900 ஆண்டுகள் பழமையான கோட்டை இஸ்ரேல் - ஹெஸ்பொலா மோதலில் ஏன் முக்கியத்துவம் பெறுகிறது?

இஸ்ரேல் ராணுவத்தால் வெளியிடப்பட்ட பாடிகேம் காட்சிகள், இஸ்ரேலிய கொடியை அந்த இடத்தில் ஏற்றுவதற்கு முன்பு, இடைக்கால மலை உச்சி கோட்டையின் இடிபாடுகளுக்கு இடையே படைகள் நகர்வதைக் காட்டுகின்றன. தெற்கு லெபனானில் உள்ள பியூஃபோர்ட் கோட்டையை மீண்டும் ஒருமுறை தாங்கள் கைப்பற்றியுள்ளதாக இஸ்ரேல் கூறுகிறது.

ஞாயிற்றுக்கிழமை, இதைக் கைப்பற்றியதைத் தொடர்ந்து, இஸ்ரேல் பிரதமர் இதனை "ஒரு தீர்க்கமான கட்டம் மற்றும் நமது கொள்கையில் ஏற்பட்ட தீர்க்கமான மாற்றம்" என்று அழைத்தார்.

"நாங்கள் அச்சத்தின் தடையை உடைத்துவிட்டோம்," என்று பெஞ்சமின் நெதன்யாகு கூறினார். "நாங்கள் முன்முயற்சி எடுத்து வருகிறோம். சிரியா, காஸா, லெபனான் என அனைத்து முனைகளிலும் நாங்கள் செயல்பட்டு வருகிறோம்."

இஸ்ரேல் தரைப்படை வீரர்கள் லிதானி நதியின் தங்களின் அசல் எல்லைக் கோட்டிற்கு அப்பால் லெபனான் எல்லைக்குள் முன்னெப்போதையும் விட ஆழமாக நகர்ந்து வரும் வேளையில் இது நடந்துள்ளது.

இஸ்ரேலின் இந்த சமீபத்திய தீவிரத்தன்மையை பிரிட்டன், பிரான்ஸ் மற்றும் ஜெர்மனி ஆகியவை விமர்சித்துள்ளன, அதே நேரத்தில் இஸ்ரேல் பாதுகாப்புப் படைகள் தெற்கு லெபனானின் பெரிய பகுதியை காலி செய்யுமாறு மேலும் பல குடியிருப்பாளர்களுக்கு எச்சரிக்கை விடுத்துள்ளன. அந்நாட்டின் பிரதமர், இஸ்ரேல் "கூட்டுத் தண்டனை" வழங்குவதாகக் குற்றம் சாட்டியுள்ளார்.

ஆனால், இஸ்ரேல் பியூஃபோர்ட் கோட்டையைக் கட்டுப்படுத்துவது இது முதல் முறையல்ல. இஸ்ரேலியர்கள் முதல் லெபனான் போர் என்று அழைக்கும் போரில், 44 ஆண்டுகளுக்கு முன்பு இஸ்ரேல் ராணுவம் இதனைக் கைப்பற்றியது. இந்த இடத்திற்காக ஏன் இவ்வளவு கடுமையான போர் நடக்கிறது என்பதைப் புரிந்து கொள்ள, இக்கோட்டையின் நீண்ட வரலாற்றையும், அது அமைந்துள்ள மலைத்தொடரின் உத்தி ரீதியான மதிப்பையும் பார்ப்பது உதவியாக இருக்கும்.

மலை உச்சி முதன்முதலில் ஃபீனிசிய அல்லது ரோமானிய காலத்தில் கோட்டையாகப் பாதுகாக்கப்பட்டிருக்கலாம் என்று சில வரலாற்றாசிரியர்கள் நம்புகின்றனர். ஆனால் இன்று இருக்கும் கோட்டை 12 ஆம் நூற்றாண்டைச் சேர்ந்தது.

11ஆம் நூற்றாண்டின் இறுதிப் பகுதி முதல் 13ஆம் நூற்றாண்டு வரை நீடித்த சிலுவைப் போர் காலத்தில், ஐரோப்பிய படைகள் லெவன்ட் பகுதியில் கடற்கரையையும் உள்நாட்டு நகரங்களையும் இணைக்கும் பாதைகளைப் பாதுகாப்பதற்காக மலை உச்சிகளில் பல கோட்டைகளைக் கட்டின. அவற்றில் மிக முக்கியமான கோட்டைகளில் ஒன்றாக பியூஃபோர்ட் கோட்டை விளங்கியது. சுமார் 1190 இல், சிலுவைப்போர் வீரர்களைத் தோற்கடித்து, இப்பகுதியை மறுவடிவமைத்த முஸ்லிம் தலைவரான சலாஹுத்தீனால் இது கைப்பற்றப்பட்டது.

இடைக்கால ஐரோப்பிய ஆதாரங்களில், இந்த இடம் "பியூஃபோர்ட்" என்று அழைக்கப்படுகிறது, இது "அழகான கோட்டை" என்று பொருள்படும் ஒரு பழைய பிரெஞ்சு பெயராகும். இது அதன் உயர்ந்த சாதகமான நிலையை பிரதிபலிக்கிறது. இதன் அரபு பெயரான கல்அத் அல்-ஷகீஃப் அல்லது ஷகீஃப் அர்னான் என்பதற்கு உயர்ந்த பாறையின் கோட்டை என்று பொருள்.

இதன் வரலாறு, சிலுவைப்போர் கட்டடக்கலையை கிழக்கு இஸ்லாமிய கூறுகளுடன் இணைக்கும் அதன் தனித்துவமான வடிவமைப்பை பிரதிபலிக்கிறது. மேலும் 2024 முதல், ஆயுதமேந்திய மோதலின் போது கலாசார சொத்துக்களைப் பாதுகாப்பதற்கான ஹேக் மாநாட்டின் "மேம்படுத்தப்பட்ட பாதுகாப்பின்" கீழ் உள்ள தொல்பொருள் மற்றும் பாரம்பரிய அடையாளங்களில் பியூஃபோர்ட்டும் ஒன்றாக உள்ளது.

20 ஆம் நூற்றாண்டின் இரண்டாம் பாதியில், அரபு இஸ்ரேல் மோதல் தீவிரமடைந்து, தெற்கு லெபனான் ஒரு முன்னணி போர்க்களமாக மாறியபோது, பியூஃபோர்ட் கோட்டை மீண்டும் முக்கியத்துவம் பெற்றது.

''இந்தக் கோட்டை சுற்றியுள்ள பகுதியை முழுமையாகக் கண்காணிக்கக்கூடிய உயரமான இடத்தில் அமைந்திருப்பதால், 1970களிலிருந்து 1982 ஜூன் மாதம் வரை, இஸ்ரேலுக்கு எதிராகப் போராடிய பாலஸ்தீன கெரில்லா போராளிகளின் தளமாக இது செயல்பட்டது'' என்று நோட்ரே டேம் பல்கலைக்கழகத்தின் பேராசிரியர் ஆஷர் காஃப்மேன் கூறுகிறார்.

1982ஆம் ஆண்டு இஸ்ரேல் லெபனானை ஆக்கிரமித்தபோது, இந்தக் கோட்டையைச் சுற்றி போரின் மிகக் கடுமையான மோதல்களில் சில நடைபெற்றன. அந்தப் போரில் அதிகம் பதிவுசெய்யப்பட்ட மோதல்களில் ஒன்றான ஷகீஃப் போர், இன்றளவும் இஸ்ரேல் மற்றும் லெபனான் நாடுகளின் இராணுவ வரலாற்றில் முக்கிய இடத்தைப் பெற்றுள்ளது என்று காஃப்மேன் கூறுகிறார்.

இறுதியில், 1982 ஜூன் 6ஆம் தேதி பியூஃபோர்ட் கோட்டையைக் கைப்பற்றிய இஸ்ரேல், அதை ஒரு வலுவான கண்காணிப்பு மற்றும் பாதுகாப்பு நிலையமாக மாற்றியது. பின்னர், தெற்கு லெபனானில் தாங்கள் கட்டுப்பாட்டில் வைத்திருந்த "பாதுகாப்பு மண்டலத்தின்" ஒரு பகுதியாக, 2000ஆம் ஆண்டு அங்கிருந்து வெளியேறும் வரை இந்தக் கோட்டையைப் பயன்படுத்தியது.

நபதியே ஆளுநரகத்தில் உள்ள அர்னான் நகருக்கு அருகிலுள்ள ஒரு பாறைகள் நிறைந்த மலையின் மேல் அமைந்துள்ள இந்த கோட்டை, வடக்கு இஸ்ரேல் மற்றும் தெற்கு லெபனானின் சமவெளிகள் மற்றும் லிதானி பள்ளத்தாக்கு வரை தெளிவாகக் கண்காணிக்கக்கூடிய இடத்தில் அமைந்துள்ளது.

வரலாற்று ரீதியாக, இதை யார் வைத்திருந்தாலும் அவர்கள் தெற்கு நோக்கிச் செல்லும் முக்கியமான சாலைகளைக் கண்காணிக்க முடியும், இதனால் இடைக்காலம் முதல் நவீன காலம் வரை போட்டியிடும் சக்திகளுக்கு இது ஒரு தொடர்ச்சியான இலக்காக மாறியது.

ஆனால் அதன் குறுகிய கல் பாதைகள், அரண் செய்யப்பட்ட அறைகள், தண்ணீர் தொட்டிகள் மற்றும் கிணறுகள் ஆகியவை முற்றுகையின் போது போராளிகள் நீண்ட காலத்திற்குத் தாக்குப் பிடிக்க அனுமதித்தன.

சாதம் ஹவுஸின் மத்திய கிழக்கு மற்றும் வட ஆப்பிரிக்கா திட்டத்தின் லினா காதிப் கருத்துப்படி, இஸ்ரேல் பியூஃபோர்ட்டை மீண்டும் கைப்பற்றியது முதன்மையாக ஹெஸ்பொலா மற்றும் அதன் ஆதரவாளர்களின் மன உறுதியைக் குலைக்கும் நோக்கம் கொண்டது.

"பியூஃபோர்ட் கோட்டையைக் கைப்பற்றியிருப்பது, லெபனான் பகுதியை இஸ்ரேல் தனது ஆக்கிரமிப்பை விரிவுபடுத்துவதைத் தடுக்க ஹெஸ்பொலாவால் முடியவில்லை என்பதைக் காட்டுகிறது" என்று அவர் கூறுகிறார்.

சமீபத்திய ஆண்டுகளில் புதுப்பிக்கப்பட்டு பார்வையாளர்களுக்காக மீண்டும் திறக்கப்பட்ட ஒரு பாதுகாக்கப்பட்ட பாரம்பரிய தளமான பியூஃபோர்ட், லெபனானின் வரலாற்று மற்றும் கலாசார அடையாளத்தின் ஒரு பகுதியாக பரவலாகக் கருதப்படுகிறது.

அர்னானில் உள்ள உள்ளூர் அதிகாரிகள் இந்த தளத்தின் மீதான சமீபத்திய தாக்குதல்களைக் கண்டித்துள்ளனர்.

மேலும் திங்கள்கிழமை, ஐரோப்பிய ஒன்றிய செய்தித் தொடர்பாளர் அன்வர் எல் அனௌனி, "லெபனானில் அதன் ராணுவத் தீவிரத்தன்மையை நிறுத்துமாறும், லெபனானின் இறையாண்மை மற்றும் பிராந்திய ஒருமைப்பாட்டை மதிக்குமாறும் நாங்கள் இஸ்ரேலைக் கேட்டுக்கொள்கிறோம்," என கூறினார்.

- இது, பிபிசிக்காக கலெக்டிவ் நியூஸ்ரூம் வெளியீடு