Bamwe mu ba repubulikani bavuga ko Trump ari we watumye batsindwa kandi ko agomba kubibazwa

Nyuma y'aho abademokarate begukanye intsinzi ikomeye yabahaye umwiganze mu nteko no muri Sena, bamwe mu bagize Ishyaka ry'Abarepubulikani batangiye gushinja Perezida Donald Trump uruhare rukomeye muri ayo makuba yageze ku ishyaka ryabo.

Umwe mu baharanira inyungu z'Abarepubulikani, Bill Miller, yavuze ko nta wundi wabazwa ayo makuba uretse Trump ubwe.

Yagize ati: "Ni we ubwe ubiryozwa. Nta wundi. Ibi ni ukwanga no gutera umugongo Perezida Trump mu buryo bwuzuye."

Yakomeje avuga ko ibyabaye ari "amakuba akomeye cyane" kandi ko nta muntu wari witeze ko ibintu byarangira muri ubwo buryo.

Mu Ishyaka ry'Abarepubulikani, ihungabana ryatewe n'ibyavuye mu matora ryahise risimburwa n'uburakari bukomeye bwibasiye Perezida Trump.

Nyuma y'uko Abademokarate batsinze mu buryo butunguranye no mu bice byari bisanzwe bifatwa nk'ibihome by'Abarepubulikani nka Texas, Kansas na South Carolina, bamwe mu badepite n'abajyanama b'ishyaka bavuze ko Trump yibanze cyane ku murage we wa politiki aho kwita ku bibazo byahangayikishaga abaturage.

Gregg Peppin, umuhanga mu ngamba za politiki mu Ishyaka ry'Abarepubulikani, yavuze ko habayeho amakosa menshi akurikirana.

Yagize ati: "Byari amakosa akurikirana nta gahenge. Biragaragara ko muri leta nyinshi abaturage batishimiye politiki za Perezida."

Umwe mu bafatanyabikorwa ba Trump muri White House na we yavuze ko umujinya abaturage bafitiye Perezida wari umaze kugera ku rwego rwo hejuru, cyane cyane nyuma y'intambara ya Iran, imisoro ku bicuruzwa bitumizwa mu mahanga n'ingamba zikomeye zafashwe ku bimukira, ibintu yavuze ko byahuriranye bikagira ingaruka zikomeye ku matora.

Ku ruhande rwa Visi Perezida wa Amerika, JD Vance yavuze ko impamvu nyamukuru yatumye Abarepubulikani batsindwa ari intambara ya Iran.

Mu butumwa burebure yashyize ku rubuga X, Vance yagize ati: "Impamvu twatsinzwe ni intambara."

Vance yemeye ko intambara ya Iran, izamuka ry'ikiguzi cy'ubuzima ndetse n'ibindi bibazo byatumye bamwe mu batoye we na Perezida Donald Trump mu matora yo muri 2024 batera umugongo Ishyaka ry'Abarepubulikani muri uyu mwaka.

Yavuze kandi ko hari abaturage batishimiye politiki ya guverinoma ku bibazo by'abimukira, yongeraho ko yiteguye gushyigikira amavugurura kuri zimwe muri izo gahunda.

Vance yanagaragaje ko na Trump ubwe yavuze ko abaturage bagaragaje kutishimira intambara ya Iran mu matora. Gusa, nyuma y'amezi menshi ashyigikira iyo ntambara ku mugaragaro, Vance yavuze yeruye kurushaho ko ari imwe mu mpamvu nyamukuru yatumye ishyaka rye ritsindwa.

Iri tangazo ryahise rituma benshi batangira kuvuga ku migambi ya Vance mu matora y'umukuru w'igihugu ateganyijwe mu 2028. Abasesenguzi ba politiki bamwe bavuga ko ashobora kuba yarakoresheje uyu mwanya kugira ngo atange ibimenyetso by'uko ateganya kwiyamamariza kuyobora Amerika.

Kugeza ubu, Vance yakomeje kwirinda gusubiza ibibazo bijyanye no kuba yakiyamamariza Perezida. Ariko nyuma y'aya matora, arushaho gushyirwaho igitutu cyo gutangaza vuba icyemezo cye ku hazaza h'umwuga we wa politiki.