Trump oo dhaleeceeyay Jamhuuriga, balse wuxuu sheegay in Dimuqraadiyiintu ay qabteen 'shaqo wanaagsan'

Madaxweynaha Maraykanka Donald Trump ayaa weerar afka ah ku qaaday xubno ka tirsan Xisbiga Jamhuuriga, isla markaana qiray in Dimuqraadiyiintu ay qabteen "shaqo wanaagsan" doorashooyinkii dhexe ee Maraykanka, iyadoo ay ku guulaysteen inay la wareegaan labada gole ee Kongareeska, Golaha Senate-ka iyo Golaha Wakiillada, guul weyn oo taariikhi ah.

Qoraal uu ku baahiyay bartiisa Truth Social, Trump wuxuu dhaliilay Greg Abbott, oo ku guuldarraystay tartankii guddoomiyenimada gobolka Texas kadib markii ay ka adkaatay musharraxa Dimuqraadiga ah ee Gina Hinojosa. Trump wuxuu sheegay in Abbott uusan guuldarraysan lahayn haddii uusan "RINO noqon lahayn lixdii bilood ee ugu dambeysay", isagoo adeegsanaya erayga gaaban ee Republican In Name Only (Jamhuuri magac uun ah).

Madaxweynuhu wuxuu sidoo kale sheegay in haddii isaga laftiisu uu ku jiri lahaa warqadda codbixinta, Jamhuurigu: "Waxay ku guulaysan lahaayeen guul aad u ballaaran!"

Si kastaba ha ahaatee, Trump wuxuu sheegay inuu aqbalayo natiijooyinka doorashada. Isagoo la hadlayay wargeyska The New York Times, wuxuu yiri: "Gebi ahaanba waxaan diyaar u ahay inaan aqbalo natiijooyinka."

Hadalladiisu waxay muujinayaan inuu isku mar cambaaraynayo qaar ka mid ah saaxiibbadiisa siyaasadeed ee Jamhuuriga, isla markaana aqoonsanayo guusha Dimuqraadiyiinta iyo xaqiiqada natiijooyinka doorashada.

Isagoo la hadlayay wargeyska, Trump wuxuu intaas ku daray inuu "rajeynayo inuu la shaqeeyo" Dimuqraadiyiinta.

"Waxay u badan tahay inaan wax isku afgaran doonno," ayuu yiri.

Wareysi kale oo uu siiyay Fox News, Trump wuxuu sheegay inuu la yaabay natiijada doorashada.

"Waxaan moodayay inay si ka wanaagsan u guulaysan doonaan," ayuu yiri, isagoo ula jeeday musharraxiintii Jamhuuriga.

Wuxuu sidoo kale qiray in Dimuqraadiyiintu ay si wanaagsan u ololeeyeen.

"Dimuqraadiyiintu shaqo fiican ayay qabteen. Si adag ayay u dagaallameen," ayuu u sheegay warbaahinta.

Hase yeeshee, wuxuu ka digay in Dimuqraadiyiintu u soo diri doonaan sharciyo uu ku tilmaamay kuwo "waalan" si uu u ansixiyo, balse uu diidi doono.

"Ka dib dhowr bilood oo aan diidmo ku sameeyo, way i soo wici doonaan oo waxay odhan doonaan, 'Sideen arrimahan u meel marin karnaa?' Markaas ayaan wada shaqayn doonnaa," ayuu yiri.

Wuxuu intaas ku daray: "Waxaan haystaa awoodda diidmada qayaxan."

Dhanka kale, bartiisa Truth Social ayuu ku daabacay sawirka koofiyad cas oo la mid ah kuwa caanka ku ah hal-ku-dhiggiisa "Make America Great Again (MAGA)", balse markan ay ku qoran tahay erayga "VETO". Tani waxay u muuqatay fariin muujinaysa awooddiisa uu ku hor istaagi karo sharciyada uu ansixiyo Kongareeska Maraykanka.

Trump ayaa qiray in khilaafka Iran uu qayb ka qaatay guuldarrada.

Markii weriye ka tirsan Fox News uu weydiiyay casharrada laga bartay natiijooyinka doorashada, wuxuu ku jawaabay: "Waxaan u maleynayaa in qayb ka mid ah ay ahayd Iran."

Hase yeeshee, wuxuu intaas ku daray in waxa dhab ahaantii saamaynta ku yeeshay codbixiyayaasha ay ahayd saameynta dagaalku ku yeeshay qiimaha shidaalka ee Maraykanka.

"Dadku way taageersan yihiin waxa aan ka sameynayo Iran, laakiin waxay u badan tahay inaysan diyaar u ahayn cawaaqibka muddada gaaban ee ka dhasha bixinta lacag badan oo shidaalka ah. Taas waan fahmayaa."

Trump wuxuu sidaas ku muujiyay in, inkastoo uu aaminsanaa in dad badani taageersanaayeen siyaasaddiisa ku aaddan Iran, haddana kororka qiimaha shidaalka iyo culayska dhaqaale ee ka dhashay khilaafka ay sababeen in qaar ka mid ah codbixiyayaashu ka jeestaan musharraxiinta Jamhuuriga.

Markii khasaaraha Jamhuuriga uu bilaabay inuu sii kordho, Trump ayaa ka falceliyay isagoo ku qoray bartiisa Truth Social inuu doonayo inuu noqdo "faalleeye siyaasadeed, dhinacyada wanaagsan iyo kuwa xunba, si uu uga hadlo sababaha musharraxiintani u guulaysteen ama u guuldarraysteen."

Waxa uu marka hore weeraray Abbott, kaas oo guuldarradiisa Texas ka dhigtay markii ugu horreysay in musharrax Dimuqraadi ahi ku guulaysto kursiga guddoomiyaha gobolka muddo ka badan 30 sano.

"Haddii Greg Abbott, Guddoomiyaha Gobolka Texas, aanu noqon lahayn RINO lixdii bilood ee ugu dambeysay noloshiisa siyaasadeed, ma uu guuldarraysan lahayn," ayuu Trump ku qoray Truth Social. "Wuxuu ku noqday habkiisii hore, mana ahayn mid qurux badan!"

Ereyga "RINO" (Republican In Name Only) waxaa xubnaha xisbiga Jamhuuriga u adeegsadaan dadka loo arko inay daacadnimo yar u hayaan xisbiga.

Trump ayaa sidoo kale iska fogeeyay qaar ka mid ah musharraxiintii Jamhuuriga ee doorashada ku tartamay, isagoo CBS News u sheegay: "Mararka qaar codbixiyayaashu ma jeclayn musharraxiinta, mararka qaarna musharraxiintaasi saaxiibbaday ma ahayn."

Waxa uu intaa ku daray: "Si fudud ayaanu u guulaysan lahayn haddii magacaygu warqadda codbixinta ku jiri lahaa. Laakiin anigu kuma aanan jirin."

Sidoo kale waxa uu si kulul u weeraray Fox News, isaga oo qoraallo dhowr ah ku baahiyay Truth Social. Wuxuu ku eedeeyay warbaahinta inay "waqti badan ku bixisay" tebinta Dimuqraadiyiinta, wuxuuna sheegay in hoos u dhaca qiimeyntooda daawadayaasha uu yahay mid "aad u hooseeya, mana aha aniga dartiis, balse sababtu waa inay iga soo horjeedaan mar kale!"

Trump waxaa kale oo uu ka carooday in Fox News ay wareysi la yeelatay duqii hore ee Magaalada New York, Bill de Blasio, oo uu ku tilmaamay "duqii ugu xumaa taariikhda Magaalada New York."

"Wuxuu magaalada uga tagay isagoo fadeexad ku baxay, waxyeelladii uu geystayna lama qiyaasi karo," ayuu Trump ku qoray Truth Social.