تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
کرېکټ: پېښور زلمي د پاکستان سوپر ليګ اتلولي وګټله
د پاکستان سوپر ليګ (پي اېس اېل) پايلوبه کې د پېښور زلمي لوبډلې د حيدراباد کېنګز ته په پنځو وېکټو ماته ورکړه او د دغه ليګ سږنۍ اتلولي یې وګټله.
دا دويم ځل دی چې پېښور زلمي د پاکستان سوپر ليګ سيالۍ ګټي.
د نننۍ لوبې پچه پېښور زلمي لوبډلې وګتله او لومړی یې حيدر اباد لوبډلې ته د منډو جوړولو بلنه ورکړه. حيدراباد د ټولو لوبغاړو په سوځېدو سره يوازې ۱۲۹ منډې وکړې او پېښور زلمو ته یې د ۱۳۰ منډو هدف وټاکه.
پېښور زلمو د پنځو لوبغاړو په سوځېدو سره په ۱۶ اوور کې ټاکلی هدف پوره او اتلولي يې په خپله نامه کړه.
د حيدر اباد لپاره صايم ايوب تر ټولو ډېرې (۵۴ منډې) وکړې. د ده تر څنګ مارنوس لبوشېن ۲۰، حسن خان ۱۲ او معاز صداقت ۱۱ منډې وکړې. نور لوبغاړي د پاموړ منډو په جوړولو ونتوانېدل.
د پېښور لپاره ارون هارډي څلور، ناهيد رانا دوه، محمد باسط او سفيان مقيم يو يو لوبغاړی وسوځاوه.
په منډو جوړولو کې بيا پېښور زلمي لوبډلې د پيل دوه لوبغاړي ژر له لاسه ورکړل. لوبډلمشر بابر اعظم په صفر، محمد حارث په شپږو او کوسل مېنډېس په ۹ منډو وسوځېدل خو وروسته ارون هارډي او عبدالصمد تر ډېره پر وېشتنځای پاتې شول او په ترتيب سره یې ۵۶ او ۴۸ منډې وکړې.
د اسټراليا ارون هارډي د ۵۶ منډو په جوړولو او د څلور وېکټو په اخيستو سره د پايلوبې غوره لوبغاړی ونومول شو.
سفيان مقيم بيا د ۲۲ وېکټو په اخيستو سره د سږني پي اېس اېل غوره لوبغاړی شو.
د پېښور زلمي لوبډلمشر بابر اعظم دا بریا د پېښور زلمو لپاره ستره لاسته راوړونه وبلله او زياته یې کړه، "په ټول لیګ کې موږ د یوې لوبډلې په توګه ښه لوبه وکړه. موږ له خپل کرېکټ څخه خوند واخيست. هر لوبغاړي د توپوهنې، توپ اچونې او ډګرساتنې په برخه کې ورکړل شوي پلانونه عملي کړل".
