Amerika yafatiye ibihano komanda wa FDLR na komanda wa M23

    • Umwanditsi, Paul Njie
    • Igikorwa, BBC News
  • Yatangajwe
  • Igihe co gusoma: iminota 3

Leta y'Amerika yafatiye ibihano abakomanda babiri b'imitwe y'inyeshyamba ishinjwa guteza urugomo n'umutekano mucye mu burasirazuba bwa Repubulika ya Demokarasi ya Congo (DRC) bwibasiwe n'intambara.

Mu itangazo byasohoye ku wa kabiri, ibiro bishinzwe kugenzura imitungo yo mu mahanga (OFAC) bya minisiteri y'imari y'Amerika byavuze ko byafatiye ibihano Gustave Kubwayo, wasobanuwe nka komanda w'umutwe w'inyeshyamba wa FDLR urwanya ubutegetsi bw'u Rwanda ukorera mu burasirazuba bwa DRC ukuriye ishami ryawo ry'ubutasi n'ibikorwa byihariye.

Ibyo biro byanafatiye ibihano John Imani Nzenze, uvugwa ko ari komanda akaba n'umukuru w'ubutasi w'umutwe w'inyeshyamba wa M23 urwanya ubutegetsi bwa DRC.

Nta cyo FDLR na M23 bahise batangaza kuri ibi bihano. BBC Gahuzamiryango yagerageje kuvugana n'umuvugizi wa FDLR n'umuvugizi wa M23.

Itangazo rya minisiteri y'imari y'Amerika rigira riti: "FDLR na M23 byigaruriye ubutaka bikoresheje urugomo ndetse byica abasivile mu burasirazuba bwa DRC."

Ryongeyeho riti: "Ku bw'igikorwa cy'uyu munsi, umutungo wose n'inyungu mu mutungo w'abantu bashyiriweho [ibihano] cyangwa babujijwe bavuzwe haruguru biri muri Leta Zunze Ubumwe [z'Amerika] cyangwa bifitwe cyangwa bigenzurwa n'abantu bo muri Amerika birahagaritswe."

Leta y'u Rwanda n'inzobere za ONU bashinja leta ya DRC gufasha FDLR, umutwe witwaje intwaro washinzwe n'abahoze ari abasirikare b'u Rwanda n'abahezanguni bahungiye mu burasirazuba bwa Zaïre, ari yo DRC y'ubu, nyuma ya jenoside yabaye mu Rwanda mu 1994. Kigali ivuga ko izo nyeshyamba ziteje inkeke ku mutekano w'u Rwanda.

Ku rundi ruhande, leta ya DRC n'inzobere za ONU bashinja u Rwanda gufasha M23, umutwe witwaje intwaro wafashe ubutaka bunini mu burasirazuba bwa DRC mu mwaka ushize.

Minisitiri w'imari w'Amerika Scott Bessent yagize ati: "Urugomo ruhoraho rukorwa n'imitwe yitwaje intwaro ruhuhura amakuba ajyanye n'imibereho asanzwe ameze nabi ndetse ruteje inkeke ku nyungu z'Amerika mu karere."

Yongeyeho ati: "Ibihano by'uyu munsi bishyigikiye igisubizo kinyuze mu mahoro ndetse n'irangizwa ry'imeneka ry'amaraso."

Yashishikarije leta ya DRC na leta y'u Rwanda guhagarika ubufasha bwazo ku mitwe yafatiwe ibihano nkuko biteganywa n'amasezerano y'amahoro ibihugu byombi byashyizeho umukono mu Kuboza (12) mu mwaka wa 2025, yayobowe n'Amerika.

Ubu si ubwa mbere abo mu mitwe yitwaje intwaro ikorera muri DRC bafatiwe ibihano. Ariko izo ngamba z'ibihano zananiwe guhagarika imirwano mu burasirazuba bw'icyo gihugu.