Loganair a' coimhead air an t-seirbheis eadar Inbhir Ùige is Obair Dheathain

Tha a' chompanaidh adhair Loganair ag ràdh gu bheil iad a' beachdachadh air an t-seirbheis eadar Inbhir Ùige agus Obair Dheathain, a tha a' faighinn subsadaidh riaghaltais, a ghabhail thairis.

'S e Eastern Airways a bha a' ruith na seirbheise ach chaidh a' chompanaidh ann an rianachd an t-seachdain a chaidh agus chaill a' chuid as motha den 330 luchd-obrach an cosnaidhean.

'S e slighe PSO a th' ann eadar Inbhir Ùige is Obair Dheathain a bhios a' faighinn taic-airgid bho Riaghaltas na h-Alba agus Comhairle na Gàidhealtachd.

Tha Simon McNamara, ceannard riaghlaidh is ghnothaichean corporra le Loganair, ag ràdh gun robh iad a' coimhead air na cosgaisean an cois a bhith a' ruith na seirbheise.

Thuirt Mgr McNamara gun robh aig companaidhean ris na cosgaisean aca fhaighinn air ais fiù 's air slighean PSO.

Thuirt e: "Tha sinn a' coimhead air na figearan agus ma dh'obraicheas e thèid sinn air adhart, ach dìreach ma tha argamaid choimeirsealta ann air a shon.

"Mar sin, aig an ìre seo chan urrainn dhomh dearbhadh taobh seach taobh, ach tha sinn a' coimhead ris."

Chaidh an t-seirbheis eadar Inbhir Ùige agus Obair Dheathain ath-stèidheachadh ann an 2022 an dèidh mar a chaidh a tarraing aig àm Chovid.

Air a' mhìos a chaidh, thuirt Comhairle na Gàidhealtachd gun robh an naidheachd mun staing ionmhais aig Eastern Airways "na fhìor bhriseadh-dùil".

"Tha port-adhair Inbhir Ùige a' toirt seachad seirbheis riatanaich do choimhearsnachdan, a' lùghdachadh neo-ionannachd a thaobh gnìomhachais, seirbheisean slàinte is foghlaim," thuirt iad.

Thuirt neach-labhairt gun do chuir an t-ùghdarras ionadail tagradh gnothachais gu Riaghaltas na h-Alba agus Còmhdhail Alba.

"Tha e a' dèanamh argamaid airson agus gun cùm seirbheisean adhair PSO a dh'Inbhir Ùige a' dol ach cuideachd airson mar a ghabhas seirbheisean a leasachadh," thuirt an neach-labhairt.

Na bu tràithe am-bliadhna, thug Riaghaltas na h-Alba subsadaidh £1m seachad airson nan seirbheisean eadar Inbhir Ùige agus Obair Dheathain, le Comhairle na Gàidhealtachd a' cur £300,000 ris.