N kò kú o, ń kò sì ya Oloolu, àlàyé rèé lórí bí ìṣẹ̀lẹ̀ náà ṣe wáyé - Wasilat

Wasilat, ti fidio rẹ gba ori ayelujara kan pe o se fidio Oloolu sita, to si pin si ori ayelujara ti fesi sita nipa isẹlẹ naa.

Bẹẹ ba gbagbe, a ti mu iroyin wa fun yin pe Wasilat ni awọn idile Oloolu ni Ode Aje nilu Ibadan se etutu fun, wọn fa ori rẹ, da ẹjẹ ewurẹ le lori lati re iku kọja lori rẹ.

Ọpọ eeyan si lo ti n bu ẹnu atẹ lu igbesẹ ti Wasila gbe naa, ti wọn si n kede kiri pe obinrin naa ti jade laye, eyi to ti gbalẹ lori ayelujara bayii.

Bi o tilẹ jẹ pe BBC News Yoruba de ọdọ Wasila, ti a fidi rẹ mulẹ pe ko ku, o si wa laaye, ti a si fẹ ko salaye ẹnu rẹ nipa isẹlẹ naa amọ o kọ lati sọ ohunkohun.

Sugbọn Wasilat ti wa sọrọ lori redio Lagelu FM nilu Ibadan, to si ni isẹlẹ naa ko ri bi gbogbo aye se n polongo rẹ.

"Ko si Oloolu nibẹ, ti mo si se fidio awọn Amotekun atawọn eeyan to duro, mo wa gbe sori ayelujara TikTok"

Ninu ọrọ rẹ, Wasilat fesi si ahesọ ọrọ to n gbalẹ kiri pe oun ti jade laye, to si ni ẹni to ba kede pe oun ti ku, maa se ara rẹ ni.

"Ọlọrun ma jẹ ka ri akoba ni, emi ko ya Oloolu o, Ọjọbọ to kọja ni Oloolu kọja ni adugbo Atolu si Ọrẹmeji.

Mo lọ si sọọbu, amọ n ko silẹkun, mo ri awọn eeyan lọọkan, ti wọn si gbe ọkọ ikọ alaabo Amotekun si ẹgbẹ kan.

Koda, ko si Oloolu nibẹ, ti mo si se fidio awọn AMotekun yẹn, mo wa gbe sori ayelujara TikTok.

Amọ awọn eeyan ni ki n lọ pa fidio naa rẹ, mo si se bẹẹ.

Amọ irọlẹ ọjọ keji ni wọn wa ba mi ni sọọbu, wọn ni mo ya fidio Oloolu, awọn ọlọpaa si wa mu mi.

Awọn ọlọpaa ko ni mi lara, wọn ko bu mi, wọn kan fi mi si ahamọ no."

"Lati agọ ọlọpaa ni wọn ti mu mi lọ sile Oloolu ni Odeaje, wọn ni wọn fẹ se oro fun mi ni, n ko ri Oloolu"

Nigba to n salaye idi ti wọn se se etutu fun, Wasilat ni se ni awọn eeyn kan de, ti wọn si wa gba oun silẹ ni ahamọ ọlọpaa, pe wọn ti yanju ọrọ naa.

"Wọn mu mi lọ sile Oloolu ni Odeaje, wọn ni wọn fẹ se oro fun mi ni.

Wọn ni ki n ra ẹran ati asọ pupa, wọn si se oro fun mi tori pe ẹnu araye ni ẹbọ.

Emi ko ri Oloolu o, koda, n ko to bẹẹ."

Kii ṣe iroyin tuntun mọ pe eto ayẹyẹ ọdun Eegun Oloolu ti waye niluu Ibadan, ipinẹ Oyo ti waye, o si ti kọja lọ.

Ṣugbọn kaka ki awọn eeyan maa sọ pataki ohun to ṣẹlẹ ati idagbasoke to waye nibi ayẹyẹ naa, ọrọ ọdọmọbinrin kan ti wọn pe ni Wasila, ẹni to lọ ṣe fọnran eegun Oloolu, to si gbe e sori ayelujara ni awọn eeyan n sọ bayii.

Ọjọbọ, ọsẹ to kọja ni ayẹyẹ naa waye, gẹgẹ bo ṣe maa n waye lọdọọdun, ti gbogbo awọn mọlẹbi ati afẹnifẹre idile naa si peju lati kopa.

"Wasilat gbe fidio Oloolu sori ayelujara ti Tiktok, to si jẹ ki gbogbo aye mọ pe oun ti lọ wo eegun ti wọn sọ pe obinrin ko gbọdọ wo"

Gẹgẹ bi a ṣe gbọ, wọn ni Wasila lo mura bi ọkunrin, to si lọ si oju ferese ibi ti eegun naa wa, lasiko ti wọn n mura fun n lọwọ lati wo o.

Kii ṣe pe Wasila lọ wo eegun Oloolu yii nikan, o tun fi ẹrọ ibanisọrọ rẹ ṣe fọnran eegun naa ninu ile to wa, ṣaaju ko to di pe o jade sita.

Awọn to ri Wasila layika ko mọ pe obinrin ni, pẹlu bo ti ṣe mura bi ọkunrin, lati fi tan awọn eeyan jẹ, ko le ba a mu erongba rẹ ṣẹ.

Wọn ni bo ṣe ya fọnran naa tan, lo kuro nibẹ, to si gba ile rẹ lọ.

Kete to ti dele, lo ti gbe foonu rẹ, to si lọ sori ikanni ayelujara ti Tiktok lati ṣafihan akasilẹ fọnran to ti ṣe, to si jẹ ki gbogbo aye mọ pe oun ti lọ wo eegun ti wọn sọ pe obinrin ko gbọdọ wo.

Wasila ni wọn lo sọ lori ayelujara pe irọ lasan ni wọn n gbe kaakiri wi pe obinrin ko gbọdọ wo eegun naa, ati pe ko sohun to jọju ninu eegun ọhun.

Bi awọn kan ṣe n gbe lẹyin Wasila nipa igbesẹ rẹ lati tako aṣa ati iṣẹṣe, bẹẹ lawọn miran n sọ pe ko yẹ ko ṣe bẹẹ nitori pe aṣa Yoruba ṣi wa nibẹ, ko si le parẹ.

Kí ló ṣẹlẹ̀ sí Wasila?

Ọrọ Yoruba to sọ pe "ẹni to ba ṣe ohun ti ẹnikan ko ṣe ri, oju rẹ yoo ri ohun ti ẹnikan ko ri ri", lo ṣẹlẹ gẹlẹ pẹlu atubọtan to koju ọmọbinrin ti wọn n pe ni Wasila yii.

Ko ju bii wakati meloo lọ, ti wọn sọ pe Wasila bẹrẹ sii ri nnkan oṣu rẹ, ti ẹjẹ si n da loju ara rẹ.

Ẹjẹ naa ni wọn lo da debi wi pe ko le mu mọra mọ, eyi ti wọn lo jẹ ko tete ronu wi pe o ṣee ṣe ko jẹ eegun Oloolu toun lọ wo, lo n fiya jẹ oun, to si ṣee ṣe koun gbabẹ sọda sọrun alakeji.

Loju ẹsẹ ni wọn lo ti gbera lọ si agboole Oloolu yii, lati ṣalaye ohun to ṣẹlẹ fun wọn, ti wọn si lo n bẹbẹ pe ki wọn foju aanu wo oun.

Kí làwọn etutu ti Olóòlù ṣe fún Wasila tumọ si?

BBC Yoruba gbọ pe ọrọ abuku lawọn olori ile Oloolu naa kọkọ bẹrẹ sii sọ si Wasila, nigba to jẹwọ bo ṣe tapa si aṣa ati iṣẹṣe wọn.

Wọn ni ki Wasila lọ bẹrẹ sii gbe ẹru kadara rẹ, nitori pe oun funra rẹ lo ṣokunfa bo ṣe fa gọngọ si ara rẹ lọrun.

Pẹlu ẹbẹ ni wọn sọ pe awọn agbaagba ilẹ eegun Oloolu yii fi gba lati ṣetutu fun Wasila, lati le ra ẹmi rẹ pada saye.

Ninu fọnran to n kaakiri ori ayelujara, eyi to tẹ BBC lọwọ, la ti ri bi wọn ṣe mu Wasila jade ninu ile kan pẹlu ewurẹ ti wọn gbe kọ ọ lọrun jade.

Lẹyin eyi ni wọn mu lọ sibi to jokoo si, ti iya rẹ si ti bẹrẹ sii fa irun ori rẹ kodoro, ko to di pe wọn pa ewurẹ, ti wọn si fi ẹjẹ rẹ wẹ fun un lati ori delẹ.

Yatọ si eyi, wọn tun gbe asopọ ikaraun igbin kọ ọ lọrun lasiko ti gbogbo etutu yii n lọ lọwọ, gẹgẹ bi ilana aṣa lati ra ẹmi rẹ pada.

Ọkan lara awọn ọmọ idile naa sọ fun BBC Yoruba pe, ka ni wọn ko tete ṣe etutu naa fun Wasila ni, ko si iyemeji pe yoo ta teru nipa lẹyin ọjọ keje to foju kan eegun ọhun.

Wọn ni kii ṣe pe Wasila ri eegun ọhun oju, bi ko ṣe pe aṣọ lasan lo ri, to ro pe oun ri i soju, ati pe kani o foju rii ni, ko si bo ṣe fẹẹ ṣe e, ti yoo mu ọjọ naa jẹ ko to fi aye silẹ.

Wasila sọ̀rọ̀ lẹ́yìn ètùtù náà

Lẹyin gbogbo etutu ti awọn olori ile Oloolu ṣe fun Wasila, ni wọn bẹrẹ sii fọrọ wa a lẹnu wo, nipa idi to fi ṣe bẹẹ, ati ohun ti oju rẹ ri.

"Mo lo ṣe fọnran Oloolu ni, latigba naa ni ara mi ko ti balẹ.

Ẹjẹ n da lara mi, ẹjẹ naa ko si da lara mi,"Wasila sọ bẹẹ.

Lẹyin to jẹwọ yii, ni wọn bẹrẹ sii ṣe iwure fun un, lati ra ẹmi rẹ pada saye.

N jẹ́ Wasila kú gẹ́gẹ́ bí wọ́n ṣe sọ?

BBC Yoruba de agboole awọn Oloolu, lati mọ bi isẹlẹ naa se waye, etutu ti wọn se at pe boya otitọ ni iroyin naa wi pe ọmọbinrin ọhun ti jade laye.

Gbara ti a debẹ, BBC Yoruba ba Oloolu nile, to si ni pe Wasila pẹlu awọn obi rẹ n bọ wa sile Oloolu naa laipẹ.

Gbogbo ohun to ṣẹlẹ, ti Wasila ba wa sọ, la o mu wa fun un yin laipẹ, ẹ ku oju lọna...