छात्रावासमा हमला गरेको आरोपमा रुसी राष्ट्रपतिद्वारा युक्रेनसँग बदला लिने वाचा

रुसी राष्ट्रपति भ्लादिमिर पुटिनले युक्रेनले कब्जामा रहेको पूर्वी युक्रेनको एउटा विद्यार्थी छात्रावासमा घातक आक्रमण गरेको आरोप लगाउँदै त्यसको बदला लिने वाचा गरेका छन्।

लुहाएन्स्क क्षेत्रको स्टारोब्लिस्क सहरमा राति भएको हमलामा छ जनाको मृत्यु हुनुका साथै ३९ जना घाइते भएका पुटिनले बताएका छन्। अन्य १५ जना बेपत्ता भएका छन्।

युक्रेनको सेनाले स्टारोब्लिस्कमा रहेको रुबिकन ड्रोन सैन्य इकाइको मुख्यालयमा आक्रमण गरेको बताएको छ। तर उसले रुसले भनेकै भवन नै हो वा होइन भन्ने खुलाएको छैन।

"यो क्षेत्रमा कुनै सैन्य केन्द्र, गुप्तचर सेवा वा सम्बन्धित सेवाहरू छैनन्," पुटिनले मस्कोमा भने।

"त्यसैले हाम्रो हवाई रक्षा वा विद्युतीय युद्ध प्रणालीको परिणामको रूपमा गोला बारुद भवनमा प्रहार भएको दाबी गर्ने कुनै आधार छैन," उनले शुक्रवार क्रेमलिनस्थित निवासमा भएको एउटा कार्यक्रममा भने।

उनले कसरी प्रतिकार गर्ने भन्ने विषयमा रुसी सेनालाई आफ्नो 'प्रस्ताव' तयार गर्न आदेश दिए।

उनले १६ वटा ड्रोन प्रयोग गरेर तीन लहरमा युक्रेनी आक्रमण भएको बताएका छन्।

रुसको सरकारी टेलिभिजनले घाइतेमध्ये एकजना छात्राको पहिचान गरेको छ र उनी १९ बर्सिया डायना शोभकुन भएको जनाएको छ।

कङ्क्रिटको स्ल्याब भत्किएर खसेपछि उनको टाउकोमा चोट लागेको टेलिभिजनमा प्रसारित रिपोर्टमा जनाइएको थियो।

मस्कोले मारिएका भनिएका व्यक्तिहरूको कुनै फोटो वा भिडिओ देखाएको छैन।

रुसको नोभोरोसिस्क बन्दरगाहमा रहेको तेल डिपोमा ड्रोनको भग्नावशेष खस्दा दुई जना घाइते भएको रुसी अधिकारीहरूले शनिवार बिहान जानकारी दिएका छन्।

दक्षिणी क्रास्नोडार क्षेत्रको जेनेरल हेडक्वार्टर्सले "धेरै प्राविधिक प्रशासनिक भवनहरूमा आगलागी भएको" र ड्रोनको टुक्राहरू इन्धन टर्मिनलमा खसेको बताएको छ। घाइते भएका दुई जनाको अस्पतालमा उपचार भइरहेको जेनेरल हेडक्वार्टर्सले जनाएको छ। कसैको पनि मृत्यु भएको विवरण आएको छैन।

जेनेरल हेडक्वार्टर्सले ड्रोनले उत्तरमा रहेको बन्दरगाह सहर अनापाका निजी घरहरूमा पनि क्षति पुर्‍याइएको जनाएको छ।

शुक्रवार अबेर युक्रेनको सेनाले रुबिकनको स्टारोब्लिस्कस्थित मुख्यालयलाई लक्षित गरी रातभरि आक्रमण गरेको बताएको छ।

यसले विशेष ड्रोन युनिटका लडाकुहरूले युक्रेनमा नियमित रूपमा नागरिक र नागरिक पूर्वाधारमा आक्रमण गरेको आरोप लगाएको छ।

विज्ञप्तिमा यो पनि भनिएको छ कि युक्रेनको सेनाले "मानवीयतासम्बन्धी अन्तर्राष्ट्रिय कानुन, कानुन र युद्धसम्बन्धी कानुनको कडा रूपमा प्रतिवाद गर्दै सैन्य पूर्वाधार र सैन्य उद्देश्यका लागि प्रयोग हुने सुविधाहरूमा क्षति पुर्‍याइरहेको छ।"

युक्रेनका राष्ट्रपति भोलोदिमिर जेलेन्स्कीले बिहीवार युक्रेनको दक्षिणी खेअरसन क्षेत्रको मस्कोले कब्जा गरेको रुसको रक्षा सेवा एफएसबीको मुख्यालयमा आक्रमण गरिएको बताएका छन्।

उनले करिब १०० रुसी "कब्जा गर्नेहरू" या त मारिएका छन् वा घाइते भएका बताएका छन्।

मस्कोको सेनाले यो विषयमा कुनै टिप्पणी गरेको छैन। तर क्रेमलिन समर्थक एउटा टेलिग्राम च्यानलले "ठूलो ड्रोन हमला" पछि "हताहत" भएको विवरण दिएको थियो।

युक्रेनले सन् २०२२ मा मस्कोको पूर्ण स्तरको आक्रमणको सुरुदेखि नै रुसी सेनाले जानाजानी सर्वसाधारणलाई निशाना बनाएको आरोप बारम्बार लगाएको छ।

गत साता युक्रेनका अधिकारीहरूले रुसी क्षेप्यास्त्रले राजधानी कियभमा रहेको एउटा बहुतल्ले आवासीय भवनमा क्षति पुर्‍याउँदा तीन जना बालिकासहित २४ जनाको ज्यान गएको जनाएका थिए।

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।