AFCON U-17: Tanzania yatinga fainali na kufuzu kombe la dunia kwa mara ya kwanza

Tanzania imeandika historia kwa kutinga fainali ya michuano ya AFCON- U17 (TotalEnergies CAF U-17 Africa Cup of Nations), baada ya kuiondoa Misri kwa mikwaju ya penati 4-3, kufuatia sare ya bila kufungana katika mchezo wa nusu fainali uliochezwa Alhamisi mjini Rabat, Morocco.

Mchezo huo uliopigwa katika Uwanja wa Moulay El Hassan ulikuwa wa ushindani mkubwa huku timu zote zikishindwa kutengeneza nafasi nyingi za wazi za kufunga, hali iliyofanya dakika 90 kumalizika bila ya mabao.

Misri ilikaribia kupata bao kipindi cha pili kupitia Daniel Tamer ambaye shuti lake kali liliokolewa na mlinda mlango wa Tanzania, Haji Abdallah. Naye kipa wa Misri, Malek Amr, aliokoa nafasi muhimu kuifanya timu yake iendelee kusalia kwenye mchezo.

Baada ya sare hiyo, mshindi alipatikana kwa mikwaju ya penati ambapo Tanzania ilifanikiwa kufunga penati nne kati ya tano na kujihakikishia ushindi pamoja na nafasi ya kucheza fainali hizo kwa mara ya kwanza katika historia ya mashindano hayo.

Kwa upande wa Misri, ambao walifika hatua ya nusu fainali kwa mara ya kwanza tangu mwaka 2003, wanaondoka kwenye mashindano hayo wakiwa tayari wamejihakikishia kufuzu kushiriki Kombe la Dunia la FIFA U-17 mwaka 2026.

Safari ya Tanzania kuelekea fainali

Safari ya Tanzania katika michuano hiyo imeelezwa kuwa ya kuvutia kutokana na uimara, nidhamu na uwezo wa kupambana katika nyakati ngumu.

Katika hatua ya makundi Tanzania ilimaliza kinara wa Kundi C kwa alama sita baada ya kupata ushindi dhidi ya Msumbiji na Angola kabla ya kupoteza mchezo mmoja dhidi ya Uganda.

Katika hatua ya robo fainali, Serengeti Boys waliiondoa Algeria kwa ushindi wa penati 4-3 baada ya sare ya mabao 3-3 kwenye mchezo uliokuwa na ushindani mkubwa uliochezwa katika uwanja wa Mohammed VI Football Academy.

Katika hatua ya nusu fainali, Tanzania iliendelea na safari yake ya kihistoria baada ya kuiondoa Misri kwa ushindi wa penati 4-3 kufuatia sare ya bila kufungana ndani ya dakika 90.

Mafanikio ya Tanzania kwenye mashindano

Mbali na kutinga fainali ya michuano hiyo kwa mara ya kwanza, Serengeti Boys tayari wamejihakikishia nafasi ya kushiriki Kombe la Dunia la FIFA U-17 mwaka 2026, hatua inayoweka rekodi nyingine muhimu katika historia ya soka la vijana Tanzania.

Tanzania sasa itacheza na Senegal kwenye mchezo wa fainali Jumanne ya Juni 2, 2026. Senegal imetinga fainali baada ya kuiondosha Morocco kwa mikwaju ya penati 7-6 baada ya kwenda sare ya 1-1 huko Rabat usiku wa Alhamisi.