You’re viewing a text-only version of this website that uses less data. View the main version of the website including all images and videos.
Gunman fire shots for White House Correspondents Dinner wey Trump and wife bin dey attend
- Author, Tabby Wilson
- Read am in 3 mins
Dem carry US President Donald Trump and First Lady Melania Trump comot from di White House Correspondents Dinner on Saturday night, afta sound of gunshots dey reported around di premises.
Di US Secret Service confam say no one injure for di "shooting incident", and dem don carry one pesin go custody.
For im address from di White House, di president say e dey "always shock wen dis kain tin hapun, and neva change".
Immediately afta di incident, Trump write on Truth Social: "Dem don catch di shooter and I don recommend say "LET THE SHOW GO ON" but, e go dey entirely guided by Law Enforcement."
E follow up wit second post, wia e say law enforcement request say e and first lady get to leave di premises.
Wetin hapun for di dinner
Di annual White House Correspondents Dinner dey hold for Washington Hilton hotel, and di president dey expected to make im address dat evening.
As di dinner dey go on, dem hear gunshots around di vicinity of di ballroom.
Several BBC correspondents, wey dey in attendance, report scenes of widespread confusion sake of di sound of gunshots.
End of Di one wey oda users dey read well well
US Secret Service agents show up to escort di president and di first lady from di room.
While security details bundle senior administration officials including Health Secretary Robert F Kennedy Jr and Defence Secretary Pete Hegseth out.
Oda attendees remain for di ballroom under lockdown - wit many journalists for di room wey dey try report di news to dia different organisations.
Di White House Correspondents Dinner na American press tradition wey start wey back from 1921, and historically, di sitting president dey attend am.
Dis na di first time Trump attend di event as sitting president; since im last attendance in 2011.
Who be di suspect and wetin dem charge am wit?
Di alleged shooting suspect dey reported to be Cole Tomas Allen, 31, of Torrance, California, according to BBC North American news partner, CBS.
Trump say di FBI and Secret Service dey execute search warrants for im California address.
Washington DC interim police chief Jeffery Carroll say e be hotel guest wia di event dey take place. E say nobodi else dey in danger.
While law enforcement confam say dem fire shots, e no clear how many security officials and di man exchange fire, police say.
Carroll say di suspect dey "armed wit shotgun, a handgun, and multiple knives".
Jeanine Pirro, US attorney for Washington, say di suspect dey face two counts for using firearm during crime of violence and assault on federal officers using dangerous weapon.
Dem go formally charged am on Monday, she tok.
Di reason for di shooting remain unclear, but Trump say e go fit give update on Sunday.
