Mòd 2026: Duais Thosgaire na Gàidhlig do Chalum MacFhearghais

Chaidh Calum MacFhearghais ainmeachadh mar Thosgaire Gàidhlig na Bliadhna aig a' Mhòd Nàiseanta Rìoghail ann an Glaschu.

'S e duais a th' ann bho Riaghaltas na h-Alba do neach a tha air obair mhòr a dhèanamh às leth na Gàidhlig.

'S ann à Inbhir Nis a tha Calum agus mar fhear a bha a' cluich ball-coise gu proifeiseanta, tha a chuid obrach a thaobh na Gàidhlig air a bhith dlùth-cheangailte ri spòrs.

Bha e am measg na stèidhich FC Sonas an toiseach, is an uairsin Alba FA agus e ag amas air fàs a thoirt air cànan is cultar na Gàidhlig tro bhall-coise.

Fon bhratach sin, bidh Calum a' stiùireadh phrògraman leasachaidh do dh'òigridh air feadh na Gàidhealtachd, an Uibhist 's an Glaschu - a' brosnachadh chloinne gu bhith a' cleachdadh na Gàidhlig ann an suidheachaidhean làitheil.

Chruthaich e cuideachd sgioba ball-coise Alba FA airson luchd-labhairt na Gàidhlig a riochdachadh.

Tha sgioba Alba FA air a' Ghàidhlig a thoirt dhan Ghearmailt far an do chluich iad an aghaidh sgiobaidhean an sin aig àm nan Euros ann an 2024.

As t-samhradh, rinn iad air Alba Nuadh agus chluich iad an aghaidh Halifax Wanderers ann an Cuach a' Chuain Shiar.

'S e turas air leth soirbheachail a bh' ann is na balaich a' faighinn moladh mòr bho Ghàidheil Chanada a choinnich riutha.

'S e urram mòr a th' ann do Chalum a bhith air ainmeachadh mar Thosgaire na Gàidhlig.

Thuirt e: "Bu mhath leam taing a thoirt dhan a h-uile duine a th' air taic a chur ris a' phròiseact thar nam bliadhnaichean agus a th' air maoineachadh a thoirt do dh'Alba FA.

"Às aonais na h-oidhirp sin aig ìre coimhearsnachd agus a' chomhairle, cha bhiodh seo idir air a bhith comasach."

Tha duais na tosgaire am measg na tha air a thoirt seachad air a' chiad là den Mhòd.

'S i Danielle Stiùbhart a chaidh ainmeachadh mar Neach-ionnsachaidh na Bliadhna.

'S e neach-dhealbh a th' ann an Danielle a bhios cuideachd glè thric a' siubhal is a' sgaoileadh susbaint air na meadhanan-sòisealta, cuid dheth mu a beatha ann am bhana.

Tha i bho chionn ghoirid air ceumnachadh bho Shabhal Mòr Ostaig far a bheil i air a bhith ag ionnsachadh na Gàidhlig.