Uruhande rwareze Agathe Habyarimana n'uruhande rumuburanira bavuze iki ku mwanzuro w'urukiko?

Abareze Agathe Habyarimana hamwe n'uruhande rw'uyu uregwa uruhare muri jenoside mu Rwanda babwiye BBC Gahuzamiryango uko bakiriye umwanzuro w'urukiko watangajwe kuri uyu mugoroba.

Urugereko rw'Urukiko rw'Ubujurire i Paris mu Bufaransa uyu munsi rwavanyeho umwanzuro w'urukiko rundi mu mwaka ushize wo kudakomeza amaperereza ku byaha biregwa Agathe Kanziga Habyarimana, rutegeka ko ayo maperereza akomeza.

Umunyamategeko Philippe Meilhac yavuze ko umwanzuro wafatiwe umukiliya we Agathe Habyarima "ukojeje isoni" ubucamanza bw'Ubufaransa, mu gihe Dafroza Gauthierwo ku ruhande rw'abareze yavuze ko ari "umwanzuro ushimishije kandi utanga icyizere".

Mu 2007 Collectif des Parties Civiles pour le Rwanda (CPCR) yashinzwe na Dafroza Gauthier n'umugabo we Alain Gauthier yareze Kanziga ibyaha birimo gufatanya icyaha cya jenoside no kuyitegura. Ibyaha uruhande rwa Kanziga ruhakana.

Kugeza ubu ntabwo Kanziga aragezwa imbere y'ubucamanza bw'iki gihugu yahungiyemo kuri ibi yarezwe.

Nyuma y'umwanzuro w'uyu munsi Dafroza Gauthieryabwiye BBC ati: "Uyu munsi umwanzuro wafashwe n'urukiko rw'ijurira bemeye yuko iperereza rikomeza ku byaha twamureze…ni umwanzuro twakiriye neza cyane

Dafroza yinubira ko imanza z'abaregwa jenoside mu Bufaransa zitinda zikamara "imyaka n'imyaka".

Ati: "Kubona rugiye gusubirwamo bitanga icyizere kinini cyane, byadushimishije kuko ni dossier nini iruhanyije, kandi yaturuhije. Twabyishimiye".

Philippe Meilhac wunganira Kanziga we yabwiye BBC ko ibirimo kuba ku mukiriya we "bigenwa n'imbaraga za politike na dipolomasi y'abategetsi b'u Rwanda n'Ubufaransa".

Ati: "Ni icyemezo kuri njye mu by'amategeko kidasobanutse. Ni icyemezo gikojeje isoni ubucamanza bw'Ubufaransa…

Me Philippe yinubira ko hashize imyaka hafi 20 umukiliya we atarakurikiranwa mu rukiko ahubwo akorwaho iperereza, kubwe ngo ni uko nta bimenyetso bifatika Bihari ku byaha akekwaho.

Ati: "Uyu mwanzuro ntabwo ari ntakuka… Tugiye kureba icyo dukurikizaho niba tujya mu rukiko rusesa imanza cyangwa mu rukiko rw'Uburayi rw'uburenganzira bwa muntu."