TOOS, Zelensky oo soo jeediyay wadahadal fool ka fool ah isla markaana warqad furan u diray Putin

Tebin toos ah

1. Saacad ka horQaramada Midoobey oo soo saartay digniin ku saabsan halis gaajo

   Barnaamijka Cunnada Adduunka ee Qaramada Midoobay (WFP) ayaa ka digay in dagaalka Bariga Dhexe uu malaayiin qof oo dheeraad ah geliyey halis gaajo.

   Hay’addu waxay sheegtay in,dhinac ahaan, kororka qiimaha shidaalka iyo gaadiidku uu cuntada ka dhigay mid qaali ah, halka dhinaca kale yaraanta dhaqaalaha ay ku qasabtay hay’adaha gargaarka inay yareeyaan taageeradooda.

   Weeraradii wadajirka ahaa ee Maraykana iyo Israa’iil ay ku qaadeen Iiraan bishii Febraayo ayaa sababay dagaal goboleed ku fiday Gacanka Faaris, kaas oo gaaray Lubnaan isla markaana carqaladeeyay marinno muhiim ah oo maraakiibta, oo ay ku jirto Marinka Hormuz.

   Xaaladdan ayaa ku qasabtay maraakiibta inay beddelaan waddooyinkooda, waxayna si weyn u xaddiday socodka caalamiga ah ee tamarta iyo silsiladaha sahayda.

   Qoysaska ku nool Afgaanistaan, Soomaaliya iyo Sri Lanka ayaa ka mid ah dhinacyada ugu daran ee ay saameysay xaaladdu; waxay wajahayaan cadaadis sii kordhaya oo ka dhashay kororka qiimaha shidaalka, qiimaha cuntada oo sare u kacay, dakhliga oo hoos u dhacay iyo ganacsiga oo carqaladoobay.

   Barnaamijka Cunnada Adduunka ayaa sheegay in qiyaastii 6.5 milyan oo qof oo ku nool Soomaaliya — taas oo u dhiganta ku dhawaad saddex meelood meel dadka dalka — ay wajihi doonaan gaajo daran marka la gaaro sannadka 2026.

   Afgaanistaan gudaheeda, 17.4 milyan oo qof ayaa sidoo kale laga yaabaa inay saameeyaan yaraanta cuntada.

2. 2 Saacadood ka horIran oo ku adkaysanaysa in 50% hantideeda la xanibay la sii daayo marka la saxiixo heshiiska

   Ku-xigeenka Wasiirka Arrimaha Dibadda ee Iran iyo xubin ka tirsan kooxda wadaxaajoodka dalkaas, Kazem Gharibabadi, ayaa sheegay in “Jamhuuriyadda Islaamiga ah ee Iran ay ku adkaysanayso in 50% hantideeda la xanibay si degdeg ah loogu sii daayo marka la saxiixo heshiis is-afgarad.”

   Gharibabadi ayaa u sheegay Mehr News Agency in qaybta kale ee hantida la xanibay ee Iran “loo sii daayo Iran muddo macquul ah gudaheed, taas oo sida ay nala tahay aan ka badnaan doonin hal ama laba bilood.”

   Ku-xigeenka wasiirka arrimaha dibadda ee Iran ayaa ku tilmaamay sii deynta hantida la xanibay ee dalkaas inay tahay “mid ka mid ah arrimaha ugu muhiimsan uguna aasaasisan ” ee wadaxaajoodyada ay la leeyihiin Maraykanka.

   Wuxuu sheegay in, “Inta lacagta ah ee marka hore la sii daynayo iyo inta dib loo sii daynayo ka dib muddo wadaxaajood ah ay tahay arrin laga wada hadli karo.”

   Dhanka kale, Maraykanka ayaa ku dhawaaqay inuusan Iran siin doonin wax lacag ah marxaladda hore ee heshiis kasta oo suurtagal ah.

   Warar dheeraad ah:

   Ma dhici doontaa in bini'aadamku ay carruur ku dhalaan hawada sare?

   Tallaalkii 'ugu horreeyay adduunka' oo ay naqshadeysay Garaadka Macmalka ah ee AI

   Waa maxay 'Heshiiska Abraham' ee uu Trump rabo in waddamada Carabta ay la saxiixdaan Israa'iil?

3. 2 Saacadood ka horRuushka oo soo bandhigay qorsha cusub oo ay ku heshiin karaan dalalka Carabta iyo Iran

   

   Xigashada Sawirka, Getty Images

   Wasiirka Arrimaha Dibadda ee Ruushka ayaa sheegay in “heshiis aan la isku soo gardarroneyn ama la isku xad-gudbayn” uu noqon karo tallaabo muhiim ah oo ugu horreysa oo lagu caadiyeeyo xiriirka u dhexeeya Iran iyo dalalka Carabta.

   Wareysi uu siiyay RT A qeybta afka Carbiga, Sergei Lavrov ayaa sidoo kale sheegay in marka laga soo tago heshiiskan, “tallaabooyin kale oo dheeraad ah la qaadi karo.”

   Isagoo sharaxaya tallaabooyinka dheeraadka ah ee uu soo jeediyay, Lavrov wuxuu sheegay in kuwaas ay ka mid noqon karaan heshiisyo ku saabsan hufnaanta hawlaha milatari iyo xaddididda dhaqdhaqaaqyada milatari, iyo arrimo kale oo si wadajir ah uga qayb qaadan kara xoojinta kalsoonida iyo is-aaminaadda ka dhexaysa Iran iyo dalalka Carabta ee gobolka.

4. 3 Saacadood ka horIsraa'iil oo digniin u dirtay dadka deggan koofurta Lubnaan

   Ciidamada Israa’iil ayaa ku dhawaaqay in ay weerari doonaan saddex tuulo oo dhanka waqooyi kaga beegan wabiga Litani ee koonfurta Lubnaan, waxaana ay uga digeen dadka ku dhaqan deegaankaasi in ay isaga guuraan.

   Saraakiisha Lubnaan ayaa sheegay in ugu yaraan toddobo qof lagu dilay dhowr weerar oo habeennimo ah oo Israa’iil ay ka geysatay koonfurta magaalada Tyre.

   Israa’iil ayaa ku nuuxnuuxsatay inay sii wadi doonto weerarrada ay ku qaadayso goobaha ay ku sugan yihiin Xisbullah inkastoo xabbad joojin ay ka dhacday Lubnaan.

   Mar sii horeysay Madaxweynaha Mareykanka Donald Trump ayaa sheegay in uu si toos ah ugala hadlay Xisbullah suurtagalnimada in la soo afjaro dagaalka.

   Mr.Trump ayaa intaa ku daray in kooxda ay Iran taageerto aysan diidin soo jeedinta Maraykanka ee nabadda.

   Si kastaba ha ahaatee, hadalka Madaxweynaha Maraykanka ka hor, Xisbullah waxa ay diidday heshiiska xabbad joojinta ee ay dawladda Lubnaan la gashay Israa’iil, taas oo ay taageertay Washington, si ay isu dhiibaan.

   Sidoo kale akhriso:

   Ayaan Xirsi Cali: Sheekada haweenay 'muran badan' ka taagan yahay oo Soomaaliya ka carartay, kadibna Yurub ilaa Maraykanka

5. 4 Saacadood ka horDad oon ugu dhintay saxaraha Niger

   

   Xigashada Sawirka, Agadez governorate/Facebook

   Ugu yaraan 49 qof ayaa harraad ugu dhintay meel ka durugsan saxaraha waqooyiga Niger ka dib markii gaarigii ay la socdeen uu cilladoobay, sida ay mas'uuliyiintu sheegeen.

   Kooxdan ayaa ka soo laabatay dalka Mali oo ay kaga soo qayb galeen xaflad ay Muslimiintu ku damaashaadayeen markii ay ka dhamaadeen biyo ay siteen, waxayna ku xayirmeen in ka badan 80 km dhanka galbeed ee magaalada Assamaka oo ah meel xudduud u ah oo u dhaxaysa Niger iyo Algeria.

   "Musaafuriinta waxay isku arkeen inay ku xayiran yihiin wadnaha jawi colaadeed halkaas oo heerkulka aadka u daran iyo la'aanta sahayda ay ka dhigayso badbaadada mid aad u adag," ayaa lagu yiri bayaan ka soo baxay guddoomiyaha Agadez.

   Kaliya labo ayaa ka badbaaday, iyaga oo u socdaalay saxaraha ilaa Assamaka, halkaas oo ay ku wargaliyeen maamulka.

   Gaariga xamuulka ah ayaa ka soo ambabaxay magaalada Telhandek ee dalka Maali balse waxa uu ka weecday waddadii loogu tala galay, sida uu hadalka u dhigay guddoomiyaha.

   Dhowr maalmood, darawalka iyo rakaabku waxay sameeyeen isku dayo isdaba joog ah oo lagu hagaajinayo gaariga, laakiin dadaalkooda ayaa ugu dambeyntii ku guuldarreystay.

   “Diyaar la’aan iyo dayactir la’aan baabuurka ah inkastoo ay dadaal badan sameeyeen darawalkii, tababarihiisii ​​iyo dadkii rakaabka ahaa, dadka safarka ahaa waxay isku arkeen inay ku go’doonsan yihiin xuddunta jawi colaadeed,” ayaa lagu daray war-saxaafadeedka.

   "Tobaneeyo maydad ah oo aan naf lahayn ayaa laga helay gaadhiga hoostiisa iyo agagaarkiisa," ayay sidoo kale la raaciyay.

   Warar dheeraad ah:

   Ma dhici doontaa in bini'aadamku ay carruur ku dhalaan hawada sare?

   Tallaalkii 'ugu horreeyay adduunka' oo ay naqshadeysay Garaadka Macmalka ah ee AI

   Waa maxay 'Heshiiska Abraham' ee uu Trump rabo in waddamada Carabta ay la saxiixdaan Israa'iil?

6. 4 Saacadood ka horQiimaha shidaalka oo sare u kacay

   

   Xigashada Sawirka, Getty Images

   Qiimaha shidaalka ayaa sare uga kacay suuqyada caalamka saakaydii hore.

   Kororkan ayaa yimid kadib markii Xisbullah ay diidday xabbad joojin cusub oo laga sameeyay Lubnaan, waxaana la sheegay in goobta saliidda ee Cumaan ay sidoo kale joojisay rarka saliidda kadib markii qarax dhacay.

   Qiimaha saliidda cayriin ee Brent ayaa kor u kacay in ka badan $95 halkii foosto, ka dib markii uu hoos u dhacay 2.84 boqolkiiba ka hor.

   Saliida ceyriin ee West Texas Intermediate ayaa sidoo kale kor u kacday maanta ka dib markii uu hoos u dhacay 3.1% shalay.

   Kor u kaca qiimaha labada tusmooyin ee saliidda ayaa dhacay iyadoo colaadaha Bariga Dhexe ay sii xoogeysteen, wadahadallada nabadeed ee u dhexeeya Maraykanka iyo Iran ay soo jiitamayaan, iyo gaadiidka booyadaha ee marinka Hormuz, oo ay soo maraan qiyaastii shan meelood meel saliidda adduunka, ayaa weli xaddidan.

   Warar dheeraad ah:

   Ma dhici doontaa in bini'aadamku ay carruur ku dhalaan hawada sare?

   Tallaalkii 'ugu horreeyay adduunka' oo ay naqshadeysay Garaadka Macmalka ah ee AI

   Waa maxay 'Heshiiska Abraham' ee uu Trump rabo in waddamada Carabta ay la saxiixdaan Israa'iil?

7. 5 Saacadood ka horTallaalkii 'ugu horreeyay adduunka' oo ay naqshadeysay Garaadka Macmalka ah ee AI

   Garaadka macmalka ah (AI) ayaa loo adeegsaday horumarinta nooc tallaal ah oo "asal ahaan cusub", kaas oo awood u yeelan kara inuu ka difaaco fayrasyo badan isla markaana ka hortago faafitaanno cudur oo waaweyn, sida ay sheegeen cilmi-baarayaal.

   Kooxda ka tirsan Jaamacadda University of Cambridge ayaa sheegtay in tani ay tahay markii ugu horreysay ee qaybta ugu muhiimsan ee tallaal si buuxda loogu naqshadeeyo AI, ka dibna lagu tijaabiyo bini'aadam.

   Tallaalkan waxaa loo sameeyay inuu ka shaqeeyo dhammaan noocyada fayrasyada corona, kuwaas oo ay ku jiraan dhammaan noocyada kala duwan ee Covid-19 iyo sidoo kale fayrasyada ku dhaca xayawaanka ee laga yaabo inay sababaan faafitaanka cudur weyn oo mustaqbalka ah.

   Cilmi-baaristaani weli waxay ku jirtaa marxaladihii hore, balse kooxdu waxay durba horumarinaysaa tallaallo kale oo gaar ah oo lagula tacaali karo hargabka iyo cudurka Ebola.

   Tallaalladu waxay jidhkeenna baraan sida loo aqoonsado caabuq ama infekshan si ay u kordhiyaan fursadda aan ugu guulaysan karno la dagaallankiisa.

   Halkan kasii akhri....

8. 6 Saacadood ka horIiraan oo ka hadashay diidmada Xisbullah ee xabbad-joojinta Lubnaan iyo Israa'iil

   Mohsen Rezaei, Taliyihii hore ee Ilaalada Kacaanka, ahaana lataliyaha dhanka Militariga ee Hogaamiyaha Jamhuuriyadda Islaamiga ah ee Iran, ayaa yiri "Xisbullah waxay nafteeda u hurtay dagaalladii ugu dambeeyay, waana xulafadayada, sidaas darteed waxaan taageersanahay Xisbullah, waxaana ku adkeysaneynaa go'aankeenna."

   Mr. Rezaei ayaa u sheegay telefishinka qaranka Iran, "Cadowgu waxay rabeen inay nagu cadaadiyaan wada xaajoodka iyagoo cadaadis saaraya Lubnaan," wuxuuna sii raaciyay hanjabaad weerar Israea'ii oo ku wajahan koonfurta Beirut, "dhammaan gantaaladayadu waxay diyaar u ahaayeen inay duqeeyaan" waqooyiga Israa'iil.

   Horraantii toddobaadkan, Ra’iisul Wasaaraha Israa’iil ayaa amray in la weeraro xarumaha Xisbullah ee koonfurta Beyruut, balse saacado kadib ayaa lagu dhawaaqay in laga hortagay weerarkaas oo ay wada hadleen Donald Trump iyo Benjamin Netanyahu.

   Hadalka Mr. Rezaei ayaa kusoo beegmaya iyadoo hoggaamiyaha Xisbullah uu diiday xabad-joojinta ay ku heshiiyeen Washington ee u dhexeeya Israa'iil iyo dowladda Lubnaan, isagoo sheegay in ilaa tuulooyinka koonfurta Lubnaan ay nabad noqdaan, waqooyiga Israa'iilna aysan nabad ahaan doonin.

   Mr. Rezaei, oo u warramayay taleefishinka Iran, waxa uu yidhi, “Waxa aanu uga digaynaa taliskan xun in uu ka tago Lubnaan, una sheego in Lubnaan ay noqon doonto qayb aan la kala maarmi karin oo heshiis kasta iyo xabbad joojin ah."

   Warar dheeraad ah:

   Ma dhici doontaa in bini'aadamku ay carruur ku dhalaan hawada sare?

   Tallaalkii 'ugu horreeyay adduunka' oo ay naqshadeysay Garaadka Macmalka ah ee AI

   Waa maxay 'Heshiiska Abraham' ee uu Trump rabo in waddamada Carabta ay la saxiixdaan Israa'iil?

9. 6 Saacadood ka horXi Jinping oo booqasho dhif ah ku tagaya Kuuriyada Waqooyi lana kulmaya Kim Jong Un

   

   Xigashada Sawirka, Xi Jinping to meet Kim Jong Un in rare visit to North Korea

   Madaxweynaha Shiinaha Xi Jinping ayaa la kulmi doona Kim Jong Un todobaadka soo socda safar uu ku tagi doono Kuuriyada Waqooyi, waana booqashadiisii ​​ugu horreysay muddo ku dhow toddobo sano, sida ay sheegtay warbaahinta dowladda ee labada waddan.

   Xi waxa uu ku sugnaan doona Kuuriyada Waqooyi 8-da ilaa 9-ka June kadib martiqaad uu Kim fidiyay. Xi ayaa markii ugu dambeysay booqday Pyongyang sanadkii 2019-kii.

   Booqashadan ayaa ku soo beegantay toddobaadyo ka dib markii uu Xi ku qaabilay magaalada Beijing madaxweynaha Maraykanka Donald Trump iyo madaxweynaha Ruushka Vladimir Putin – oo ah laba waddan oo aad ugu dhow siyaasadda arrimaha dibadda ee Pyongyang.

   Shiinaha ayaa ah saaxiibka muhiimka ah ee dhaqaale iyo siyaasadeed ee Kuuriyada Waqooyi, taasoo wajaheysa cunaqabateyn caalami ah oo ka dhalatay barnaamijkeeda hubka nukliyeerka iyo ku xadgudubka xuquuqda aadanaha ee lagu eedeeyay.

   Shiinaha iyo Kuuriyada Waqooyi ayaa wadaaga xudduud dhererkeedu dhan yahay 1,400km, waxaana ku xiran heshiis dhanka difaaca ah oo ah midka kaliya ee Shiinuhu la leeyahay dal kasta. Waxay dammaanad qaadaysaa taageerada labada dhinac haddii midkood la soo weeraro.

   Sannadkan waxa uu ku beegan yahay sannad-guuradii 65-aad ee heshiiskaas.

   Warar dheeraad ah:

   Tallaalkii 'ugu horreeyay adduunka' oo ay naqshadeysay Garaadka Macmalka ah ee AI

   Waa maxay 'Heshiiska Abraham' ee uu Trump rabo in waddamada Carabta ay la saxiixdaan Israa'iil?

10. 8 Saacadood ka horBaranbaro qiimaheedu yahay $200,000 oo la qabtay

    

    Xigashada Sawirka, Supplied: DCCEEW

    In ka badan 100,000 baranbaro qalaad oo sharci-darro ah - qaarkood sida calaacasha gacanta - ayay mas'uuliyiinta Australiya ka qabteen beeralayda ganacsi ee New South Wales.

    Qabashada, oo qiimaheedu dhan yahay $AU200,000 ($143,000; £106,000), ayaa waxaa ka mid ahaa baranbaro xiiqsan oo Madagascar ah iyo baranbaro dubia oo uu ka helay mid dhaqda ah oo deggan Bathurst, oo 200km galbeed ka xigta Sydney. Labada noocba si sharci ah looguma soo dejin karo Australiya ama laguma hayn karo, lama dhaqan gelin karo ama lama iibin karo.

    Waa qabsashadii ugu waynayd ee qalaad ee qallafsanaanta, sida ay masuuliyiintu sheegeen. Cayayaanka sharci darrada ah waxa ay faafin karaan cudurro oo ay waxyeeleyn karaan duurjoogta iyo beeraha, ayay raaciyeen.

    Baranbarrada sharci-darrada ah, oo inta badan lagu quudiyo xamaaratada, waa la dili doonaa oo tuuri doonaa mas'uuliyiinta.

    Warar dheeraad ah:

    Tallaalkii 'ugu horreeyay adduunka' oo ay naqshadeysay Garaadka Macmalka ah ee AI

    Waa maxay 'Heshiiska Abraham' ee uu Trump rabo in waddamada Carabta ay la saxiixdaan Israa'iil?

11. 9 Saacadood ka horXaaskii hore ee wiil uu adeer u yahay Boqorka Dubai oo xabsi la dhigay

    

    Xigashada Sawirka, Supplied

    Xaaskii hore ee wiil uu adeer u yahay boqorka Dubai ayaa xabsiga la dhigay, sida ay mas’uuliyiintu sheegeen.

    Xeer-ilaalinta guud ee Dubai ayaa BBC-da u sheegay in Zenab Javadli la xiray ka dib cabasho uu sameeyay aabbaha dhalay saddex carruur ah oo ay dhashay - ninkeedii hore, Sheikh Saeed bin Maktoum bin Rashid Al Maktoum.

    Waxa uu ku eedeeyay in ay afduubtay carruurta xilli ay maxkamaddu ogolaatay fadhi booqasho ah.

    Qoyska Javadli iyo saaxiibbadeed ayaa lumiyay xidhiidhkii ay la lahaayeen ilaa habeennimadii Talaadada waxayna qeylo dhaan ka muujiyeen halka ay joogto.

    Ku dhawaad ​​laba maalmood, wax war ah lagama helin meesha Javadli iyo carruurteedu tageen.

    Muddo bilo ah, si dirqi ah ayay uga baxday guriga iyadoo aaminsanayd in saraakiisha ammaanku sugayeen inay carruurteeda ka kaxaystaan ​​oo ay xidhaan.

    Sannadkii hore, ninkeedii hore wuxuu u gudbiyay dacwadda booliiska isagoo ku eedeeyay inay afduubtay gabdhahooda.

    Arintaas ayaa ka dambeysay kadib markii ay caruurtu dhowr jeer isku bed beddeleen gacmaha waalidiintooda, iyadoo mid waliba uu kan kale ku eedeeyay inuu afduubtay.

12. 5 Juunyo 2026Trump: "Kulan u dhexeeya Putin iyo Zelensky wuxuu noqon lahaa “wax aad u wanaagsan,” Moscow-na waxay soo dhoweysay wada-hadallo toos ah

    Madaxweynaha Mareykanka Donald Trump ayaa Khamiistii sheegay in kulan dhex mara Volodymyr Zelensky iyo Vladimir Putin uu noqon lahaa “wax aad u wanaagsan,” kaddib markii madaxweynaha Ukraine uu soo jeediyay in wada-hadal toos ah lala yeesho dhiggiisa Ruushka.

    “Waan ku faraxsanahay inay ka hadlayaan suurtagalnimada kulan,” ayuu Trump u sheegay weriyeyaasha gudaha Xafiiska Oval. “Waxaan u maleynayaa inaan door weyn ku leenahay arrintaas.”

    Wuxuu intaas ku daray: “Waxaan u maleynayaa inay aad u fiicnaan lahayd haddii ay kulmaan.”

    Trump wuxuu sidoo kale sheegay inuu aaminsan yahay in labada madaxweyne ay khasab ku noqon doonto inay “sameeyaan tanaasul. Sida aad ogtihiin, waan soo jeediyay tanaasulladaas, waxaana door weyn ka qaadannay arrintaas,” balse ma uusan bixin faahfaahin dheeraad ah.

    Kremlin-ka ayaa Khamiistii sheegay in madaxweynaha Ukraine lagu soo dhoweynayo inuu la kulmo dhiggiisa Ruushka Vladimir Putin gudaha Moscow “wakhti kasta,” kaddib markii Volodymyr Zelensky uu warqad furan ku soo jeediyay kulan laba geesood ah si loo soo afjaro dagaalka.

13. 5 Juunyo 2026Zelensky oo Putin ugu yeeray in ay yeeshaan wada-hadal fool-ka-fool ah.

    

    Xigashada Sawirka, EPA

    Madaxweynaha Ukraine Volodymyr Zelensky ayaa ku baaqay kulan fool-ka-fool ah oo dhex mara isaga iyo Vladimir Putin, isagoo mar kale dadaal ugu jira sidii loo soo afjari lahaa dagaalka.

    Warqad furan oo uu u diray madaxweynaha Ruushka, hoggaamiyaha Ukraine ayaa sheegay inay “khalad noqon doonto in si fudud loo sugo” ilaa dagaalka Yurub uu mar kale noqdo arrinta ugu weyn ee ay diiradda saarto Mareykanka, isagoo intaas ku daray in nabaddu ay ku imaan karto oo keliya “wada-hadal toos ah oo u dhexeeya” Ukraine iyo Ruushka.

    Sidoo kale wuxuu ku baaqay xabbad-joojin buuxda inta ay soconayaan wada-hadallada la soo jeediyay

    Donald Trump ayaa Khamiistii sheegay inuu “wax aad u wanaagsan” u arko haddii labada hoggaamiye ay kulmi lahaayeen. Kremlin-ka ayaa sheegay inay heshay warqadda, islamarkaana Putin loo gudbin doono xogteeda.

    Sheekooyin kale

    Maxa kala qabsaday Trump iyo Netanyahu mar ay khadka taleefoonka ku wada hadleen?

    Tuulada dadkeedu ay u safraan masaafo dhan 45 kiiloomitir si ay telefoonadooda u soo dabeystaan

    'Rabshaduhu waa kuwo aan laga fiirsan': Sida dunidu uga falcelisay dagaalka Muqdisho

14. 5 Juunyo 2026Qatar iyo Turkiga oo ka wada hadlay halka ay marayaan wada-hadallada nabadda ee u dhexeeya Iraan iyo Maraykanka

    Ra’iisul Wasaaraha ahna Wasiirka Arrimaha Dibadda ee Qatar, Mohammed bin Abdulrahman bin Jassim Al-Thani, ayaa kulan telefoonka ah la yeeshay Wasiirka Arrimaha Dibadda ee Turkiga, Hakan Fidan, iyaga oo ka wada hadlay xiriirka laba geesoodka ah iyo sidii loo xoojin lahaa iskaashiga u dhexeeya labada dal.

    Wasaaradda Arrimaha Dibadda ee Qatar ayaa qoraal ay ku baahisay barta X ku sheegtay in labada dhinac ay ka wada hadleen dadaallada dhexdhexaadinta ee u dhexeeya Mareykanka iyo Jamhuuriyadda Islaamiga ah ee Iiraan iyo hababka lagu taageeri karo geeddi-socodkan.

    Wasiirrada Arrimaha Dibadda ee Qatar iyo Turkiga ayaa sidoo kale adkeeyay muhiimadda isku-duwidda dadaallada lagu taageerayo hindiseyaasha diblomaasiyadeed ee looga gol leeyahay dhimista xiisadaha iyo xoojinta amniga iyo xasilloonida gobolka.

    Intii uu socday wada-hadalkan, Ra’iisul Wasaaraha iyo Wasiirka Arrimaha Dibadda ee Qatar ayaa carrabka ku adkeeyay baahida loo qabo in dhammaan dhinacyadu taageeraan dadaallada dhexdhexaadinta ee socda, iyagoo sheegay in geeddi-socodkani uu furi karo waddo lagu xalliyo sababaha salka u ah qalalaasaha iyadoo la adeegsanayo wada-hadal iyo xalal nabadeed, isla markaana horseedi karo heshiis waara oo ka hortaga in xiisaduhu mar kale sii kacaan.

    Sheekooyin kale

    Maxa kala qabsaday Trump iyo Netanyahu mar ay khadka taleefoonka ku wada hadleen?

    Tuulada dadkeedu ay u safraan masaafo dhan 45 kiiloomitir si ay telefoonadooda u soo dabeystaan

    'Rabshaduhu waa kuwo aan laga fiirsan': Sida dunidu uga falcelisay dagaalka Muqdisho

15. 4 Juunyo 2026Wasiirrada Arrimaha Gudaha ee Iiraan iyo Pakistan oo kulan gaar ah yeeshay xilli ay ku sugnaayeen shir-madaxeedka Ururka Iskaashiga Shanghai

    Wasiirka Arrimaha Gudaha ee Iiraan, Eskandar Momeni, ayaa la kulmay dhiggiisa Pakistan, Mohsen Naqvi, intii uu socday shir-madaxeedka Ururka Iskaashiga Shanghai ee ka dhacay Bishkek, caasimadda Kyrgyzstan.

    Faahfaahin dheeraad ah oo ku saabsan kulanka lama shaacin.

    Wasiirka Arrimaha Gudaha ee Pakistan ayaa horaantii bishan booqasho ku tagay Iiraan isaga oo ay weheliyaan Field Marshal Asim Munir, Taliyaha Guud ee Ciidamada Qalabka Sida iyo Ciidanka Pakistan.

    Booqashada mas’uuliyiinta Pakistan ee Iiraan ayaa lagu fuliyay qaab dhexdhexaadin ah oo la xiriirta wada-hadallada u dhexeeya Iiraan iyo Mareykanka.

    Sheekooyin kale

    Maxa kala qabsaday Trump iyo Netanyahu mar ay khadka taleefoonka ku wada hadleen?

    Tuulada dadkeedu ay u safraan masaafo dhan 45 kiiloomitir si ay telefoonadooda u soo dabeystaan

    'Rabshaduhu waa kuwo aan laga fiirsan': Sida dunidu uga falcelisay dagaalka Muqdisho

16. 4 Juunyo 2026Trump oo sababta uu Iiraan u weeraray ku sheegay dal Jeceyl

    Donald Trump ayaa dhaleeceeyay codbixintii Aqalka Wakiillada Mareykanka ee lagu xaddidayay awoodihiisa dagaal, isla markaana meel mariyey qaraar lagu diidayo dagaalka Iiraan, waxa uuna Trump sheegay in tallaabadaasi timid xilli uu ku jiray “wada-hadalladii ugu dambeeyay” ee lagu soo afjarayay dagaalka lala galay Jamhuuriyadda Islaamiga ah ee Iiraan.

    “Yaa samayn lahaa fal sidan oo kale ah oo aan dal jeceyl ahayn?” ayuu yiri.

    Aqalka Wakiillada Mareykanka ayaa shalay meel mariyay qaraar muujinaya diidmadiisa dagaalka uu Mr. Trump kula jiro Iiraan. Si kastaba ha ahaatee, qaraarkaas ma aha mid sharci ahaan khasab ah in la fuliyo, wuxuuna u badan yahay hadal ama calaamad muujinaysa mucaaradka ka dhanka ah siyaasadda dagaal ee Mr. Trump ee ku wajahaan Iiraan.

17. 4 Juunyo 2026Daawo:Muqaal cusub oo muujinaya xilliga ay diyaaradda aan duuliyaha lahayn ee Iran duqaysay madaarka Kuwait

    Muuqaal cusub oo ilaalo ah oo ay baahisay Agaasinka Guud ee Duullimaadka Rayidka ee Kuwait ayaa muujinaya xilligii garoonka diyaaradaha Kuwait ay duqeeyeen diyaaradaha aan duuliyaha lahayn ee Iran Arbacadii.

    Hal qof ayaa ku dhintay in ka badan 60 kalena waa ay ku dhaawacmeen weerarkaas oo burbur xooggan ka soo gaaray goob ay rakaabku saarnaayeen.

    Afhayeen u hadlay wasaaradda difaaca Kuwait ayaa ku tilmaamay weerarka "gardarrada ah ee Iran", halka wasaaradda arrimaha dibadda ay sheegtay in weerarka uu waxyeello ka soo gaaray xarumaha diblomaasiyadeed.

    Lifaaqa kore ka daawo muuqaalka:

18. 4 Juunyo 2026'Rabshaduhu waa kuwo aan laga fiirsan': Sida dunidu uga falcelisay dagaalka Muqdisho

    Xaaladda ka taagan magaalada Muqdisho iyo dagaalka ka dhacay ayay si weyn uga digeen beesha caalamku, iyagoo sheegay in tani tahay wax laga baaqsan karay saamayn baaxad lehna ku yeelanaysa mustaqbalka Soomaaliya.

    "Rabshadaha ka socda Muqdisho waa kuwo aan laga fiirsan." Ayaa lagu yidhi qoraal ay daabacday Safaaradda Maraykanka ee caasimadda Soomaaliya.

    "Hoggaamiyeyaasha Soomaaliyeed ee dhammaan dhinacyada waxay leeyihiin mas'uuliyad ka saaran ilaalinta xasilloonida, isla markaana ay khilaafaadka ku xalliyaan si nabadeed"

    Warkaas oo lagu daabacay barta X ayay dowladda Maraykanku ku tidhi in talaabooyinka la qaado maalmaha soo socda ay saamayn ku yeelanayaan mustaqbalka Soomaaliya.

    "Tallaabooyinka la qaado saacadaha iyo maalmaha soo socda waxay yeelan karaan cawaaqib waara oo saameeya amniga, midnimada, iyo mustaqbalka Soomaaliya." Ayaa lagu gunaanaday baaqa Maraykanka.

    Halkan kasii akhri....

19. 4 Juunyo 2026Dowladda Soomaaliya oo digniin culus dirtay

    

    Xigashada Sawirka, SNTV

    Taliyaha booliiska gobolka Banaadir Mahdi Cumar Muumin oo loo yaqaanno Macallin Mahdi ayaa shir jaraa’id oo uu goor dhow ku qabtay magaalada Muqdisho kaga hadlay dhacdadii shalay galab ee magaalada Muqdisho, isagoo sidoo kale soo bandhigay hub kala duwan oo uu sheegay in laga qaaday ilaalada qaar ka mid ah siyaasiyiinta mucaaradka.

    “Runtii waa ayaan darro anaggo diigniinno kala duwan gaarsiinnay dad badan shacabka Soomaaliyeedna gaarsiinnay in caaismaddan iyo dalkan iyo dadkanba aysan u baahneyn qalqalgelin amni, iyo qori iyo xabbad iyo bannaanbax rabshad wata oo ujeeddadiisu tahay in caasimaddan lagu suurad xumeeyo.” Ayuu yiri.

    Wuxuu ku tilmaamay in dhacdadaas ahayd mid qalqalgelin ah oo loo adeegsaday hub waaweyn.

    Wuxuu intaa ku daray “in hay‘adaha ammaanka ay la wareegeen ciidamadii dagaallamayay iyo hub”. Isagoo diray digniin ah in dhacdooyinkaas oo kale aan la aqbali Karin.

    “Marnaba shalay maanta ma aha ee ka jooga oo digniinteenna qaata. Qoryihiinna soo dhiiba, dadka idiin dhiibay qoryahana kasoo taga oo shacabkiinna u tura. Marka gacanta la idinku soo dhigo cafis ma jiro.” Ayuu hadalkiisa kusoo gabagabeeyay.

    Warar dheeraad ah:

    Maxa kala qabsaday Trump iyo Netanyahu mar ay khadka taleefoonka ku wada hadleen?

    'Rabshaduhu waa kuwo aan laga fiirsan': Sida dunidu uga falcelisay dagaalka Muqdisho

    Tuulada dadkeedu ay u safraan masaafo dhan 45 kiiloomitir si ay telefoonadooda u soo dabeystaan

20. 4 Juunyo 2026Xisbullah oo diidady xabbad-joojin cusub oo ay ku heshiiyeen Israa'iil iyo Lubnaan

    

    Xigashada Sawirka, Reuters

    Kooxda hubaysan ee Xisbullah ee dalka Lubnaan ayaa si adag u diiday shuruudaha xabad joojinta uu Maraykanku taageerayo ee u dhexeeya Israa’iil iyo Lubnaan.

    War qoraal ah oo si adag loo hadal hayay ayuu hoggaamiyaha kooxda ay Iran taageerto Naciim Qasem ku sheegay in wada xaajoodku uu ahaa "mid aan waxba tarayn" oo " bahdilaad ah" Lubnaan, waxaana si cad u diiday "qaybaha ballaaran ee dadka Lubnaan".

    Waxay timid ka dib markii Israa'iil iyo Lubnaan ay ku dhawaaqeen dib u cusboonaysiinta xabbad joojintooda jilicsan ee abuurista "aagagga ammaanka" ee gudaha Lubnaan kuwaas oo laga mamnuuci doono hawl-wadeennada Xisbullah.

    War qoraal ah oo ay si wadajir ah u soo saareen arbacadii wasaaradda arrimaha dibadda ee Maraykanka, ayay saddexda dal ku sheegeen in heshiisku uu “ku xiran yahay in gebi ahaanba la joojiyo dagaalka” oo ay fulinayso ururka Xisbullah.

    Warar dheeraad ah:

    Maxa kala qabsaday Trump iyo Netanyahu mar ay khadka taleefoonka ku wada hadleen?

    'Rabshaduhu waa kuwo aan laga fiirsan': Sida dunidu uga falcelisay dagaalka Muqdisho

    Tuulada dadkeedu ay u safraan masaafo dhan 45 kiiloomitir si ay telefoonadooda u soo dabeystaan