TOOS, Golaha wasiirrada UK oo qaar is casileen kadib markii uu raysalwasaare Starmer sheegay inuusan is casili doonin

Tebin toos ah

1. 19 Daqiiqadood ka horWarbixinno sirdoon oo shaaca ka qaaday: Sacuudi Carabiya ayaa qaaday weeraro "aan la shaacin" oo ka dhan ah Iran

   Warbixinno sirdoon caalami ah iyo warbaahin, oo ay soo xiganayaan saraakiil reer Galbeed iyo kuwa Iran ah, ayaa sheegay – sida ay daabacday Reuters – in Sacuudiga ay markii ugu horreysay fulisay weerarro militari oo “aan si rasmi ah loo shaacin” oo lagu beegsaday goobo ku yaalla gudaha Iran.

   Sida ay sheegayaan laba sarkaal oo reer Galbeed ah iyo laba sarkaal oo Iran ah oo xog-ogaal ah, howlgaladan ayaa la sheegay inay ahaayeen “jawaab toos ah” oo ka dhan ah weerarro hore oo ay Tehran ama kooxo la shaqeeya ay ka fuliyeen xarumo muhiim ah oo ku yaalla Boqortooyada Sacuudi Carabiya intii lagu jiray xiisadda sii kordhaysay ee la xiriirta dagaallada Bariga Dhexe.

   Warbixintani waa mid lagu sifeeyay in ay ka mid tahay is-weydaarsi qarsoon oo weerarro iyo ka jawaabid ah, balse dhinacyada rasmiga ah si madax-bannaan looma xaqiijin faahfaahinta lagu sheegay.

2. 36 Daqiiqadood ka horKuwait oo sheegtay inay xartay 4 qof oo lala xiriirinayo ilaalada kacaanka Iran

   Wasaaradda Arrimaha Gudaha ee Kuwait ayaa Talaadadii ku dhawaaqday inay xirtay afar qof oo looga shakisan yahay inay xiriir la leeyihiin ilaalada kacaanka Iiraan, kadib markii ay isku dayeen inay dalka kaga soo galaan dhinaca badda, sida ay sheegtay wakaaladda wararka Kuwait ee KUNA.

   Wasaaraddu waxay intaas ku dartay in hal askari oo ka tirsan ciidamada qalabka sida ee Kuwait uu dhaawacmay intii ay socdeen iska horimaadyada lala galay dadka la sheegay inay soo dhex galeen.

   Kuwait ayaa sidoo kale u yeertay safiirka Iran waxayna u gudbisay qoraal rasmi ah oo cabasho ah, kadib waxa ay ku tilmaantay isku day lagu doonayay in lagu soo dhex galo jasiiradda Bubiyan, sida ay sheegtay Wasaaradda Arrimaha Dibadda.

   Jasiiradda Bubiyan waa jasiiradda ugu weyn ee xeebaha Kuwait waxayna ku taallaa waqooyi-galbeed ee Khaliijka.

   Kuwait ayaa sidoo kale cambaareysay dhacdadan waxayna ku tilmaantay fal “cadaawadeed,” iyadoo adkeysay xaqeeda ay u leedahay inay difaacdo madaxbannaanideeda iyadoo la raacayo Qodobka 51-aad ee Axdiga Qaramada Midoobay.

3. 52 Daqiiqadood ka hor"Jasiirad hanti ah" Maxay Mareykanka, Shiinaha, iyo Taiwan ugu hardamayaan Somaliland?

   Booqashadii la qorsheeyay ee Madaxweynaha Taiwan, Lai Ching‑te, uu ku tegi lahaa Eswatini — oo ah saaxiibka diblomaasiyadeed ee keliya ee ay Taiwan ku leedahay Afrika — ayaa la baajiyay Talaadadii (21‑ka Abriil), kadib markii waddamo Afrikaan ah ay baajiyeen oggolaanshaha duullimaadyada hawada. Arrintani waxay mar kale muujisay xaaladda adag ee diblomaasiyadeed ee Taiwan ka haysata Afrika.

   Faahfaahinta warbixinta oo dhameystiran ku dhufo lifaaqa hoose

   "Jasiirad hanti ah" Maxay Mareykanka, Shiinaha, iyo Taiwan ugu hardamayaan Somaliland?

4. Saacad ka horSafiirka Maraykanka u fadhiya Qaramada Midoobay: Israel waxay siisay Imaaraadka nidaamka Iron Dome

   Wargeyska Israel Hayom ayaa soo xigtay safiirka Mareykanka ee Qaramada Midoobay, isagoo sheegay in Israel ay siisay nidaamka difaaca “Iron Dome” dalka Imaaraadka intii lagu jiray dagaalkii dhowaan dhacay.

   Kahor warbixinta wargeyskan midigta-fog, website-ka Axios ayaa sidoo kale sheegay warkan, isagoo tixraacaya saraakiil Mareykan iyo Israa’iili ah oo aan magacyadooda la sheegin.

   Israel Hayom wuxuu soo xigtay Mike Waltz, safiirka Maraykanka ee Qaramada Midoobay, isagoo yiri: “Waxaan aragnay Imaaraadka oo adeegsanaya nidaamka Iron Dome oo Israa’iil siisay.”

   Wargeysku wuxuu sheegay in Waltz uu faahfaahin bixiyay taasoo muujinaysa in xiriirka u dhexeeya Israa’iil iyo Imaaraadka uu sii xoogeysanayo.

   Wargeyska Mareykanka ee The Wall Street Journal ayaa hore u sheegay in Imaaraadka Carabta uu si qarsoodi ah duqeymo dhowr ah u fuliyay xarumo shidaal oo Iran ah bilowgii Abriil, xilli xabbad-joojin lagu dhawaaqay.

   Ra’iisul Wasaaraha Israa’iil Benjamin Netanyahu ayaa marar badan ku celceliyay aragtida “Bariga Dhexe cusub,” isagoo sheegay inay kordhi doonto iskaashiga u dhexeeya Israa’iil iyo dalalka Khaliijka si looga hortago Iran.

5. Saacad ka horHogaamiyaha Xisbullah oo war cusub soo saaray

   Maalin ka hor wareeg cusub oo wada-hadallo ah oo u dhexeeya Israa’iil iyo dowladda Lubnaan, ururka Xisbullah ayaa mar kale ku baaqay in laga fogaado wada-xaajood toos ah oo lala yeesho Israa’iil.

   Xoghayaha guud ee Xisbullah, Naim Qassem, ayaa ka digay in wada-hadal kasta oo toos ah uu faa’iido u yeelan doono Israa’iil oo keliya.

   Wuxuu sidoo kale carrabka ku adkeeyay in arrinta hubka Xisbullah ay tahay “arrin gudaha ah” oo aysan meel ku lahayn wada-xaajood lala yeesho cadowga.

   Farriin cod ah oo uu u diray ciidamada Xisbullah, Naim Qassem wuxuu ku sheegay in “iska caabbinta” aysan waligeed isu dhiibi doonin cadaadiska Mareykanka iyo Israa’iil, isagoo ballan qaaday in goobta dagaalka ay “jahannamo” u noqon doonto Israa’iil.

   Qayb kale oo ka mid ah hadalkiisa, xoghayaha guud ee Xisbullah wuxuu uga mahadceliyay Iran taageerada ay siiso Lebanon iyo shacabkeeda, isagoo yiri: “Heshiiska Iran iyo Mareykanka, oo ay ku jirto joojinta gardarrada ka dhanka ah Lubnaan, wuxuu ku dhow yahay dukumintiga ugu xooggan ee lagu joojin karo gardarradan.”

   Si kastaba ha ahaatee, wuxuu intaas ku daray in mas’uuliyadda wada-xaajoodka lagu gaarayo himilooyinka qaran ee Lubnaan ay saaran tahay maamulka Lubnaan, isagoo ballan qaaday inay la shaqeyn doonaan.

   Wareegga saddexaad ee wada-hadallada u dhexeeya Lebanon iyo Israel ayaa la qorsheeyay inuu qabsoomo Khamiista iyo Jimcaha toddobaadkan.

   Inkasta oo uu jiro xabbad-joojin lala galay Iran, haddana is-weydaarsiga rasaasta u dhexeeya Xisbullah ee Lubnaan iyo Israa’iil ayaa sii socday.

   Mareykanka iyo Israa’iil waxay dowladda Lubnaan ka dalbanayaan inay hubka ka dhigto Xisbullah, balse Xisbullah waxay sheegtay inaysan is dhiibi doonin.

6. Saacad ka horIngiriiska ayaa shaaciyay inuu ka qeybgalayo howlgal lagu “sugayo ammaanka”of Hormuz

   Dowladda Ingiriiska ayaa ku dhawaaqday inay ka qeybgaleyso howlgal caalami ah oo lagu sugayo ammaanka Strait of Hormuz, iyadoo diraysa qalab miinooyinka lagu baaro laguna saaro, nidaamyo casri ah oo looga hortago diyaaradaha aan duuliyaha lahayn, diyaaradaha dagaalka ee Eurofighter Typhoon iyo markabka dagaalka ee HMS Dragon.

   Wasaaradda Difaaca ayaa sheegtay in howlgalka difaaca uu dhaqan geli doono marka ay jiraan xaalado ku habboon, iyadoo lagu taageerayo maalgelin cusub oo dhan £115 milyan oo ah lacagta Ingiriiska si loo xoojiyo awoodaha baarista miinooyinka iyo ka hortagga diyaaradaha drones-ka.

   Wasiirka Difaaca ee Britain, John Healey, ayaa xaqiijiyay in UK “door hoggaamineed ka ciyaareyso sugidda ammaanka marinka Hormuz,” isagoo xusay in awoodahan casriga ahi loogu talagalay ilaalinta danaha Britain iyo xoojinta ammaanka marinada badda.

   Wuxuu intaas ku daray in maalgelinta cusub, diyaaradaha iyo markabka dagaalka ay yihiin ballanqaadyo cad oo lagu taageerayo maraakiibta ganacsiga laguna yareynayo saameynta colaadda ku yeelan karto shacabka gudaha dalka.

   Wuxuu carrabka ku adkeeyay in howlgalka uu noqon doono “mid difaac ah, madax-bannaan oo lagu kalsoonaan karo” iyadoo lala kaashanayo xulafada.

7. Saacad ka horIlaalada Kacaanka Iraan oo sheegay inay ballaariyeen howlaha masaafada Marinka Hormuz

   Ku-xigeenka madaxa siyaasadda ciidamada badda ee ilaalada Kacaanka iran ayaa sheegay in Iran ay “si weyn” u ballaarisay aagga marinka biyaha ee S Hormuz kadib dagaalkii dhowaan dhex maray Mareykanka iyo Iran.

   Maxamed Akbarzadeh ayaa telefishinka Iran u sheegay in aagga hadda loo qeexay inuu yahay goob istiraatiiji ah, “laga bilaabo xeebaha Jask iyo Siri ilaa meel ka baxsan jasiiradaha Greater Tunb; si kale haddii loo dhigo, marinka Hormuz wuu sii weynaadey wuxuuna noqday goob hawlgal oo ballaaran.”

   Sida uu sheegay ku-xigeenka madaxa siyaasadda ciidamada badda ee IRGC, marinka Hormuz ayaa cabbir ahaan ka ballaarmay “20 ilaa 30 mayl sidii hore ilaa in ka badan 200 ilaa 300 mayl, taas oo ah 500 kiiloomitir.”

   Maxamed Akbarzadeh wuxuu yiri: “Dhacdo dhowaan dhacday, markab dagaal oo Mareykan ah ayaa doonayay inuu maro aaggan, balse waxaa si dhow ula socday ciidamada qalabka sida. Kadib markii la arkay dhaqamo kicin ah, ciidamada badda ayaa gudbiyay fariin digniin ah oo rasaas lagu riday, markabkiina isla markiiba wuu beddelay jihadiisa.”

8. 2 Saacadood ka horIraan oo dacwad ka dhan ah Mareykanka maxkamad u gudbisay

   Iiraan ayaa dacwad ka dhan ah Mareykanka u gudbisay Maxkamadda Caalamiga ah ee GarnaqsiGA ee Hague, iyadoo ku eedeysay “duullaan militari oo lagu qaaday xarumaheeda nukliyeerka, cunaqabateyn dhaqaale, iyo hanjabaad isticmaal xoog,” sida ay sheegtay wakaaladda wararka ee Tasnim ee Iran.

   Wakaaladdu waxay sheegtay in dowladda Iran ay dacwadda ku saleysay qodobada Heshiisyadii Algiers ee 1981, iyadoo ku eedeysay Mareykanka inuu jebiyay waajibaadkiisa caalamiga ah intii lagu jiray dagaalkii 12-ka maalmood socday ee Iran.

   Sida ay wakaaladdu sheegtay, dacwadda waxaa si rasmi ah looga diiwaangeliyay Maxkamadda Dacwadaha Iran iyo Mareykanka bishii Maarso 2026.

   Iran waxay maxkamadda ka codsatay inay cambaareyso Mareykanka isla markaana ku qasabto inuu joojiyo dhammaan faragelinta tooska iyo tan dadban ee arrimaha gudaha Iran.

   Tehran waxay sidoo kale dalbatay dammaanad qaad ah inaan xadgudubyadan dib loo soo celin doonin, iyo magdhow buuxa oo ku saabsan dhammaan khasaaraha dalka loo geystay, sida ay sheegtay wakaaladdu.

   “Lammaane: Iran waxay dacwad ka dhan ah Mareykanka uga gudbisay Maxkamadda Caalamiga ah ee Garnaqsiinta sababo la xiriira ‘duullaan iyo cunaqabateyn.’”

9. 3 Saacadood ka horWar deg deg ah, Boqol iyo dheeraad xildhibaan oo warsaxaafadeed ka soo saaray xaalka Starmer

   110 xildhibaan oo ka tirsan xisbiga Labour ayaa saxiixay bayaan ay kaga soo horjeedaan in la qabto tartan hoggaamineed.

   Bayaanka ayaa u qornaa: “Todobaadkii hore waxaan galnay natiijooyin doorasho oo aad u adag oo niyad-jab leh. Tani waxay muujinaysaa in shaqo adag naga horeyso si aan dib ugu soo ceshano kalsoonida codbixiyeyaasha.

   Shaqadaas waa inay bilaabataa maanta—annagoo dhammaanteen iska kaashanay si aan u gaarsiinno isbeddelka dalka u baahan yahay. Waa inaan diiradda saarno arrintaas.

   Ma aha waqtigan ku habboon tartan hoggaamineed.”

10. 3 Saacadood ka horStarmer oo weli sii adkaysanaya xilka xilli cadaadisku sii kordhayo

    Ra’iisul wasaare Sir Keir Starmer ayaa wali isku dayaya inuu xilka sii haysto, inkastoo awooddiisu ay hoos u sii dhacayso, xisbigiisuna uu kala qaybsan yahay.

    Maanta wuxuu diiday cadaadiskii saarnaa isaga sii adkaysanaya xilkiisa, kuna tiirsan xeerarka xisbiga Labour-ka ama Shaqaalah, maadaama ilaa hadda uusan jirin qof si rasmi ah ugu tartamaya hoggaanka, taas oo u baahan taageero 81 xildhibaan.

    Wuxuu fariin u diray kuwa doonaya inay beddelaan, isagoo leh: ha ismuujiyo ama ha la aamuso qofkii doonaya booskayga.

    Wes Streeting, oo loo arko musharax suurtagal ah, ayaa wajahaya go’aan adag—haddii uu tartamo ama uu sugayo. Dhanka kale, Andy Burnham ayaa isna bilaabay inuu taageero raadsado.

    Tan iyo 2019, UK waxay la arkayey dhowr ra’iisul wasaare oo isbeddelay, Starmer-na hadda wuu sii haystaa xilka, ugu yaraan illaa hadda, inkasta oo xaalku ku adag yahay.

11. 3 Saacadood ka horTrump: 'Kurdido waa i niyad jabiyeen'

    Shir jaraa'id oo uu Isniintii ku qabtay xafiiska Oval Office-ka, ayaa madaxweynaha Maraykanka waxa uu ku celceliyey sheegashadiisa ah in Maraykanku hub u soo diray dibad-baxayaasha Iran isagoo u sii maraya Kurdiyiinta, balse aanay Kurdiyiintu hubkaas gaarsiin Iiraaniyiinta.

    "Iraniyiintu waxay rabaan inay jidadka isugu soo baxaan oo ay mudaaharaad sameeyaan, laakiin ma haystaan hub, waxaan u malaynaynay in Kurdiyiintu ay siin doonaan [hubka]. Kurdiyiinta ayaa na niyad-jabiyay," ayuu yiri.

    Trump oo hadalkiisa sii wata ayaa u yiri sidan.

    "Kurdigu waxay sii wadaan qaadashada, waxay ku leeyihiin sharaf weyn Congress-ka. Koongarasku wuxuu leeyahay, 'Maya, si fiican ayay u dagaallamaan." Si fiican ayay u dagaalamaan marka lacag la siiyo. Kurdiyiinta ayaa i niyad jabiyay. Waa kuu sheegay in aysan shaqeyn doonin.

    Trump ayaa horay u sheegay in maamulka Mareykanka uu hub u soo diray dadka ku mudaaharaadaya dowladda Iran ee ka soo horjeeda, balse hubkaasi ay gacanta ku dhigeen kooxaha Kurdiyiinta.

    Trump: 'Kurdido waa i niyad jabiyeen' .....

12. 3 Saacadood ka horWar deg deg ah, Madaxweyne Deni oo gaadhay magaalada Muqdisho xilli wadahadallo la filayo

    Madaxweynaha Puntland, Siciid Cabdullaahi Deni, ayaa gaadhay magaalada Muqdisho halkaas oo uu uga qaybgalayo wadahadallo siyaasadeed oo ay taageerayaan beesha caalamka, sida ay ilo xog ogaal ahi sheegeen.

    Kulamadan ayaa u dhexeeya Dowladda Federaalka Soomaaliya iyo Golaha Mucaaradka, iyadoo diiradda lagu saarayo sidii xal looga gaadhi lahaa khilaafaadka siyaasadeed ee ka taagan Soomaaliya.Muddooyinkii u danbeeyey waxaa si gaar ah loogu kala duwanaa hawlo ay ugu muhiimsan yihiin habraaca doorashada Soomaaliya, oo muddo xileedkeedii hore dhawaan dhammaanayo, inkasta oo isbeddel dhanka Dastuurka ah yimi, kaas oo aanay dhinacyadu isku raacsanayn.

13. 4 Saacadood ka horMuuqaal sir ahaa oo la shaaciyay oo ku saabsan xogta maqluuqaadka UFO's

    Amarka madaxweyne Donald Trump, ayaa wasaaradda gaashaandhigga ku sii daysay daraasiin faylal horey sir u ahaa oo ku saabsan muuqaallada UFO ee ay u bixiyaan waxa ay ugu yeereen 'daah-furnaan aan horay loo arag' oo dadka Mareykanka la siinayo, in kasta oo falanqeeyayaasha ay sheegeen in qaar badan oo ka mid ah dukumentiyada horay loo soo bandhigay.

    Shaacinta dukumeentiyada, sawirada iyo fiidyowyada maqluuqaadkaan ayaa waxaa ku xigi doona sii dayno kale maadaama agabyo badan la sii daayay, ayay ku dareen hadal ay soo saareen.

    Trump waa madaxweynihii ugu dambeeyay ee siidaaya warbixinnada dowladda Mareykanka ee ku saabsan UFOs, hanaankaan ayaa soo bilowday dabayaaqadii 1970-meeyadii.

    Khubarada ayaa sheegay in qaybta ku dhawaad ​​160-ka faylal ee la sii daayay Jimcihii ay ka koobnaayeen muuqaallo cusub balse ma aysan bixin caddayn dhammaystiran oo ku saabsan in maqluuqaad shisheeye jiran ama nolol ka baxsan tan aan naqaano.

    Halkan guji si aad faahfaahinta u sii akhrido..

14. 4 Saacadood ka horWar deg deg ah, Wasiirkii afraad oo iska casilay golaha Starmer ee UK xilli xaalku sii adkaanayo

    Wasiirka Caafimaadka ee UK, Zubir Ahmed ayaa noqday wasiirkii ugu dambeeyay ee ka tirsan dowladda ee iska casila xilkiisa.

    Warqaddiisa iscasilaadda oo uu ku daabacay barta X, ayuu saaxiibka Wes Streeting ku yiri:“Waxa si cad uga muuqata dhacdooyinkii maalmihii u dambeeyay in shacabka UK ay si buuxda kalsoonidiaadii u lumiyeen adigoo ah ra’iisul wasaare ah.” isaga oo ka wada Starmer

    Iscasilaaddiisu waxay timid kadib markii saddex wasiir kale—Jess Phillips, Alex Davies-Jones iyo Miatta Fahnbulleh—ay sidoo kale xilka ka tageen.

15. 5 Saacadood ka horWar deg deg ah, Iran oo war cusub ka soo saartay Marinka Hormuz si ka duwan sidii hore

    Mas’uul sare oo ka tirsan ciidamada badda ee Ilaalada Kacaanka Iran ayaa sheegay in Iran ay hadda dib u qeexday Marin-biyoodka Hormuz, iyadoo u aragta “aag hawlgal aad u ballaadhan” oo ka fog sidii hore ee xaal ahaa ka hor dagaalka.

    Wakaaladda wararka Fars ee Iran ayaa Talaadadii soo xigatay ku-xigeenka taliyaha siyaasadda ee ciidamada badda Ilaalada Kacaanka, Mohammad Akbarzadeh, oo sheegay in Tehran aysan mar dambe u arkin Marinka Hormuz marin-biyood yar oo ku kooban jasiirado, balse ay hadda u aragto deegaan leh muhiimad istiraatiji iyo ciidan oo aad u ballaadhan.

    Wuxuu yidhi: “Marinka Hormuz hore waxaa loogu qeexi jiray aag kooban oo ku xeeran jasiiradaha sida Hormuz iyo Henjam, laakiin fikraddaasi maanta way is beddeshay.”

    Mas’uuliyiinta Iran kama aysan jawaabin codsi faallo ah oo Reuters u dirtay.

    Wakaaladaha Fars iyo Tasnim ayaa sidoo kale sheegay in aagga loo arko marin-biyoodka uu hadda gaadhay 200 ilaa 300 mayl, halka hore uu u ahaa kaliya 20 ilaa 30 mayl.

16. 5 Saacadood ka horMaxaa dhacaya haddii Starmer iscasilo?

    Waxaa sii kordhaya cadaadiska saaran Raysalwasaaraha UK keir Starmer, kaas oo ku dhawaad boqol xildhibaan oo xisbigiisa doonayaan in uu iscasilo, kaddib guuldarradii xisbiga ka soo gaadhay doorashadii Golayaasha Deegaanka.

    Waxa dhici kara:

    Hadduu iscasilo tartan hoggaamineed ayaa la qabanayaa. Waxaana ay dhici kartaa haddii 20% xildhibaanada xisbiga (hadda waa 81) ay magacaabaan xildhibaan doonaya inuu la tartamo hoggaamiyaha jira. Hore ayuu Starmer ugu sheegay golihiisa wasiirrada in habkan aanu weli bilaaban.

    Yaa beddeli kara Starmer?

    Saddex magac ayaa si weyn loo hadal hayaa: Wasiirka Caafimaadka Wes Streeting, raysal wasaare ku-xigeenkii hore Angela Rayner, iyo duqa magaalada Greater Manchester Andy Burnham. Si kastaba, Streeting iyo Rayner midkoodna si cad uma sheegin goorta ay tartan geli doonaan, halka Burnham aanu hadda xildhibaan ahayn kadib markii laga hor istaagay inuu tartamo bishii Janaayo.

    Goorma ayuu Starmer noqday ra’iisul wasaare?

    Wuxuu xilka qabtay 2024 kadib markii uu ku guuleystay doorasho guud, taas oo xisbiga Labour uu helay 412 kursi, taasoo siisay aqlabiyad 174 ah. Hadda waxay haystaan 403 kursi. Starmer wuxuu hoggaaminayay xisbiga Labour-ka tan iyo 2020.

    Starmer ma qaban karaa doorasho guud?

    Haa, ra’iisul wasaaruhu wuxuu awood u leeyahay inuu qabto doorasho guud. Starmer waa inuu boqorka ka codsadaa in Baarlamaanka la kala diro—taas oo ah in Westminster doorasho laga aado—markaasna 650-ka xildhibaan ee doonaya inay kursigooda sii hayaan waa inay dib isu soo sharaxaan.

    Goormaa la qabanayaa doorashada guud ee xigta ee UK?

    Waa in la qabtaa ka hor 15 Agoosto 2029, balse sida hore loo sheegay, Starmer wuxuu go’aansan karaa inuu doorasho qabto ka hor taariikhdaas.

17. 6 Saacadood ka horMuseveni oo markii 7aad mar kale xilka loo dhaariyey

    Madaxweynaha Uganda, Yoweri Museveni (81 jir), ayaa loo dhaariyay xilka markii toddobaad oo xidhiidh ah kadib markii uu si weyn ugu guuleystay doorasho muran dhalisay oo dhacday bishii Janaayo. T

    aasoo sii kordhinaysa muddada uu xilka hayo, isaga oo ka sii mid ahaanayaa hoggaamiyeyaasha Afrika ee ugu muddada dheer ee xilka haya.

    Amniga ayaa aad loo adkeeyey, gawaadhi gaashaaman, oo ay ku jiraan taangiyo ciidan, ayaa la geeyay magaalada caasimadda ah ee Kampala ka hor munaasabadda dhaarinta, si loo ilaaliyo ammaanka.

    Khudbaddiisa dhaarinta, Museveni wuxuu sheegay in muddadan cusub ay tahay waqti “aan hurdo jirin”, isagoo ugu baaqay shacabka inay xoogga saaraan abuurista shaqooyin iyo kobcinta dhaqaalaha, isla markaana la sii dhiso horumarka 40‑kii sano ee la soo dhaafay.

    Museveni ayaa lagu dhawaaqay inuu helay in ka badan 70% codadka, waxaana muddadiisu dhammaan doontaa 2031.

    Si kastaba, mucaaradka ugu weyn, Bobi Wine, ayaa diiday natiijada, isagoo sheegay inay doorashadu ku dhacday musuq iyo wax isdaba marin. Saraakiisha doorashada ayaa beeniyay eedahaas.

    Bobi Wine oo 44 jir ah, magaciisana rasmiga ah yahay Robert Kyagulanyi, ayaa dalka ka baxay kadib doorashada, isaga oo sheegay inuu ka baqayay in la beegsado.

18. 6 Saacadood ka horUK: Golihii wasiirrada oo qaar iscasileen si ay xaaladda ugu adkeeyaan Raysalwasaare Starmer

    Ra’iisul Wasaare Sir Keir Starmer ayaa wajahaya cadaadis xooggan oo kaga imanaya xisbiga Labour si uu xilka uga dego, kadib doorashooyin uu xisbigu si xun uga soo baxay. waxaana iscasilay ku dhex wasiir golihiisa wasiirrada.

    • Qaar ka mid ah wasiirradiisa, oo uu ku jiro Wasiirka Arrimaha Gudaha Shabana Mahmood, ayaa ku booriyay inuu dejiyo jadwal uu xilka kaga degayo.
    • Si kastaba, Starmer ayaa sheegay inuusan iscasilayn, wuxuuna u sheegay cid kasta oo rabta inay hoggaanka kula tartanto inay si rasmi ah u shaaciso.
    • Ilaa hadda, ma jiro xildhibaan si rasmi ah tartankiisi u shaaciyey, taas oo u baahan taageerada 81 xildhibaan (20% xildhibaanada Labour).
    • Wasiirro muhiim ah oo ay ka mid yihiin Steve Reed iyo Pat McFadden ayaa weli taageeraya Starmer.
    • Laakiin qaar kale sida Wasiirka Caafimaadka Wes Streeting kama hadlin arrinta, taas oo muujin karta kala qeybsanaan.
    • Wasiir Jenny Chapman ayaa qirtay in dood ku saabsan hoggaankiisa socoto, balse waxay sheegtay inaysan jirin cid toos uga hortimid kulankii golaha wasiirrada.

    Guud ahaan: Starmer wuu diiday inuu iscasilo, laakiin cadaadis siyaasadeed oo xooggan ayaa sii kordhaya gudaha xisbigiisa

19. 8 Saacadood ka horCabdikariin Axmed Mooge, ma isagaa doortay mise waa lagu qasbay in uu xilka banneeyo?

    Duqii hore ee magaalada Hargeysa, Cabdikariin Axmed Mooge, ayaa xilka laga qaaday kadib mooshin ay gudbiyeen xubno ka tirsan golaha deegaanka Hargeysa.

    Inkastoo hore loo sheegay in xil ka qaadista lagu saleeyay arrimo shaqo, haddana dhacdadan ayaa timid xilli uu Cabdikariin hore u shaaciyey inuusan aqbalayn muddo korodhsi, islamarkaana uu xilka banneyn doono marka ay dhammaato muddadiisa sharciga ah.

    Cabdikariin wuxuu hore u muujiyay mowqif cad oo ahaa inuusan doonayn inuu kursiga sii joogo waqti ka baxsan mudadii loo doortay, taas oo dad badan u fasirteen inuu ixtiraamayo nidaamka iyo isbeddelka maamulkam marka xilligiisu dhammaado.

    Waxaana uu sheegay saaka: "Anigoo faraxsan ayaan saaka halkan imi, aniga oo faraxsanna saaka halkan waanka tagayaa. waxaanan Ilaahay ugu mahadnaqayaa in uu qalbigaya ka saaray in aan kursiga jeclaado."

    Si kastaba, inkastoo uu hore u sheegay inuu xilka wareejin doono marka waqtigiisu dhammaado, haddana xilka kama uusan degin si iskiis ah wakhttigan, balse waxaa xilka ka qaaday xubno ka tirsan golaha deegaanka, kuwaas oo doortay maayar cusub iyo ku xigeenkiisa, xilli eedo lagusoo oogay.Dhammaadka bishan ayaa la filayaa in Cabdikariin iska casilo xilka xubinnimada Golaha Deegaanka Hargeysa, isaga oo fulinaya ballankii uu hore u qaaday.

20. 9 Saacadood ka horBBC-da oo fahamsan in Starmer is adkaynayo xilli laga dalbanayo in uu 'iscasilo'

    Wasiirro dhowr ah oo ka tirsan golaha wasiirrada ayaa isku dayay inay kala hadlaan raysalwasaare Keir Starmer arrinta hoggaaminiisa kadib kulankii golaha, balse sida ay BBC fahamsan tahay, wuu ka gaabsaday inuu la hadlo.

    Xaaladdan ayaa ku soo beegmaysa xilli ay sii kordhayaan codadka xibigiisa si gaar ah xildhibaannada Labourka oo doonayo in uu iscasilo, kaddib guuldarradii Xisbiga Shaqaalaha ka soo gaadhay Golayaasha Deegaanka.