Zari yatangaje ko yatandukanye n'umugabo we Shakib nyuma y'imyaka itanu bashakanye

Zarinah Hassan, umucuruzi akaba n'umugore wo muri Uganda uzwi cyane mu myidagaduro mu karere yatangaje ko yatandukanye n'umugabo we Shakib Lutaaya nyuma y'imyaka itanu bashakanye.

Zari yashyize itangazo kuri Instagram rivuga ko bombi bumvikanye kuri icyo cyemezo kubera "ibibatandukanya bidashobora kungwa".

Shakib nta cyo aravuga ku itangazo ryasohowe na Zari.

Zari na Shakib ni 'couple' yatangiye gukurikiranwa n'abantu benshi kuva batangaza umubano wabo mu 2022 nyuma y'uko Zari yari amaze gutandukana n'umushoramari Geofrey Kimera uzwi muri Uganda nka GK Choppa.

Mu 2023, Zari na Shakib bashyingiranywe mu muhango wa Kisilamu wabereye i Pretoria muri Afurika y'Epfo, igihugu Zari atuyemo akanakoreramo 'business'.

Ubukwe n'urugo rwabo byakuruye amaso ya benshi kuko Zari yari amaze igihe atandukanye n'uwari umukunzi we, icyamamare muri muzika Diamond Platnumz wo muri Tanzania, banafitanye abana babiri.

Mu 2024, Zari na Shakib bagaragaye babwirana nabi nyuma y'uko habonetse amashusho atarashimishe Shakib, yerekana Zari na Diamond mu gufata amashusho ya filimi ya serie ya 'Young, Famous & African' ica kuri Netflix kandi bombi babonetsemo.

Zari yaje kwemera ko icyo kintu cyateye ikibazo mu rushako rwe na Shakib umushoramari akaba n'umukinnyi w'iteramakofe.

Amakuru y'ibinyamakuru muri Uganda avuga ko icyo gihe bombi batandukanye by'igihe gito mbere yo kongera bakiyunga.

Zari uzwi cyane nka "The Boss Lady", mbere yashakanye na Ivan Semwanga, umushoramari wari ukomeye muri Uganda, batandukana mu 2013 babyaranye abahungu batatu, Semwanga yaje gupfa mu 2017 azize indwara y'umutima.

Nyuma yo gutana na Semwanga, Zari yakundanyeho n'umukinnyi wa basketball Farouk Sempala mbere y'uko yinjira mu rukundo rwavuzwe cyane n'umuhanzi Diamond Platnumz banabyarana abana babiri; mbere yo gutandukana mu 2018.

Uretse kuba azwi cyane mu ishoramari rishingiye ku myidagaduro na filimi, Zari ni umushabitsi mu bucuruzi bw'ibikoresho by'ubwiza unfite ishuri ryigisha imyuga muri Afurika y'Epfo, nk'uko yagiye abitangaza.

Mu itangazo ryo gutandukana na Shakib, Zari ntabwo yavuze ibirambuye ku gitumye batandukana. Gusa avuga ko bazakomeza kuba inshuti mu rugendo rwabo buri umwe ukwe.