Diwrnod cyntaf Eisteddfod Genedlaethol yr Urdd Ynys Môn 2026
Yr Eisteddfod eleni yn saith diwrnod am y tro cyntaf wrth i fwy gystadlu a galw am fwy o gystadlaethau
Y pwyllgor gwaith wedi cyrraedd y targed ariannol o £380,000
Cystadlaethau i Ddysgwyr, Dawnsio Disgo ac ADY yw'r prif rai ddydd Sadwrn - y Prif Weithredwr, Sian Lewis yn dweud ei bod yn bwysig bod dysgwyr yn "rhan allweddol o daith yr Urdd a'r Eisteddfod".
Prif seremoni'r dydd yw cyflwyno Medal y Dysgwyr ar gyfer pobl ifanc 10–19 oed, a Medal Bobi Jones ar gyfer dysgwyr rhwng 19 a 25 oed
Penodi pedwar llysgennad newydd i ysbrydoli mwy o bobl i ddysgu, defnyddio a mwynhau'r Gymraeg
Ar draws yr ynys mae nifer o bentrefi a threfi wedi bod wrthi yn ddygn yn paentio'n goch, gwyn a gwyrdd.
Ffynhonnell y llun, Llun cyfrannyddBryngwran
Ffynhonnell y llun, Llun cyfrannyddStar a Phenmynydd
Ffynhonnell y llun, Llun cyfrannyddArdal Bryngwran
Ffynhonnell y llun, Llun cyfrannyddBodffordd
Eisteddfod yr Urdd
Prif seremoni'r dydd yw cyflwyno Medal y Dysgwyr ar gyfer pobl ifanc 10–19 oed, a Medal Bobi Jones ar gyfer dysgwyr rhwng 19 a 25 oed.
Nod y ddwy gystadleuaeth yw gwobrwyo unigolyn sydd:
Ffynhonnell y llun, Urdd Gobaith CymruJoe Morgan o Gaerdydd enillodd Fedal Bobi Jones yn Eisteddfod yr Urdd 2025
Ffynhonnell y llun, Urdd Gobaith CymruLloyd Wolfe o Gaerdydd oedd enillydd Medal y Dysgwyr yn 2025
Ffynhonnell y llun, Urdd Gobaith CymruMistar Urdd a'r dyn a'i greodd - Wynne Melville Jones
Does yna'r un 'Steddfod yn gyflawn heb ymweliad gan Mistar Urdd.
Eleni fe ddathlodd ei ben-blwydd yn 50 a bu cryn ddathlu ar draws Cymru.
Ffynhonnell y llun, Casgliad y WerinMistar Urdd flynyddoedd yn ôl gyda phlant ifanc
Ar 20 Chwefror, 1976, y daeth y cymeriad bach coch, gwyn a gwyrdd i fodolaeth, ac mae nawr wedi bod yn ffefryn gyda phlant Cymru ers hanner canrif.
Ffynhonnell y llun, Getty ImagesMistar Urdd gyda Sage Todz yn Stadiwm Dinas Caerdydd
Ac ydy mae e wedi cyrraedd Ynys Môn!
Ffynhonnell y llun, Yr UrddMr Urdd yng nghae Sioe Môn, lleoliad yr eisteddfod eleni
Eisteddfod yr Urdd
Esa Hankin o Ysgol Bro Idris Meirionnydd yw'r enillydd cyntaf eleni.
Fe enillodd e am adrodd 'Amser Gwely' yn y gystadleuaeth Llefaru Unigol Bl. 2 ac iau i Ddysgwyr.
Ac roedd e wrth ei fodd!
Mae Lucy yn edrych ymlaen i wisgo medal aur Emma Finucane
Un sy'n edrych ymlaen yn arw at gystadlu yn yr Eisteddfod eleni yw Lucy, disgybl ym mlwyddyn pedwar, Ysgol y Model, Caerfyrddin.
Dywedodd ei bod yn "gwneud popeth! Y gân actol, Mistar Mostyn, y cerdd dant, heini a'r ymgom".
Ar gyfer y gystadleuaeth llefaru unigol i ddysgwyr, mae Lucy am wisgo medal go arbennig o gwmpas ei gwddf – medal aur Pencampwriaeth y Byd a enillwyd gan un o gyn-ddisgyblion yr ysgol, Emma Finucane.
Mae Lucy yn edrych ymlaen i wisgo medal go arbennig wrth gystadlu
Mae teulu dyn ifanc o Sir Gaerfyrddin wedi diolch i'r Urdd am gynnig cystadleuaeth newydd yn yr Eisteddfod eleni i bobl ifanc ag Anghenion Dysgu Ychwanegol.
Wedi bod yn rhan o Aelwyd Cynwyl Elfed ers yn 12 oed, dyma fydd y tro cyntaf y bydd Sion Davies yn medru cystadlu'n unigol mewn categori sy'n addas ar ei gyfer.
Mae'r gystadleuaeth 'Perfformiad unigol dan 25 i ddisgyblion ysgolion/Unedau ag Anghenion Dysgu Ychwanegol' yn un o nifer o gystadlaethau newydd sydd yn rhan o'r ŵyl eleni.
Daw hyn wrth i'r ŵyl ymestyn i saith diwrnod am y tro cyntaf.
Mae Sion Davies, 20, wedi bod wrth ei fodd yn dawnsio a chystadlu gydag Aelwyd Cynwyl Elfed ers yn ifanc
Bellach yn 20 oed mae Sion Davies wedi bod wrth ei fodd yn dawnsio a chystadlu gydag Aelwyd Cynwyl Elfed ers yn ifanc.
Gyda chystadlaethau newydd yn rhan o'r Eisteddfod eleni, bydd y dyn ifanc yn medru cystadlu'n unigol am y tro cyntaf - profiad mae e'n edrych ymlaen yn arw ar ei gyfer.
"Fi'n barod. Dim fi yn nerfus" meddai, "Fi'n barod!"
Gyda'r gystadleuaeth yn rhoi rhyddid i'r unigolyn berfformio mewn unrhyw gyfrwng, mae Sion wedi penderfynu clocsio.
"Nes i ddisgyn oddi ar ffens dair wythnos yn ôl," meddai Isabelle, o Ysgol Creigiau, Caerdydd felly'n anffodus fydd hi methu â dawnsio disgo am sbel....ond yn lwcus iawn cystadlu yn y llefaru mae hi yn yr Eisteddfod eleni!
Mae disgyblion Ysgol Bae Baglan, Port Talbot, wedi gorfod teithio dipyn pellach eleni o'i gymharu efo 'Steddfod Margam y llynedd - oedd ar eu stepen drws. Maen nhw yma i gystadlu yn y grŵp llefaru.
Dyma Mimi ac Evie o'r Fenni wrth eu boddau yn yr ardal syrcas ar y maes! Pwy a ŵyr - a welwn ni nhw'n meistroli sgiliau newydd?
Aria a Non o Ysgol Maenofferen, Blaenau Ffestiniog, yn barod i gystadlu yn y dawnsio disgo pâr.
I un ysgol cyfrwng Saesneg o Gaerfyrddin, sydd wedi bod yn cystadlu ers dros ugain mlynedd, mae'r newid agwedd at ddysgwyr sydd wedi bod yn ystod y blynyddoedd diwethaf i'w groesawu.
Mae Ysgol y Model wedi bod yn cefnogi Eisteddfod yr Urdd ers ugain mlynedd a rhagor.
Mae'r ysgol yn un cyfrwng Saesneg a dywed y pennaeth cynorthwyol, Mrs Debi Deacon, fod yr Eisteddfod yn llwyfan anhygoel i ddangos i'w disgyblion fod y Gymraeg yn "iaith fyw".
"'Da ni'n teimlo'n gryf iawn i roi pob cyfle 'da ni'n gallu i'r plant a ma' Steddfod yr Urdd wedi bod yn rhan huge o'n hysgol ni ers blynyddoedd bellach."
Mae pennaeth cynorthwyol Ysgol y Model, Debi Deacon, yn credu bod yr Eisteddfod yn llwyfan anhygoel i ddysgwyr
"Dwi'n teimlo bod y plant yn cael y cyfle i weld yr iaith Gymraeg fel rhywbeth byw, rhywbeth sy'n cael ei ddefnyddio nid yn unig mewn dosbarth, ond mae'n cael ei ddefnyddio mewn lle hwyliog, cystadleuol.
"Mae'n fwy na chyfle i siarad yr iaith, a dwi wedi cael llawer iawn o blant yn diolch am y cyfle ac maen nhw wedi cofio am y profiad gydol eu bywyd," ychwanegodd.
Mae disgyblion Ysgol y Model yn edrych ymlaen i gystadlu yn yr Eisteddfod
Mae criw Ysgol Prendergast, Hwlffordd yn eu hetiau arbennig yn barod i gystadlu yn y parti unsain pnawn 'ma.
Dyma Olivia, sy'n 9 oed o Gaernarfon yn mwynhau gwisgoedd y ffilm Madfabulous ar stondin Into Film Cymru
Eisteddfod yr Urdd
Mae’r prif seremonïau fel a ganlyn:
Dydd Sadwrn, Medal y Dysgwyr a Medal Bobi Jones;
Dydd Llun, Ysgoloriaeth yr Artist Ifanc a’r Fedal Gelf;
Dydd Mawrth, Y Fedal Gyfansoddi;
Dydd Mercher, Y Fedal Ddrama;
Dydd Iau, Y Gadair;
Dydd Gwener, Y Goron.
Nid pobl yn unig sydd ar y Maes... mae ambell un arall hefyd wedi cyrraedd ac yn denu cryn sylw!
Mae'r gwaith celf ar y maes wastad yn boblogaidd, gyda phobl yn gwerthfawrogi sgiliau ieuenctid plant a phobl ifanc.
Mae Alaw (chwith), Rhian ac Ifan o Aberystwyth yn mwynhau eu cinio ar y maes ac maen nhw’n edrych ymlaen at ddod yn ôl i gystadlu ddydd Mawrth, Mercher ac Iau!
Mae Sara a Sienna o Aberystwyth wedi bod yn cystadlu yn y ddawns Amlgyfrwng yn barod a nawr yn gallu ymlacio.
Alaw (chwith), Rhian ac Ifan
Sara a Sienna
Cafodd y chwaraewr rygbi George North ei fagu ar Ynys Môn, ond mae bellach yn byw yn Ffrainc gyda Becky ei wraig, a’u dau fab bach, Jac a Tomi.
Mae George wedi ennill 121 cap dros Gymru, ac wedi chwarae i dimau y Scarlets, y Gweilch ac Aix en Provence, heb anghofio am ei dîm cyntaf, Llangefni.
Bu’n cystadlu ar y dawnsio gwerin yn yr Urdd pan oedd yn 10 oed ond mae’n cyfaddef nad yw wedi dawnsio ers hynny – er bod y profiad wedi ei helpu i ddawnsio ar y cae chwarae!
Mae’n teimlo ei bod yn fraint ac yn anrhydedd cael bod yn Llywydd y Dydd yn yr Eisteddfod, a chael bod yn rhan o ddathlu popeth Cymraeg.
Ffynhonnell y llun, Getty ImagesY daith i'r maes
Ein gohebydd Liam Evans wnaeth ffilmio'r wibdaith yma o'r tir mawr dros Bont Britannia i'r Maes
Mi fydd Clwb Dawns Lowri yn cystadlu am 17:00 y prynhawn yma ond gydag 18 o aelodau yn gorfod cael eu colur a'u gwallt wedi'u sortio mae'r gwaith paratoi yn dechrau nawr!
