Stiùidio teiripe-ealain ùr do Bheinn na Faoghla

Tha an carthannas coimhearsnachd Tagsa Uibhist, taobh a-muigh (TU) air cead fhaighinn stiùidio teiripe-ealain a stèideachadh gus cur ris na seirbheisean slàinte-inntinn agus sunnd aca do dhaoine eadar Èireisgeigh agus Beàrnaraigh.

Thug Comhairle nan Eilean Siar cead don ghoireas ùr ann am Beinn nam Faoghla.

Thuirt Manadsair Seirbheis Slàinte-Inntinn agus Sunnd TU, Catriona NicAonghais, gum biodh e na "ghoireas airson ath-shlànachaidh, dàimhean agus seasmachd sa choimhearsnachd".

Thuirt i: "Tha fios againn gu bheil an t-iarrtas airson taic le slàinte-inntinn an Uibhist a' sìor fhàs, ach chan eil na tha de dh'àitichean a' coinneachadh ris an sin.

"Thàinig leudachadh mòr air an t-seirbheis Slàinte-Inntinn agus Sunnd againn agus tha i a-nis a' cuideachadh inbheach, chloinne, dhaoine òga, phàrantan, dhaoine le seargadh-inntinn, luchd-cùraim agus dhaoine a tha a' fulang aonaranachd."

Bidh an stiùidio ann an gàrradh coimhearsnachd na buidhne aig a' phrìomh làraich aca aig a' Champa an Ear ann am Baile a' Mhanaich.

Thuirt Àrd-oifigear na buidhne, Chris MacLullaich, gur e "leasachadh air leth cudromach do Thagsa Uibhist agus dha na daoine ris a bheil sinn a' cumail taic air feadh Uibhist".

Fhuair am pròiseact £15k bho NHS nan Eilean Siar sa Mhart airson leigeil leotha an togalach sam bi an stiùidio a cheannach.

Tha iad cuideachd air granta £10,000 fhaighinn bho Chaidreachas nan Clothworkers airson an talamh timcheall air an togalach a leasachadh.