Indege ya Emirates yagushije inda igitaraganya i Dubai

Indege y'isosiyete Emirates yari ivuye mu Buhinde yagushije inda igitaraganya irimo kugwa ku kibuga cy'indege cy'i Dubai ( Dubai International Airport).

Abantu bose 300 bari bayirimo babashije gusohoka muri iyo ndege yarimo yaka umuriro ari bazima.

Iyo ndege bisa nkayo yagwiriye inda yayo kandi amashusho yerekanye umwotsi mwinshi w'umukara uzamuka mu kirere.

Icyabiteye ntabwo cyari cyamenyekana.

Iyo ndege yo mu bwoko bwa Boeing 777 yari ivuye mu ntara ya Kerala mu Buhinde yerekeza i Dubai.

Ibitangazamakuru bya leta byavuze ko abagenzi bose bari muri iyo ndege batabawe bakayisohokamo ntawe ukomeretse.

Isosiyete ya Emirates ivuga ko muri iyo ndege harimo abagenzi 282 n'abakozi b'indege 18 bose bafite ubwenegihugu burenze 20.

Ariko ngo abenshi ni abahinde.

Urebye ni igitangaza kubona ntawakomeretse ukurikije ukuntu indege yangiritse.