Diwrnodau Blasu Get In

Trosolwg

Mae ein Diwrnodau Blasu Get In yn rhoi cipolwg ar sut beth yw gweithio yn y BBC go iawn. Byddwch yn cael profiad ymarferol gyda’r math o waith y gallech chi fod yn ei wneud fel prentis.

Ddim yn siŵr a yw’r BBC yn addas i chi? Gadewch i ni newid eich meddwl – yn enwedig os ydych chi’n rhywun na fyddai fel arfer yn gwneud cais am rywbeth fel hyn.

Mewn profiad blasu Get In, cewch gyfle i wneud y canlynol:

• Dysgu am ddiwydiant y cyfryngau ac amgylchedd gweithle proffesiynol
• Dysgu am yr amrywiaeth eang o swyddi sydd gennym i’w cynnig
• Datblygu sgiliau ymarferol
• Treulio amser yn un o stiwdios y BBC
• Edrych yn fanylach ar ein proses ymgeisio am brentisiaeth a chael awgrymiadau ar gyfer gwneud cais

Cofrestrwch eich diddordeb mewn Diwrnod Blasu ‘Get In’ yn eich ardal

Drwy gydol 2026/2027, byddwn yn cynnal PROFIADAU BLASU ‘GET IN’ yng nghanolfannau’r BBC ar hyd a lled y DU.

Byddem wrth ein bodd yn clywed gennych chi os yw swydd yn niwydiant y cyfryngau yn rhywbeth rydych chi’n meddwl y byddech chi’n ei hoffi, ond ddim yn gwybod sut na ble i ddechrau chwilio!

Mae ein PROFIADAU BLASU ‘GET IN’ wedi’u cynllunio i ddangos i chi pa gyfleoedd sydd ar gael ac i’ch cefnogi gyda’r camau nesaf y mae angen i chi eu cymryd i weithio i’r BBC.

Mae llawer o’r sesiynau ar gyfer myfyrwyr 16-18 oed, ond byddwn hefyd yn cynnal Diwrnodau Blasu ar gyfer myfyrwyr dros 18 oed, y rheini sy’n newid gyrfa a grwpiau ysgol. Cliciwch y ddolen hon i’n ffurflen mynegi diddordeb i gofrestru eich diddordeb ar gyfer lleoliad y BBC sydd agosaf atoch chi neu sydd hawsaf i’w gyrraedd.

Sylwch, er y byddwn yn gwneud pob ymdrech i ymweld â chanolfan yn eich ardal chi, ni allwn warantu y bydd Diwrnod Blasu Get In yn cael ei gynnal ar bob safle.

Pan fydd gennym ddyddiad wedi’i gadarnhau ar gyfer y ganolfan o’ch dewis, byddwn yn cysylltu â chi ac yn gofyn i chi lenwi ffurflen gais ar wahân.

I osgoi cael eich siomi, edrychwch ar y meini prawf cymhwysedd uchod.

Gwybodaeth ddefnyddiol

Bydd profiadau blasu Get In wyneb yn wyneb yn cael eu cynnal rhwng 9:30am a 3:30pm.

Bydd angen i chi ddod o hyd i’ch ffordd eich hun i’r lleoliad. Os yw teithio’n bryder, gwnewch gais o hyd a gallwn drafod hyn gyda chi.

Efallai y bydd angen i chi ddod â’ch cinio eich hun.

Oherwydd nifer y lleoedd sydd ar gael, bydd ymgeiswyr yn cael eu dewis ar hap a, lle bo angen, efallai y bydd yn rhaid i ni gyfyngu ar nifer y myfyrwyr o’r un ysgol sy’n cymryd rhan.

Mae’r BBC wedi ymrwymo i amddiffyn eich data personol chi. I gael rhagor o fanylion am sut rydym yn casglu ac yn defnyddio’r data hwn, edrychwch ar yr Hysbysiad Preifatrwydd Data - Datganiad o Ddiddordeb profiadau Blasu ‘Get In’. 

Cynlluniau eraill

Cynlluniau talent

Mae ein cynlluniau talent ar gael drwy gydol y flwyddyn, gyda chyfleoedd mewn timau fel BBC Sport, Radio 1 ac 1Xtra, The Proms, World Service a BBC Creative.

Mae lleoliadau gwaith yn cynnig hyfforddiant yn y gwaith a phrofiad gwaith ymarferol. Cewch ddysgu gan weithwyr proffesiynol profiadol, cydweithio ar brosiectau cyffrous, a chyfrannu at gynnwys y BBC.

Bydd angen i chi fod yn 18 oed a hŷn i wneud cais ond nid oes angen cymwysterau penodol ar gyfer y cynlluniau hyn.

Profiad gwaith

Nid yw’r BBC yn cynnig profiad gwaith ad-hoc na chyfleoedd cysgodi.

Os ydych chi rhwng 16 a 18 oed, edrychwch ar ein profiadau blasu ‘Get In’ (uchod).

Os ydych chi’n 18 oed neu’n hŷn, efallai y bydd gennych chi ddiddordeb yn ein prentisiaethau neu ein cynlluniau talent (uchod). Efallai y byddwch hefyd yn gymwys i gael profiad blasu ‘Get In’ i bobl dros 18 oed.