Hii ni tovuti ya maandishi pekee ambayo inatumia data kidogo. Tazama toleo kuu la tovuti likijumuisha picha na video zote.
Pata maelezo zaidi kuhusu toleo hili la linalotumia kiasi kidogo cha data
Moja kwa moja, Trump asema hana haraka kufanya makubaliano na Iran, ataka Mlango wa Hormuz ufunguliwe
Waziri wa Mambo ya Nje wa Iran, Abbas Araghchi, amesema Iran imefanikiwa kuangusha ndege ya kivita ya Marekani aina ya F 35, akidai hatua hiyo imeonyesha uwezo mpya wa vikosi vya Iran.
Muhtasari
- UAE yaomba Iraq kuzuia mashambulizi yanayotoka ndani ya nchi yake
- Serikali ya Botswana yakanusha kuwapa mashabiki wa Arsenal likizo baada ya ushindi wa Ligi Kuu ya Uingereza
- Marekani yawaonya raia wake dhidi ya kusafiri kwenda baadhi ya nchi za Afrika Mashariki kwasababu ya Ebola
- Waziri wa Mambo ya Ndani wa Pakistan awasili Tehran
- Urusi iko tayari kuendelea kuipatia China nishati, asema Putin
- Urusi na China zaonekana kukosoa hatua za kijeshi za Marekani
- Wanandoa wa Uingereza waliofungwa Iran waanza kususia kula gerezani
- Iran yaonya vita vitaenea nje ya Mashariki ya Kati iwapo itashambuliwa tena
- Uingereza yaondoa vikwazo dhidi ya mafuta ya Urusi
- Meli za mafuta za China zapita katika Mlango Bahari wa Hormuz baada ya miezi miwili
- Baada ya miaka 127, Bournemouth kucheza michuano ya Ulaya kwa mara ya kwanza
- Beijing na Moscow zinafaa kushirikiana zaidi, Xi amwambia Putin
- Rais Trump atishia kuishambulia Iran, iwapo makubaliano hayataafikiwa
- Waziri wa Israel Bezalel Smotrich asema mwendesha mashtaka wa ICC anataka akamatwe
- Watu 19 wauawa katika mashambulizi ya anga Lebanon
- Ghana kuikabili Ivory Coast katika mechi za kufuzu Afcon 2027
- Rais wa Urusi, Vladimir Putin, kutana na Rais wa China Xi Jinping
Moja kwa moja
Na Beldeen Waliaula & Mariam Mjahid
Magari ya kifahari ya Anita Among yakamatwa katika uchunguzi wa ufisadi Uganda
Polisi nchini Uganda wamekamata magari manne ya kifahari kutoka makazi ya aliyekuwa Spika wa Bunge, Anita Among, katika eneo la Nakasero jijini Kampala, ikiwa ni sehemu ya uchunguzi unaoendelea kuhusu madai ya ufisadi na matumizi mabaya ya madaraka.
Operesheni hiyo iliyofanywa mapema leo ilihusisha maafisa kutoka vitengo mbalimbali vya usalama, vikiwemo Ofisi ya Mkurugenzi wa Upelelezi wa Makosa ya Jinai pamoja na mamlaka ya kukabiliana na ufisadi.
Kwa mujibu wa vyanzo vya usalama, magari yaliyokamatwa ni pamoja na gari maalum lenye uwezo wa kuhimili mashambulizi ya risasi.
Magari hayo yaliondolewa chini ya ulinzi mkali wa polisi.
Bi Among anakabiliwa na tuhuma za kutumia vibaya madaraka, kujitajirisha kinyume cha sheria na ubadhirifu wa fedha za umma wakati akiwa madarakani.
Mamlaka zinadai baadhi ya mali zake huenda zilipatikana kwa kutumia fedha za serikali.
Msemaji wa polisi nchini Uganda, Kituuma Rusoke, amesema operesheni hiyo ni sehemu ya juhudi za kurejesha mali zinazodaiwa kupatikana kwa njia zisizo halali.
Hata hivyo, wawakilishi wa Bi Among wamekanusha vikali madai hayo wakisema hatua zinazochukuliwa dhidi yake zina msukumo wa kisiasa na zinalenga kuharibu hadhi pamoja na shughuli zake za kisiasa.
Uchunguzi unaendelea huku mamlaka zikitarajiwa kupanua operesheni hiyo katika siku zijazo.
Trump asema hana haraka kufanya makubaliano na Iran, ataka Mlango wa Hormuz ufunguliwe
Rais wa Marekani Donald Trump amesema anataka kuona Mlango wa Hormuz ukifunguliwa mara moja, akisisitiza kuwa “unapaswa kufunguliwa mara moja.”
Akijibu swali kuhusu mazungumzo na Iran Jumatano, Trump amesema: “Tunahitaji kufungua Mlango wa Hormuz na unapaswa kufunguliwa mara moja.”
Akizungumzia mazungumzo na Iran, amesema hana haraka ya kufikia makubaliano.
“Sina haraka ya kufikia makubaliano. Nataka tu kuona kama wanataka yaliyo bora kwa watu wao,” amesema.
Rais huyo ameongeza kuwa kuna hasira kubwa nchini Iran kutokana na hali ngumu ya maisha.
“Kuna hasira kubwa Iran kwa sasa kwa sababu watu wanaishi katika mazingira mabaya. Kuna hali ya sintofahamu ambayo hatujawahi kuiona hapo awali, sasa tusubiri tuone kitakachofuata,” amesema Trump.
Pia unaweza kusoma:
UAE yaomba Iraq kuzuia mashambulizi yanayotoka ndani ya nchi yake
Wizara ya Mambo ya Nje ya United Arab Emirates imeitaka Iraq kuchukua hatua kuzuia mashambulizi ya uhasama yanayodaiwa kuanzia katika ardhi yake, kufuatia shambulio la droni dhidi ya kinu cha nyuklia cha Barakah.
Wizara ya Ulinzi ya UAE ilisema shambulio hilo lililotokea Jumapili na kusababisha moto katika kinu hicho lilitoka Iraq, kulingana na taarifa zake.
Serikali ya Botswana yakanusha kuwapa mashabiki wa Arsenal likizo baada ya ushindi wa Ligi Kuu ya Uingereza
Chapisho lililosambaa kwenye mitandao ya kijamii likidai kuwa serikali ya Botswana imetangaza siku ya mapumziko kwa mashabiki wa Arsenal limekanushwa kuwa la uongo baada ya kurasa rasmi za serikali hiyo kwenye Facebook na X kupinga taarifa hiyo iliyokuwa ikisambazwa.
Chapisho hilo lililowekwa kwenye kurasa zilizothibitishwa za serikali ya Botswana lilikuwa na kichwa kikubwa kilichosema: “HAPANA, HAKUNA LIKIZO KWA MASHABIKI WA ARSENAL.”
Pia lilikuwa na alama kubwa nyekundu yenye neno “FAKE” kuonyesha kuwa taarifa hiyo ilikuwa ya kughushi.
Taarifa hiyo ya uongo ilikuwa na tarehe ya Mei 17, 2026 na ilibeba nembo zilizoonekana kuwa rasmi za serikali ya Botswana.
Taarifa hiyo ilidai kwa uongo kuwa Rais Duma Gideon Boko alikuwa ameidhinisha siku maalum ya mapumziko kwa mashabiki wa Arsenal.
Ilisema mashabiki hao wangepata mapumziko siku ya Jumatano, Mei 20, kusherehekea ushindi wa Arsenal katika Ligi Kuu England.
Botswana hapo awali iliwahi kutangaza siku ya mapumziko ya kitaifa baada ya timu ya taifa ya wanaume ya mbio za kupokezana vijiti za mita 4x400 kushinda medali ya dhahabu katika Mashindano ya Dunia ya Riadha.
Nchi hiyo pia iliwahi kutangaza nusu siku ya mapumziko baada ya mwanariadha Letsile Tebogo kushinda medali ya dhahabu ya Olimpiki katika mbio za mita 200 kwenye Michezo ya Olimpiki ya Paris 2024.
Pia unaweza kusoma:
Marekani yawaonya raia wake dhidi ya kusafiri kwenda baadhi ya nchi za Afrika Mashariki kwasababu ya Ebola
Serikali ya Marekani imewaonya raia wake dhidi ya kusafiri kwenda katika baadhi ya nchi za Afrika Mashariki na Kati kufuatia mlipuko wa virusi vya Ebola Bundibugyo ulioripotiwa katika eneo hilo.
Katika taarifa iliyotolewa Jumanne, Wizara ya Mambo ya Nje ya Marekani ilisema Wamarekani hawapaswi kusafiri kwenda DR Congo, Sudan Kusini na Uganda kutokana na mlipuko huo.
Wakati huohuo, Rwanda iliwekwa chini ya tahadhari ya kiwango cha tatu, huku raia wa Marekani wakishauriwa kufikiria upya safari zao kwenda nchini humo.
“Tunaendelea kuwahimiza kwa dhati Wamarekani kutosafiri kwenda Jamhuri ya Kidemokrasia ya Congo, Sudan Kusini au Uganda kwa sababu yoyote ile, na wafikirie upya safari za kwenda Rwanda kutokana na mlipuko wa ugonjwa wa virusi vya Ebola Bundibugyo katika eneo hilo,” taarifa hiyo ilisema.
“Tahadhari za usafiri kwa DRC, Sudan Kusini na Uganda sasa zipo katika kiwango cha nne, yaani ‘Usisafiri’, huku tahadhari ya Rwanda ikiwa kiwango cha tatu, yaani ‘Fikiria upya safari’.”
Hata hivyo, Wizara ya Afya ya Kenya imesema hakuna kisa cha Ebola kilichogunduliwa nchini humo, lakini imethibitisha kuwa hatua za kuimarisha utayari na mwitikio zimeanzishwa, ikiwa ni pamoja na ukaguzi mkali zaidi katika viwanja vya ndege na mipaka.
Pia unaweza kusoma:
Waziri wa Mambo ya Ndani wa Pakistan awasili Tehran
Waziri wa Mambo ya Ndani wa Pakistan, Mohsin Naqvi, amewasili tena mjini Tehran ambako anatarajiwa kukutana na viongozi wa Iran.
Afisa mmoja wa Wizara ya Mambo ya Ndani ameambia BBC Urdu kuwa ziara hiyo “ni mwendelezo wa ziara ya awali na ajenda yake ni kufufua mazungumzo kati ya Marekani na Iran.”
Aidha, shirika la habari la Tasnim, linalochukuliwa kuwa karibu na Jeshi la Walinzi wa Mapinduzi ya Iran, limethibitisha kuwasili kwa Waziri huyo mjini Tehran.
Mohsin Naqvi alikuwa ametumia takribani siku nne nchini Iran kabla ya kurejea Pakistan Jumanne iliyopita, ambapo alikutana na viongozi mbalimbali wa Iran akiwemo Rais Masoud Pezeshkian, Spika wa Bunge Mohammad Baqer Qalibaf na Waziri wa Mambo ya Nje Abbas Araghchi.
Baada ya kurejea kutoka Iran, Mohsin Naqvi alimpa taarifa Waziri Mkuu wa Pakistan Shehbaz Sharif pamoja na Field Marshal Asim Munir kuhusu ziara yake.
Ingawa serikali ya Pakistan haijaweka wazi maelezo kamili ya ziara hiyo, hatua hiyo inajiri wakati Iran na Marekani zikiendelea kubadilishana ujumbe kupitia upatanishi wa Pakistan kuhusu uwezekano wa kusitisha mapigano kwa kudumu na kurejesha mazungumzo.
Pia unaweza kusoma:
Urusi iko tayari kuendelea kuipatia China nishati, asema Putin
Baada ya hotuba ya rais wa China, Rais wa Urusi Vladimir Putin amesema kuwa Urusi iko tayari kuendelea kusambaza nishati kwa China.
Amesema biashara kati ya mataifa hayo mawili inalindwa dhidi ya shinikizo la nje na mwenendo hasi wa masoko ya dunia.
Kwa mujibu wa Putin, Urusi na China zimejizatiti kuendeleza sera huru za mambo ya nje na zitaendelea kuwa na nafasi katika kuimarisha utulivu wa kimataifa.
Pia unaweza kusoma:
Urusi na China zaonekana kukosoa hatua za kijeshi za Marekani
Hoja kadhaa zimejitokeza katika taarifa ya pamoja iliyotolewa na Urusi na China, kama ilivyotangazwa na Kremlin, kuhusu “uhusiano wa kina wa ujirani mwema, urafiki na ushirikiano.”
Taarifa hiyo imekosoa aina mbalimbali za vitisho vya kijeshi duniani, na inaonekana kurejelea hatua za Marekani nchini Iran na Venezuela katika kipindi cha miezi sita iliyopita.
Xi Jinping na Vladimir Putin wametoa wito wa kupinga “mashambulizi ya kijeshi ya moja kwa moja dhidi ya mataifa mengine, matumizi ya mazungumzo yasiyo ya kweli kuandaa mashambulizi hayo, mauaji ya viongozi wa nchi huru, kuvuruga hali ya kisiasa ya ndani ya mataifa hayo na kubadili tawala, pamoja na kuwateka viongozi wa kitaifa kwa ajili ya kufikishwa mahakamani.”
Viongozi hao wawili wamesema hatua kama hizo “zinakiuka kwa kiasi kikubwa madhumuni na misingi ya Mkataba wa Umoja wa Mataifa, sheria za kimataifa na mahusiano ya kimataifa, na kusababisha uharibifu usioweza kurekebishwa kwa misingi ya mfumo wa dunia ulioanzishwa baada ya Vita vya Pili vya Dunia.”
Xi na Putin wanaonekana kujiweka zaidi kama walinzi wa mfumo mpya wa kimataifa, huku kukiwa na wasiwasi kuhusu mwelekeo wa mfumo wa sasa wa dunia wakati wa muhula wa pili wa Rais wa Marekani Donald Trump.
Pia unaweza kusoma:
Wanandoa wa Uingereza waliofungwa Iran waanza kususia kula gerezani
Familia ya wanandoa wa Uingereza waliofungwa nchini Iran baada ya kushutumiwa kwa ujasusi imesema wawili hao wameanza kususia kula.
Lindsay Foreman na Craig Foreman walikamatwa walipokuwa wakivuka Iran kwa pikipiki mnamo Januari 2025, na baadaye walihukumiwa kifungo cha miaka kumi gerezani.
Wakati huo huo, raia wa Iran mwenye ukaazi wa kudumu nchini Marekani ameachiwa huru na kurejea Marekani baada ya kuzuiliwa kwa miaka kumi nchini Iran.
Shahab Dalili alikuwa ameshtakiwa kwa kushirikiana na serikali hasimu.
Iran yaonya vita vitaenea nje ya Mashariki ya Kati iwapo itashambuliwa tena
Jeshi la Walinzi wa Mapinduzi la Iran IRGC limetoa taarifa likionya kuwa iwapo Marekani na Israel wataishambulia Iran tena, vita vitaenea nje ya eneo la Mashariki ya Kati.
Taarifa hiyo ya kijeshi ya Iran imetolewa kujibu vitisho vya mashambulizi mapya vilivyotolewa na Rais wa Marekani Donald Trump pamoja na baadhi ya maafisa wa Israel, waliodai kuwa hatua mpya dhidi ya Iran inaweza kusababisha vita kuenea katika maeneo mengi duniani.
Jeshi hilo limesema mashambulizi yoyote dhidi ya Iran yatakabiliwa na “majibu makali.”
Wakati huo huo, Waziri wa Mambo ya Nje wa Iran, Abbas Araghchi, amesema kupitia mtandao wa X kuwa Iran imejifunza mengi kutokana na vita vya karibuni na sasa ina uwezo mkubwa zaidi wa kijeshi.
“Marekani itashangazwa iwapo itaingia vitani nasi tena,” amesema Araghchi.
Katika ujumbe wake mwingine, amesema Iran imefanikiwa kuangusha ndege ya kivita ya Marekani aina ya F 35, akidai hatua hiyo imeonyesha uwezo mpya wa vikosi vya Iran.
“Kwa sababu ya mafunzo tuliyopata na maarifa tuliyojifunza, Marekani itakumbana na mshangao mwingine,” ameongeza.
Kauli hiyo imejiri siku moja baada ya Rais Trump kusema alikuwa amesitisha mpango mkubwa wa mashambulizi dhidi ya Iran kufuatia ombi kutoka kwa viongozi wa Qatar, Saudi Arabia na Umoja wa Falme za Kiarabu.
Pia unaweza kusoma:
Uingereza yaondoa vikwazo dhidi ya mafuta ya Urusi
Serikali ya Uingereza imeondoa baadhi ya vikwazo dhidi ya mafuta ya Urusi,huku bei ya mafuta ikipanda nchini humo.
Agizo hilo limeanza kutekelezwa hii leo, na inaashiria hofu inayoongezeka kuhusu upatikanaji wa mafuta kutokana na kuzuizi kilichowekwa katika Mlango bahari wa Hormuz tangu kuanza kwa vita kati ya Marekani na Israel dhidi ya Iran.
Vikwazo dhidi usafirishaji wa gesi ya asili ya Urusi iliyoyeyushwa (LNG) pia vimeondolewa.
Hatua kama hiyo iliyochukuliwa na Marekani hivi majuzi ilikosolewa vikali.
Bei za mafuta ya ndege barani Ulaya zimeongezeka mara mbili Zaidi baada ya vita kuanza, huku bei ya mafuta katika vituo za mafuta zikipanda.
Mashirika kadhaa ya ndege nchini Uingereza na duniani kote yamehairisha safari zake na kuongeza bei za tiketi kutokana na kupanda kwa bei mafuta ya ndege.
Pia unaweza kusoma:
Meli za mafuta za China zapita katika Mlango Bahari wa Hormuz baada ya miezi miwili
Meli mbili za mafuta za China zimeweza kupita katika Mlango bahari wa Hormuz hii leo, baada ya kuzuiliwa kwa Zaidi ya miezi miwili.
Hii inaashiria dalili kuwa mkwamo katika mlango huo wa bahari umetatuliwa.
Rais wa Marekani Donald Trump, hapo jana, alidokeza kuwa vita hivyo viko karibu kuisha na wako karibu kuafikia makubaliano
Trump aidha alisema aliagiza kusitishwa kwa mashambulizi mapya dhidi ya Iran, baada ya kupokea ombi kutoka mataifa ya Ghuba.
Pia unaweza kusoma:
Baada ya miaka 127, Bournemouth kucheza michuano ya Ulaya kwa mara ya kwanza
Licha ya kutoka sare ushindi nyumbani dhidi ya Manchester City waliopata bao la kusawazisha la dakika za jioni kupitia Erling Haaland, Bournemouth bado wameandika historia kubwa kwa kufuzu michuano ya Ulaya kwa mara ya kwanza tangu kuanzishwa kwa klabu hiyo.
Sare ya bao 1-1 dhidi ya City katika Uwanja wa Vitality usiku wa Jumanne imeihakikishia Bournemouth nafasi ya kushiriki michuano ya Europa League msimu ujao.
Hata hivyo, bado kuna uwezekano kwa Bournemouth kufuzu hadi Ligi ya Mabingwa Ulaya kulingana na matokeo ya mechi za mwisho za msimu.
Iwapo Aston Villa wataifunga Freiburg katika fainali ya Europa League itakayochezwa Jumatano usiku, Bournemouth kuna uwezekano ku kupata nafasi hiyo.
Villa wakitwaa ubingwa huo na kumaliza nafasi ya tano kwenye msimamo wa EPL, watapata tiketi ya moja kwa moja ya Ligi ya mabingwa League kama mabingwa wa Europa League. Hivyo itafanya nafasi ya ziada ya timu ya Ligi kuu England (EPL) kwenda kwa timu itakayomaliza nafasi ya sita, jambo ambalo linaweza kuinufaisha Bournemouth.
Ili hilo litokee, Aston Villa wanapaswa kupoteza dhidi ya Manchester City huku Liverpool wakishinda nyumbani dhidi ya Brentford. Kwa upande wa Bournemouth, watakuwa na uhakika wa kumaliza nafasi ya sita iwapo wataepuka kupoteza dhidi ya Nottingham Forest au Brighton wakashindwa kuifunga Manchester United.
Bado kuna uwezekano mwingine mdogo wa Bournemouth kufuzu Ligi ya mabingwa Ulaya ikiwa Liverpool watapoteza kwa kipigo kikubwa katika mchezo wao wa mwisho huku Bournemouth wakishinda kwa mabao mengi.
Kwa mfano, Liverpool wakifungwa mabao 3-0 na Bournemouth kushinda 4-0, tofauti ya mabao inaweza kuibeba Bournemouth. Pia njia ya kipekee zaidi inaweza kutokea ikiwa Liverpool wakifungwa 1-0 na Bournemouth kushinda 5-0.
Katika mazingira hayo, timu hizo zinaweza kuwa sawa kwa kila kitu hadi kuhitaji mechi ya mchujo maalum ya mwisho wa msimu kuamua nani afuzu ligi ya mabingwa.
Wakati Arsenal tayari wametwaa ubingwa wa EPL kwa mara ya kwanza baada ya miaka 22, bado kuna ushindani mkubwa katika michezo ya mwisho ya msimu huku nafasi za kufuzu mashindano ya Ulaya pamoja na vita vya kushuka daraja vikiwa bado havijaamuliwa.
Katika vita vya kushuka daraja, West Ham wanahitaji ushindi dhidi ya Leeds United ili kujiweka kwenye nafasi ya kuendelea kubaki EPL.
Tottenham pia wako kwenye presha kubwa huku wakihitaji ushindi dhidi ya Everton ili kuhakikisha hawashuki daraja.
Chelsea, Brighton, Brentford na Sunderland nazo bado zinapambana kuwania nafasi za michuano ya Ulaya kabla ya pazia la msimu kufungwa rasmi Jumapili hii.
Pia unaweza kusoma:
Beijing na Moscow zinafaa kushirikiana zaidi, Xi amwambia Putin
Katika hotuba yake, Rais Xi Jinping wa China, amemwambia Rais wa Urusi Vladimir Putin, kwamba nchi hizo mbili zinapaswa kusaidiana katika maendeleo na kufufua uchumi wa mataifa hayo.
Putin naye katika katika hotuba yake, amesema uhusiano kati ya Urusi na China ni wa viwango vya juu na unaonyesha “mwenendo mzuri” kati ya mataifa hayo mawili.
Putin aliisifia taifa lake kuwa “muuzaji wa nishati anayeaminika” licha ya mgogoro unaoendelea Mashariki ya Kati.
China na Urusi pia wameongeza muda wa miaka mitano kwa mkataba walionao wa kushirikiana kibiashara na kijeshi.
Viongozi hao wawili pia wamejadili vita Mashariki ya Kati, Rais Xi akisema kuwa imefikia wakati muhimu wa kusitisha mashambulizi na kupatikana kwa amani.
Putin amemwalika Rais Xi Jinping kutembelea Urusi mwaka ujao, akisisitiza kuwa uhusiano kati ya Beijing na Moscow ndiyo “unachangia utulivu wa dunia.”
Xi alikuwa Urusi mara ya mwisho mwezi Mei mwaka uliopita.
Pia unaweza kusoma:
Rais Trump atishia kuishambulia Iran, iwapo makubaliano hayataafikiwa
Rais wa Marekani Donald Trump amesema kuwa alikuwa amebakisha saa moja tu, kabla ya kuidhinisha shambulio jipya dhidi ya Iran, kisha akabadili uamuzi huo, baada ya kupokea ombi kutoka kwa mataifa ya Ghuba asitishe mashambulizi, huku akionya kuwa Marekani inaweza kuanzisha mashambulizi mapya dhidi ya Iran siku chache zijazo.
Trump amesisitiza kuwa viongozi wa Iran “wanatakiwa kuafikia makubaliano kwa haraka,” na kuongezea kuwa shambulio jipya la Marekani linaweza kufanyika siku chache zijazo iwapo hakutakuwa na makubaliano yaliyoafikiwa.
“Ninamaanisha ndani ya siku mbili au tatu, labda Ijumaa au Jumamosi au Jumapili, au mwanzoni mwa wiki ijayo, kwa sababu hatuwezi kuiruhusu Iran kuwa na silaha ya nyuklia.”
Trump pia alisema kuwa Rais wa China Xi Jinping, aliahidi kutoipa jeshi la Iran silaha yoyote.
Jeshi la Iran nalo limejibu semi za Trump na kusema pia wako tayari kurejea kutekeleza mashambulizi.
Pia unaweza kusoma:
Waziri wa Israel Bezalel Smotrich asema mwendesha mashtaka wa ICC anataka akamatwe
Waziri wa Fedha kutoka mrengo wa kulia nchini Israel, Bezalel Smotrich, amesema amepewa taarifa kwamba waranti ya kukamatwa kwake imetolewa na mahakama ya kimataifa ya uhalifu ya ICC.
Smotrich hakusema ni mashtaka gani anayokabiliwa nayo, lakini alieleza hatua hiyo kuwa “tangazo la vita” na kuinyooshea lawama mamlaka ya Palestina.
Waranti ya mtu kukamatwa na mahakama ya ICC huwa suala la siri na lazima iidhinishwe na majaji wa mahakama hiyo.
Mahakama hiyo aidha imekanusha kutoa waranti ya kukamatwa kwa viongozi watano wa Israel.
Smotrich ambaye ana mamlaka makubwa juu ya sera za Israel katika eneo linalokaliwa kimambavu la Ukingo wa Magharibi, aliagiza kubomolewa kwa Kijiji maarufu cha Waaplestina cha Khan al-Ahmar karibu na Jericho.
Afisa mmoja wa Mamlaka ya Palestina amelaani agizo hilo na kulitaja kama “hatua hatari ya kuongeza mvutano”.
Mwaka 2018, Mahakama Kuu ya Israel iliidhinisha amri ya kuwafurusha wakazi wa Khan al-Ahmar, lakini amri hiyo haijatekelezwa baada ya mahakama ya ICC kutoa onyo kuwa ni ukiukwaji wa sheria za kimataifa.
Pia unaweza kusoma:
Watu 19 wauawa katika mashambulizi ya anga Lebanon
Mashambulizi ya angani yaliyotekelezwa na Israel, imewauwa takriban watu 19 kusini mwa Lebanon, kulingana na wizara ya afya ya taifa hilo.
Kumi kati ya waliouawa ni watoto watatu na wanawake watatu ambao walifariki katika shambulio moja nyumbani kwao, katika mji wa Dier Qanoun.
Lebanon ilianza kushambuliwa na Israel tarehe 2 mwezi Machi, baada ya kundi la Hezbollah linaloungwa mkono na Iran, kuishambulia Israel, kama hatua ya kulipiza kisasi kifo cha aliyekuwa kiongozi mkuu wa Iran Ali Khamenei.
Mashambulizi haya yanajiri siku chache tu, baada ya mataifa hayo mawili kukubaliana kuongeza muda wa kusitisha mapigano kwa siku 45, ili kutoa muda kwa mazungumzo kufanyika.
Licha ya makubaliano hayo ya kusitisha mapigano, Israel na kundi la Hezbollah wamekuwa wakishambuliana.
Pia unaweza kusoma:
Ghana kuikabili Ivory Coast katika mechi za kufuzu Afcon 2027
Ghana wamepangwa pamoja na Ivory Coast katika kundi ambalo linaonekana kuwa gumu kwenye mechi za kufuzu kwa fainali za Kombe la Mataifa ya Afrika (Afcon) 2027.
Black Stars hawakuwa kwenye chungu cha kwanza cha timu zilizopanda daraja kwenye droo hiyo, baada ya kushuka kwenye viwango vya dunia kufuatia kushindwa kufuzu kwa mashindano yaliyopita yaliyofanyika Morocco mwezi Disemba na Januari.
Mabingwa hao wawili wa Afrika Magharibi watakutana katika Kundi C, ambako pia watacheza dhidi ya Gambia, waliotikisa kwa kufika robo fainali ya Afcon 2021 kwenye ushiriki wao wa kwanza, pamoja na Somalia.
“Kwa nini kila mara sisi? Hili ni kundi gumu,” alisema mchezaji wa zamani wa Ivory Coast, Max-Alain Gradel, ambaye aliisaidia timu ya Elephants kutwaa ubingwa nyumbani mwaka 2022 na alikuwa mmoja wa wasaidizi kwenye droo iliyofanyika Cairo.
“Lakini tutafanya kila tuwezalo kufuzu. Nina imani na timu hivyo hakuna tatizo.”
Kenya, Tanzania na Uganda zitakuwa wenyeji wa pamoja wa Afcon ijayo, itakayofanyika kuanzia tarehe 19 Juni hadi 17 Julai 2027.
Timu 48 zinazowania kufuzu kwa fainali zimegawanywa katika makundi 12 yenye timu nne kila moja, ambapo timu mbili za juu kutoka kila kundi zitafuzu baada ya raundi sita za mechi.
Hata hivyo, mambo yanakuwa magumu zaidi kwa sababu wenyeji watatu tayari wamehakikishiwa nafasi kwenye mashindano hayo, hivyo ni timu moja tu nyingine kutoka kwenye makundi yao itakayopata tiketi ya kufuzu.
Nigeria, Afrika Kusini na Tunisia zina nafasi ndogo ya kufanya makosa baada ya kupangwa pamoja na mmoja wa wenyeji hao watatu. Kenya itacheza dhidi ya Eritrea, ambao wanarejea kwenye mechi za kufuzu Afcon kwa mara ya kwanza tangu mchujo wa mashindano ya 2008, pamoja na Guinea na Afrika Kusini katika Kundi A.
Kwingineko, mabingwa wa kihistoria wa Afcon wenye mataji saba, Misri, wamepangwa pamoja na Angola, Malawi na Sudani Kusini.
Raundi nne za kwanza za kufuzu zitachezwa mwezi Septemba, Oktoba na Novemba mwaka huu, huku mechi mbili za mwisho zikitarajiwa kuchezwa mwezi Machi mwaka ujao.
Pia unaweza kusoma:
Rais Putin aanza ziara ya kitaifa nchini China
Rais wa Urusi, Vladimir Putin, yuko mjini Beijing kwa ziara ya kitaifa ambapo anatarajiwa kufanya mazungumzo na Rais wa China, Xi Jinping, hii leo.
Putin, aliwasili China usiku wa kuamkia leo, na anatarajiwa kujadili “masuala muhimu” yanayohusu Urusi na China,kulingana na taarifa iliyotolewa na ikulu ya Kremlin.
Ziara ya Putin, ambayo ndiyo safari yake ya kwanza nje ya taifa lake mwaka huu wa 2026, imejiri siku chache tu baada ya ziara ya Rais wa Marekani, Donald Trump, nchini China, ambapo walijadili na Rais Xi masuala mbalimbali ya kibiashara ikiwemo vita vya Iran.
Wizara ya Mambo ya Kigeni ya China imesema ziara ya Putin inalenga kuimarisha zaidi uhusiano wa mataifa hayo mawili.
Pia unaweza kusoma:
