Weerar Internetka ah oo lagu qaaday in badan oo ka mid ah mareegaha caalamka, ayadoo qaarkood la geli waayey

Helitaanka faahfaahinta cillad amni oo halis ah oo ku jirta luqadda barnaamijyada PHP ayaa sababtay in mareegaha dowladda iyo adeegyada internetka ee dalal badan oo adduunka ah aan si ku meel gaar ah loo heli karin Arbacadii.

Khubarada internetka ayaa sheegaya in faahfaahinta cilladda amniga ee luqadda barnaamijyada PHP, oo mareegaha badankood ay ku tiirsan yihiin, la shaaciyay.

Nuglaanshaha ayaa la shaaciyay Talaadadii, ka hor inta aysan horumariyayaashu helin xal u helid, waxayna kicisay malaayiin isku day jabsi ah. Mareego badan oo ganacsi iyo dawladeed ayaa si ku meel gaar ah loo heli waayay taxaddar ahaan.

Digniintu waxay keentay carqaladeyn adeegyada adduunka oo dhan, laga bilaabo goobaha ciyaaraha ilaa mareegaha dowladda iyo kuwa internetka.

Wikimedia, oo ah ururka taageera Wikipedia, ayaa sidoo kale qaar ka mid ah nidaamyadeeda ka dhigtay kuwo offline ah si taxaddar loo yeesho.

Xukuumadda Finland, Golaha Deegaanka magaalada Edinburgh iyo BBC-da ayaa sidoo kale ka dhigay bogaggooda iyo mareegahooda kuwo aan la geli karin, halka hay'adda amniga internetka ee Holland ay sidoo kale damisay boggeeda internetka.

Dhanka kale, hawl wadeennadu waxay sidegdeg leh ugu dhakhsadeen inay xaqiijiyaan bedqabka.

Cilmi baaraha ogaaday cilladda ayaa u sheegay BBC-da inay u oggolaan kartay dambiilayaasha internetka inay galaan wax walba laga bilaabo taariikhda raadinta ilaa faahfaahinta bangiyada. Ma cadda in jabsade uu ku guuleystay inuu tan sameeyo iyo in kale.

Muddo ka badan toban sano, cillado halis ah oo ku jiray tiknoolajiyadda aasaaska u ah qayb weyn oo ka mid ah internetka ayaa qarsoonaa.

Hadda iyada oo la adeegsanayo sirdoonka macmalka ah (artificial intelligence), waxaa suurtagal noqotay in la ogaado cilladahan, taas oo keentay in la soo saaro digniin caalami ah oo ku saabsan amniga internetka.

Cilladahan waxay ku jiraan luuqadda barnaamij samaynta ee PHP, waana luuqad tan iyo sannadihii 2000i laga isticmaalayay caalamka oo dhan si loo dhiso mareegaha internetka.

Shirkadda OpenAI oo tiknoolajiyaddeeda loo adeegsaday helitaanka cilladahan, ayaa ku tilmaantay daah-furkan "mid ka mid ah arrimaha amniga ee ugu saameynta badan waayadan dambe".

Dad badan ayaa laga yaabaa inaysan maqlin magaca "PHP," balse waxay u badan tahay inay maalin walba la macaamilaan.

Luuqaddan waxaa la sameeyay horraantii sagaashameeyadii si ay gacan uga geysato soo bandhigidda bogagga internetka iyo barnaamijyada is-bedbeddela (dynamic web pages and applications). Ilaa maanta, waxaa isticmaala aalado iyo mareego badan oo ay ka mid yihiin Wikipedia, dukaamada internetka, iyo WordPress.

Marka isticmaaluhu uu booqdo mareeg, PHP ayaa koodka (code) ururiya xogta u beddela bog la akhriyi karo.

Waxaa sidoo kale loo isticmaalay in lagu sameeyo qalab kala duwan oo fududeeya ama dedejiya dhisidda barnaamijyada internetka.

Sida ay sheegtay shirkadda amniga internetka ee Wiz, taas oo door weyn ka qaadatay helitaanka cilladaha halista ah ee ku jira luuqadda PHP toddobaadkan, ayaa luuqaddani waxay aasaas u tahay 70 boqolkiiba mareegaha internetka ee adduunka.

Luuqaddan waxaa daryeela oo taageera urur aan faa'iido doon ahayn oo la yiraahdo "PHP Foundation". Waa koox ka kooban shakhsiyaad iyo shirkado u heellan luuqaddan, kuwaas oo hadafkoodu yahay inay xaqiijiyaan "horumarkeeda iyo jiritaankeeda muddada dheer".

Maxaa lagaaga baahan yahay si aad uga badbaaddid weerarkan oo kale

Arrintani waxay saamaysaa hababka horumarinta shabakadda iyo nidaamyada aysan arki Karin isticmaaleyaal badan, taasoo la macno ah in dadka badankiisu aysan u baahnayn inay wax tallaabo ah qaadaan.

Laakiin ganacsiyada yaryar ee leh goobo, oo ay ku jiraan kuwa lagu dhisay WordPress, waxay rabi karaan inay ogaadaan sida ay isu ilaaliyaan.

Kuwa leh mareegaha ama maamula kaabayaasha dhaqaalaha ee isticmaala PHP ayaa lagu booriyay inay cusboonaysiiyaan mareegaha ay ku leeyihiin oo ay isticmaalaan nooca ugu dambeeyay ee amniga ah.

Xarunta Amniga Internetka Qaranka ee UK waxay ku talinaysaa in laga fiirsado inaad si ku meel gaar ah mareegaha looga dhigo kuwo offline ah ooaan la soo geli karin haddii cusbooneysiinta (update) ama ilaalinta ku meel gaarka ah aan si dhakhso ah loo hirgelin.

Hay'adda Amniga Qaranka ee Mareykanka ayaa sidoo kale ku baaqday "feejignaan dheeraad ah" toddobaadyada soo socda, iyadoo u sheegaysa dadka inay si dhow ula socdaan cusbooneysiinta ay bixiyaan iibiyeyaasha barnaamijyada.