Dragh mu "sgrios mòr" air gnothachasan Earra-Ghàidheal

Bha fianais ga togail aig an Rest and Be Thankful air an A83 air an deireadh-sheachdain mu phlanaichean airson leasachadh mòr a thoirt air an rathad ann an Earra-Ghàidheal.

Nochd timcheall air 20 làraidh is tractar air an earrann den rathad tro Ghleann a' Chrò, air a bheil maoimtean-slèibhe air buaidh mhòr a thoirt thar nam bliadhnaichean, gus dragh a thogail mu na planaichean aig Còmhdhail Alba.

Chaidh an togail-fianais Disathairne a chur air dòigh leis a' bhuidhinn an Rest and Be Thankful Campaign, taobh a-muigh.

Còmhla riutha, bha BP SNP na sgìre, Brendan O'Hara, a tha air ath-chuinge a thòiseachadh an aghaidh nam molaidhean.

Thuirt Còmhdhail Alba gu bheil fuasgladh maireannach dha na trioblaidean ann an Gleann a' Chrò na amas dhan Riaghaltas.

Tha an A83, anns a bheil cha mhòr 100 mìle de dh'fhaid, a' ceangal Maol Chinn Tìre agus ceann a deas Earra-Ghàidheal le bruaichean Loch Laomainn.

Tha timcheall air 1.3m carbad a' siubhail air an rathad gach bliadhna.

Ach tha earrann an Rest and Be Thankful tric air a bhith dùinte ri linn mhaoimtean-slèibhe thar nam bliadhnaichean.

Ann an 2023, dh'fhoillsich Còmhdhail Alba planaichean a chosgadh £470m gus fasgadh a chur os cionn an rathaid airson a dhìon bho sprùilleach.

Fhad 's a thathas ag obair air seo, tha moladh ann gun cleachd carbadan seann rathad an airm - rathad singilte - le siostam conbhoidh ga chur an sàs fad ceithir bliadhna.

Dh'innis Mgr O'Hara nas tràithe dhen mhìos seo gun robh e air ath-chuinge a thòiseachadh an aghaidh nam planaichean.

Thuirt e gun toir iad fìor dhroch bhuaidh air eaconamaidh Earra-Ghàidheil agus gu bheil e ag iarraidh gun lorg an Riaghaltas fuasgladh eile a' leigeadh le carbadan fhaighinn tron earrann den rathad gun bhacadh.

Tha cha mhòr 9,000 duine air ainm a chur ris an ath-chuinge.

A' bruidhinn aig an togail-fianais, thuirt Mgr O'Hara gum biodh buaidh ann air turasachd, roinn an àiteachais, gnothachasan fiodha is eile.

"Chan eil roinn ann an Earra-Ghàidheal is Bòd air nach toir seo fìor dhroch bhuaidh," thuirt e.

"Tha muinntir na sgìre a' seasamh còmhla ri gnothachasan a ràdh nach gabh seo fhulang."

Tha Coinneach MacLeòid, aig a bheil a' chompanaidh Macleod Construction Eta ann an Ceann Loch Gilb, air a' bhuidheann-iomairt a chuir an togail-fianais air dòigh.

Thuirt esan gun dèanadh na planaichean "sgrios mòr" air gnothachasan san sgìre.

"Tòrr dhe na daoine a tha ag obair dhuinne, tha iad a' tighinn an seo a h-uile Diluain agus tha iad a' dol dhachaigh air an Dihaoine," thuirt e.

"Tha sinn an urra ris an rathad a Ghlaschu a bhith fosgailte fad an t-siubhail.

"Tha e garbh ma tha iad a' smaoineachadh gun urrainn dhaibh siostam conbhoidh a chur an sàs - chan eil sinn toilichte idir ma dheidhinn."

Tha Mgr MacLeòid ag ràdh gun cuireadh e co-dhiù leth uair a thìde de mhaill air daoine ma thèid na planaichean air adhart.

Tha e ag ràdh gu bheil fuasgladh eile ann, a' cleachdadh rathad coilltearachd seach seann rathad an airm.

"Feumaidh e a bhith comasach faighinn a Ghlaschu thairis air rathad dà fhillte," thuirt e.

"Rathad singlite, tha e dol a thachdadh na sgìre."

Thuirt neach-labhairt bho Chòmhdhail Alba gu bheil an Riaghaltas a' cur rompha fuasgladh maireannach a chur an sàs cho luath 's a ghabhas aig an Rest and Be Thankful, gus dèiligeadh ris a' chunnart a th' ann bho mhaoimtean-slèibhe.

Thuirt iad gum beachdaich Rùnaire na Còmhdhail Stephen Flynn air beachdan luchd-iomairt is eile, agus gun coinnich e ris a' bhuidhinn-iomairt agus luchd-poileataigs ionadail air a' mhìos seo mus tèid co-dhùnadh a dhèanamh.