د راتکو ملادیچ وکیلانو د مرګ په درشل کې د دغه جنګي مجرم خوشي کېدل غوښتي

د راتکو ملادیچ مدافع وکیلان، چې د بوسني صربي ځواکونو پوځي قوماندان او د جنګي جرمونو په تور محکوم شوی دی، د ملګرو ملتونو د محکمې پرېکړې ته په تمه دي چې د هاګ له زندانه د هغه د خوشي کېدو په اړه د دوی غوښتنه وڅېړي؛ دا غوښتنه د هغه د بدني وضعیت او د ژوند د پای نژدېوالي پر بنسټ وړاندې شوې ده.

ښاغلی ملادیچ، چې ۸۴ کلن دی، په ۲۰۱۷ کال کې د پخوانۍ یوګوسلاویا د جګړو پر مهال (۱۹۹۲–۱۹۹۵) د توکم‌وژنې، جنګي جرمونو او د بشریت پر ضد جرمونو په تور په عمري بند محکوم شو. د هغه دا حکم، چې "د بوسنیا قصاب" په نوم هم پېژندل کېږي، په ۲۰۲۱ کال کې د استیناف محکمې له خوا تایید شو.

د هغه وکیلانو د جمعې په ورځ په یوه مفصل راپور کې محکمې ته ویلي چې ملادیچ د ډېر وخت لپاره یا په بستر پروت وي او یا هم په ویلچیر کې ژوند کوي.

هغوی همداراز محکمې ته ویلي هغه له خپل زوی سره د تماس پر مهال په مغزي سکتې اخته شوی او نژدې هېڅ توان د خبرو کولو نه لري.

د دوی په وینا، دوو ډاکټرانو د هغه حالت "سخت خراب" ارزولی او د "نږدې مرګ جدي خطر" یې لوړ بللی دی. وکیلان یې د دې غوښتنه کوي چې هغه په بیړني ډول یا موقتاً او یا مشروط ډول داسې روغتون یا د پاملرنې مرکز ته خوشې شي چې هلته په صربي ژبه خبرې کېږي.

په ښکاره ډول معلومه ده چې د ښاغلي ملادیچ دفاعي ټیم د هغه د کور ته د ستنېدو هڅه کوي او د صربستان د عدلیې وزیر نیناد وویيچ په څرګند ډول ویلي چې حکومت یې چمتو دی که هغه خوشی شي، محکمې ته ضمانتونه وړاندې کړي.

قاضي ګراسیلا ګاتي سانتانا د روغتیایي وضعیت د خپلواکې ارزونې غوښتنه کړې وه، چې ټاکل شوې وه د جمعې په ورځ خپلې موندنې وړاندې کړي.

راتکو ملادیچ په ۱۹۹۰مه لسیزه کې د بوسني صربي ځواکونو قومانده د کرواتي او بوسني (د بوسنیا مسلمانانو) ځواکونو پر ضد پر غاړه لرله.

د جګړې پر مهال د هغه ځواکونو په بوسنیا او هرزګوینا کې "قومي تصفیه" ترسره کړه، د پلازمېنې سرايېوو ښار یې کلابند کړ چې له امله یې تر ۱۰ زرو ډېر کسان ووژل شول، او په سربرنیڅا کې یې په عام وژونه کې اته زره سړي او هلکان ووژل.