Zelensky avuga ko Uburusiya bwarashe ku cyicaro gikuru cy'ubutasi bwa Ukraine mu gitero cya 'drone'

Perezida wa Ukraine Volodymyr Zelensky yavuze ko indege nto y'intambara itajyamo umupilote (drone) y'Uburusiya yarashe ku cyicaro gikuru cy'urwego rw'ubutasi bw'imbere mu gihugu rwa Ukraine (SBU), mu gitero cyagabwe rwagati mu murwa mukuru Kyiv.

Iyo 'drone' yapfumuriye mu cyicaro gikuru cya SBU ku wa gatanu nyuma ya saa sita z'amanywa, igambiriye icyumba gikoreshwa n'umukuru w'urwo rwego rw'umutekano Oleksandr Poklad.

Ntibisobanutse niba Poklad yari ari muri iyo nyubako ariko Zelensky yavuze ko yamaze kuvugana na we ndetse amutegeka gutanga "igisubizo gikwiye kandi gifatika" ku Burusiya.

Zelensky yemeje ati: "Drone yari igambiriye mu buryo butaziguye ibiro by'Umukuru w'Urwego rw'Umutekano [rw'Ubutasi] muri iriya nyubako." Ibi byumvikanisha ko 'drone' nshya z'Uburusiya zirimo kugenda zitera intambwe mu guhamya ndetse ibi bica amarenga ko Moscow ishobora kuba irimo kongera umurego mu bitero mbere y'ibiganiro by'ubuhuza bw'Amerika bishobora kuba muri iyi mpera y'icyumweru.

Mu butumwa yatangaje ku rubuga rwa Telegram, Zelensky yongeyeho ati: "Serivisi zose z'ubutabazi bwihuse ziri aho byabereye. Buri muntu wese wagizweho ingaruka azabona ubufasha bwa ngombwa."

"Nategetse Poklad gutanga igisubizo gikwiye kandi gifatika ndetse, aho bishoboka, gihuye [kingana] n'iki gitero, kikagabwa ku Barusiya igihe ibintu byose bizaba biteguye. Ingabo zacu zizafasha iki gisubizo."

Amashusho agaragaza ibyo biro, yatangajwe henshi ku mbuga zo kuri murandasi (internet), agaragaza umwotsi w'umukara uva mu madirishya abiri yo ku gice cy'imbere cy'iyo nyubako.

Minisitiri w'ububanyi n'amahanga wa Ukraine Andrii Sybiha yavuze ko icyo gitero ari "ugufata indi ntera gukomeye gucyeneye guhabwa ibisubizo bihamye".

Yongeyeho ati: "Moscow yagabye iki gitero mu gihe cyo guharanira amahoro bundi bushya - bikaba bigaragaza kwanga kwa nyako kwayo kwa dipolomasi [ibiganiro]."

Umukuru w'umujyi wa Kyiv Vitali Klitschko yavuze ko abantu batanu bakomerekeye muri icyo gitero ku cyicaro gikuru cya SBU ariko nta makuru arambuye yatanze niba abo bari bari imbere muri ibyo biro.

Inzu icururizwamo ibinyobwa n'ibiribwa byoroheje (café) iri hafi aho yangiritse ndetse umukiliya umwe yajyanwe mu bitaro nyuma y'icyo gitero.

Stanislav Zavertaylo, umwe muri ba nyiri kompanyi Zavertailo izwi cyane ifite za 'café' nyinshi nk'iyo, yabwiye BBC ko iyi ari iya gatatu ye yangijwe kuva igitero gisesuye cy'Uburusiya kuri Ukraine gitangiye muri Gashyantare (2) mu mwaka wa 2022.

Yongeyeho ati: "Ubu numiwe kuko hari ibintu byinshi byangiritse. Amadirishya yose yamenetse, hari ibirahure byinshi, [hari] imyanda [myinshi]."

Minisiteri y'ingabo y'Uburusiya na yo ku wa gatanu yavuze ko yarashe ubwato butwara imizigo bwari buri ku cyambu cya Chornomorsk cyo muri Ukraine ndetse ko yarashe ubwato butwara ibikomoka kuri peteroli bwari buri hafi y'i Odesa.

Mu byumweru bya vuba aha bishize, Uburusiya bwakajije umurego mu bitero byo ku manywa bugaba ku hantu hanyuranye muri Ukraine.

Muri byinshi muri ibyo bitero, bwagiye bukoresha 'drone' zifite moteri nk'iz'indege, bigatuma zihuta cyane ndetse bikagorana cyane kuzisama. Ntibiramenyekana ubwoko nyirizina bw'intwaro yakoreshejwe muri iki gitero gishya.

Icyo gitero ku nyubako ya SBU ni urugero rw'imbonekarimwe rw'ukuntu Uburusiya bwashoboye kurasa ku nyubako ya leta.

SBU – iri hakurya y'umuhanda uvuye kuri Katederali (y'aba Orthodox) yitiriwe Mutagatifukazi Sophia, iyi ikaba ari yo nyubako nkuru cyane i Kyiv – ni igice cy'ingenzi mu bikorwa bya Ukraine byo mu ntambara kuko igaba ibitero bigera imbere kure byo kwangiza ibikorwa-remezo by'Uburusiya.

Iyo 'drone' yahageze mu gihe cy'ukundi gutanga impuruza yuko hari hagiye kuba igitero cyo mu kirere. Humvikanye ijwi rihanitse ryamaze igihe gito, nuko humvikana igiturika cyomonganye mu bisenge by'inyubako ndetse umwotsi uzamuka ugana mu kirere.

Nubwo impande zombi zikomeje kurasana, amakuru avuga ko abahuza b'Amerika Steve Witkoff na Jared Kushner (uyu akaba ari n'umukwe wa Perezida w'Amerika) basura Uburusiya na Ukraine muri iyi mpera y'icyumweru, mu gihe umuhate wo kurangiza intambara ukomeje.

Ku wa gatandatu, izo ntumwa zizahura i Moscow na Perezida w'Uburusiya Vladimir Putin, nuko ku cyumweru i Kyiv zigirane ibiganiro na Perezida Zelensky, nkuko byatangajwe n'urubuga rw'amakuru Axios rwo muri Amerika, mu gusubiramo amagambo y'abategetsi bo muri Amerika.

Witkoff na Kushner bamaze igihe bayoboye ibikorwa bya Perezida w'Amerika Donald Trump byo kugera ku masezerano y'amahoro, ariko kugeza ubu nta ntambwe ikomeye bari batera.