Rosenberg: Inkeke iteruye ya Putin ku Bwongereza iri muri gahunda y'Uburusiya yo guhangana n'Uburengerazuba

Perezida w'Uburusiya Vladimir Putin yasubije mu nteruro ngufi ubwo yari abajijwe mu kiganiro n'abanyamakuru niba Moscow ishobora kurasa ku bigo bya gisirikare by'Ubwongereza mu gusubiza ku ntwaro Ubwongereza buha Ukraine.

"Iryo ni ibanga. Ibanga rya gisirikare."

Ibanga rya gisirikare si "yego". Kandi si "oya". Bidusiga mu gihirahiro.

Kandi, ni ko nkeka, ni icyo agamije.

Ayo magambo ye yumvikana nko kotsa igitutu mu bitekerezo, bikozwe na Kremlin (ibiro bya perezida w'Uburusiya): gutuma Ubwongereza bukomeza gushidikanya – no guhangayika – ku migambi nyakuri ya Moscow, hamwe no gushishikariza Ubwongereza kongera gutekereza ku bufasha bushimitse buha Ukraine.

Binyibutsa inkuru mperutse gusoma mu minsi micye ishize. Ikinyamakuru Moskovsky Komsomolets cyumvikanishije ko Minisitiri w'intebe w'Ubwongereza Andy Burnham akwiye kubona Uburusiya, atari mu nzozi ze, "ahubwo mu nzozi mbi ze".

Ni imvugo iteye ubwoba. Ariko idatanga amakuru arambuye ku kuntu izo nzozi mbi zizaba zimeze.

Ntidushobora kwanzura ko misile z'Uburusiya ziri hafi gukoreshwa mu kurasa ku hantu ho mu Bwongereza.

Ariko reba ibirimo kuba ahandi i Burayi.

Ubudage ubu buvuga ko Uburusiya ari bwo bwagabye igitero cya 'drone' (indege nto y'intambara itajyamo umupilote) cyo mu kwezi gushize ku kibuga cy'indege cya Leipzig.

Putin yashinje Ubudage "guhimba no gushyira ibimenyetso" aho ikintu cyabereye. Ariko Minisitiri w'ubutegetsi bw'igihugu w'Ubudage Alexander Dobrindt yasobanuye ko ari "uburyo buzwi neza bw'Uburusiya bw'ibikorwa bya gisirikare [operations] bikomatanya byinshi bubera i Burayi".

Ibyo "bikorwa bya gisirikare" ubu byaba bigiye kongerwa mu Bwongereza?

Nyamara si Ubwongereza gusa bwashyizwe ku nkeke ziteruye mu kiganiro n'abanyamakuru cya Putin.

No ku burengerazuba bw'isi (Uburayi n'Amerika) muri rusange ni ko byagenze. Putin yagereranyije ibihugu byo mu burengerazuba n'ibifi binini.

Yagize ati: "Niba umuntu n'umwe agerageje kudushora mu ruhererekane rw'ibiryo, kugira ngo aduconshomere cyangwa atumiraze, ashobora gukubitwa ingumi mu menyo."

"Uburusiya bwiteguye kubikora, nubwo hari ubushake bwo kurya burimo kwiyongera byihuse n'amenyo y'ibi bifi binini arimo gukura byihuse."

Perezida w'Uburusiya arimo kugenda arushaho kuvanga umubano wa politike w'ibihugu n'iby'inyamaswa . Aherutse kuvuga ku bifi binini byica "bishwanyaguza amadubu [bears] yo ku mpera y'isi", ubwo yahaga ishingiro intambara y'Uburusiya muri Ukraine.

Icyo kiganiro n'abanyamakuru i Bishkek, umurwa mukuru wa Kyrgyzstan, cyari uburyo bwiza bwo kurunguruka mu bitekerezo bya Putin.

Mu gihe cy'iminota 45, yakiriye ibibazo by'abanyamakuru b'Abarusiya, nuko agaragara nk'umuntu urimo guhangana, ufite icyizere cyo kugera ku ntsinzi kandi ufite imbaraga. Muri iyi minsi, uko bigaragara Putin akenshi aba afite imbaduko iyo arimo kuvuga ku kuntu rwabuze gica muri politike hagati y'Uburusiya n'uburengerazuba bw'isi no ku ntambara yo muri Ukraine.

Nubwo bwose iyo ntambara itagenze uko yabiteganyaga. Uburusiya bwatakaje byinshi cyane ndetse bupfusha abasirikare benshi cyane ku rugamba ndetse ubukungu bwabwo buri ku gitutu cyinshi.

Yagize ati: "Sinshidikanya ko umwanzi azasenyuka." Nyamara intambara ubu imaze imyaka ine n'igice irenga kandi Ukraine ikomeje kurwana.

Mu mvugo y'ubutegetsi, Kremlin iracyayita "igikorwa cya gisirikare cyihariye". Ariko ubu na Putin asigaye akoresha ijambo "intambara".

Muri icyo kiganiro n'abanyamakuru, yagize ati: "Intambara ni mbi cyane kandi ni ikintu udashobora guteganya."

Yavuze ko acyiteguye kujya mu biganiro byo kurangiza intambara ndetse nta rujijo yateje ku wo yifuza kwicarana bakaganira wo mu butegetsi bw'Amerika: arashaka intumwa za Perezida Donald Trump.

Putin yagize ati: "Rwose twishimira gukorana n'abo bantu tuzi neza kandi twizera muri rusange."

"[Jared] Kushner [umukwe wa Trump] na [Steve] Witkoff bahora ari abashyitsi bisanga. Ni ibyishimo gukorana na bo."

Ntiyigeze akomoza ku mukuru w'urwego rw'ubutasi bwo mu mahanga rw'Amerika (CIA), wagiriye uruzinduko rutunguranye mu Burusiya mu cyumweru gishize. Kremlin ivuga ko Perezida w'Uburusiya atahuye n'uwo mukuru wa CIA John Ratcliffe muri urwo ruzinduko rwe.

Byashoboka ko Putin vuba aha agiye guhura na Witkoff na Kushner?

Nta kintu na kimwe cyanditse muri ajenda. Ntikirandikwa.

Ariko niziramuka rwose zigiye i Moscow, intumwa za Trump zizahura n'umukuru wa Kremlin ukiyemeje ko amahoro ayo ari yo yose muri Ukraine akwiye kugerwaho hashingiwe ku byo Uburusiya bushaka.