لائیو, فیلڈ مارشل عاصم منیر ایران کے دورے پر روانہ، ’امید ہے ایران سے جلد معاہدہ طے پا جائے گا‘: مارکو روبیو

لائیو کوریج

1. 58 منٹ قبلاسماعیل بقائی ایران کی امریکہ سے مذاکراتی ٹیم کے ترجمان مقرر

   ایران کی امریکہ کے ساتھ مذاکرات کرنے والی ٹیم کے سربراہ محمد باقر قالیباف نے ایک حکم نامے کے ذریعے اسماعیل بقائی کو ٹیم کا ترجمان مقرر کر دیا ہے۔

   اسماعیل بقائی اس وقت ایرانی وزارتِ خارجہ کے بھی ترجمان ہیں۔

   ایران اور امریکہ کے درمیان جنگ کے بعد ہونے والے پہلے مذاکراتی دور میں، جو اسلام آباد میں منعقد ہوا، اسماعیل بقائی ایرانی وفد کے رکن کے طور پر پاکستان گئے تھے۔

   گذشتہ دو دنوں کے دوران پاکستان کے وزیر داخلہ کے دورہ ایران کے موقع پر دونوں ممالک کے درمیان اہم بات چیت جاری رہی۔ ایرانی خبر رساں ایجنسی (فارس) کے مطابق مذاکرات کا مقصد ایران اور امریکہ کے درمیان اختلافات کے حل کے لیے تجاویز کا جائزہ لینا تھا۔

   دوسری جانب امریکہ کے وزیر خارجہ مارکو روبیو نے سویڈن میں صحافیوں سے بات کرتے ہوئے کہا ہے کہ فیلڈ مارشل عاصم منیر تہران جا رہے ہیں، ان سے مسلسل رابطے میں ہیں اور امید ہے ایران سے جلد معاہدہ طے پا جائے گا۔

2. ایک گھنٹہ قبلبریکنگ, فیلڈ مارشل عاصم منیر سے مسلسل رابطے میں ہیں، امید ہے ایران سے جلد معاہدہ طے پا جائے گا: مارکو روبیو

   امریکہ کے وزیر خارجہ مارکو روبیو نے سویڈن میں صحافیوں سے بات کرتے ہوئے کہا ہے کہ فیلڈ مارشل عاصم منیر تہران جا رہے ہیں، ان سے مسلسل رابطے میں ہیں اور امید ہے ایران سے جلد معاہدہ طے پا جائے گا۔

   مارکو روبیو نے کہا کہ ایران سے مذاکرات پاکستانی کی ثالثی میں ہو رہے ہیں۔

   انھوں نے کہا کہ ایران کے ساتھ ڈیل ہماری پہلی ترجیح ہے۔ انھوں نے بتایا کہ ’امریکہ سے معاہدہ کرنے کے لیے ایران کو فیصلہ کرنا ہے۔‘

3. 2 گھنٹے قبل’یہ ذاتی نوعیت‘ کا معاملہ ہے، تاہم کسی خاتون کو ہراساں کرنے کے معاملے پر بلا امتیاز کارروائی ہوگی، مریم نواز کا انتباہ

   وزیر اعلیٰ پنجاب مریم نواز نے کہا ہے کہ ایک صوبائی رکنِ اسمبلی اور ایک معروف میڈیا شخصیت سے متعلق حالیہ معاملہ ذاتی نوعیت کا ہے، تاہم اس کو قانون اور میرٹ کے مطابق نمٹایا جائے گا۔

   سماجی رابطے کی ویب سائٹ ایکس پر جاری بیان میں مریم نواز نے کہا کہ کسی خاتون کو ہراساں کرنے، دھمکانے یا استحصال کرنے کی کوشش میں ملوث افراد کے خلاف بلا امتیاز کارروائی کی جائے گی۔

   ان کا کہنا تھا کہ کوئی بھی شخص، چاہے اس کا عہدہ، حیثیت یا سیاسی تعلق کچھ بھی ہو، قانون سے بالاتر نہیں ہے۔

   مریم نواز نے کہا کہ ریاستی ادارے اپنی ذمہ داریاں آزادانہ اور غیر جانبدارانہ انداز میں آئین اور قانون کے مطابق ادا کریں گے۔

   انھوں نے خبردار کیا کہ کسی بھی خاتون کو ذاتی مواد عام کرنے کی دھمکی دے کر بلیک میل کرنے یا سیاسی اثر و رسوخ استعمال کرنے کی کوشش برداشت نہیں کی جائے گی اور ایسے عناصر کے خلاف سخت کارروائی کی جائے گی۔

   ان کے بقول اسے ملوث افراد کے لیے ایک واضح اور سنجیدہ پیغام سمجھا جائے۔

   واضح رہے کہ تین روز قبل اداکارہ مومنہ اقبال نے اپنے انسٹاگرام اکاؤنٹ پر ایک پوسٹ میں دعویٰ کیا تھا کہ ایک لیگی ایم پی اے کی جانب سے انھیں اور ان کے خاندان کو ہراساں کیا جا رہا ہے اور جان سے مارنے کی دھمکیاں دی جا رہی ہیں۔

   انھوں نے یہ بھی کہا تھا کہ وہ اس معاملے پر مختلف اداروں میں شکایات درج کرا چکی ہیں، تاہم ملزم کے خلاف کارروائی کے بجائے ان کی شکایت کو دبایا جا رہا ہے۔

   جمعے کو ثاقب چدھڑ نے اداکارہ مومنہ اقبال سے متعلق معاملے پر وضاحتی بیان جاری کرتے ہوئے کہا ہے کہ انھوں نے گذشتہ آٹھ ماہ سے مومنہ اقبال کو کوئی کال نہیں کی اور اب ان کا ان سے کوئی رابطہ بھی نہیں ہے۔

   انھوں نے دعویٰ کیا کہ ان کے پاس اس حوالے سے تمام ریکارڈ موجود ہے اور مومنہ اقبال ’ویمن کارڈ‘ استعمال کر رہی ہیں۔

   ثاقب چدھڑ کے مطابق اداکارہ کے ہونے والے شوہر نے ان کے موبائل میں ان کی ایک ویڈیو دیکھی، جس کے بعد انھوں نے غصے میں آ کر انھیں کال کر کے دھمکی دی۔ جبکہ ان کے بقول اداکارہ کی والدہ اور خود اداکارہ نے بھی انھیں فون کر کے معذرت کی ہے اور درگزر سے کام لینے کی درخواست کی ہے۔

   انھوں نے کہا کہ اس معاملے پر انھوں نے تھانے میں درخواست بھی دی ہے اور مؤقف اختیار کیا ہے کہ انھیں ایک مخصوص نمبر سے دھمکیاں دی جا رہی ہیں۔

   لیگی رکنِ اسمبلی کا مزید کہنا تھا کہ انھیں بعد میں معلوم ہوا کہ مومنہ اقبال شادی کرنے جا رہی ہیں۔ انھوں نے کہا کہ اگر انھوں نے کبھی مومنہ اقبال کو کال کی ہو تو اس کے ثبوت پیش کیے جائیں۔

   گذشتہ روز کی پیشی کا احوال

   تاہم گذشتہ دن اداکارہ مومنہ اقبال اور مسلم لیگ ن کے رکنِ صوبائی اسمبلی ثاقب چدھڑ لاہور میں نیشنل سائبر کرائم انویسٹی گیشن ایجنسی (این سی سی آئی اے) کے دفتر میں اپنے اپنے وکلا کے ہمراہ پیش ہوئے۔ مومنہ اقبال کی جانب سے این سی سی آئی اے میں لیگی ایم پی اے کے خلاف ثبوت بھی جمع کروائے گئے ہیں۔

   اس کے بعد این سی سی آئی اے نے اداکارہ مومنہ اقبال اور چنیوٹ سے تعلق رکھنے والے لیگی ایم پی اے ثاقب چدھڑ کو لاہور میں طلب کیا۔

   اداکارہ کی درخواست میں ثاقب چدھڑ اور ان کی اہلیہ کو بھی نامزد کیا گیا ہے۔

   رکن صوبائی اسمبلی حنا پرویز بٹ نے کہا ہے کہ ’وزیراعلی مریم نواز نے مومنہ اقبال کیس کا سختی سے نوٹس لیا ہے، اداکارہ مومنہ اقبال اور ان کی فیملی کو فول پروف سکیورٹی فراہم کرنے کی ہدایت کر دی گئی ہے۔‘

   انھوں نے کہا کہ ’وزیراعلیٰ مریم نواز کے لیے خواتین ریڈ لائن ہیں، ان کی ہراسانی یا ذہنی اور تشدد بالکل بھی برداشت نہیں کیا جائے گا۔‘

   اداکارہ کے وکیل نے پیشی کے بعد میڈیا کو کیا بتایا؟

   پیشی کے بعد مومنہ اقبال کے وکلا نے میڈیا سے گفتگو کرتے ہوئے کہا کہ معاملہ اداکارہ کی شادی طے ہونے کے بعد خراب ہوا۔ ان کا کہنا تھا کہ ایم پی اے اداکارہ سے شادی کے خواہاں تھے اور اس سلسلے میں رشتہ بھی بھجوایا گیا تھا۔

   وکلا کے مطابق دونوں کے درمیان 2022-23 کے دوران تعلقات رہے، تاہم بعد میں مومنہ اقبال کو معلوم ہوا کہ ایم پی اے پہلے سے شادی شدہ ہیں اور وہ تیسری شادی کرنا چاہتے ہیں۔ اس پر اداکارہ نے تعلق ختم کر دیا اور ان کی شادی کہیں اور طے ہو گئی، جس کی تقریب آئندہ جون میں متوقع ہے۔

   انھوں نے الزام عائد کیا کہ مومنہ اقبال کا رشتہ طے ہونے کے بعد ایم پی اے نے انھیں ہراساں کرنا شروع کیا اور اپنے اثر و رسوخ کا استعمال کرتے ہوئے اداکارہ کے ہونے والے شوہر کے خلاف ایک بے بنیاد مقدمہ بھی درج کروایا۔

   وکلا کا کہنا تھا کہ اداکارہ کی شادی کی تیاریوں میں مصروف افراد کو بھی ہراساں کیا جا رہا ہے، تاہم شادی طے شدہ تاریخ پر ہی ہوگی۔ ان کے مطابق تمام شواہد متعلقہ حکام کو فراہم کر دیے گئے ہیں۔ انھوں نے وزیراعلیٰ پنجاب کا شکریہ بھی ادا کیا کہ انھوں نے معاملے کا نوٹس لیا اور سکیورٹی فراہم کی۔

   ایم پی اے کے وکیل نے کیا صفائی دی؟

   دوسری جانب این سی سی آئی اے کے دفتر میں پیشی سے قبل ثاقب چدھڑ کے وکیل میاں علی اشفاق نے میڈیا سے گفتگو کرتے ہوئے کہا کہ انھیں سوشل میڈیا پر مبینہ طور پر غیر مناسب مواد اپ لوڈ کیے جانے کے حوالے سے نوٹس موصول ہوا ہے۔

   ان کا کہنا تھا کہ ثاقب چدھڑ کے خلاف لگائے گئے الزامات کی مکمل تفصیلات حاصل کرنے کے بعد ہی مؤقف دیا جائے گا۔ انھوں نے کہا کہ ہراساں کیے جانے کے الزامات زیرِ گردش ہیں، تاہم این سی سی آئی اے ایسے معاملات کے لیے موزوں فورم نہیں ہے۔

   انھوں نے مزید کہا کہ اگر سوشل میڈیا پر کوئی غیر قانونی مواد شائع کیا گیا ہے تو اس حوالے سے معلومات حاصل کر کے قانونی کارروائی میں حصہ لیا جائے گا۔

4. 2 گھنٹے قبلبریکنگ, فیلڈ مارشل عاصم منیر ایران کے دورے پر روانہ ہو گئے: پاکستانی سرکاری میڈیا

   پاکستان کے سرکاری میڈیا نے سکیورٹی ذرائع کے حوالے سے یہ خبر نشر کی ہے کہ آرمی چیف فیلڈ مارشل سید عاصم منیر آج سرکاری دورے پر ایران روانہ ہو گئے ہیں۔

   پی ٹی وی کو ذرائع نے یہ بھی بتایا کہ اس دورے کے دوران فیلڈ مارشل عاصم منیر ایران-امریکہ مذاکرات، خطے میں امن کی صورتحال اور دیگر اہم امور پر بات چیت کریں گے۔

   تفصیلات کے مطابق اپنے دورۂ ایران کے دوران آرمی چیف اہم ایرانی شخصیات سے بھی ملاقاتیں کریں گے، جن میں باہمی دلچسپی کے امور اور علاقائی سکیورٹی پر تبادلہ خیال کیا جائے گا۔

5. 2 گھنٹے قبلایران-امریکہ مذاکرات میں پیش رفت کے باوجود دو نکات پر تعطل برقرار ہے: عباس عراقچی

   ایران کے وزیر خارجہ عباس عراقچی نے کہا ہے کہ امریکہ اور ایران کے درمیان جاری مذاکرات میں کچھ مثبت اشارے ضرور ملے ہیں، تاہم ایران کے یورینیم ذخائر اور آبنائے ہرمز کے کنٹرول جیسے اہم معاملات پر اب بھی تعطل برقرار ہے۔

   عباس عراقچی نے سوشل میڈیا پلیٹ فارم ایکس پر ایک سلسلہ وار پیغامات میں کہا کہ موجودہ کشیدہ صورتحال کے باوجود بات چیت کے عمل میں ’محتاط امید‘ پائی جاتی ہے، تاہم ان کے بقول سفارت کاری ہی آگے بڑھنے کا واحد راستہ ہے۔

   ان کا کہنا تھا کہ ایران نے آبنائے ہرمز میں جہاز رانی کو منظم کرنے کے لیے ایک نئی بحری اتھارٹی قائم کی ہے، اور ایک نقشہ بھی جاری کیا گیا ہے جس کے مطابق ایران نے متحدہ عرب امارات کے قریب واقع سمندری حدود تک اپنا کنٹرول بڑھا دیا ہے، جہاں سے گزرنے والے جہازوں کے لیے پیشگی اجازت لازمی قرار دی گئی ہے۔

   ایرانی وزیر خارجہ کے مطابق مذاکراتی عمل میں دو بڑی رکاوٹیں درپیش ہیں۔ ایک جانب امریکہ فوری طور پر جوہری پروگرام پر بات چیت چاہتا ہے، جبکہ ایران اس سے قبل 30 روزہ اعتماد سازی کا وقت دینے پر زور دے رہا ہے۔

   دوسری جانب آبنائے ہرمز میں فیس یا ٹول سسٹم کے قیام پر دونوں ممالک کے درمیان شدید اختلافات موجود ہیں۔

   عباس عراقچی نے کہا کہ مذاکرات کا حتمی مسودہ تیار ہو چکا ہے، تاہم یہ دو بڑے نکات اب بھی کسی حتمی معاہدے کی راہ میں رکاوٹ ہیں۔ان کے مطابق اس تعطل کو ختم کرنے کے لیے ’واضح مؤقف، سمجھوتہ اور فیصلہ کن اقدامات‘ ضروری ہیں، اور انھوں نے خبردار کیا کہ ان معاملات کو حل نہ کرنا خطرناک ہو سکتا ہے۔

   دوسری جانب ایرانی پاسدارانِ انقلاب کی بحریہ کا کہنا ہے کہ گذشتہ 24 گھنٹوں کے دوران 35 جہاز، جن میں آئل ٹینکرز، کنٹینر جہاز اور دیگر تجارتی بحری جہاز شامل ہیں، ایرانی حکام کی اجازت سے آبنائے ہرمز سے گزرے۔

   ایرانی سرکاری میڈیا کے مطابق اس عمل کو پاسدارانِ انقلاب کی بحریہ کی نگرانی میں منظم کیا گیا، جسے آبنائے ہرمز میں جہاز رانی کے نظام کو کنٹرول کرنے کی کوشش کا حصہ قرار دیا جا رہا ہے۔

   ادھر امریکی وزیر خارجہ مارکو روبیو نے ایران کے مجوزہ ’ٹول سسٹم‘ کو مسترد کرتے ہوئے کہا ہے کہ کسی ملک کے لیے بھی اس طرح کا اقدام قابل قبول نہیں ہو سکتا۔

   ان کے مطابق، یہ نظام بین الاقوامی جہاز رانی کے لیے خطرہ ہے اور اسے غیر قانونی اقدام سمجھا جائے گا۔

6. 4 گھنٹے قبلپاکستان نے سعودی عرب اور متحدہ عرب امارات پر ڈرون حملوں کی مذمت کی: ترجمان دفتر خارجہ

   ترجمان دفتر خارجہ نے ہفتہ وار بریفنگ میں کہا ہے کہ 17 مئی کو سعودی عرب اور متحدہ عرب امارات پر ڈرون حملے کیے گئے جن کی پاکستان نے شدید مذمت کی ہے اور دونوں برادر ممالک کے ساتھ مکمل یکجہتی کا اظہار کیا ہے۔

   ترجمان کے مطابق متحدہ عرب امارات پر حملوں کے حوالے سے پاکستان نے اس بات پر زور دیا کہ جوہری تنصیبات کو جان بوجھ کر نشانہ بنانا بین الاقوامی قانون کی سنگین خلاف ورزی ہے، جس میں بین الاقوامی انسانی قانون، اقوام متحدہ کا چارٹر، اور بین الاقوامی ایٹمی توانائی ایجنسی (آئی اے ای اے) کے اصول شامل ہیں۔

   ان کا کہنا تھا کہ جوہری تنصیبات کو کسی بھی صورت میں نشانہ نہیں بنایا جانا چاہیے۔

7. 4 گھنٹے قبلپاکستان کی مشرقِ وسطیٰ میں امن کے لیے کوششیں جاری ہیں: ترجمان دفتر خارجہ

   ترجمان دفتر خارجہ نے کہا ہے کہ پاکستان نے اس ہفتے بھی مشرقِ وسطیٰ اور خلیجی خطے میں جاری کشیدگی کے پرامن حل، مکالمے کے فروغ اور دیرپا استحکام کے لیے اپنی سفارتی کوششیں جاری رکھی ہیں۔

   اسلام آباد میں ہفتہ وار بریفنگ کے دوران ترجمان کے مطابق وزیر اعظم شہباز شریف نے گذشتہ ایک ہفتے کے دوران قطر کے امیر شیخ تمیم بن حمد آل ثانی سے دو مرتبہ ٹیلیفونک رابطہ کیا۔

   ان کے مطابق ان رابطوں میں دوطرفہ تعاون کے علاوہ خطے اور عالمی صورتحال، خصوصاً مشرقِ وسطیٰ میں جاری پیش رفت اور پاکستان کی جانب سے کشیدگی کم کرنے کی کوششوں پر تبادلہ خیال کیا گیا۔

   ترجمان دفتر خارجہ کا کہنا تھا کہ دونوں رہنماؤں نے اس بات پر اتفاق کیا کہ خطے میں پائیدار امن اور استحکام کے لیے مکالمہ اور سفارت کاری ہی واحد مؤثر راستہ ہے۔

   ترجمان نے مزید بتایا کہ نائب وزیر اعظم اور وزیر خارجہ سینیٹر اسحاق ڈار بھی اس سلسلے میں متحرک رہے اور مختلف ممالک کے ہم منصبوں سے رابطوں کا سلسلہ جاری رکھا۔

   ان کے مطابق 18 مئی کو اسحاق ڈار نے قطر کے وزیر مملکت برائے خارجہ محمد بن عبدالعزیز الخلیفی سے ٹیلیفون پر گفتگو کی، جبکہ 17 مئی کو مصر کے وزیر خارجہ بدر عبدالعتی اور 16 مئی کو ازبکستان کے وزیر خارجہ بختیار سعیدوف سے رابطہ کیا، جن میں علاقائی صورتحال اور باہمی دلچسپی کے امور زیر بحث آئے۔

   ترجمان دفتر خارجہ نے بتایا کہ وزیر داخلہ محسن نقوی نے بھی اس ہفتے ایران کے دو اہم دورے کیے، 16 اور 20 مئی کو، جہاں انھوں نے ایرانی قیادت سے ملاقاتیں کیں اور دوطرفہ امور پر بات چیت کی۔

   واضح رہے کہ اس بریفنگ میں ایک سوال کے جواب میں ترجمان نے کہا کہ فیلڈ مارشل کے دورہِ ایران کے حوالے سے ایک سوال پر ان کا کہنا تھا کہ ’فیلڈ مارشل دورہ ایران کررہے ہیں یا نہیں، نا اس کی تصدیق کرتے ہیں نا تردید۔‘

8. 4 گھنٹے قبلنیٹو سربراہ کا پولینڈ میں 5,000 امریکی فوجیوں کی تعیناتی کا خیرمقدم

   نیٹو کے سیکرٹری جنرل مارک روٹے نے امریکہ کے اس اعلان کا خیرمقدم کیا ہے جس کے تحت وہ پولینڈ میں مزید پانچ ہزار فوجی تعینات کرے گا۔

   یہ اعلان امریکی صدر ڈونلڈ ٹرمپ کی جانب سے ایک ہفتے بعد کیا گیا ہے، جب پینٹاگون نے پولینڈ میں چار ہزار فوجیوں کی مجوزہ تعیناتی منسوخ کر دی تھی۔

   سویڈن میں نیٹو وزرائے خارجہ کے اجلاس سے قبل گفتگو کرتے ہوئے مارک روٹے نے کہا کہ یورپ کا امریکہ پر انحصار کم کرنے کا عمل جاری رہے گا، تاہم اس کے ساتھ ساتھ سکیورٹی تعاون برقرار رہے گا۔

   صدر ٹرمپ نے سوشل میڈیا پلیٹ فارم ٹروتھ سوشل پر لکھا کہ یہ فیصلہ پولینڈ کے صدر کارول ناوروکی کے ساتھ قریبی تعلقات کی بنیاد پر کیا گیا ہے، جن کی انھوں نے گذشتہ برس صدارتی انتخابات میں حمایت کی تھی۔

   تاہم انھوں نے یہ واضح نہیں کیا کہ یہ فوجی پہلے سے منسوخ کیے گئے منصوبے کا حصہ ہیں یا کوئی نئی تعیناتی ہے۔

   یورپ میں امریکی فوجی موجودگی پر سوالات

   وائٹ ہاؤس حالیہ ہفتوں میں یہ اشارہ دے چکا ہے کہ وہ اپنی ’امریکہ فرسٹ‘ پالیسی کے تحت یورپ میں مجموعی فوجی تعداد کم کرنا چاہتا ہے۔

   دوسری جانب، امریکی وزیر خارجہ مارکو روبیو نے کہا ہے کہ صدر ٹرمپ نیٹو اتحادیوں کے رویے سے مایوس ہیں۔ انھوں نے خاص طور پر مشرقِ وسطیٰ میں امریکی کارروائیوں کا حوالہ دیا ہے۔

   سویڈن کے شہر ہیلسنگبورگ میں ہونے والے اجلاس میں مارکو روبیو نیٹو ممالک پر دفاعی اخراجات بڑھانے اور ذمہ داریوں میں زیادہ حصہ ڈالنے پر زور دیں گے۔

   صحافیوں سے گفتگو کرتے ہوئے ان کا کہنا تھا کہ ’امریکہ کو اپنی عالمی ذمہ داریوں کو مدنظر رکھتے ہوئے اپنی فوجی تعیناتی کا ازسرِ نو جائزہ لینا پڑتا ہے۔ یہ کوئی سزا دینے کا عمل نہیں ہے۔‘

   جرمنی سے فوجیوں کی واپسی

   اس سے قبل امریکہ نے جرمنی سے پانچ ہزار فوجیوں کو واپس بلانے کا اعلان کیا تھا، جس کی وجہ صدر ٹرمپ اور جرمن چانسلر فریڈرِش مرز کے درمیان ایران کے معاملے پر اختلافات بتائے گئے تھے۔

   تاہم یہ واضح نہیں کہ پولینڈ بھیجے جانے والے فوجی اسی فیصلے کا حصہ ہیں یا کسی الگ منصوبے کے تحت تعینات کیے جا رہے ہیں۔

   پولینڈ نیٹو کا ایک اہم رکن ہے اور روس کے قریب ہونے کی وجہ سے اسے یورپ کے دفاعی انتظام میں مرکزی حیثیت حاصل ہے۔

   پولینڈ کے صدر کارول ناوروکی، جو صدر ٹرمپ کے قریبی اتحادی سمجھے جاتے ہیں، اس سے قبل یہ کہہ چکے ہیں کہ ٹرمپ ہی واحد عالمی رہنما ہیں جو روس-یوکرین جنگ کے خاتمے میں کردار ادا کر سکتے ہیں۔

   امریکہ کی جانب سے یورپ میں فوجی موجودگی کے حوالے سے متضاد اشاروں نے نیٹو کے بعض اتحادیوں میں تشویش پیدا کی ہے، جبکہ کئی امریکی قانون سازوں نے بھی خبردار کیا ہے کہ فوجیوں کے انخلا سے روس کو غلط پیغام جا سکتا ہے۔

   یورپ میں اس وقت امریکہ کے سب سے زیادہ فوجی جرمنی میں تعینات ہیں، جہاں ان کی تعداد 36 ہزار سے زائد ہے، جبکہ اٹلی اور برطانیہ میں بھی ہزاروں امریکی فوجی موجود ہیں۔

9. 5 گھنٹے قبلامریکہ نے ایران جنگ کے باعث تائیوان کو 14 ارب ڈالر کے ہتھیاروں کی فروخت مؤخر کر دی, کو ایو، بی بی سی نیوز

   امریکی بحریہ کے قائم مقام سیکریٹری ہونگ کاؤ نے کہا ہے کہ امریکہ تائیوان کو 14 ارب ڈالر (تقریباً چار کھرب پاکستانی روپے) کے ہتھیاروں کی فروخت کو عارضی طور پر روک رہا ہے تاکہ ایران کے ساتھ جنگ کے لیے اپنے پاس کافی ہتھیار موجود رکھ سکے۔

   انھوں نے سینیٹ کی ایک سماعت کے دوران اس بات کی تصدیق کی۔

   یہ بیان اس وقت سامنے آیا ہے جب صدر ڈونلڈ ٹرمپ نے چینی صدر شی جن پنگ سے ملاقات کے بعد اس معاہدے کے حوالے سے غیر واضح موقف اختیار کیا تھا۔

   تائیوان کے صدارتی دفتر کے ترجمان نے جمعہ کے روز صحافیوں کو بتایا کہ انھیں امریکہ کی جانب سے اس اسلحہ معاہدے میں کسی قسم کی تبدیلی کے بارے میں کوئی اطلاع نہیں ملی۔

   تائیوان کو امریکی ہتھیاروں کی فروخت بیجنگ کے لیے ہمیشہ ناراضی کا سبب بنتی رہی ہے کیونکہ چین اس خود مختار جزیرے کو اپنا حصہ سمجھتا ہے اور اسے طاقت کے ذریعے حاصل کرنے کے امکان کو رد نہیں کرتا۔

   ہونگ کاؤ نے سماعت کے دوران کہا کہ ’اس وقت ہم وقفہ لے رہے ہیں تاکہ یہ یقینی بنایا جا سکے کہ ہمارے پاس ’ایپک فیوری‘ کے لیے کافی اسلحہ موجود ہے اور ہمارے پاس کافی مقدار میں موجود ہے۔‘

   انھوں نے مزید کہا کہ ’ہم صرف یہ یقینی بنا رہے ہیں کہ ہمارے پاس سب کچھ موجود ہو، اور پھر جب انتظامیہ مناسب سمجھے گی تو غیر ملکی فوجی فروخت دوبارہ شروع ہو جائے گی۔‘

   جب ان سے پوچھا گیا کہ تائیوانی حکام سے اس تعطل کے بارے میں کیا بات ہوئی ہے، تو کاؤ نے کہا کہ انھوں نے ’تائیوانی حکام سے بات نہیں کی‘۔

   یہ 14 ارب ڈالر کا پیکیج کئی مہینوں سے ٹرمپ کی منظوری کا منتظر ہے۔ اس میں فضائی دفاعی میزائل جیسے لاک ہیڈ مارٹن کے PAC-3 اور دیگر زمین سے فضا میں مار کرنے والے نظام شامل ہیں۔

   ٹرمپ نے ابھی تک اس پیکیج کی حتمی منظوری نہیں دی۔ انھوں نے گذشتہ ہفتے فاکس نیوز کو بتایا کہ یہ ’چین کے ساتھ مذاکرات کا ایک بہت اچھا ہتھیار‘ ہو سکتا ہے۔

   انھوں نے یہ بھی کہا کہ وہ ’جلد ہی‘ اس معاہدے پر فیصلہ کریں گے۔

   یہ بیانات بیجنگ میں ہونے والی سربراہی ملاقات کے بعد سامنے آئے جہاں شی جن پنگ نے ٹرمپ سے کہا کہ تائیوان کا مسئلہ امریکہ اور چین کے تعلقات میں سب سے اہم ہے۔

   بعد ازاں ٹرمپ نے صحافیوں کو بتایا کہ انھوں نے تائیوان کو اسلحہ فروخت کے معاملے پر شی سے ’تفصیل سے بات کی‘ حالانکہ 1982 کے امریکی وعدے کے مطابق واشنگٹن نے بیجنگ سے اس معاملے پر مشاورت نہ کرنے کا عہد کیا تھا۔

   ٹرمپ نے یہ بھی کہا کہ وہ اس معاملے پر براہ راست تائیوان کے صدر لائی چنگ-تے سے بات کریں گے، جو سفارتی روایات سے ہٹ کر ہوگا اور چین کو مزید ناراض کر سکتا ہے۔

   امریکی اور تائیوانی رہنماؤں کے درمیان کئی دہائیوں سے براہ راست رابطہ نہیں ہوا، تاہم ٹرمپ نے صدر بننے سے پہلے تائیوان کی سابق صدر سائی اِنگ وین سے گفتگو کی تھی۔

   گذشتہ دسمبر میں امریکہ کی جانب سے 11 ارب ڈالر کے اسلحہ پیکیج کی منظوری پر چین نے شدید ردعمل ظاہر کیا تھا اور کہا تھا کہ اس سے ’آبنائے تائیوان میں خطرناک اور پرتشدد صورتحال پیدا ہو سکتی ہے‘۔

   تائیوان کے صدر لائی چنگ-تے کا کہنا ہے کہ امریکی اسلحہ فروخت ’خطے میں امن اور استحکام برقرار رکھنے کا اہم ذریعہ‘ ہے۔

   ان کی قیادت میں تائیوان نے چین کے بڑھتے ہوئے فوجی دباؤ کے پیش نظر اپنے دفاعی اخراجات میں نمایاں اضافہ کیا ہے۔

10. 6 گھنٹے قبلزیارت اور چاغی میں نامعلوم مسلح افراد کے حملے: متعدد گاڑیاں تباہ، ایک پولیس آفیسر سمیت چار افراد اغوا کرلیے, محمد کاظم، بی بی سی اردو، کوئٹہ

    بلوچستان کے دو اضلاع زیارت اور چاغی میں نامعلوم مسلح افراد نے حملہ کرکے متعدد گاڑیوں کو نقصان پہنچایا ہے جبکہ ایک پولیس آفیسر سمیت چار افراد کو اغوا کرلیا ہے۔

    اغوا کا واقعہ ضلع زیارت میں پیش آیا۔ محکمہ داخلہ حکومت بلوچستان کے معاون برائے میڈیا بابر یوسفزئی نے بتایا کہ گذشتہ شب شرپسندوں نے زیارت میں کوئلے سے لوڈ ٹرکوں کو نذر آتش کیا۔

    زیارت میں پولیس کے ایک اہلکار نے نام ظاہر نہ کرنے کی شرط پر بتایا کہ نامعلوم مسلح افراد نے ضلع زیارت میں مانگی کے علاقے میں حملہ کرکے پانچ ٹرکوں کو نذر آتش کیا۔

    انھوں نے کہا کہ یہ ٹرک کوئلے سے لوڈ تھے جو کہ ہرنائی سے پنجاب جارہے تھے۔ پولیس اہلکار نے بتایا کہ مسلح افراد مانگی پولیس کے ایس ایچ او مسعود پانیزئی سمیت چار افراد کو اغوا کرکے اپنے ساتھ لے گئے۔

    جب فون پر محکمہ داخلہ حکومت بلوچستان کے معاون برائے میڈیا بابر یوسفزئی سے رابطہ کیا گیا تو انھوں نے بتایا کہ اس علاقے میں شرپسندوں نے کوئلے سے لوڈ پانچ ٹرکوں کو نذر آتش کیا۔ ان کا کہنا تھا کہ پولیس اور سیکورٹی فورسز شرپسندوں کے خلاف کاروائی کررہے ہیں۔

    زیارت سے تعلق رکھنے والے بلوچستان کے وزیر نورمحمد دومڑ نے اس واقعے کی مذمت کرتے ہوئے کہا ہے کہ ملزمان کو انصاف کے کٹہرے میں لاکر کھڑا کیا جائے گا۔

    ادھر ضلع چاغی میں پولیس حکام کے مطابق نامعلوم مسلح افراد نے چہتر کے مقام پر حملہ کرکے آئل ٹینکروں کو نقصان پہنچایا۔

    ادھر ضلع نصیر آباد کے علاقے ڈیرہ مراد جمالی میں بم کے ایک دھماکے میں تین پولیس اہلکاروں سمیت چھ افراد زخمی ہو گئے۔

    پولیس کے ایک اہلکار نے بتایا کہ ڈیرہ مراد جمالی میں نامعلوم مسلح افراد نے پولیس کی ایک گاڑی پر دستی بم سے حملہ کیا۔

11. 7 گھنٹے قبلوزیر اعظم چین میں ایران امریکہ مذاکرات پر بات کریں گے، فیلڈ مارشل کے دورہِ ایران کی تصدیق نہیں کر سکتے: پاکستانی دفتر خارجہ

    پاکستان کی وزراتِ خارجہ کے ترجمان نے ہفتہ وار بریفنگ میں کہا کہ وزیر اعظم شہباز شریف کے دورہ چین کے دوران ایران امریکہ مذاکرات پر بات ہوسکتی ہے۔

    انھوں نے کہا کہ وزیر اعظم اور چینی لیڈر شپ کے درمیان مشرق وسطیٰ تنازعے پر بات چیت متوقع ہے۔

    ترجمان دفتر خارجہ نے مزید بتایا کہ پاکستان اور چین کے درمیان مشرق وسطیٰ کے معاملے پر پہلے سے اعتماد موجود ہے۔

    خطے میں قیام امن کے حوالے پاکستانی کی کوششوں کا ذکر کرتے ہوئے انھوں نے کہا کہ گذشتہ دنوں وزیر اعظم شہباز نے دو مرتبہ قطری سربراہ حکومت سے بات کی اور خطے میں امن کے حوالے سے بات چیت کی۔

    اسحاق ڈار بھی دیگر وزرائے خارجہ کے ساتھ رابطے میں رہیں تاکہ خطے میں امن آ سکے۔ انھوں نے بتایا کہ اس معاملے پر پاکستان ک دیگر حکامِ بالا نے بھی قطری حکام سے بات کی۔

    انھوں نے بتایا پاکستانی اعلیٰ حکام نے ازبکستان کے حکام سے بھی خطے کی صوتحال پر مشاروت کی۔

    فیلڈ مارشل کے دورہِ ایران کے حوالے سے ایک سوال پر ان کا کہنا تھا کہ ’فیلڈ مارشل دورہ ایران کررہے ہیں یا نہیں، نا اس کی تصدیق کرتے ہیں نا تردید۔‘

12. 7 گھنٹے قبلممنوعہ جانوروں کی قربانی کرنے والوں کے خلاف فوجداری مقدمات قائم ہوں گے: دہلی حکومت کی تنبیہ

    انّیا مںی دارالحکومت دہلی حکومت کی وزارت ترقی نے عیدالاضحیٰ کے لیے رہنما خطوط جاری کیے ہیں جن کے مطابق ممنوعہ جانوروں کی قربانی کرنے والوں کے خلاف فوجداری مقدمات درج کیے جائیں گے۔

    دہلی حکومت کے وزیر کپل مشرا نے کہا کہ عید پر گائے، بچھڑے، اونٹ اور دیگر ممنوعہ جانوروں کی قربانی مکمل طور پر غیر قانونی ہے۔

    ان کا کہنا تھا کہ ’ایسا کرنے والوں کے خلاف فوجداری مقدمات درج کیے جائیں گے۔‘

    انھوں نے یہ بھی کہا کہ ’عوامی مقامات، گلیوں اور سڑکوں پر قربانی کی اجازت نہیں ہے۔ ایسا کرنے والوں کے خلاف قانونی کارروائی کی جائے گی۔‘

    کپل مشرا نے کہا، ’قربانی کے بعد کچرے کو گٹروں، نالیوں یا عوامی مقامات پر پھینکنا مکمل طور پر ممنوع ہے۔ قربانی صرف مجاز جگہوں پر کی جا سکتی ہے۔‘

    انڈیا میں عید کا تہوار 28 مئی کو منایا جائے گا۔

13. 9 گھنٹے قبلپاکستان کے وزیر داخلہ کی ایرانی وزیر خارجہ سے دوبارہ ملاقات

    تہران میں اسلام آباد کے سفارت خانے نے اطلاع دی ہے کہ پاکستانی وزیر داخلہ محسن نقوی نے گزشتہ دو دنوں میں دوسری بار ایرانی وزیر خارجہ عباس عراقچی سے ملاقات کی۔

    فارس خبر رساں ایجنسی کا کہنا ہے کہ یہ ملاقات ایران اور امریکہ کے درمیان معاہدے کے حوالے سے ’تنازعے کے حل کے لیے تجاویز پر تبادلہ خیال کے لیے‘ تھی۔

    محسن نقوی بدھ کے روز تہران پہنچے اور پہلے ہی اسلامی جمہوریہ کے سینئر عہدیداروں سے ملاقات کر چکے ہیں۔

    ایران نے اعلان کیا ہے کہ وہ جنگ کے خاتمے کے لیے تازہ ترین امریکی تجاویز پر غور کر رہا ہے۔

    ایسی اطلاعات بھی ہیں کہ ممکن ہے کہ پاکستانی فوج کے کمانڈر فیلڈ مارشل عاصم منیر بھی ایران اور امریکہ کے درمیان ثالثی میں مدد کے لیے تہران جائیں گے۔

14. 9 گھنٹے قبلجنگ کے دوران 7,200 سے زائد افراد کو ملبے سے ریسکیو کیا گیا: ایرانی ہلال احمر

    ایرانی ہلال احمر سوسائٹی کا کہنا ہے کہ وہ ایران کے ساتھ امریکہ اسرائیل جنگ کے دوران ’ملبے کے نیچے سے 7,200 سے زائد افراد کو زندہ نکالنے‘ میں کامیاب رہی۔

    تنظیم نے سوشل نیٹ ورکنگ کی سائٹ ایکس پر ایک پوسٹ میں لکھا ہے کہ ’رہائشی علاقوں پر امریکی اور اسرائیلی فضائی حملے۔۔۔ جنگی قوانین کی بار بار خلاف ورزی اور عام شہریوں بالخصوص بچوں اور خواتین کی ہلاکتیں ہوئی ہیں۔‘

    اس پوسٹ میں ہلال احمر کے امدادی کارکنوں کی جانب سے متاثرین کو ملبے سے نکالنے کی ویڈیو بھی شامل ہے۔

15. 9 گھنٹے قبلجنوبی لبنان میں طبی مرکز پر اسرائیلی فضائی حملہ، کم از کم چار افراد ہلاک

    اطلاعات ہیں کہ جنوبی لبنان میں طبی مرکز پر اسرائیلی فضائی حملے میں کم از کم چار افراد ہلاک ہو گئے ہیں۔

    لبنان کی قومی خبر رساں ایجنسی نے اطلاع دی ہے کہ طائر کے علاقے میں حناویہ شہر میں ایک صحت مرکز پر رات بھر کیے گئے فضائی حملوں میں چار افراد ہلاک ہو گئے۔

    خبر رساں ادارے کا یہ بھی کہنا تھا کہ حملے میں دو امدادی کارکن زخمی بھی ہوئے۔

16. 9 گھنٹے قبلبچوں کی آن لائن حفاظت سے متعلق قوانین پر عمل نہ کرنے پر ایکس کو ساڑھے چھ لاکھ ڈالر جرمانہ

    آسٹریلیا کی ایک عدالت نے ایلون مسک کی کمپنی ایکس (سابقہ ٹوئٹر) پر عائد جرمانے کو برقرار رکھا ہے، کیونکہ کمپنی نے بچوں کی آن لائن حفاظت سے متعلق قوانین پر عمل نہ کرنے کا اعتراف کیا ہے۔ اس طرح تین سال سے جاری قانونی تنازع ختم ہو گیا۔

    آسٹریلیا کے انٹرنیٹ ریگولیٹر ای سیفٹی نے 2023 میں یہ جرمانہ لگایا تھا، کیونکہ سوشل میڈیا کمپنی نے اس سوال کا مناسب جواب نہیں دیا تھا کہ وہ بچوں کے آن لائن استحصال کو روکنے کے لیے کیا اقدامات کر رہی ہے۔

    تاہم ایکس کمپنی کا مؤقف تھا کہ اسے اس درخواست پر عمل کرنے کی ضرورت نہیں تھی، کیونکہ یہ درخواست اس وقت کی گئی تھی جب کمپنی ابھی ٹوئٹر کے نام سے موجود تھی اور بعد میں ایکس میں ضم ہو گئی تھی۔

    جمعرات کو کمپنی نے اپنی غلطی تسلیم کر لی اور عدالت نے اسے 650,000 آسٹریلوی ڈالر جرمانہ ادا کرنے کا حکم دیا۔ جج نے پہلے جرمانے کو بڑھا کر مقرر کیا اور ساتھ ہی کمپنی کو ریگولیٹر کے قانونی اخراجات کے لیے بھی 100,000 ڈالر ادا کرنے کا کہا۔

    جج نے کہا کہ اتنی بڑی کمپنی کے لیے زیادہ جرمانہ ضروری ہے تاکہ یہ واقعی سزا کے طور پر اثر انداز ہو، نہ کہ صرف کاروبار کی لاگت بن کر رہ جائے۔

    آسٹریلیا کا یہ ادارہ اس سے پہلے بھی ایکس سے ٹکرا چکا ہے، جیسے 16 سال سے کم عمر بچوں کے سوشل میڈیا استعمال پر پابندی اور سڈنی میں ایک حملے کی ویڈیوز ہٹانے کے معاملے پر اختلاف ہوا تھا۔

    ای سیفٹی کمشنر نے کہا کہ ٹیکنالوجی کمپنیوں کو جوابدہ بنانے کے لیے شفافیت بہت ضروری ہے۔

    یہ معاملہ اس وقت شروع ہوا تھا جب فروری 2023 میں ٹوئٹر سے بچوں کے استحصال سے متعلق مواد روکنے کے اقدامات پر معلومات مانگی گئی تھی، اور بعد میں کمپنی ایکس میں ضم ہو گئی۔ عدالت پہلے ہی فیصلہ دے چکی تھی کہ کمپنی کو یہ معلومات فراہم کرنی ہوں گی، اور اب دونوں فریقوں نے جرمانے پر اتفاق کر لیا ہے، جسے 45 دن کے اندر ادا کرنا ہوگا۔

17. 22 مئ 2026آبنائے ہرمز میں ٹول لینے کے نظام ہوا تو امریکہ اور ایران کے درمیان سفارتی معاہدہ ممکن نہیں ہوگا: روبیو

    امریکہ کے وزیر خارجہ مارکو روبیو نے کہا ہے کہ اگر ایران آبنائے ہرمز میں ٹول (فیس) لینے کا نظام نافذ کرتا ہے تو امریکہ اور ایران کے درمیان سفارتی معاہدہ ممکن نہیں رہے گا۔

    روبیو نے صحافیوں سے بات کرتے ہوئے کہا کہ دنیا میں کوئی بھی اس طرح کے نظام کے حق میں نہیں ہے اور یہ ناقابلِ قبول ہوگا۔

    خبر رساں ادارے روئٹر کے مطابق امریکہ وزیر خارجہ نے کہا کہ ’اگر ایران اس راستے پر چلتا رہا تو یہ نہ صرف معاہدے کو مشکل بنا دے گا بلکہ عالمی سطح پر خطرہ بھی بن جائے گا اور یہ مکمل طور پر غیرقانونی عمل ہوگا۔‘

    انھوں نے یہ بھی کہا کہ ایران کے ساتھ جاری مذاکرات میں کچھ پیش رفت ہوئی ہے۔

    روبیو نے مزید کہا کہ کچھ مثبت اشارے ضرور نظر آ رہے ہیں، لیکن وہ زیادہ پُرامید ہونے سے گریز کر رہے ہیں اور آئندہ چند دنوں میں صورتحال واضح ہو جائے گی۔

18. 22 مئ 2026امریکہ پولینڈ میں مزید 5000 فوجی بھیجے گا: ڈونلڈ ٹرمپ کا اعلان

    امریکی صدر ڈونلڈ ٹرمپ نے کہا ہے کہ امریکہ پولینڈ میں مزید 5000 فوجی بھیجے گا، حالانکہ ایک ہفتہ پہلے پینٹاگون نے وہاں 4000 فوجیوں کی تعیناتی کا منصوبہ منسوخ کر دیا تھا۔

    ٹرمپ نے سوشل میڈیا پر لکھا کہ یہ فیصلہ پولینڈ کے صدر کارول ناوروکی کے ساتھ امریکہ کے تعلقات کی بنیاد پر کیا گیا ہے، جن کی انھوں نے گذشتہ برس انتخابات میں حمایت کی تھی۔

    امریکی صدر نے یہ واضح نہیں کیا کہ اضافی فوجی پہلے والے منصوبے کا حصہ ہیں یا کوئی نیا آپریشن ہے۔

    حالیہ ہفتوں میں وائٹ ہاؤس یہ اشارہ دے چکا ہے کہ وہ اپنی ’امریکہ فرسٹ‘ پالیسی کے تحت یورپ میں فوجیوں کی مجموعی تعداد کم کرنا چاہتا ہے۔ اسی مہینے امریکہ نے جرمنی سے 5000 فوجی واپس بلانے کا بھی اعلان کیا تھا، جو ایران کے معاملے پر جرمن چانسلر کے ساتھ اختلاف کے بعد کیا گیا۔

    یہ واضح نہیں کہ پولینڈ بھیجے جانے والے اضافی فوجی جرمنی سے واپس آنے والوں میں سے ہیں یا کوئی الگ دستہ ہے۔

    ٹرمپ نے نیٹو اتحادیوں پر بھی تنقید کی ہے کہ وہ ایران کے خلاف دباؤ ڈالنے میں امریکہ کا ساتھ نہیں دے رہے۔

    یہ اعلان اس کے ایک ہفتے بعد آیا جب امریکی محکمہ دفاع نے اچانک پولینڈ میں 4000 فوجیوں کی تعیناتی روکنے کا اعلان کیا تھا۔ بعد میں امریکی وزیر دفاع نے کہا کہ یہ صرف عارضی تاخیر تھی اور امریکہ پولینڈ میں اپنی مضبوط فوجی موجودگی برقرار رکھے گا۔

    پولینڈ کے صدر ناوروکی ٹرمپ کے قریبی حامی مانے جاتے ہیں اور ٹرمپ نے ان کی انتخابی مہم میں بھی حمایت کی تھی۔ انھوں نے کہا تھا کہ ٹرمپ دنیا کے واحد لیڈر ہیں جو روس کے صدر ولادیمیر پوتن کو روک سکتے ہیں اور یوکرین کی جنگ ختم کرا سکتے ہیں۔

    اگرچہ ٹرمپ پہلے نیٹو اور یورپی ممالک پر تنقید کرتے رہے ہیں، لیکن ناوروکی کا کہنا ہے کہ یورپ کی سلامتی کے لیے امریکہ اب بھی اہم کردار ادا کر رہا ہے۔

    کچھ امریکی سیاستدانوں نے جرمنی سے فوج نکالنے کے فیصلے پر تنقید بھی کی ہے، کیونکہ ان کے مطابق اس سے روس کو غلط پیغام جا سکتا ہے۔ حالیہ اعداد و شمار کے مطابق جرمنی میں امریکہ کے 36 ہزار سے زیادہ فوجی تعینات ہیں، جبکہ اٹلی اور برطانیہ میں یہ تعداد نسبتاً کم ہے۔

19. 22 مئ 2026انڈیا امریکہ کا ’اہم اتحادی اور پارٹنر‘ ہے، یہ دورہ اہم ہے: مارکو روبیو

    انڈیا کے دورے سے پہلے امریکی وزیر خارجہ مارکو روبیو نے کہا ہے کہ انڈیا امریکہ کا ’اہم اتحادی اور پارٹنر‘ ہے۔

    انھوں نے مزید کہا کہ انڈیا کے ساتھ ’بہت سے معاملات پر کام کرنا ہے۔‘

    مارکو روبیو چار روزہ دورے پر 23 مئی کو انڈیا پہنچ رہے ہیں ان کا دورہ 26 مئی تک جاری رہے گا۔ وہ اس دوران دہلی، جے پور، کولکتہ اور آگرہ کا دورہ کریں گے۔

    میڈیا سے بات کرتے ہوئے روبیو نے کہا ، ’ہم انھیں (انڈیا کب) اتنی توانائی بیچنا چاہتے ہیں جتنی وہ خریدنا چاہتے ہیں۔ امریکہ اس وقت پیداوار اور برآمدات کی تاریخی سطح پر ہے۔ ہم اسے مزید بڑھانا چاہتے ہیں۔‘

    انھوں نے کہا، ’اس حوالے سے انڈیا کے ساتھ بات چیت پہلے سے ہی چل رہی تھی اور ہم چاہتے ہیں کہ انڈیا کے توانائی کے پورٹ فولیو میں ہمارا حصہ زیادہ ہو۔‘

    آبنائے ہرمز کے ذریعے مفت نیویگیشن کی بندش سے دنیا بھر میں توانائی کا بحران جاری ہے۔ انڈیا بھی واضح طور پر متاثر ہوا ہے، حالانکہ انڈین حکومت مسلسل دعویٰ کرتی رہی ہے کہ ملک کے پاس کافی ایندھن موجود ہے۔

    امریکی وزیر خارجہ نے یہ بھی کہا کہ ان کا آئندہ دورہ انڈیا اہم ہے۔

    روبیو نے کہا، ’انڈیا کے ساتھ بہت سے معاملات پر کام کرنا ہے۔ وہ ایک اہم اتحادی اور پارٹنر ہیں۔ ہم ان کے ساتھ بہت اچھا کام کرتے ہیں۔ اسی لیے یہ دورہ اہم ہے۔‘

    انھوں نے کہا کہ مجھے خوشی ہے کہ ہم یہ دورہ کرنے میں کامیاب ہوئے ہیں۔ وہاں ہم کواڈ ممالک کے ساتھ میٹنگ بھی کریں گے۔

20. 22 مئ 2026کیوبا امریکہ کے لیے خطرہ ہے: مارکو روبیو

    امریکہ کے وزیر خارجہ مارکو روبیو نے کہا ہے کہ کیوبا امریکہ کی قومی سلامتی کے لیے خطرہ ہے اور دونوں ممالک کے درمیان امن معاہدے کے امکانات زیادہ نہیں ہیں۔

    یہ بیان اس وقت سامنے آیا جب امریکہ نے ایک دن پہلے کیوبا کے سابق صدر راؤل کاسترو پر 1996 میں دو طیارے گرانے اور امریکی شہریوں کی ہلاکت کا الزام لگایا۔

    روبیو نے کہا کہ امریکہ اب بھی مسئلے کا حل سفارتی طریقے سے چاہتا ہے، لیکن صدر ڈونلڈ ٹرمپ کو اپنے ملک کو کسی بھی خطرے سے بچانے کا حق حاصل ہے۔

    دوسری طرف، کیوبا اس وقت ایندھن کی کمی کا شکار ہے، جس کی ایک بڑی وجہ امریکی پابندیاں ہیں۔ اس کے باعث وہاں بجلی کی طویل بندش اور خوراک کی کمی جیسے مسائل پیدا ہو گئے ہیں۔

    روبیو نے یہ بھی کہا کہ کیوبا نے امریکہ کی جانب سے 100 ملین ڈالر کی انسانی امداد قبول کر لی ہے۔ اسی دوران ٹرمپ انتظامیہ مسلسل کیوبا پر دباؤ ڈال رہی ہے اور اس کی کمیونسٹ حکومت کو ختم کرنے کی بات بھی کر رہی ہے۔

    امریکہ کی جانب سے سابق صدر پر مقدمہ چلانے کو کچھ لوگ وینزویلا کے صدر نکولس مادورو کے خلاف امریکی کارروائی سے بھی ملا رہے ہیں۔

    ادھر کیوبا کے وزیر خارجہ برونو روڈریگز نے روبیو کے الزامات کو مسترد کرتے ہوئے انھیں ’جھوٹ‘ قرار دیا اور کہا کہ کیوبا نے کبھی امریکہ کے لیے خطرہ پیدا نہیں کیا۔

    روبیو نے صحافیوں سے بات کرتے ہوئے کہا کہ سفارتکاری اب بھی ترجیح ہے، لیکن موجودہ حالات میں اس کے امکانات کم ہیں۔

    انھوں نے کیوبا پر یہ بھی الزام لگایا کہ وہ خطے میں دہشت گردی کی حمایت کرنے والے بڑے ممالک میں شامل ہے، جسے کیوبا نے سختی سے رد کر دیا۔

    کیوبا کے وزیر خارجہ نے امریکہ پر الزام لگایا کہ وہ فوجی جارحیت کو ہوا دے رہا ہے اور مسلسل ان کے ملک کے خلاف سخت اقدامات کر رہا ہے۔