Impaka zikomeye mu rubanza rwa Victoire Ingabire ku busabe bwo kuburanira mu muhezo

Mu rubanza rwa Ingabire Umuhoza Victoire rwakomeje mu rukiko rukuru, urukiko rwateye utwatsi ubusabe bwa Me Gashabana ko bimwe mu byo Ingabire aregwa bivugirwa mu muhezo.

Ingabire akurikiranyweho ibyaha 7 birimo kurema umutwe w'abagizi ba nabi no gushaka guhirika ubutegetsi, ibyaha we ahakana.

Mu gihe umushinjacyaha yasobanuraga ibikorwa bigize icyaha cyo gushyiraho umutwe w'abagizi ba nabi hagamijwe gushaka guhirika ubutegetsi, yageze ku ngingo yo gusobanura uburyo Ingabire Umuhoza Victoire yateye inkunga itsinda rya bamwe mu bayoboke be bakurikiranaga amahugurwa y'uburyo ubutegetsi yita "ubw'igitugu" buhirikwa hatifashishijwe intwaro. Ariko yavuze cyane cyane ku buryo ab'itabiriye ayo mahugurwa bahawe ubushobozi na Ingabire burimo amafaranga y'itumanaho ndetse bamwe bagurirwa telephone ngendanwa.

Ubwo Umushinjacyaha yari agiye kuvuga ku ruhare rwa bamwe mu banyamakuru ba Youtube Ingabire yitaga 'abe' mu kwamamaza icengezamatwara, umwe mu bamwunganira Me Gatera Gashabana yasabye ko bivugirwa mu muhezo.

Ati: "Turasaba umuhezo kuko ibyo umushinjacyaha agiye kuvuga bijyanye nibanga ry'akazi sinemera ko ibanga ry' akazi k'umwavoca rishyirwa ahagaragara."

Ibi byakuruye impaka mu rukiko Gashabana asobanura ko iby'umushinjacyaha yari agiye kuvuga byagombaga kubanza kunyuzwa mu rugaga rw'abavoca.

Urukiko rwavugaga ko ikibazo azanye kigomba kuganirwaho n'ababuranyi nyuma rukagifatira umwanzuro.

Ingabire nawe yatse ijambo abwira urukiko ko Gashabana adashaka ko havugwa ku nyemezabwishyu ze ndetse n'ibyo baganiriye- mu gihe umushinjacyaha we yagize ati: "Ibyo tugomba kuvuga ni ikimenyetso cy'ubushinjacyaha, kandi abavoca bakwiye kujya bitandukanya n' ibikorwa byabo bunganira."

Me Gashabana yakomeje gutera hejuru, ari nako umucamanza uyoboye inteko nawe avuga uko bigomba gukorwa. Gashabana ati "ariko ni akarengane, muri kwica amategeko."

Uyoboye inteko ati: "Turi gufata icyemezo ku busabe bwanyu - mu iburanisha ryibanze ntabyo mwavuzemo - kandi niho mwagombaga kubivugira -urukiko rurabacecekesheje!"

Avuga ko ubusabe bwa Gashabana bw'umuhezo atabwemerewe.

Umushinjacyaha yagumanye ijambo asobanura uburyo Ingabire Victoire yasabye Me Gatera Gashabana gukora inyandiko zigaragaza ubwishyu bw'abanyamategeko bunganiraga abanyamakuru Cyuma Hassan na Theoneste Nsengimana - mu manza yitaga ko zigendanye n'ubukangurambaga bwe, kugira ngo izo nyemezabwishyu azisabiraho amafaranga y'inkunga.

Uretse ibyo yashinje Ingabire Victoire gukorana n'amashyaka arwanya ubutegetsi bw'u Rwanda akorera hanze y'igihugu ari mu mpuzamashyaka izwi nka P5 arimo RNC ya Kayumba Nyamasa, FDLR na Rudi Urunana, umushinjacyaha yifashishije amajwi ya telephone yumvikanishije Ingabire avugana na Cassien Ntamuhanga uburyo bategura imyitozo no gutangiza ibikorwa bya gisirikare mu gihugu cy'u Burundi.

Cassien Ntamuhanga wari umunyamakuru yakatiwe n'inkiko adahari igifungo cy'imyaka 25 nyuma yo kumuhamya ibyaha birimo iby'iterabwoba. Urubanza ruracyakomeje.