Iomairt gus bùth san Eilean Sgitheanach a chumail fosgailte

Dùnaidh bùth Chàrabhoist ann an ceann beagan sheachdainnean mura faighear dòigh a cumail fosgailte.

'S i an aon bhùth a tha a' frithealadh air feumalachdan mhuinntir Mhiniginis.

Tha an tè leis a bheil i air a bhith a' feuchainn ri a reic airson bliadhnaichean ach cha do nochd duine ùidh innte.

Nochd mu 100 duine aig coinneimh phoblaich agus dragh orra gun caill iad goireas coimhearsnachd cho riatanach.

'S e Stop Shop ainm na bùtha ann an Càrabost.

Tha i a' reic bìdh, stuth dachaigh, phàipearan naidheachd agus connaidh.

'S ann le Sharon Thackeray a tha i agus tha i am beachd sguir a dh'obair air an 10mh den Dùbhlachd.

"'S i bùth bheag mhath a th' innte ach tha mi airson m' obair a leigeil seachad.

"Rinn mi seo airson 10 bliadhna agus tha sin fada gu leòr", mhìnich i.

Tha a' bhùth air a bhith air a' mhargaidh airson grunn bhliadhnaichean ach cha tàinig duine air adhart airson a gabhail thairis.

Tha an cunnart gun caill iad i air luchd-còmhnaidh a phiobrachadh iomairt a chur air dòigh airson a cumail a' dol.

Bha mu 100 duine aig coinneimh ann an talla na coimhearsnachd feuch am faigheadh iad fuasgladh, nam measg Calina Dhòmhnallach.

Thuirt ise; "Tha tòrr dhaoine an seo a' fàs sean agus chan eil na rathaidean againn math idir.

"Tha sinn 25 mìle a-mach à Port Rìgh chun na bùtha as fhaisge agus na goireasan a tha ann.

"Chan fhaigh thu fiù 's peatral gus an tig thu a Phort Rìgh neo An Ath Leathann agus tha sin còrr agus 20 mìle air falbh.

"Meadhan a' gheamhraidh nuair a tha sneachd agus reòthadh ann agus fiù's san t-samhradh nuair a tha uiread a thrafaig air an rathad tha e uabhasach doirbh.

"Tha a' bhùth againn sa bhaile seo a' cumail na coimhearsnachd còmhla agus a' toirt frithealadh do thòrr iarrtais san àite cuideachd." thuirt i.

Chuala a' choinneamh mu choimhearsnachdan eile a bha anns an aon shuidheachadh agus a ghabh os làimh a' bhùth ionadail.

Chaidh buidheann-stiùiridh a chur air bhonn a bhios ag amas air an aon rud agus bùth Chàraboist a chumail fosgailte.

Tha Murray Caimbeul a' fuireach sa bhaile agus a' cur feum air a' bhùth a h-uile là.

"Chan fhaca mise uidhear a dhaoine a' tighinn a-mach airson coinneamh den t-seòrsa seo ann an seo a-rìamh.

"Tha sin a' sealltainn mar a tha daoine a' faireachdainn mu dhèidhinn a' bhùth a' dùnadh.

"Tha cuimhne agam gum b' àbhasit trì bùithean agus dà Oifis a' Phuist a bhith san sgìre seo.

"Chan eil againn ach aon bhùth a-nise agus tha sinn an dòchas nach caill sinn an tè sin cuideachd.

"Chan e rud furasta a th' ann a bhith a' ruith bùtha.

"Feumaidh daoine fios a bhith aca dè tha iad a' dèanamh airson a bhith ag òrdachadh stuth, gu h-àraid ann an àite mar seo cho fada air falbh bhon a h-uile càil.", thuirt e.