Lamine Yamal yiginye intsinzi y'Igikombe c'Isi ari kumwe na murumunawe yahimbaye abakunzi b'umupira w'amaguru

Umukinyi w'umupira w'amaguru w'umunya Espagne Lamine Yamal kumbure ni we yari kwigina intsinzi yIgikombe c'isi. Yamara mu kwigina iyo ntsinzi, murumunawe Keyne ni we asa n'uwakurikiranywe na benshi kurusha Yamal.

Uwo mwana w'imyaka itatu yaramenyekanye yongera aravugwa cane inyuma y'uko amasanamu y'ukuntu yigina anezerewe rwose intsinzi ya Espanye ya 1-0 kuri Argentine, ahanahanywe ku mbuga ngurukanabumenyi na nyagiro ku musi w'Imana.

Mu gihe Lamine Yamal, imyaka 19 gusa, yagiye akora ibidasanzwe mu gufasha Espagne gutwara Igikombe c'Isi, amaso y'abantu yaciye ahindukira yerekeza kuri mutoya wiwe kubera ukuntu yahimbaje cane ari ku ruhande rw'ikibuga.

Kuva ku kungene yasohoye ururimi kuri 'écran' nini, gushika ku kuntu yashigikiye mukuruwe, Keyne yashimagijwe n'abakunzi b'umupira w'amaguru aho bamufashe nka kimwe mu vyamamare bitari vyitezwe mu gikombe c'isi co mu 2026.

Espagne yatahukanye intsinzi mu rukino rutari rworoshe rwasavye ukwihangana, aho yatsinze Argentine igitsindo kimwe ku munota ugira 106, ku kibuga ca New York New Jersey Stadium.

Iyo ntsinzi ya kabiri ya Espagne mu Gikombe c'Isi yatumye Lamine Yamal aba umukinyi akiri muto kurusha abandi bose mu mateka ashoboye gutwara igikombe c'umugabane wa Buraya n'igikombe c'isi.

Mutoya wiwe Keyne yabaye umuntu adahara amwama hafi haba mu kibuga canke hanze yaco - kenshi agaragara mu mashusho Lamine Yamal ashira kuri TikTok, kandi yigaruriye imitima y'abakunzi b'umupira w'amaguru bo hirya no hino kw'isi.

Uwo mwana w'imyaka itatu, asa kandi n'uwipfuza guca mu makanda ya mukuruwe, ni umuhungu wa mama wa Lamine Yamal, Sheila Ebana.

"Birankora ku mutima iyo mbonye murumunanje anezerewe gutyo, nkabona na mama hamwe n'abagenzi banje babayeho mu buzima bahora bipfuza".

"Murumunanje ni umuntu ahambaye mu buzima bwanje. Ndamukunda rwose. Numva ari nk'aho ari umwana wanje."

Mu kibonwa nk'ikimenyetso c'uguhererekana uburongozi hagati y'urunganwe rwa kera n'urw'ubu, Lamine Yamal yarahanganye ku ncuro ya mbere n'icamamare mu mupira w'amaguru ca Argentine, Lionel Messi, mu rukino rw'igice ca nyuma rw'Igikombe c'Isi.

Abo bombi bari barigeze guhura imyaka itari mike imbere y'aha, mu 2007, igihe Messi, agifise imyaka 20, yafotorwa ateruye kandi ariko yoza akayoya - Lamine Yamal - inyuma y'uko mama wa Yamal atsinze ihiganwa ryatumye aronka akaryo ko guhura n'umukinyi wa mbere wo mu murwi Barcelona.

Imbere y'urukino rwa nyuma rwo ku wa Mungu, Messi, ubu afise imyaka 39, yavuze ko Lamine Yamal ari "umwe mu bakinnyi beza kuruta abandi" muri iki gihe.

Yongeyeko ati:

"Ni umukinyi adasanzwe - icamamare ku rwego rw'isi. Afise imyaka 19 gusa kandi aracafise urugendo rurerure mu mwuga wiwe. Ndamwipfurije ivyiza vyose, ariko tuzokora ibishoboka vyose kugira ntatware igikombe kuri iyi ncuro."

Igihe umuhagarikizi yavuza ifirimbi irangiza urukino, ku ntsinzi ya Espagne, Messi na Yamal bagaragaye mu kibuga bariko barahoberana.