तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
'इजरेल र हिज्बुल्लाहबीच एक अर्कामाथि आक्रमण रोक्ने सहमति'
अमेरिकी मध्यस्थतामा इजरेल र हिज्बुल्लाहबीच एक अर्कामाथि आक्रमण रोक्ने सहमति भएको लेबननले जनाएको छ।
अमेरिकास्थित लेबननको दूतावासले इजरेलले लेबननको राजधानी बेरुतमा आक्रमण रोक्ने र हिज्बुल्लाहले पनि इजरेलमाथि आक्रमण नगर्ने अमेरिकी योजना हिज्बुल्लाहले स्वीकार गरेको जनाएको छ।
इजरेली प्रधानमन्त्री बेन्जमिन नेतन्याहूले उक्त सम्झौता भएको पुष्टि गरेका छन्। यद्यपि हिज्बुल्लाहले इजरेली नागरिकमाथि आक्रमण नरोके बेरुतमा आक्रमण जारी रहने उनको चेतावनी छ।
यसअघि अमेरिकी राष्ट्रपति डोनल्ड ट्रम्पले आफूले नेतन्याहू र हिज्बुल्लाहका प्रतिनिधिसँग कुरा गरेको र "उनीहरूले सबै गोलाबारी रोक्ने सहमति जनाएको" बताएका थिए।
इरानले लेबननमा जारी इजरेली सैन्य गतिविधिले अमेरिका र इरानबीच युद्धविरामलाई खतरा पुर्याइरहेको चेतावनी दिएपछि ट्रम्पले दुवै पक्षसँग कुराकानी गरेका थिए।
इजरेली अडान र झडपका विवरण
लेबननको दूतावासले सोमवार अबेर जारी गरेको विज्ञप्तिमा "हिज्बुल्लाहले पनि इजरेलमाथि आक्रमण नगर्ने सर्तमा बेरुतको दक्षिणी क्षेत्रमा इजरेलले आक्रमण रोक्ने" "पारस्परिक सहमति" भएको जनाएको छ। उक्त विज्ञप्तिमा सम्पूर्ण "लेबननभरि" नै यो युद्धविराम लागु हुने जनाइएको छ।
तर इजरेली प्रधानमन्त्री नेतन्याहूले "इजरेल डिफेन्स फोर्स 'आईडीएफ'ले योजना अनुसार दक्षिणी लेबननमा आफ्नो उपस्थिति कायम राख्ने" बताएका छन्।
ट्रम्पले दुवै पक्ष भिडन्त रोक्न सहमत भएको बताएपछि पनि केही स्थानमा झडपहरू भएका विवरण आएका थिए।
हिज्बुल्लाहले उत्तरी इजरेलका दुई वटा गाउँ नजिक इजरेली ट्याङ्क र सैनिकमाथि ड्रोन आक्रमण र गोलाबारी गरेको थियो। इजरेली सेनाले लेबननबाट प्रहार गरिएका दुई वटा 'प्रोजेक्ट'लाई निष्क्रिय बनाइएको जनाएको छ। यो घटनामा मानिसहरू घाइते भएको विवरण आएको छैन।
लेबननको सरकारी समाचार एजेन्सीले दक्षिणी क्षेत्रमा इजरेली आक्रमणहरू भएको जनाएको छ र डेब्बीन सहरमा "ठूलो विस्फोट" भएको बताएको छ।
इरानको चेतावनी
यसअघि इजरेली प्रधानमन्त्रीले हिज्बुल्लाहले गरेको रकेट र ड्रोन आक्रमणको जबाफमा बेरुतका दक्षिणी क्षेत्रका "आतङ्कवादी निशानामा" आक्रमण गर्न आदेश दिएका थिए।
लगत्तै इरानी अधिकारीहरूले आक्रमण रोक्न चेतावनीहरू दिए। इरानी विदेशमन्त्री अब्बास अराग्चीले अमेरिका र इरानबीचको युद्धविराम लेबननमा उल्लङ्घन भए "सबै मोर्चामा युद्धविराम उल्लङ्घन ठहर्ने" चेतावनी दिए।
सँगसँगै इरानको तस्नीम समाचार एजेन्सीले लेबननमा इजरेलका सैन्य कारबाहीका कारण तेहरानले अमेरिकासँग भइरहेको अप्रत्यक्ष वार्ता पनि रोक्न सक्ने समाचार प्रकाशित गर्यो।
इरानको इस्लामिक रेभलूशनरी गार्ड कोर (आईआरजीसी)सम्बद्ध उक्त समाचार एजेन्सीले इरान र उसका सहयोगीहरूले लाल सागरको प्रवेश मार्ग "बाब अल–मान्डबको जलमार्ग सहितका मोर्चाहरू सक्रिय गर्न सक्ने" उल्लेख गरेको थियो। बाब अल-मान्डब जलमार्ग लाल सागरको अरबी किनारतर्फ यमन र अफ्रिकातर्फ जिबुटी र एरेट्रियाको बीचमा अवस्थित छ। सूइज कनालमा पुग्न हिन्द महासागर र एडेनको खाडीबाट आउने पानीजहाजहरू उक्त मार्ग भएर जानुपर्छ।
त्यसपछि ट्रूथ सोशलमा पोस्ट गर्दै ट्रम्पले इरानसँगको वार्ता "तीव्र गतिमा" जारी रहेको र आफूले नेतन्याहू अनि हिज्बुल्लाह दुवै तर्फका प्रतिनिधिसँग कुरा गरेको उल्लेख गरे।
"मैले इजरेलका प्रधानमन्त्री नेतन्याहूसँग निकै परिणाममुखी संवाद गरेको छु र बेरुतमा कुनै पनि सेना जाने छैनन्। बाटोमा रहेका सेना पनि फर्काइसकिएको छ," अमेरिकी राष्ट्रपतिले ट्रूथमा लेखेका छन्।
"त्यसैगरी हिज्बुल्लाहसँग पनि उच्चस्तरका प्रतिनिधिमार्फत् मेरो कुरा भएको छ। उनीहरू गोलाबारी रोक्न सहमत भएका छन्। इजरेलले उनीहरूमाथि आक्रमण गर्दैन र उनीहरूले पनि इजरेलमाथि आक्रमण नगर्ने भएका छन्।"
अमेरिकी विदेशमन्त्री मार्को रुबिओले आइतवार इजरेली प्रधानमन्त्री र लेबननका राष्ट्रपतिसामु लेबननमा जारी तनाव कम गर्ने प्रस्ताव अघि सारेको बताएका थिए।
बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।
