Shin Koriya ta Kudu za ta tura sojoji zuwa Mashigin Hormuz?

Ana ci gaba da yada jita-jita da hasashe cewa gwamnatin Koriya ta Kudu na duba yiwuwar tura sojoji da kayan aikin soja zuwa Mashigin Hormuz.

Ma'aikatar Tsaron Koriya ta Kudu ta sanar da cewa ƙasar ta tura wata tawaga zuwa Hadaddiyar Daular Larabawa (UAE) a ƙarshen makon da ya gabata domin tantance halin tsaro da kuma yanayin gudanar da ayyuka a Mashigin Hormuz.

Wani jami'in ma'aikatar ya ce tawagar tana nazarin yanayin tsaro da halin da ake ciki a filin aiki, amma ya jaddada cewa wannan aiki ba yana nufin cewa tura sojoji yana gab da faruwa nan take ba.

Ya ce: "Ba a gudanar da wannan bita da zaton cewa za a tura sojoji ba, kuma har yanzu ba a yanke wata shawara game da tura sojoji ba."

Ba a bayyana adadin mambobin tawagar ko wuraren da suka ziyarta ba. Sai dai ana kyautata zaton cewa ƙarama ce, kuma ta ƙunshi jami'ai daga Ma'aikatar Tsaro, Rundunar Hafsoshin Sojoji ta Haɗin Gwiwa , da kuma Rundunar Sojin Ruwa ta Koriya ta Kudu.

Amma waɗanne matakai ne ya kamata a bi kafin a aiwatar da tura sojoji?

Matakan tura sojoji: daga binciken yanayin filin aiki zuwa horas da sojoji.

A cewar rahotanni, tawagar na duba sansanonin soja da tashoshin jiragen ruwa da suka dace domin saukar jiragen ruwa, da kuma wuraren tallafi na cikin gida, ciki har da gyare-gyare da harkokin sufuri da samar da kayayyaki , waɗanda za a iya amfani da su idan aka tura sojojin Koriya ta Kudu zuwa yankin.

Koriya ta Kudu tana da sansanin soja a Hadaddiyar Daular Larabawa (UAE), kuma ƙasar tana da cibiyoyin da ke tallafa wa ayyukan sojin sama, ciki har da Sansanin Sojin Sama na Al Dhafra, wanda sojojin Amurka ke amfani da shi.

Jiragen ruwa masu sintirin na P-8A Poseidon, na taimakawa jiragen ruwa msu dakon kayayyayaki, da dakarun rundunonin kwararru da kan abubuwa masu fashewa (Explosive Ordnance Disposal - EOD) na daga cikin zaɓuɓɓukan da ake la'akari da su domin tura wa yankin. Sai dai har yanzu ba a tantance ainihin nau'in rundunonin da kayan aikin da za a tura ba, ko adadinsu, ko kuma takamaiman aikin da za su gudanar.

Ana sa ran tawagar ta koma gida a cikin wannan makon domin gabatar da rahotonta. Bayan Ma'aikatar Tsaro ta yi nazari kan sakamakon rahoton, ana iya miƙa batun ga Majalisar Tsaron Ƙasa domin duba matakan da za a ɗauka na gaba.

Ma'aikatar Tsaron Koriya ta Kudu ta bayyana cewa rahotannin da ke cewa Amurka ta buƙaci Koriya ta Kudu ta tura sojoji zuwa yankin nan da watan Nuwamba "ba gaskiya ba ne."

Tura tawagar bincike zuwa UAE shi ne mataki na farko wajen yanke shawarar ko za a tura sojoji ko a'a. Ko da bayan an gabatar wa gwamnati sakamakon binciken, ba za a yanke shawarar tura sojoji nan take ba

Da farko, Rundunar Hafsoshin Sojoji ta Haɗin Gwiwa za ta yi nazarin shirin farko na tura sojoji bisa ga sakamakon da tawagar bincike ta tattara. Daga nan, shugaban rundunar sojojin kasa zai gabatar da shirin ga Ministan Tsaro, wanda shi kuma zai miƙa rahoto ga Majalisar Tsaron Ƙasa (National Security Council).

Bayan Majalisar Tsaron Ƙasa ta yanke shawara kan manufofin tura sojoji, Ma'aikatar Tsaro za ta shirya daftarin dokar tura sojoji wanda zai fayyace yankin da za a tura su, manufar aikin, ayyukan da za su gudanar, yawan sojojin da za a tura, da kuma tsawon lokacin da za su kasance a wurin.

Daga nan, kudirin neman amincewa da tura sojojin za a miƙa shi ga Majalisar Dokoki ta Ƙasa . Kafin hakan, dole ne gwamnati ta yi nazari a kansa, a gabatar da shi a taron Majalisar Ministoci sannan Shugaban Ƙasa ya amince da shi.

Sashe 60, layi na 2 na Kundin Tsarin Mulkin Jamhuriyar Koriya ta Kudu ya bai wa Majalisar Dokoki ta Ƙasa ikon amincewa da tura sojojin ƙasar zuwa ƙasashen waje. Saboda haka, ko da gwamnati ta yanke shawarar tura sojoji, dole ne ta samu amincewar Majalisar Dokoki kafin a aiwatar da wannan shawarar a hukumance.

Bayan an samu amincewar majalisa, za a isar da umarnin fara shirye-shiryen tura sojojin ga Shugaban Rundunar Hafsoshin Sojoji ta Haɗin Gwiwa . Daga nan ne za a fara aiwatar da matakai kamar:

Sojojin da za a tura dole ne su samu horo kan yanayin yankin, al'adun mutanen wurin, ƙa'idojin tsaro, da kuma yanayin aikin da za su gudanar. Idan jiragen sama ko jiragen ruwa ne za a tura, dole ne a tsara yadda za a yi gyaransu da samar musu da kayan aiki a wurin aiki, tare da tsara yadda za a kai su zuwa yankin da za su yi aiki.

Saboda haka, ko da gwamnati ta yanke shawarar tura sojoji, yana iya ɗaukar lokaci mai tsawo kafin sojojin da kayan aikinsu su isa wurin da za su gudanar da aikinsu. Wannan saboda akwai matakai masu yawa da suka haɗa da samun amincewar majalisa, kafa rundunar da za a tura, zaɓen sojoji, shirya kayan aiki, gudanar da horo, da kuma tsara harkokin sufuri da tallafi kafin a fara aikin a hukumance.

Samun amincewar a majalisa da rinjaye shi ne muhimmin abin da ke yanke hukunci na ƙarshe kan tura sojojin Koriya ta Kudu zuwa Mashigin Hormuz.

Babban cikas na ƙarshe kafin a tura sojoji shi ne samun amincewar Majalisar Dokoki ta Ƙasa Ana iya amincewa da shirin tura sojojin ne kawai a zaman majalisa idan mafi yawan dukkan 'yan majalisa sun halarta, kuma mafi yawan waɗanda suka halarta suka kaɗa ƙuri'ar amincewa da shi.

A halin yanzu, Jam'iyyar Democratic Party of Korea mai mulki tana riƙe da rinjayen kujeru a Majalisar Dokoki. Saboda haka, idan jam'iyyar ta ɗauki goyon bayan kudirin a matsayin matsayinta na hukuma, akwai yiwuwar kudirin ya samu nasarar wucewa.

Sai dai kuma, akwai masu adawa da wannan mataki har ma a cikin jam'iyyar mai mulki, lamarin da ke sa sakamakon ƙuri'ar ya kasance ba mai sauƙin hasashe ba.

Ɗan majalisar Democratic Party, Lee Ki-hoon, ya fito fili ya nuna adawarsa da shirin, inda ya ce ko da za a tura kayan aiki da sojojin da ba na faɗa ba, "ainihin ma'anar wannan mataki ita ce shiga yaƙi a sarari."

Jam'iyyun masu ra'ayin ci gaba da ke kusa da jam'iyya mai mulki, ciki har da Jam'iyyar Innovation da Jam'iyyar Progressive, da Jam'iyyar Justice, su ma sun bayyana adawarsu ga shirin tura sojoji.

A gefe guda kuma, shugabannin Jam'iyyar Democratic Party suna nuna taka-tsantsan kan lamarin, suna mai jaddada cewa har yanzu gwamnati ba ta kammala tsara manufofinta kan batun ba.

Bugu da ƙari, an fara ganin wasu motsi na adawa da tura sojoji daga cikin sansanin masu mulki kansu, lamarin da ke nuna cewa batun na fuskantar sabani ba kawai daga jam'iyyun adawa ba, har ma daga wasu mambobin jam'iyyar mai mulki.

Jadawalin ayyukan Majalisar Dokoki ta Ƙasa ma wani muhimmin abu ne da zai iya tasiri kan batun. Da yake an shirya zaman tantance ministoci da kuma zaman sa ido da binciken ayyukan gwamnati a watan gobe, ko da gwamnati ta miƙa kudirin neman amincewa da tura sojoji, yana iya ɗaukar lokaci kafin a yi nazari a kansa sannan a kaɗa ƙuri'a a zaman majalisa gaba ɗaya.

A wani bangare kuma, adawa daga ƙungiyoyin fararen hula da na addinai na ci gaba da ƙaruwa. A ranar 9 ga watan nan, sun gudanar da taron manema labarai a tsakiyar Seoul sannan suka yi tattaki zuwa Fadar Shugaban Ƙasa (Blue Palace) domin nuna rashin amincewarsu da shirin tura sojoji.

Gwamnatin kuma ta ci gaba da jaddada cewa za ta yi la'akari da ra'ayin jama'a da kuma martanin ƙasashen duniya gaba ɗaya kafin ta yanke kowace irin shawara.

Saboda haka, ko da yake a bisa doka samun ƙuri'ar amincewa daga mambobin jam'iyya mai mulk masu rinjaye na iya tabbatar da wucewar kudirin, kasancewar akwai sabani a cikin jam'iyyar mulki da kuma yanayin ra'ayin jama'a a halin yanzu, ba za a iya cewa da cikakken tabbaci cewa tura sojoji za ta tabbata ba.

What have been previous examples of troop deployments?

Wannan ba shi ne karo na farko da Koriya ta Kudu ke nazarin yiwuwar tura sojoji zuwa Gabas ta Tsakiya ba.

Wani fitaccen misali shi ne tura Rundunar Zaytun zuwa Iraki a shekarar 2004. Kafin hakan, Koriya ta Kudu ta riga ta tura Rundunar Sohi domin ayyukan tallafin fararen hula da Rundunar Jama domin ayyukan kiwon lafiya da jinya zuwa Iraki a shekarar 2003, bayan samun amincewar Majalisar Dokoki ta Ƙasa . Sai dai a watan Satumba na wannan shekarar, Amurka ta nemi Koriya ta Kudu da ta ƙara tura wasu sojoji.

Yayin da ake ci gaba da samun sabani a cikin ƙasar kan wannan buƙata, gwamnatin Koriya ta Kudu ta ɗauki hanyar sulhu ta hanyar mayar da babban aikin rundunar da za a tura kan wanzar da zaman lafiya da ayyukan sake gina ƙasa, maimakon shiga faɗa kai tsaye.

A ranar 24 ga Satumba na waccan shekarar, gwamnatin Koriya ta Kudu ta tura wata tawaga zuwa Iraki domin gudanar da bincike da tantance halin da ake ciki a fagen daga. Bayan nazarin sakamakon binciken, gwamnatin ta yanke shawarar ƙara tura sojoji a watan Oktoba.

Daga bisani, Majalisar Dokoki ta Ƙasa ta amince da tura sojojin a watan Fabrairu na shekarar 2004, kuma a ranar 23 ga wannan watan ne aka kafa Rundunar Zaytun (Zaytoun Unit).

Bayan an kafa rundunar tare da kammala horaswa da atisayen sojojin, an fara tura su a watan Agusta na wannan shekarar. Babbar rundunar, mai ɗauke da kusan sojoji 3,600, ta isa birnin Erbil da ke arewacin Iraki a watan Satumba.

Daga lokacin da Majalisar Dokoki ta amince da tura sojojin zuwa lokacin da babbar rundunar ta isa wurin aikinta, ya ɗauki kusan watanni bakwai. Haka kuma, daga lokacin da aka tura tawagar farko ta binciken fagen daga zuwa lokacin da aka fara ainihin tura sojojin, ya ɗauki kusan shekara guda.

Rundunar Zaytun da ke Erbil ta gudanar da ayyuka da suka haɗa da sake gina ababen more rayuwa, ba da taimakon lafiya da na jin ƙai, da kuma tabbatar da tsaron sansanonin da take aiki a cikinsu.

Sai dai wasu masana da masu sharhi suna ganin cewa ba za a iya kwatanta shirye-shiryen da aka yi wa Rundunar Zaytun kai tsaye da yiwuwar tura jiragen sintirin teku ko jiragen ruwa na tallafin kayayyaki da ake tattaunawa a yanzu ba.

Koriya ta Kudu ta kuma tura rundunar tallafin kiwon lafiya da rundunar jigilar kayayyaki ta sama zuwa Yaƙin Tekun Fasha a shekarar 1991.

A lokacin Yaƙin Iraki na 2003 kuwa, ta tura Rundunar Sohi domin ayyukan injiniya da gine-gine, da Rundunar Jama domin ayyukan kiwon lafiya da jinya.

A shekarar 2020 kuma, maimakon kafa wata sabuwar runduna mai zaman kanta, gwamnatin Koriya ta Kudu ta zaɓi faɗaɗa yankin aikin Rundunar Cheonghae na ɗan lokaci domin ya haɗa da yankin Mashigin Hormuz.

Wannan matakin ya ba Koriya ta Kudu damar mayar da martani cikin sauri ga matsalolin tsaro a yankin ba tare da ɗaukar dogon lokaci wajen kafa sabuwar runduna ba. Rundunar Cheonghae, wadda aka fi sani da aikin yaƙi da fashin teku a yankin Tekun Aden, ta ci gaba da gudanar da ayyukanta yayin da aka faɗaɗa ikon aikinta zuwa Mashigin Hormuz domin kare jiragen ruwa da muradun Koriya ta Kudu a yankin.

Wadannan misalan suna nuna cewa Koriya ta Kudu tana da tarihin tura rundunoni zuwa Gabas ta Tsakiya, amma nau'i, girma, da manufar kowace tura runduna sun bambanta gwargwadon yanayin tsaro da manufofin gwamnati a lokacin.