகற்ற வேண்டியிருக்கும் என்றும் மருத்துவர் சாய்கிருஷ்ணா கூறினார்.

நரசராவ்பேட்டையில் நடந்த சம்பவத்தில், வயிற்றுக்குள் துளை ஏற்பட்டிருந்ததால், நோயாளிக்கு உடனடியாக அறுவை சிகிச்சை செய்ய வேண்டியிருந்தது என்றும், இது மிகவும் பெரிய பிரச்னையாக இருந்தது என்றும் அவர் கூறினார்.

இதுபோன்ற வழக்குகள் இதற்கு முன்பு பதிவாகியுள்ளனவா?

'டைம்ஸ் ஆஃப் இந்தியா' வெளியிட்ட செய்தியின்படி, 2025ஆம் ஆண்டு உத்தரப் பிரதேசத்தின் ஹாபூர் நகரில் உள்ள ஒரு மருத்துவமனையில் 40 வயதான ஒருவரின் வயிற்றில் இருந்து 29 ஸ்டீல் கரண்டிகள், 19 பல் துலக்கும் பிரஷ்கள் மற்றும் இரண்டு பேனாக்கள் அகற்றப்பட்டன.

அறுவை சிகிச்சைக்கு குறைந்தது ஒரு மாதத்திற்கு முன்பு அவர் காசியாபாத்தில் உள்ள போதை மறுவாழ்வு மையத்தில் அனுமதிக்கப்பட்டிருந்ததாக அந்தச் செய்தியில் தெரிவிக்கப்பட்டுள்ளது.

எனினும், மறுவாழ்வு மையத்தில் அனுமதிக்கப்பட்ட பிறகு, தன்னை யாரும் முறையாகக் கவனித்துக் கொள்ளவில்லை என்றும், தனக்கு முறையான உணவுகூட வழங்கப்படவில்லை என்றும் அந்த நபர் கூறியதாக 'டைம்ஸ் ஆஃப் இந்தியா' செய்தியில் குறிப்பிடப்பட்டுள்ளது.

கோபமும் உதவியற்ற நிலையும் ஏற்பட்டதால், தனக்குத் தானே தீங்கு விளைவித்துக்கொள்ளும் நோக்கில் இந்தப் பொருட்களை விழுங்கியதாக அந்த நபர் கூறியதாக 'டைம்ஸ் ஆஃப் இந்தியா' செய்தி தெரிவிக்கிறது.

இரானின் அஹ்வாஸ் நகரில் உள்ள இமாம் கொமேனி மருத்துவமனை மருத்துவர்கள், 2024ஆம் ஆண்டு 36 வயதான ஒருவரின் வயிற்றில் இருந்து 450-க்கும் மேற்பட்ட உலோகப் பொருட்களை வெற்றிகரமாக அகற்றியதாக தேசிய மருத்துவ நூலகம் தெரிவித்துள்ளது.

கடுமையான வயிற்றுவலி, தொடர்ந்து வாந்தி மற்றும் உணவு அல்லது திரவங்களை உட்கொள்ள முடியாத நிலை ஏற்பட்டதைத் தொடர்ந்து அந்த நபர் மருத்துவமனையில் அனுமதிக்கப்பட்டார்.

அவருக்கு மேற்கொள்ளப்பட்ட எக்ஸ்ரே மற்றும் எண்டோஸ்கோபி பரிசோதனையில், அவரது வயிற்றில் பல உலோகப் பொருட்கள் இருப்பது தெரியவந்தது.

தேசிய மருத்துவ நூலகம் வெளியிட்ட அறிக்கையின் படி, அந்த நோயாளிக்கு காஸ்ட்ரோஸ்டமி அறுவை சிகிச்சை மேற்கொள்ளப்பட்டது. அதில், 452 திருகுகள், நட்டுகள், சாவிகள், கற்கள் மற்றும் பிற உலோகப் பொருட்கள் என மொத்தம் 2,900 கிராம் எடையுள்ள பொருட்கள் அவரது வயிற்றில் இருந்து அகற்றப்பட்டன.

உணவுப் பொருட்கள் விழுங்கப்படும் போது அவற்றை வெற்றிகரமாக வெளியே எடுப்பது அரிது என்று தேசிய மருத்துவ நூலகம் குறிப்பிடுகிறது.

பொருட்களை விழுங்குவது ஒரு தீவிரமான உடல்நலப் பிரச்னையாகும். இது குழந்தைகளிடையே அதிகமாகக் காணப்படுவதாக அந்த அறிக்கையில் தெரிவிக்கப்பட்டுள்ளது.

எனினும், சில பெரியவர்களிடமும், குறிப்பாக மனநலப் பிரச்னைகள் உள்ளவர்களிடமும், சிறைச்சாலைகளிலும் இது பொதுவாகக் காணப்படுகிறது.

- இது, பிபிசிக்காக கலெக்டிவ் நியூஸ்ரூம் வெளியீடு