Xildhibaanadda xisbiga Dimuqraadiga, Ilhaan Cumar, ayaa markii shanaad ku guuleysatay kursiga Aqalka Wakiillada Mareykanka, kaddib markii ay musharraxa xisbiga Jamhuuriga, John Nagel, kaga adkaatay doorashadii degmada 5-aad ee gobolka Minnesota, fiidnimadii Talaadada, sida ay saadaalisay warbaahinta CBS News oo ay bahwadaag yihiin BBC-da.
Ilhaan Cumar ayaa degmadaas, oo ka kooban magaalada Minneapolis iyo xaafadaha ku hareeraysan, matalaysay tan iyo sannadkii 2019-kii. Waa degmada ugu taageerada badan xisbiga Dimuqraadiga ee gobolka Minnesota iyo guud ahaan dalka Mareykanka.
Waxay guul weyn ka gaartay doorashadii hordhaca ahayd ee bishii Agoosto la qabtay, halkaas oo ay kaga adkaatay Julie T. Le, Abena McKenzie, Latonya Reeves iyo Nate Schluter. Xisbiga Dimuqraadiga ee Minnesota (DFL) ayaa sidoo kale taageeray musharraxnimadeeda shirweynihii gobolka ee bishii May dhacay.
Ilhaan Cumar ayaa muddo dheer bartilmaameed u ahayd hadallada Madaxweyne Donald Trump ee ka dhanka ah muhaajiriinta.
Kadib markii markii ugu horreysay loo doortay Kongareeska, Trump ayaa sheegay inay tahay inay “ku laabato” dalkeedii hooyo. Waxa uu sidoo kale ku tilmaamay “qashin”, isagoo sheegay in baaritaan lagu sameeyo.
Bishii hore, guriga Ilhaan Cumar ee magaalada Washington DC ayaa waxaa baaritaan ku sameeyay saraakiil ka tirsan Waaxda Amniga Gudaha ee Mareykanka, iyadoo baaritaanku u muuqday mid la xiriira dukumentiyada socdaalka ee aabbaheed ee geeriyooday uu u gudbiyay iyada oo carruur ah.
Ilhaan Cumar ayaa baaritaanka iyo weerarka gurigeeda ku tilmaantay “ku takri-fal awoodeed oo arrin fool xun, iyo tallaabo aan hore loo arag oo muujinaysa in hay’adaha fulinta sharciga federaalka loo adeegsanayo bartilmaameedsiga dadka siyaasiyan ka soo horjeeda”.
Dhanka kale, John Nagel oo hore uga tirsanaa ciidanka ilaalada waddooyinka ee gobolka Minnesota, ayaa telefishinka WCCO u sheegay in barnaamijkiisa doorashada uu diiradda saaray xoojinta tallaabooyinka lagula dagaallamayo musuqmaasuqa, ilaalinta barnaamijyada Medicare iyo Medicaid, dib-u-habaynta sharciga daryeelka caafimaadka ee Affordable Care Act, casriyeynta amniga iyo tiknoolajiyadda xuduudaha, iyo ilaalinta awoodda difaaca qaranka Mareykanka.
