وروستی, لبنانۍ رسنۍ: د خونړیو نښتو درشل کې واشنګټن کې د لبنان – اسرائیل ترمنځ خبرې بیا پیل شوې, د بي بي سي د رسنیو د څار برخه
د لبنان او اسرائیل ترمنځ د خبرو درېیم پړاو د مې په ۱۴مه په واشنګټن کې بېرته پیل شو، په داسې حال کې چې د لبنان په جنوبي سیمو کې د اسرائیل او حزبالله ترمنځ متقابل بریدونه لا هم روان دي.
د یوې مهمې هوکړې د ترلاسه کېدو په اړه فضا ډېره ناهیلې ښکاري، په ځانګړي ډول ځکه چې امریکا د حزبالله د وسلو د محدودولو لپاره فشار ډېر کړی او اسرائیل هم له جنوبي لبنانه د بشپړ وتلو مخالفت کوي.
د لبنان "النهار" ورځپاڼې راپور ورکړی چې په امریکا کې د لبنان او اسرائیل سفیران به د امریکا له هغو سفیرانو سره وګوري چې په لبنان او اسرائیل کې دندې لري. ورځپاڼې زیاته کړې چې د تېرې ورځې اسرائیلي بریدونو کې ۲۲ کسان وژل شوي، چې د روغتیا وزارت په وینا اته ماشومان هم پکې شامل دي.
النهار لیکلي چې د دواړو لورو وروستۍ غونډه د اپرېل په ۲۳مه په سپینه ماڼۍ کې شوې وه، هلته د امریکا ولسمشر ډونلډ ټرمپ د درېیو نورو اوونیو لپاره د اوربند د غځولو اعلان کړی و او د "تاریخي تړون" په اړه یې خوشبیني ښودلې وه.
خو له هغه وروسته، لبناني چارواکو ویلي چې د اسرائیلي هوايي بریدونو له امله سلګونه نور کسان وژل شوي دي او راپورونه ښيي چې تر لس زرو زیات کورونه یا بشپړ ویجاړ شوي او یا زیانمن شوي دي. حزب الله او اسرائیل دواړه یو بل د اوربند په ماتولو تورنوي. ایران پلوه حزب الله ویلي چې د غچ اخیستنې په توګه یې د لبنان دننه او د اسرائیل په شمال کې اسرائیلي ځواکونه په نښه کړي دي.
فرانسوي ژبې لبناني ورځپاڼې "لوریان لوژور" په خپل سرلیک کې لیکلي:"بیروت له یوه جدي دام سره مخ دی: د وسلو د خلع کولو امریکایي پلان، که یوه نوې پراخه جګړه؟"
ورځپاڼې ویلي چې واشنګټن پر دوو ټکو ټینګار کوي:د لبنان موضوع باید له ایران او نورو عربي قضیو جلا وساتل شي او د وسلو د انحصار پروژه باید چټکه شي.
د اسرائیل "واي نېټ" خبري وېبپاڼې راپور ورکړی چې اسرائیل به تر هغه د جنوبي لبنان پرېښودو ته غاړه کېنږدي څو حزب الله “بریدونه روان ساتي او امنیتي ګواښ بلل کېږي.”
دغه وېبپاڼه زیاتوي چې اوربند به په رسمي ډول د مې په ۱۴مه پای ته ورسېږي، او تمه کېږي لبنان به بیا د اسرائیلي ځواکونو د وتلو غوښتنه مطرح کړي.
وروستي رسمي غبرګونونه:حزب الله لا هم له اسرائیل سره د مستقیمو خبرو مخالفت کوي او پخوا یې د غیر مستقیمو خبرو ملاتړ کړی و. دغه ډلې د ۲۰۲۲ کال سمندري هوکړه او د ۲۰۲۴ کال د نومبر اوربند د بریالیو بېلګو په توګه یاد کړي، چې دواړه د امریکا په منځګړیتوب ترسره شوي وو.
