Tha piseach air tighinn air seirbheis Tagsa Uibhist a tha a-nis "math"

Ceann togalaich le soidhne geal is buidhe air a bheil sgrìobhte Tagsa Uibhist. Tha cumadh cridhe buidhe sa mheadhan le na litrichean TU na bhroinn.

Tha luchd-sgrùdaidh ag ràdh gun tàinig piseach air seirbheis a tha a' cumail taice ri daoine nan dachaighean ann an Uibhist.

Bha aithisg a rinneadh an dèidh sgrùdaidh air Tagsa Uibhist sa Ghearran air ceithir roinnean a mheas mar "math gu leòr". B' iad sin:

  • taic sunnd

  • ceannas

  • sgioba an luchd-obrach

  • planadh cùraim

Chaidh iarraidh air a' bhuidhinn còig leasachaidhean a chur an sàs:

  • làimhseachadh chungaidhean-leighis

  • planadh cùraim

  • barantas inbhe a' chùraim

  • trèanadh luchd-obrach

  • comasachd

Cha deach na h-iarrtasan uile a choileanadh an dèidh dà sgrùdadh eile gun rabhadh sa Chèitean agus san Iuchar.

Ge-tà, an dèidh dhaibh tilleadh gun innse ro làimh o chionn ghoirid, mheas luchd-sgrùdaidh gun robh na ceithir roinnean a-nis aig ìre "math", agus gun deach na còig iarrtasan aca a choileanadh.

Tha an aithisg as ùire aig Buidheann-sgrùdaidh a' Chùraim a' ciallachadh gu bheil barrachd neartan na laigsean aig Tagsa Uibhist.

Thuirt luchd-sgrùdaidh gu bheil luchd-cleachdaidh na seirbheis a' faighinn cùraim bho luchd-obrach a b' aithne dhaibh gu math.

Rinn iad moladh air "ceannardan aig an robh smachd air gach roinn den t-seirbheis", agus thuirt an luchd-obrach gun d' fhuair iad taic a bharrachd bho mhanaidsearan.