Ikoranabuhanga ry'ejo hazaza: Indege y'intambara izajya isoma ibitekerezo by'umuntu

Mu Ntambara ya Kabiri y'Isi, abapilote b'indege z'intambara zitwaga Spitfire bavuze ko indege zabo zari ifite ubushobozi buteye imbere cyane mu kurwana intamabara.

Abapilote b'indege z'intambara bo mu myaka ya 2030 bo bashobora kuzagirana umubano wa hafi n'indege zabo z'intambara kuko izi ndege zizaba zifite ubushobozi bwo gusoma ibitekerezo byabo, nk'uko abahanga babivuga.

Izi ni indege za Tempest ubu zirimo gukorwa n'ikigo cy'ingabo z'Ubwongereza BAE Systems, Rolls-Royce, uruganda rwa misile MDBA hamwe n'uruganda Leonardo rwo muri Italy.

Kimwe mu bintu bikorwa kuri iyi ndege ni icyuma cy'ubwenge buhangano buzwi nka Artificial Intelligence (AI) cyo gufasha umupilote w'umuntu mu gihe ananiwe cyangwa ari mu muhangayiko mwinshi .

Utwuma tw'ikoranabuhanga tuzakurikirana ibimenyetso by'ubwonko n'andi makuru y'ubuvuzi by'umupilote, bityo, mu ngendo zikurikira, ubuhanga bwa AI buzabashe gukoresha amakuru menshi y'ibipimo by'umubiri n'iby'imitekerereze.

Ubuhanga buteye imbere cyane bwa AI buri mu nzira ihobora gufasha mu gihe ibyuma bipima ubuzima bw'umupilote byerekanye ko hakenewe ubufasha.

Mu imurikagurisha ry'indege rya Farnborough, BAE Systems yavuze ko mu 2027 izajyanayo indege ivuye mu ruganda rwayo rwa Warton muri Lancashire izakora igeregeza kuri iryo koranabuhanga.

Zimwe muri izi ndege zizageragerezwa mu mu mishinga 60 itandukanye y'ikoranabuhanga riteye imbere.

Isura y'indege ya Tempest yarahindutse kuva amafoto yayo ya mbere yashyirwa ahagaragara mu 2018.

Mu byahindutse harimo kugabanuka k'uburemere bwayo, n'imiterere yayo yarahindutse.

Biteganijwe ko igihe izaba igeze mu kirere Tempest ishobora gukikizwa n'indege zidatwarwa n'umupilote (drones).

Abahanga bavuga ko iterambere nk'iryo rizasaba ko hashyirwaho uburyo bushya bwo kurikurikiranira hafi imikorere y'izi ndege.

John Stocker, ushinzwe iterambere ry'ubucuruzi muri Tempest, agira ati: "Tugomba kugendana n'umuvuduko w'impinduka mu ikoranabuhanga."

Stocker arashaka kubaka indege nshya y'intambara ifite sisitemu zishobora kuvugururwa mu buryo bworoshye, mbese bisa nko gukura porogaramu runaka kuri telefoni igendanwa.

Hagati aho, igice kinini cy'inganda zizakora izi ndege kizaba gikoze mu buryo bwikoresha (automatic). Robots ziri gukorwa zizatanga amakuru ku batanga serivisi mu buryo bwihuse.

Muri uyu mushinga kandi, BAE Systems na Leonardo bazafatanya na Mitsubishi yo mu Buyapani.

Umushinga wa Mitsubishi w'ejo hazaza w'indege za FX urasa cyane na Tempest.

Ubu ni ubunararibonye bushya ku bigo by'indege byo mu Burayi, ariko ubufatanye bukomeye n'Ubuyapani bwashobotse kubera imishinga iriho y'ikoranabuhanga.

Stocker aragira ati: "Ushobora gukora ibi bintu vuba cyane mu buryo bw'ikoranabuhanga, ubufatanye buroroshye cyane."

Itsinda ry'abasemuzi n'abakozi bashobora kuvugana neza mu Cyongereza no mu Kiyapani ku bijyanye n'ikoranabuhanga ry'imbere mu gihugu, rizakomeza ubufatanye n'itsinda rya Mitsubishi ry'ingabo zirwanira mu kirere (FX fighter).

Muri Tempest, kandi byitezwe ko AI izafasha umupilote kwakira amakuru atandukanye, menshi y'ubutasi ubundi adashobora gusesengurwa n'ubwonko bw'umuntu.

Uyu mushinga wose uri gukorwa ku bufatanye n'uruganda rukora intwaro rwa MBDA.

Iyi ndege izakoresha moteri nshya ya Rolls-Royce.

Rolls-Royce ikeneye ko ikoresha imbaraga atari mu ndege ya Tempest gusa, ahubwo no mu buryo bwayo bwose bwa digitale.

Ba-injeniyeri ba Rolls-Royce barateganya uburyo bwihariye bwo kugabanya ubushyuhe bwa Tempest.

John Wardell ushinzwe ibikorwa muri Rolls-Royce aragira ati: "Turashaka kugenzura buri gice cy'iyi gahunda."

Leta y'Ubwongereza yamaze gutanga miliyari ebyiri z'amapawundi mu mushinga wa Tempest kandi ayo mafaranga aziyongera mbere yuko indege zitangira gukoreshwa.

BAE Systems ivuga ko mu 2040, Ubwongereza n'ibihugu bifatanyije bizahura n'ibibazo bishya n'intwaro zigezweho zisaba ikoranabuhanga rigezweho kugira ngo bwirengere, ikaba ivuga ko ariyo mpamvu hakenewe indege nka Tempest.

Umushinga w'izi ndege watanze imirimo irenga 20.000, nyuma y'ishoramari rya leta rya miliyari 12 z'amapawundi, nk'uko isosiyete ibivuga