لائیو, باقر قالیباف کی فیلڈ مارشل سے ملاقات: ’ٹرمپ نے دوبارہ جنگ کا آغاز کیا تو یہ امریکہ کے لیے زیادہ تلخ اور تباہ کن ثابت ہو گی‘

لائیو کوریج

1. 24 منٹ قبلایران کو عالمی توانائی مارکیٹ کو یرغمال بنانے نہیں دیا جائے گا: امریکی وزیرِ خارجہ

   امریکی وزیرِ خارجہ مارکو روبیو نے انڈیا کے چار روزہ دورے کے دوران نئی دہلی میں وزیراعظم نریندر مودی سے ملاقات کی ہے۔

   وزیرِ خارجہ روبیو کے ترجمان کے مطابق ملاقات میں مشرقِ وسطیٰ کی صورتحال بھی زیرِ بحث آئی۔ ترجمان نے مزید کہا کہ ’امریکہ ایران کو عالمی توانائی مارکیٹ کو یرغمال بنانے نہیں دے گا اور امریکی توانائی مصنوعات انڈیا کی توانائی کی ضروریات کو پورا کرنے اور اسے مستحکم کرنے کی بھرپور صلاحیت رکھتی ہیں۔‘

   واضح رہے کہ روبیو سنیچر کی صبح مشرقی شہر کلکتہ پہنچے جہاں سے وہ دارالحکومت نئی دہلی روانہ ہوئے۔ اپنے دورے کے دوران وہ جئے پور اور آگرہ کا دورہ بھی کریں گے۔

   امریکی حکام کے مطابق ملاقات میں روبیو نے وزیراعظم مودی کو وائٹ ہاؤس کے سرکاری دورے کی دعوت دی۔ انڈین وزیراعظم نے کہا کہ دونوں رہنماؤں نے علاقائی اور عالمی امن و سلامتی سے متعلق امور پر تبادلۂ خیال کیا۔

   یہ دورہ ایسے وقت میں ہو رہا ہے جب دونوں ممالک اپنے اقتصادی تعلقات میں بہتری کی کوشش کر رہے ہیں، جبکہ ایران جنگ کے بعد پیدا ہونے والا عالمی توانائی بحران انڈیا کو بھی شدید متاثر کر رہا ہے۔

   واضح رہے کہ امریکی وزیرِ خارجہ مارکو روبیو کا دورۂ انڈیا ایک ایسے وقت میں ہو رہا ہے جب نئی دہلی اور واشنگٹن کے درمیان تجارتی مذاکرات اور گزشتہ سال کے انڈیا پاکستان تنازعے کے حل سے متعلق متضاد دعووں نے تعلقات میں کشیدگی پیدا کر رکھی ہے۔

   صدر ڈونلڈ ٹرمپ بارہا دعویٰ کر چکے ہیں کہ انڈیا اور پاکستان کے درمیان فوجی کشیدگی ان کی ثالثی سے ختم ہوئی، تاہم انڈیا نے اس دعوے کی مسلسل تردید کی ہے اور اپنی پالیسی کے مطابق واضح کیا ہے کہ جنوبی ایشیا کی دو جوہری طاقتوں کے درمیان کسی تیسرے فریق کی ثالثی قبول نہیں۔

   انڈیا کو یہ بات بھی ناگوار گزری ہے کہ ٹرمپ نے پاکستانی فیلڈ مارشل اور آرمی چیف عاصم منیر کے لیے کھل کر پسندیدگی کا اظہار کیا اور انھیں اپنا ’پسندیدہ فیلڈ مارشل‘ قرار دیا۔

   دوسری جانب ایران اور امریکہ کے درمیان جاری مذاکرات میں پاکستان کی ثالثی نے اسلام آباد اور واشنگٹن کے تعلقات کو مزید قریب کر دیا ہے، جسے خطے کی سفارتی ماحول میں ایک اہم پیش رفت سمجھا جا رہا ہے۔

2. ایک گھنٹہ قبلوزیراعظم شہباز شریف چار روزہ دورۂ چین کے پہلے مرحلے میں ہانگژو پہنچ گئے

   وزیراعظم شہباز شریف چار روزہ دورۂ چین کے پہلے مرحلے میں ہانگژو پہنچ گئے

   وزیراعظم پاکستان شہباز شریف اپنے چار روزہ سرکاری دورے کے پہلے مرحلے میں ہانگژو پہنچ گئے ہیں۔ ہانگژو کے شیاؤ شین ایئرپورٹ پر ژجیانگ صوبے کے نائب گورنر شو وینگوانگ، چین کے پاکستان میں سفیر جیانگ زائی ڈونگ اور پاکستان کے چین میں سفیر خلیل ہاشمی نے وزیراعظم کا استقبال کیا۔

   وزیراعظم کے ہمراہ ڈپٹی وزیراعظم و وزیرِ خارجہ سینیٹر اسحاق ڈار، وزیرِ منصوبہ بندی احسن اقبال، وزیرِ اطلاعات و نشریات عطا اللہ تارڑ، وزیرِ آئی ٹی شزا فاطمہ خواجہ اور معاونِ خصوصی طارق فاطمی بھی موجود ہیں۔

   وزیراعظم کے دفتر سے جاری بیان میں اُن کی چین میں مصروفیات کے حوالے سے بتایا گیا ہے کہ ہانگژو میں وزیراعظم کی ملاقات ژجیانگ صوبے کے پارٹی سیکریٹری وانگ ہاؤ سے ہوگی۔

   بیان میں یہ بھی کہا گیا ہے کہ وزیراعظم سی پیک فیز ٹو کے تحت پاکستان اور چین کی کمپنیوں کے درمیان تعاون کے فروغ کے لیے منعقدہ بزنس فورم میں بھی شرکت کریں گے، جہاں مختلف معاہدوں اور مفاہمتی یادداشتوں کے تبادلے کی تقریب بھی منعقد ہوگی۔

   وزیراعظم کے دفتر کے مطابق وزیراعظم کی معروف چینی کمپنیوں کے سی ای اوز سے ملاقاتیں بھی طے ہیں، جبکہ وہ چین کی بڑی ٹیکنالوجی کمپنی علی بابا کے ہیڈکوارٹر کا دورہ بھی کریں گے۔

   تاہم وزیراعظم پاکستان شہباز شریف کے چین کے چار روزہ سرکاری دورے کے حوالے سے وزارتِ خارجہ کی جانب سے جاری بیان میں کہا گیا ہے کہ وزیراعظم اپنے دورے کے دوران چین کے صدر شی جن پنگ اور وزیراعظم لی چانگ سے ملاقاتیں کریں گے اور دونوں ممالک کے مشترکہ سرمایہ کاری کانفرنس کی صدارت بھی کریں گے۔

   وزارتِ خارجہ نے بتایا کہ دورے کا بنیادی مقصد دوطرفہ تعلقات کو مزید مضبوط بنانا ہے تاہم موجودہ مشرقِ وسطیٰ کی کشیدہ صورتحال بھی گفتگو کا اہم حصہ ہوگی۔

   وزارتِ خارجہ کے ترجمان طاہر اندرابی کے مطابق خطے کے موجودہ بحران میں دونوں ممالک نے امن کے لیے تعاون جاری رکھا ہے اور اس پر بات بھی ہوتی رہی ہے اور وزیراعظم کے دورے میں یہ معاملہ بھی زیرِ بحث آئے گا۔

   دوسری جانب ایران کی وزارتِ خارجہ کے ترجمان اسماعیل بقائی نے بتایا کہ قطری وفد نے تہران میں ایرانی وزیرِ خارجہ سے ملاقات کی ہے۔ انھوں نے کہا کہ کئی ممالک جنگ کے خاتمے میں کردار ادا کرنا چاہتے ہیں تاہم سرکاری سطح پر مذاکرات کا مرکزی کردار اب بھی پاکستان کے پاس ہے۔

   اسی سلسلے میں پاکستان کے آرمی چیف عاصم منیر بھی گزشتہ روز تہران پہنچے، جہاں انھوں نے رات گئے تک ایرانی وزرائے خارجہ اور داخلہ، عباس عراقچی اور سکندر مومنی سے ملاقاتیں کیں۔ اس سے قبل پاکستان کے وزیرِ داخلہ محسن نقوی بھی تہران کا دورہ کر چکے ہیں۔

3. ایک گھنٹہ قبلچین کے شمالی حصے میں کوئلے کی کان میں دھماکہ، ہلاکتوں کی تعداد 90 ہو گئی

   چین کے سرکاری میڈیا کے مطابق شمالی چین میں واقع ایک کوئلے کی کان میں ہونے والے دھماکے میں کم از کم 90 افراد ہلاک ہو گئے ہیں۔ شانشی صوبے میں لیوشینیو کول مائن میں دھماکہ سنہ 2009 کے بعد چین میں پیش آنے والا بدترین کان کنی کا حادثہ قرار دیا جا رہا ہے۔

   رپورٹس کے مطابق دھماکے کے وقت کان میں 247 کارکن موجود تھے۔ حادثہ جمعہ کی شام پیش آیا۔ امدادی ٹیموں نے اب تک 100 سے زائد افراد کو محفوظ مقام پر منتقل کر لیا ہے جبکہ سیکڑوں ریسکیو اہلکار موقع پر موجود ہیں۔

   چینی صدر شی جن پنگ نے ہدایت کی ہے کہ زخمیوں کے علاج اور زندہ بچ جانے والوں کی تلاش میں کوئی کسر نہ چھوڑی جائے۔ انھوں نے حکومت کو دھماکے کی وجوہات کی تحقیقات کرنے اور ذمہ داروں کے خلاف کارروائی کی ہدایت بھی کی ہے۔

   سرکاری میڈیا کے مطابق27 افراد مقامی ہسپتال میں زیرِ علاج ہیں جن میں سے ایک کی حالت تشویشناک ہے جبکہ باقیوں کو معمولی زخم آئے ہیں۔ زیادہ تر افراد زہریلی گیس کے باعث متاثر ہوئے تاہم یہ واضح نہیں ہو سکا کہ گیس کی نوعیت کیا تھی۔

4. ایک گھنٹہ قبلباقر قالیباف کی فیلڈ مارشل سے ملاقات میں گفتگو: ’ٹرمپ نے دوبارہ جنگ کا آغاز کیا تو یہ امریکہ کے لیے زیادہ تلخ اور تباہ کن ثابت ہو گی‘

   پاکستان کے فیلڈ مارشل اور آرمی چیف فیلڈ مارشل جنرل عاصم منیر نے تہران میں ایرانی پارلیمنٹ کے سپیکر محمد باقر قالیباف سے ملاقات کی ہے۔

   ایرانی میڈیا نے اس ملاقات کی تفصیلات جاری کرتے ہوئے بتایا کہ قالیباف نے گفتگو کے دوران کہا کہ ’ہم اپنے ملک اور قوم کے حقوق سے پیچھے نہیں ہٹیں گے، خاص طور پر ایسے فریق کے سامنے جس نے کبھی صداقت سے کام نہیں لیا اور جس پر کسی بھی صورت میں اعتماد نہیں کیا جا سکتا۔‘

   انھوں نے مزید کہا کہ ’ہماری مسلح افواج نے جنگ بندی کے دوران خود کو اس طرح مضبوط کیا ہے کہ اگر ٹرمپ نے دوبارہ حماقت کی اور جنگ کا آغاز کیا تو یہ جنگ امریکہ کے لیے پہلے دن سے زیادہ تلخ اور تباہ کن ثابت ہوگی۔‘

   اسی سلسلے میں آرمی چیف جنرل عاصم منیر گزشتہ روز تہران پہنچے تھے، جہاں انھوں نے ایرانی حکام کے ساتھ خطے کی صورتحال اور سکیورٹی امور پر تفصیلی بات چیت کی۔

   پاکستانی فوج کے سربراہ فیلڈ مارشل عاصم منیر نے تہران میں ایران کے صدر مسعود پزشکیان سے بھی ملاقات کی، یہ گزشتہ چند ہفتوں میں ان کا ایران کا دوسرا دورہ ہے۔

   ایرانی حکام کے مطابق فیلڈ مارشل عاصم منیر نے گزشتہ شب ایرانی وزیرِ خارجہ عباس عراقچی سے بھی تفصیلی ملاقات کی تھی جو دیر رات تک جاری رہی۔

   اس سے قبل پاکستان کے وزیرِ داخلہ محسن نقوی بھی چند روز کے اندر دوسری مرتبہ تہران کا دورہ کر چکے ہیں، جہاں انھوں نے ایرانی حکام سے اہم مذاکرات کیے۔

   واضح رہے کہ ایران اور امریکہ کے درمیان جاری مذاکرات میں پاکستان ثالثی کا کردار ادا کر رہا ہے اور حالیہ سفارتی سرگرمیوں کو اسی سلسلے کی کڑی قرار دیا جا رہا ہے۔

5. 2 گھنٹے قبلبنوں میں پولیس اور سی ٹی ڈی کا آپریشن: آٹھ شدت پسند ہلاک، 10 کلوگرام وزنی دیسی ساختہ بم برآمد، پولیس

   پاکستان کے صوبہ خیبر پختونخوا میں بنوں پولیس اور سی ٹی ڈی خیبر پختونخوا نے خفیہ اطلاعات کی بنیاد پر تھانہ میریان کی حدود میں شدت پسندوں کے خلاف انٹیلیجنس بیسڈ آپریشن کیا جس میں آٹھ شدت پسند ہلاک ہو گئے۔

   بیان کے مطابق ’آپریشن کے دوران پولیس اور شدت پسندوں کے درمیان شدید فائرنگ کا تبادلہ ہوا، جبکہ علاقے کو مکمل طور پر گھیرے میں لے لیا گیا۔ فائرنگ کے نتیجے میں آٹھ شدت پسند ہلاک ہوئے جبکہ متعدد کے زخمی ہونے کی اطلاعات بھی موصول ہوئیں۔‘

   ’اسی دوران میرانشاہ روڈ پر آزاد منڈی کے قریب 10 کلوگرام وزنی دیسی ساختہ بم بھی برآمد ہوا، جسے بم ڈسپوزل سکواڈ نے بروقت کارروائی کرتے ہوئے ناکارہ بنا دیا۔‘

   خیبر پختونخوا پولیس کا کہنا ہے کہ ’ابتدائی معلومات کے مطابق یہ بم آج ہونے والی روڈ اوپننگ ڈیوٹی کو نشانہ بنانے کے لیے نصب کیا گیا تھا، تاہم پولیس اور سی ٹی ڈی کی بروقت حکمت عملی سے دہشتگردی کا بڑا منصوبہ ناکام بنا دیا گیا۔‘

   صوبائی پولیس کی جانب سے جاری بیان میں کہا گیا ہے کہ ’آپریشن علی الصبح شروع ہوا جس میں پولیس اور سی ٹی ڈی کی مشترکہ ٹیموں نے حصہ لیا، جیس کی نگرانی ایس پی رورل بنوں نے کی، جبکہ دو ایس ڈی پی اوز اور ایس پی سی ٹی ڈی بھی موقع پر موجود رہے۔‘

   بیان میں مزید کہا گیا ہے کہ ’شدت پسندوں کی نقل و حرکت اور ممکنہ ٹھکانوں کی نشاندہی کے لیے جدید ڈرون سرویلنس اور جدید ٹیکنالوجی استعمال کیا گیا۔‘

   صوبہ خیبر پختونخوا پولیس کے آئی جی ذوالفقار حمید نے بنوں پولیس اور سی ٹی ڈی ٹیموں کی جرات، بہادری اور پیشہ ورانہ مہارت کو سراہتے ہوئے کہا کہ ’خیبر پختونخوا پولیس ہر محاذ پر دہشتگردوں کے عزائم خاک میں ملانے کی بھرپور صلاحیت رکھتی ہے۔ بنوں پولیس اور سی ٹی ڈی کے بہادر جوانوں نے ایک بار پھر ثابت کیا ہے کہ وہ قوم کے تحفظ کے لیے ہر قربانی دینے کو تیار ہیں۔‘

   وفاقی وزیرِ داخلہ محسن نقوی نے شدت پسندوں کے خلاف کامیاب انٹیلیجنس بیسڈ آپریشن پر خیبرپختونخوا پولیس اور کاؤنٹر ٹیررازم ڈیپارٹمنٹ کی کارکردگی کو سراہتے ہوئے انھیں خراجِ تحسین پیش کیا ہے۔

   وزیرِ داخلہ نے کہا کہ ’آٹھ شدت پسندوں کو خیبرپختونخوا پولیس اور سی ٹی ڈی کی بہادری، پیشہ ورانہ مہارت اور بروقت کارروائی کے نتیجہ میں نشانہ بنایا گیا۔‘

   محسن نقوی نے آپریشن کے دوران ہلاک ہونے والے پولیس اہلکار کو خراجِ عقیدت پیش کیا اور اُن کے لواحقین سے دلی ہمدردی اور تعزیت کا اظہار کیا۔

6. 2 گھنٹے قبلجنگ میں تقریباً 3 ہزار صنعتی یونٹس متاثر ہوئے، جن کی بحالی کا عمل تیزی سے جاری ہے: ایرانی وزارتِ داخلہ

   ایرنی وزارتِ صنعت کان کنی و تجارت کے ترجمان عزت اللہ زارعی کا کہنا ہے کہ ایران میں جنگ کے دوران تقریباً تین ہزار صنعتی یونٹس کو نقصان پہنچا ہے۔

   ترجمان کی جانب ےس جاری ہونے والے ایک بیان میں مزید کہا گیا ہے کہ ’بعض صوبوں میں ابھی اس بات کا جائزہ لیا جا رہا ہے اور ابھی یہ کام مکمل نہیں ہوا کہ نقصان کتنا ہوا، اس لیے حتمی اعداد و شمار سامنے نہیں آئے۔

   بیان میں یہ کہا گیا ہے کہ ابتدائی تحقیقات سے یہ معلوم ہوا ہے کہ تقریباً تین ہزار صنعتی یونٹس متاثر ہوئے ہیں۔

   ان کے مطابق مبارکہ سٹیل اور خوزستان سٹیل جیسے اہم صنعتی اداروں کی بحالی کو ترجیح دی جا رہی ہے تاکہ وہ جلد از جلد دوبارہ پیداوار شروع کر سکیں۔

   وزارتِ داخلہ کے ترجمان کا کہنا ہےکہ جنگ نے سپلائی چین کو شدید متاثر کیا ہے اور خام مال کی درآمد اب پہلے کی طرح آسان نہیں رہی۔

7. 7 گھنٹے قبلچین کے شمالی صوبے میں کوئلے کی کان میں دھماکے سے کم از کم 82 افراد ہلاک

   چین کے سرکاری میڈیا کے مطابق شمالی چین میں کوئلے کی کان میں دھماکے سے کم از کم 82 افراد ہلاک ہو گئے ہیں۔

   سرکاری خبر رساں ایجنسی ’شنہوا‘ کے مطابق یہ دھماکہ جمعے کی شب صوبے شانزی میں ٹونگ زو گروپ کی لیوشینیو کوئلے کی کان میں گیس دھماکے کے نتیجے میں ہوا۔

   اطلاعات کے مطابق دھماکے وقت 247 کان کن ڈیوٹی پر موجود تھے، جائے حادثہ پر امدادی سرگرمیاں جاری ہیں٫

8. 8 گھنٹے قبلفیلڈ مارشل عاصم منیر کی تہران میں ایرانی وزیرِ خارجہ عباس عراقچی سے ملاقات

   جمعے کو ایران پہنچنے والے آرمی چیف فیلڈ مارشل عاصم منیر نے ایرانی وزیر خارجہ عباس عراقچی سے تہران میں ملاقات کی ہے۔

   بی بی سی فارسی نے مختلف ایرانی ذرائع کے حوالے سے بتایا ہے کہ جمعے کی شب رات دیر گئے تک جاری رہنے والی بات چیت میں فریقین نے جنگ کے خاتمے کے لیے تازہ ترین سفارتی کوششوں کے ساتھ ساتھ مغربی ایشیائی خطے میں امن و سلامتی کو مضبوط بنانے کے طریقوں پر بھی تبادلہ خیال کیا۔

   گذشتہ چند ہفتوں میں فیلڈ مارشل عاصم منیر کا ایران کا یہ دوسرا دورہ ہے۔

9. 8 گھنٹے قبلانڈیا میں پیٹرول کی قیمت میں 87 پیسے کا اضافہ، ایک لیٹر پیٹرول 99 روپے 51 پیسے کا ہو گیا

   انڈیا میں پیٹرولیم مصنوعات کی قیمتوں میں رواں مہینے کے دوران تیسری مرتبہ اضافہ کر دیا گیا ہے جس کے بعد نئی دہلی میں پیٹرول کی قیمت 87 پیسے اضافے سے 99 روپے 51 پیسے فی لیٹر ہو گئی ہے۔ جبکہ ڈیزل کی قیمت 91 پیسے اضافے کے بعد 92 روپے 49 پیسے ہو گئی ہے۔

   انڈیا میں سرکاری ایندھن کی تقسیم کار کمپنیوں نے ہفتے کے روز اس مہینے میں تیسری بار پیٹرول اور ڈیزل کی قیمتوں میں اضافہ کیا۔

   حکام کے مطابق یہ اقدام ایران جنگ کے بعد تیل کی قیمتوں میں اضافے سے ہونے والے نقصانات کی تلافی کے لیے حکومت کی کوششوں کا حصہ ہے۔

   انڈیا اپنی زیادہ تر تیل کی ضروریات کو درآمد کرتا ہے اور تیل کی بڑھتی ہوئی قیمتوں نے توانائی کی درآمد کی لاگت اور حکومتی بجٹ پر خاصا دباؤ ڈالا ہے۔

10. 8 گھنٹے قبلایران جنگ کے باعث باعث معاشی مشکلات، 27 ممالک کا مدد کے لیے عالمی بینک سے رُجوع

    خبر رساں ادارے ’روئٹرز‘ کی طرف سے دیکھی گئی ایک اندرونی دستاویز کے مطابق، ایران جنگ کے آغاز کے بعد سے 27 ممالک نے عالمی بینک سے رُجوع کیا ہے تاکہ ایران جنگ کے اُن کی معیشتوں پر پڑنے والے اثرات کے باعث مدد لی جا سکے۔

    دستاویز میں ان ممالک کا نام نہیں دیا گیا ہے اور نہ ہی درخواست کی گئی فنڈنگ ​​کی صحیح رقم سامنے آ سکی ہے۔ ورلڈ بینک نے اس معاملے میں تبصرہ کرنے سے گریز کیا ہے۔

    رپورٹ کے مطابق 28 فروری کو تنازع شروع ہونے کے بعد توانائی کی عالمی منڈی میں اس کے نتیجے میں خلل نے سپلائی چین کو متاثر کیا ہے اور ترقی پذیر ممالک کو اہم کھاد کی ترسیل کو روک دیا ہے۔

    کینیا اور عراقی حکام نے تصدیق کی ہے کہ وہ جنگ کے نتائج سے نمٹنے کے لیے عالمی بینک سے فوری مالی مدد کے خواہاں ہیں، جس میں کینیا میں ایندھن کی قیمتوں میں ہوشربا اضافہ اور عراق کی تیل کی آمدنی میں بڑے پیمانے پر کمی شامل ہے۔

    یہ 27 ممالک ان 101 ممالک کا حصہ ہیں جنھیں عالمی بینک کے ہنگامی مالیاتی نظام کی کسی نہ کسی شکل تک رسائی حاصل ہے۔

    عالمی بینک کے صدر اجے بنگا نے گذشتہ ماہ کہا تھا کہ بحران سے نمٹنے کے لیے ادارہ مختلف ممالک کو 20 سے 25 ارب ڈالرز کی فنانسنگ تک رسائی فراہم کرے گا۔

    اُنھوں نے مزید کہا کہ ورلڈ بینک اپنے کچھ منصوبوں کو دوبارہ ترجیح دے کر چھ ماہ کے اندر اس تعداد کو 60 بلین ڈالر اور طویل مدت میں تقریباً 100 بلین ڈالر تک بڑھا سکتا ہے۔

    دوسری جانب آئی ایم کی مینجنگ ڈائریکٹر کرسالینا جیورجیا کا کہنا ہے کہ ایران جنگ کی وجہ سے اُنھیں تقریباً 12 ممالک کی جانب سے 20 ارب سے 50 ارب ڈالرز کی امداد کی درخواست کی توقع ہے۔ لیکن معاملے سے واقف تین ذرائع کے مطابق، ابھی تک چند درخواستیں دائر کی گئی ہیں۔

11. 9 گھنٹے قبلسی ٹی ڈی کا پشین میں چار مبینہ شدت پسندوں کو ہلاک کرنے کا دعویٰ, محمد کاظم، بی بی سی اردو، کوئٹہ

    بلوچستان کے ضلع پشین میں انسدادِ دہشت گردی ڈپارٹمنٹ (سی ٹی ڈی) نے ایک کارروائی میں چار مبینہ شدت پسندوں کو ہلاک کرنے کا دعویٰ کیا ہے۔

    سی ٹی ڈی کے ترجمان کے مطابق خفیہ معلومات کی بنیاد پر یہ کاروائی ضلع پشین کے علاقے سرخاب میں کی گئی۔

    ترجمان کے مطابق کارروائی کے دوران مبینہ شدت پسندوں اور سکیورٹی اہلکاروں کے مابین فائرنگ کا تبادلہ ہوا جس میں چار شدت پسند ہلاک ہو گئے۔

    ترجمان کے مطابق کارروائی کے دوران اسلحہ و گولہ بارود برآمد کرلیا گیا، ہلاک ہونے والے شدت پسندوں کی لاشیں سول ہسپتال کوئٹہ منتقل کردی گئی ہیں۔

12. 23 مئ 2026اسرائیل کی جنوبی لبنان کے شہر طائر کے دو علاقوں سے شہریوں کو نکلنے کی ہدایت

    اسرائیلی فوج نے جنوبی لبنان کے شہر طائر کے دو علاقوں کے رہائشیوں کے لیے ’انخلا کا حکم‘ جاری کیا ہے۔

    اسرائیلی فوج کے عربی زبان کے ترجمان نے فوج کے اکاؤنٹ پر دو عمارتوں اور آس پاس کے رہائشیوں کو وہاں سے نکل جانے کا کہا اور کہا کہ فوجی آپریشن جلد شروع ہو جائے گا۔

    اسرائیلی فوج نے جن عمارتوں کو خالی کرنے کا حکم دیا ہے ان میں سے ایک طائر کے مصروف علاقے کے بالکل قریب واقع ہے۔

    اسرائیل کا دعویٰ ہے کہ حزب اللہ دونوں عمارتوں کو استعمال کرتی ہے۔

    اسرائیل اور لبنان کے درمیان جنگ بندی کے باوجود طائر شہر کو بارہا اسرائیلی فضائی حملوں کا نشانہ بنایا جاتا رہا ہے۔

    آج طائر شہر میں اسرائیلی فضائی حملوں میں کم از کم نو افراد ہلاک ہو گئے۔

    ادھر حزب اللہ نے شمالی اسرائیل پر ڈرون سے حملہ کیا ہے تاہم ابھی تک ممکنہ جانی نقصان کی کوئی رپورٹ جاری نہیں کی گئی ہے۔

13. 23 مئ 2026سفارتکاری کے دوران بھی امریکہ ممکنہ طور پر ایران پر نئے حملوں کی تیاری کر رہا ہے: امریکی ٹی وی

    امریکہ میں بی بی سی کے پارٹنر ادارے سی بی ایس نیوز نے رپورٹ کیا ہے کہ سفارتی کوششوں کے دوران بھی امریکہ ایران پر نئے حملوں کی تیاری کر رہا ہے۔

    سی بی ایس نیوز کے مطابق، منصوبہ بندی سے آگاہ ذرائع نے بتایا کہ ٹرمپ انتظامیہ جمعہ کو نئے حملوں کی تیاری کر رہی تھی، تاہم جمعہ کی شام تک حتمی فیصلہ نہیں کیا گیا تھا۔

    صدر ٹرمپ نے سوشل میڈیا پر ایک پیغام میں اعلان کیا کہ ’حکومتی معاملات‘ انھیں سنیچر کے روز اپنے بیٹے ڈونلڈ ٹرمپ جونیئر کی شادی میں شرکت سے روکیں گے۔

    وہ ویک اینڈ نیو جرسی میں اپنے گولف ریزورٹ میں گزارنے والے تھے، لیکن اب وہ وائٹ ہاؤس واپس آ رہے ہیں۔

    کئی ذرائع نے یہ بھی کہا ہے کہ امریکی فوج اور انٹیلی جنس کمیونٹی کے کچھ ارکان نے اپنے تعطیلات کے منصوبے منسوخ کر دیے ہیں، یہ اقدام نئے حملوں کے امکان کے پیش نظر اٹھایا گیا تھا۔

    ان ذرائع کے مطابق امریکی دفاعی اور انٹیلی جنس حکام خطے میں امریکی فوجی موجودگی کو کم کرنے کی کوششوں اور ممکنہ ایرانی ردعمل کے خدشات کے تحت مشرق وسطیٰ میں تعینات کچھ افواج کے انخلا کے ساتھ ساتھ بیرون ملک اڈوں پر سٹینڈ بائی پر موجود فوجیوں کی فہرست کو اپ ڈیٹ کر رہے ہیں۔

    اپریل کے اوائل میں عارضی جنگ بندی کے آغاز کے بعد سے، ایران اور امریکہ نے بڑے پیمانے پر ایک دوسرے پر براہ راست حملہ کرنے سے گریز کیا ہے، جس سے طویل مدتی معاہدے پر بالواسطہ بات چیت کے لیے وقت دیا گیا ہے۔

    وائٹ ہاؤس کی ترجمان اینا کیلی نے سی بی ایس کو بتایا کہ ’ٹرمپ نے اپنی سرخ لکیریں بالکل واضح کر دی ہیں کہ ایران کو کبھی بھی جوہری ہتھیار حاصل نہیں کرنا چاہیے اور وہ اپنی افزودہ یورینیم کو برقرار نہیں رکھ سکتا۔‘

14. 23 مئ 2026کوئٹہ کے قریب نامعلوم افراد کے حملے میں دو سرکاری اہلکار ہلاک, محمد کاظم، بی بی سی اردو/کوئٹہ

    بلوچستان کے دارالحکومت کوئٹہ کے قریب نامعلوم مسلح افراد کے حملے میں دو سرکاری اہلکار ہلاک ہو گئے۔

    دونوں اہلکار، جو آپس میں سگے بھائی تھے، کو نامعلوم مسلح افراد نے جمعہ کی شام ضلع مستونگ کے علاقے غنجہ ڈوری میں نشانہ بنایا۔

    سرکاری حکام کے مطابق مارے جانے والے افراد کی شناخت فنانس آفیسر فرید اللہ شاہ اور ان کے بھائی انعام اللہ شاہ کے ناموں سے ہوئی۔ انعام اللہ شاہ وزیر اعلیٰ سیکریٹریٹ کے ملازم تھے۔

    اس حملے کے محرکات تاحال معلوم نہیں ہو سکے۔

    دریں اثنا وزیر اعلیٰ بلوچستان میر سرفراز بگٹی نے اس واقعے کی مذمت کرتے ہوئے گہرے دکھ اور افسوس کا اظہار کیا ہے۔ ایک بیان کے مطابق وزیر اعلیٰ بلوچستان نے واقعے کا فوری نوٹس لیتے ہوئے متعلقہ حکام سے رپورٹ طلب کر لی ہے۔

    وزیر اعلیٰ نے واقعے میں ملوث عناصر کو فوری طور پر گرفتار کرنے کے احکامات جاری کیے۔

    دریں اثنا بلوچستان کے ضلع پشین میں کاؤنٹر ٹیررزم ڈیپارٹمنٹ (سی ٹی ڈی) کی ایک کارروائی میں حکام کے مطابق چار مبینہ شدت پسند ہلاک ہو گئے ہیں۔

    سی ٹی ڈی کے ترجمان کے مطابق خفیہ معلومات کی بنیاد پر یہ کارروائی ضلع پشین کے علاقے سرخاب میں کی گئی۔

    ترجمان کے مطابق کارروائی کے دوران مبینہ شدت پسندوں اور سکیورٹی اہلکاروں کے درمیان فائرنگ کا تبادلہ ہوا جس میں چار شدت پسند ہلاک ہو گئے۔

    ترجمان کے مطابق کارروائی کے دوران اسلحہ اور گولہ بارود برآمد کر لیا گیا۔

    ہلاک ہونے والے شدت پسندوں کی لاشیں سول ہسپتال کوئٹہ منتقل کر دی گئیں۔

    ترجمان کا کہنا ہے کہ ان کا تعلق ایک کالعدم تنظیم سے تھا۔

    تاحال ان افراد کی ہلاکت اور کسی کالعدم تنظیم سے تعلق کی آزاد ذرائع سے تصدیق نہیں ہوئی ہے۔

15. 23 مئ 2026پاکستان میں پیٹرول اور ڈیزل کی قیمتوں میں کمی

    پاکستانی حکومت نے عید الاضحیٰ سے کچھ روز قبل پیٹرول کی قیمت میں چھ روپے کی کمی کا اعلان کیا ہے۔

    وزارت توانائی میں پیٹرولیئم ڈویژن کے اعلامیے کے مطابق پیٹرول کی قیمت میں فی لیٹر چھ روپے جبکہ ڈیزل کی قیمت میں بھی فی لیٹر 6 روپے 80 پیسے کی کمی کی گئی ہے۔

    اس کے مطابق پیٹرول کی نئی قیمت 403 روپے 78 پیسے جبکہ ڈیزل کی نئی قیمت 402 روپے 78 پیسے فی لیٹر مقرر کی گئی ہے۔

    گذشتہ ہفتے پاکستان میں پیٹرول اور ڈیزل کی قیمتوں میں پانچ، پانچ روپے فی لیٹر کمی کی گئی تھی۔

16. 22 مئ 2026ایران کی جانب سے قطری وفد کے دورے کی تصدیق

    ایرانی وزارت خارجہ کے ترجمان اسماعیل بقائی نے تصدیق کی ہے کہ ایک قطری وفد جمعے کو تہران میں موجود تھا جس نے ایرانی وزیر خارجہ عباس عراقچی سے بات چیت کی ہے۔

    تفصیلات بتائے بغیر انھوں نے کہا کہ حالیہ دنوں میں مختلف ممالک نے وزیر خارجہ سے بات کی ہے۔ تاہم انھوں نے اس بات پر زور دیا کہ ایران اور امریکہ کے درمیان ثالث پاکستان ہے۔

    اس سے قبل روئٹرز نے باخبر ذرائع کے حوالے سے اپنی رپورٹ میں بتایا تھا کہ قطر کا ایک وفد تہران پہنچا ہے۔

    قطر، متحدہ عرب امارات اور سعودی عرب وہ تین ممالک تھے جن کے بارے میں ٹرمپ نے پیر کو کہا تھا کہ انھوں نے ان کی درخواست پر ایران پر حملہ عارضی طور پر روک دیا ہے۔

17. 22 مئ 2026قلات میں ایئرپورٹ سکیورٹی فورس کے افسر سمیت دو اہلکار ’اغوا‘, محمد کاظم، بی بی سی اردو/کوئٹہ

    بلوچستان کے ضلع قلات سے ایئرپورٹ سکیورٹی فورس کے ایک سینیئر افسر سمیت دو اہلکاروں کو مبینہ طور پر اغوا کر لیا گیا ہے۔

    قلات میں ایک سینیئر سرکاری اہلکار نے نام ظاہر نہ کرنے کی شرط پر بتایا کہ ژوب میں تعینات ایئرپورٹ سکیورٹی فورس کے ڈپٹی ڈائریکٹر محمد وسیم اپنے باورچی کے ہمراہ 20 مئی کو ژوب سے کوئٹہ پہنچے تھے۔ انھوں نے بتایا کہ کوئٹہ سے وہ ایک کرائے کی گاڑی میں کراچی کے لیے روانہ ہوئے تھے۔

    ان کا کہنا تھا کہ جب وہ قلات پہنچے تو ’نامعلوم مسلح افراد نے ایئرپورٹ سکیورٹی فورس کے ڈپٹی ڈائریکٹر اور ان کے باورچی کو اغوا کر کے نامعلوم مقام کی جانب لے گئے‘ جبکہ گاڑی میں سوار ایک مسافر اور ڈرائیور کو چھوڑ دیا۔

    سینیئر سرکاری اہلکار کے مطابق مغوی آفیسر اور اہلکار کی بازیابی کے لیے کوششیں جاری ہیں۔ تاحال سرکاری سطح پر اس حوالے سے کوئی بیان جاری نہیں کیا گیا ہے۔

    بلوچستان میں گذشتہ چند دنوں سے قومی شاہراہوں پر معدنیات لے جانے والے گاڑیوں پر حملوں اور اغوا کے واقعات میں اضافہ سامنے آیا ہے۔ گذشتہ شب ضلع زیارت میں مانگی کے علاقے سے پولیس کے ایک ایس ایچ او سمیت تین افراد کو اغوا کرلیا گیا۔

    13مئی کو کوئٹہ کراچی شاہراہ پر ضلع مستونگ کے علاقے کھڈ کھوچہ سے گوادر یونیورسٹی کے وائس چانسلر، پرو وائس چانسلر اور پرسنل سٹاف آفیسر اور ڈرائیور کو اغوا کرلیا گیا تھاُ۔ دس روز گزرنے کے باوجود تاحال گوادر یونیورسٹی کے وائس چانسلر اور دیگر اہلکاروں کی بازیابی ممکن نہیں ہوئی۔

18. 22 مئ 2026مارکو روبیو نے امریکی فوجی تعیناتیوں پر نیٹو اتحادیوں کو اعتماد میں لیا, پولین کولا، بی بی سی

    سویڈن میں نیٹو کے وزرائے خارجہ کے اجلاس میں امریکہ کے وزیر خارجہ مارکو روبیو نے یورپ میں امریکی فوجیوں کی تعیناتی سے متعلق امریکی فیصلوں پر اتحادیوں کو اعتماد میں لیا ہے۔

    خیال رہے کہ صدر ڈونلڈ ٹرمپ نے کہا تھا کہ امریکہ پولینڈ میں مزید پانچ ہزار فوجی تعینات کرے گا۔

    یہ فیصلہ اُس کے ایک ہفتے بعد سامنے آیا جب ملک میں چار ہزار فوجیوں کی مجوزہ تعیناتی منسوخ کر دی گئی تھی اور چند دن بعد یہ اعلان بھی ہوا تھا کہ امریکہ جرمنی سے اپنے فوجی واپس بلائے گا۔

    یہ اعلانات نیٹو اتحادیوں کے لیے باعث تشویش تھے۔ تاہم جمعے کو نیٹو اجلاس کے بعد ایک پریس کانفرنس میں روبیو نے کہا کہ ’امریکہ اپنی عالمی ذمہ داریوں کے پیش نظر مسلسل اپنے فوجی وجود کا ازسرنو جائزہ لے رہا ہے۔‘

    امریکی فوجی اس وقت مشرق وسطیٰ میں بھی موجود ہیں جہاں امریکہ اور اسرائیل کا ایران کے ساتھ تنازع جاری ہے۔

    ٹرمپ نے جمعرات کو اپنے سوشل میڈیا پلیٹ فارم ٹروتھ سوشل پر لکھا کہ یہ فیصلہ پولینڈ کے صدر کے ساتھ امریکہ کے تعلقات کی بنیاد پر کیا گیا جن کی انھوں نے گذشتہ برس صدارتی انتخابات میں حمایت کی تھی اور جو طویل عرصے سے ان کے حامی رہے ہیں۔

    امریکی صدر نے یہ وضاحت نہیں کی کہ اضافی فوجی پہلے سے طے شدہ تعیناتی کا حصہ ہیں یا الگ اقدام۔

    سویڈن کی وزیر خارجہ نے کہا کہ یہ واقعی الجھن پیدا کرنے والی صورت حال ہے اور اسے سمجھنا ہمیشہ آسان نہیں ہوتا۔

    تاہم ان کے امریکی ہم منصب نے کہا کہ اتحاد کے اندر یہ بات اچھی طرح سمجھ لی گئی ہے کہ یورپ میں امریکی فوجیوں کی موجودگی میں تبدیلی کی جائے گی۔

    روبیو نے کہا کہ یہ عمل پہلے ہی جاری تھا اور اسے اتحادیوں کے ساتھ رابطے میں رہ کر انجام دیا گیا ہے۔ تشویش کا اعتراف کرتے ہوئے انھوں نے کہا کہ ’میں یہ نہیں کہہ رہا کہ وہ اس پر خوش ہوں گے لیکن وہ یقینی طور پر اس سے آگاہ ہیں۔‘

    امریکہ نیٹو کا سب سے بڑا اور سب سے زیادہ صلاحیت رکھنے والا رکن ہے۔ اس نے سوویت دور سے کئی دہائیوں تک یورپی ممالک میں فوجی موجودگی برقرار رکھی ہے۔

    فروری 2022 میں روس کی جانب سے یوکرین پر مکمل حملے کے بعد امریکہ کے یورپی اتحادیوں نے واشنگٹن پر زور دیا ہے کہ وہ ان کے دفاع کے لیے اپنی وابستگی برقرار رکھے۔

    جرمنی میں 36 ہزار امریکی فوجی، اٹلی میں تقریباً 12 ہزار، برطانیہ میں 10 ہزار اور پولینڈ میں بھی اندازاً 10 ہزار فوجی موجود ہیں۔

    ٹرمپ اکثر نیٹو پر تنقید کرتے رہے ہیں اور بعض اوقات یورپی اتحادیوں اور کینیڈا کی جانب سے امریکہ کے مقابلے میں کم مالی شراکت کے باعث امریکہ کو اتحاد سے نکالنے کی دھمکی بھی دے چکے ہیں۔

    اس کے نتیجے میں کئی ممالک نے اب اپنے دفاعی اخراجات بڑھانے پر آمادگی ظاہر کی ہے۔

    تاہم امریکی صدر نیٹو ممالک کی جانب سے ایران کے ساتھ تنازع میں امریکہ کی مدد نہ کرنے پر بھی ناراض رہے ہیں۔

    وائٹ ہاؤس نے حالیہ ہفتوں میں اشارہ دیا ہے کہ وہ اپنے ’امریکہ فرسٹ‘ ایجنڈے کے تحت یورپ میں مجموعی فوجی تعداد کم کرنے کا ارادہ رکھتا ہے۔

    نیٹو کے سیکریٹری جنرل مارک روٹے نے صحافیوں کو بتایا کہ یورپ کا امریکہ پر کم انحصار کرنے کی جانب رجحان جاری رہے گا۔

    سویڈن میں امریکی وزیر خارجہ نے خبردار کیا کہ امریکی سیاست میں ہمیشہ نیٹو اتحاد میں امریکہ کے کردار پر بحث ہوتی رہی ہے۔

    روبیو نے کہا کہ ’میں سمجھتا ہوں کہ نیٹو یورپ کے لیے اہم ہے اور ایسا ہونا چاہیے، لیکن اسے امریکہ کے لیے بھی اہم ہونا چاہیے۔‘

19. 22 مئ 2026فیلڈ مارشل عاصم منیر تہران پہنچ گئے: آئی ایس پی آر

    پاکستان کے شعبہ تعلقات عامہ آئی ایس پی آر کے مطابق فیلڈ مارشل سید عاصم منیر جاری ثالثی کوششوں کے سلسلے میں تہران پہنچ گئے ہیں۔

    آئی ایس پی آر کے مطابق تہران آمد پر اُن کا استقبال اور پرتپاک خیرمقدم ایرانی وزیر داخلہ اسکندر مومنی نے کیا، جہاں محسن نقوی بھی استقبالیہ تقریب میں موجود تھے۔

20. 22 مئ 2026ایران معاہدہ کرنے کے لیے بے چین ہے: ڈونلڈ ٹرمپ

    امریکی صدر ڈونلڈ ٹرمپ نے وائٹ ہاؤس میں گفتگو کے دوران ایران کے حوالے سے بات کرتے ہوئے کہا ہے کہ ’ہمارے پاس دنیا کی سب سے عظیم فوج ہے‘۔

    ٹرمپ نے کہا کہ ’ایران معاہدہ کرنے کے لیے بے تاب ہے، ہم دیکھیں گے کیا ہوتا ہے۔ لیکن ہم نے انھیں سخت نشانہ بنایا اور ہمارے پاس کوئی اور راستہ نہیں تھا کیونکہ ایران ایٹمی ہتھیار نہیں رکھ سکتا۔ وہ اسے حاصل نہیں کر سکتے۔‘