அக்வான் புயல் எங்கு உள்ளது? எங்கே கரையைக் கடக்கும்? - சமீபத்திய தகவல்கள்

புயல் இருப்பை காட்டும் செயற்கைக்கோள் படம்
பிரசுரிக்கப்பட்டது
வாசிக்கும் நேரம்: 4 நிமிடங்கள்

வங்கக்கடலில் நிலைகொண்டுள்ள தீவிரப் புயலான அக்வான், வடக்கு நோக்கி நகர்ந்து வருகிறது. இந்தப் புயல் நாளை நவம்பர் 20ஆம் தேதி நண்பகலில் வடக்கு ஆந்திரப் பிரதேசம், ஏனாம் மற்றும் தெற்கு ஒடிசா கடலோரப் பகுதிகளுக்கு இடையே, கோபால்பூருக்கு கிழக்கே கரையைக் கடக்கும் என்று இந்திய வானிலை ஆய்வு மையம் கணித்துள்ளது. அப்போது மணிக்கு 90 முதல் 100 கி.மீ. வேகத்தில் காற்று வீசக்கூடும்; காற்றின் வேகம் மணிக்கு 110 கி.மீ. வரை அதிகரிக்கலாம்.

தமிழ்நாட்டில் நவம்பர் 19 முதல் 22ஆம் தேதி வரை கனமழைக்கான எச்சரிக்கை இல்லை. இருப்பினும், சில இடங்களில் லேசான மழை பெய்ய வாய்ப்புள்ளது. நவம்பர் 23 முதல் 25ஆம் தேதி வரை கனமழை பெய்யக்கூடும் என்று வானிலை ஆய்வு மையம் தெரிவித்துள்ளது.

புயல் எங்கு உள்ளது? எப்போது கரையைக் கடக்கும்?

இந்திய வானிலை ஆய்வு மையத்தின் நவம்பர் 19ஆம் தேதி காலை 5.30 மணி நிலவரப்படி, அக்வான் புயல் மத்திய மேற்கு வங்கக்கடலில் நிலைகொண்டிருந்தது. கடந்த ஆறு மணி நேரத்தில் மணிக்கு 12 கி.மீ. வேகத்தில் வடக்கு நோக்கி நகர்ந்துள்ளது.

அப்போது புயலின் மையம் 14.5 டிகிரி வடக்கு அட்சரேகையிலும் 85.3 டிகிரி கிழக்கு தீர்க்கரேகையிலும் அமைந்திருந்தது.

இது ஆந்திரப் பிரதேசத்தின் நரசாபூரிலிருந்து சுமார் 440 கி.மீ. கிழக்குத் தென்கிழக்கிலும், களிங்கப்பட்டினத்திலிருந்து 440 கி.மீ. தெற்கு தென்கிழக்கிலும் இருந்தது. சென்னையிலிருந்து சுமார் 580 கி.மீ. கிழக்கு வடகிழக்கிலும், ஒடிசாவின் கோபால்பூரிலிருந்து 530 கி.மீ. தெற்கிலும், பூரியிலிருந்து 590 கி.மீ. தெற்கிலும் புயல் மையம் அமைந்திருந்தது.

அடுத்ததாக, இந்தப் புயல் வடக்கு வடமேற்குத் திசையில் நகர்ந்து, நவம்பர் 20ஆம் தேதி நண்பகலில் நரசாபூர் – பூரி இடையே, கோபால்பூருக்கு கிழக்கே வடக்கு ஆந்திரப் பிரதேசம், ஏனாம் மற்றும் தெற்கு ஒடிசா கடலோரப் பகுதிகளைக் கடக்கும் என்று கணிக்கப்பட்டுள்ளது.

கரையைக் கடக்கும்போது மணிக்கு 90 முதல் 100 கி.மீ. வேகத்தில் பலத்த காற்று வீசக்கூடும். அவ்வப்போது காற்றின் வேகம் மணிக்கு 110 கி.மீ. வரை அதிகரிக்கலாம்.

புயல் பாதை கணிப்பு

தமிழ்நாட்டில் மழை பெய்யுமா?

அக்வான் புயல் தமிழ்நாட்டை நேரடியாகக் கடக்காது என்றாலும், அதன் தாக்கத்தால் மாநிலத்தின் சில பகுதிகளில் மழை பெய்ய வாய்ப்புள்ளது. தமிழ்நாட்டில் அடுத்த சில நாட்களில் மழையின் தாக்கம் படிப்படியாக அதிகரிக்கக்கூடும் என, சென்னை வானிலை ஆய்வு மையம் தெரிவித்துள்ளது.

வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

அதன்படி, நவம்பர் 20ஆம் தேதி வரை மேற்குத் தொடர்ச்சி மலைப் பகுதிகளில் மட்டும் ஓரிரு இடங்களில் லேசான மழை பெய்ய வாய்ப்புள்ளது. நவம்பர் 21ஆம் தேதி வட கடலோரத் தமிழ்நாட்டிலும் மழை பெய்யக்கூடும். நவம்பர் 22ஆம் தேதி கடலோர மாவட்டங்களில் மழை அதிகரிக்கத் தொடங்கும்.

நவம்பர் 23ஆம் தேதி பல மாவட்டங்களில் இடியுடன் கூடிய கனமழையும், நவம்பர் 24ஆம் தேதி கடலூர் மற்றும் டெல்டா மாவட்டங்களில் கனமழையும் பெய்யக்கூடும் எனக் கணிக்கப்பட்டுள்ளது.

நவம்பர் 19, வியாழக்கிழமை

தென்தமிழகத்தின் மேற்குத் தொடர்ச்சி மலை மாவட்டங்களின் மலைப் பகுதிகளில் ஓரிரு இடங்களில் லேசான மழை பெய்யக்கூடும். ஏனைய தமிழ்நாடு, புதுச்சேரி, காரைக்கால் பகுதிகளில் பொதுவாக வறண்ட வானிலை நிலவக்கூடும் என வானிலை ஆய்வு மையம் தெரிவித்துள்ளது.

நவம்பர் 20, வெள்ளிக்கிழமை

மேற்குத் தொடர்ச்சி மலை மாவட்டங்களின் மலைப் பகுதிகளில் ஓரிரு இடங்களில் லேசான மழைக்கு வாய்ப்புள்ளது. மாநிலத்தின் ஏனைய பகுதிகள், புதுச்சேரி, காரைக்காலில் பொதுவாக வறண்ட வானிலை நிலவும்.

நவம்பர் 21, சனிக்கிழமை

மேற்குத் தொடர்ச்சி மலை மாவட்டங்களின் மலைப் பகுதிகளிலும், வட கடலோரத் தமிழ்நாட்டின் ஓரிரு இடங்களிலும் லேசான மழை பெய்யக்கூடும். காரைக்கால் பகுதிகளிலும் லேசான மழைக்கு வாய்ப்புள்ளது. ஏனைய தமிழ்நாடு மற்றும் புதுச்சேரியில் பொதுவாக வறண்ட வானிலை நிலவும் என கணிக்கப்பட்டுள்ளது

நவம்பர் 22, ஞாயிற்றுக்கிழமை

கடலோரத் தமிழ்நாட்டின் ஓரிரு இடங்களிலும், புதுச்சேரி மற்றும் காரைக்கால் பகுதிகளிலும் மிதமான மழை பெய்யக்கூடும். கடலோரத் தமிழ்நாட்டை ஒட்டிய மாவட்டங்களின் ஓரிரு இடங்களில் லேசான மழை பெய்ய வாய்ப்புள்ளது. ஏனைய தமிழ்நாட்டில் பொதுவாக வறண்ட வானிலை நிலவும்.

நவம்பர் 23, திங்கட்கிழமை

தமிழ்நாட்டின் பல மாவட்டங்களில் இடியுடன் கூடிய மழை பெய்யக்கூடும் என கணிக்கப்பட்டுள்ளது.

கடலூர், தஞ்சாவூர், திருவாரூர், நாகப்பட்டினம், புதுக்கோட்டை, சிவகங்கை, ராமநாதபுரம், மதுரை, விருதுநகர், தேனி, தென்காசி, தூத்துக்குடி, திருநெல்வேலி, கன்னியாகுமரி ஆகிய மாவட்டங்களின் ஓரிரு இடங்களிலும், காரைக்கால் பகுதிகளிலும் இடியுடன் கூடிய கனமழை பெய்யக்கூடும்.

சென்னை, திருவள்ளூர், செங்கல்பட்டு, காஞ்சிபுரம், ராணிப்பேட்டை, நீலகிரி, கோயம்புத்தூர், திருப்பூர், ஈரோடு, திருவண்ணாமலை, விழுப்புரம், கள்ளக்குறிச்சி, நாமக்கல், கரூர், திருச்சிராப்பள்ளி, பெரம்பலூர், அரியலூர், திண்டுக்கல் ஆகிய மாவட்டங்களின் ஒருசில இடங்களிலும், புதுச்சேரியிலும் இடியுடன் கூடிய மிதமான மழை பெய்ய வாய்ப்புள்ளது.

ஏனைய தமிழ்நாட்டின் ஒருசில இடங்களில் இடியுடன் கூடிய லேசான மழை பெய்யக்கூடும்.

நவம்பர் 24, செவ்வாய்க்கிழமை

கடலூர், தஞ்சாவூர், திருவாரூர், நாகப்பட்டினம், புதுக்கோட்டை ஆகிய மாவட்டங்களின் ஓரிரு இடங்களிலும், காரைக்கால் பகுதிகளிலும் இடியுடன் கூடிய கனமழை பெய்யக்கூடும்.

சென்னை, திருவள்ளூர், செங்கல்பட்டு, காஞ்சிபுரம், ராணிப்பேட்டை, நீலகிரி, கோயம்புத்தூர், திருப்பூர், ஈரோடு, சேலம், தருமபுரி, கிருஷ்ணகிரி, திருப்பத்தூர், வேலூர், திருவண்ணாமலை, விழுப்புரம், கள்ளக்குறிச்சி, நாமக்கல், கரூர், திருச்சிராப்பள்ளி, பெரம்பலூர், அரியலூர், சிவகங்கை, ராமநாதபுரம், திண்டுக்கல், மதுரை, விருதுநகர், தேனி, தென்காசி, தூத்துக்குடி, திருநெல்வேலி, கன்னியாகுமரி ஆகிய மாவட்டங்களின் அநேக இடங்களிலும், புதுச்சேரியிலும் இடியுடன் கூடிய மிதமான மழை பெய்யக்கூடும்.

சென்னை மற்றும் புறநகர்ப் பகுதிகளின் வானிலை

சென்னை மற்றும் புறநகர்ப் பகுதிகளில் இன்று (நவம்பர் 19) வானம் ஓரளவு மேகமூட்டத்துடன் காணப்படும். பொதுவாக வறண்ட வானிலை நிலவும் எனக் கணிக்கப்பட்டுள்ளது.

மழை மேகங்கள் திரண்டிருக்கும் காட்சி
படக்குறிப்பு, கோப்புப்படம்

ஆந்திரப் பிரதேசம், ஏனாம், ஒடிசாவில் கனமழை எச்சரிக்கை

அக்வான் புயலின் தாக்கத்தால் ஆந்திரப் பிரதேசம் மற்றும் ஒடிசாவின் பல பகுதிகளில் கனமழை பெய்யக்கூடும் என்று வானிலை ஆய்வு மையம் எச்சரித்துள்ளது.

ஆந்திரப் பிரதேசம்: நவம்பர் 19, 20 ஆகிய தேதிகளில் கடலோர ஆந்திரப் பிரதேசத்தின் பல இடங்களில் லேசானது முதல் மிதமான மழை பெய்யக்கூடும். சில இடங்களில் கனமழை முதல் மிகக் கனமழை பெய்யவும், ஓரிரு இடங்களில் அதி கனமழை (21 செ.மீ. அல்லது அதற்கு மேல்) பெய்யவும் வாய்ப்புள்ளது.

நவம்பர் 21ஆம் தேதி வடக்கு கடலோர ஆந்திரப் பிரதேசத்தின் சில இடங்களில் கனமழை பெய்யக்கூடும். அதே நேரத்தில், மழையின் தீவிரம் படிப்படியாகக் குறையும் என்று கணிக்கப்பட்டுள்ளது.

ஒடிசா: நவம்பர் 19, 20 ஆகிய தேதிகளில் தெற்கு ஒடிசாவின் சில பகுதிகளில் மிகக் கனமழை முதல் அதி கனமழை பெய்யக்கூடும். வடக்கு ஒடிசாவின் சில இடங்களிலும் கனமழை முதல் மிகக் கனமழை பெய்ய வாய்ப்புள்ளது.

நவம்பர் 21ஆம் தேதி ஒடிசாவின் சில இடங்களில் கனமழை முதல் மிகக் கனமழை பெய்யக்கூடும் என்று முன்னறிவிக்கப்பட்டுள்ளது.

புயல் கரையைக் கடக்கும்போது, கஞ்சம் மற்றும் பூரி மாவட்டங்களின் தாழ்வான கடலோரப் பகுதிகளில் கடல் நீர் உட்புகும் அபாயமும் இருப்பதாக ஒடிசா கடலோர வானிலை எச்சரிக்கை குறிப்பிடுகிறது.

ஆந்திராவில் அக்டோபர் மாதம் பெய்த மழையின் போது
படக்குறிப்பு, கோப்புப் படம்

மீனவர்களுக்கான எச்சரிக்கை

அக்வான் புயல் காரணமாக வங்கக் கடலின் மத்திய மற்றும் மேற்கு மத்திய பகுதிகளில் கடல் கொந்தளிப்புடன் காணப்படலாம். புயல் நகரும் பாதையிலும், அது கரையைக் கடக்கும் பகுதிகளிலும் கடல் நிலை மோசமடைய வாய்ப்புள்ளது.

வடதமிழகக் கடலோரப் பகுதிகளில் நவம்பர் 19, 20 ஆகிய தேதிகளில் மணிக்கு 50 முதல் 60 கி.மீ. வேகத்திலும், இடையிடையே 70 கி.மீ. வேகத்திலும் சூறாவளிக் காற்று வீசக்கூடும். நவம்பர் 21ஆம் தேதி காற்றின் வேகம் மணிக்கு 40 முதல் 50 கி.மீ. ஆகவும், இடையிடையே 60 கி.மீ. ஆகவும் இருக்கக்கூடும். நவம்பர் 22ஆம் தேதி எச்சரிக்கை ஏதுமில்லை.

இதனால், எச்சரிக்கை விடுக்கப்பட்டுள்ள நாட்களில் மீனவர்கள் அந்தப் பகுதிகளுக்குச் செல்ல வேண்டாம் என அறிவுறுத்தப்பட்டுள்ளனர்.

ஒரே பருவத்தில் அடுத்தடுத்து புயல்கள் உருவாவது ஏன்?

வங்கக் கடலில் ஒரே பருவத்தில் அடுத்தடுத்து புயல்கள் உருவாவது வழக்கத்துக்கு மாறானதல்ல. குறிப்பாக, வடகிழக்குப் பருவமழைக் காலத்தில் வங்கக் கடலில் காற்றழுத்தத் தாழ்வுப் பகுதிகள் உருவாகி, அவை வலுப்பெற்று புயல்களாக மாறுவதற்கான சூழல் ஏற்படலாம்.

கடல் மேற்பரப்பின் வெப்பநிலை, வளிமண்டலத்தில் நிலவும் ஈரப்பதம், காற்றின் திசை மற்றும் வேகம், மேலடுக்குகளில் நிலவும் காற்றோட்டம் ஆகியவை புயல் உருவாவதிலும் அதன் நகர்விலும் முக்கியப் பங்கு வகிக்கின்றன.

ஒரு புயல் கரையைக் கடந்து வலுவிழந்த பிறகும், வங்கக் கடலில் சாதகமான வானிலைச் சூழல் தொடர்ந்து நிலவினால் மற்றொரு காற்றழுத்தத் தாழ்வுப் பகுதி உருவாகலாம். அதுவும் வலுப்பெற்று புயலாக மாற வாய்ப்புள்ளது.

1976, 1987, 2013 ஆகிய ஆண்டுகளிலும் ஒரே பருவத்தில் ஒன்றுக்கு மேற்பட்ட புயல்கள் உருவான நிகழ்வுகள் உள்ளன. எனவே, அடுத்தடுத்து புயல்கள் உருவாவது மட்டுமே அசாதாரணமான வானிலை நிகழ்வு என்று கூற முடியாது. ஒவ்வொரு புயலின் உருவாக்கம், நகரும் பாதை, தீவிரம் ஆகியவற்றைத் தனித்தனியாகக் கண்காணிப்பதே முக்கியம்.

- இது, பிபிசிக்காக கலெக்டிவ் நியூஸ்ரூம் வெளியீடு