Man United ta ci gaba da kasa samun nasara bayan kunen doki da Leeds

Rahoto kai-tsaye

Muhammad Annur Muhammad

1. 18 Oktoba 2026Real Madrid ta lallasa Sevilla 4-1

   

   Asalin hoton, Getty Images

   Kylian Mbappe ya ci kwallo biyu, inda Real Madrid ta doke Sevilla 4-1, ta ci gaba da bin Barcelona a teburin La Liga.

   Dan wasan gaba na Faransa Kylian Mbappe ya zura kwallonsa ta 10 da ta 11 a kakar wasan nan yayin da Real Madrid ta samu nasara a kan Sevilla, tare da ci gaba da kasancewa maki shida a bayan jagorar gasar, Barcelona.

   Tawagar kocin Jose Mourinho ta bude cin kwallo a minti na 30 ta hannun Arda Guler, wanda ya ci kwallo mai kyau daga nesa.

   Mbappe ya kara ta biyu bayan minti bakwai, inda ya yanke mai tsaron gidan Sevilla Odysseas Vlachodimos kafin ya zura kwallo cikin raga.

   Sevilla ta yi kokarin dawowa wasan a rabin lokaci na biyu, kuma Felix Correia ya kusa cin kwallo lokacin da bugun da ya yi ya karkata ya wuce saman raga kadan.

   Sai dai Real Madrid ta tabbatar da nasararta lokacin da aka yi wa Mbappe keta a da'irar bugun fanareti.

   Dan wasan na Faransa ne da kansa ya zura kwallon daga bugun daga kai sai mai tsaron gida.

   Da wannan, Mbappe ya kai kwallaye 11 a wasanni 11 da ya buga a dukkan gasa a bana, abin da ke nuna irin kyakkyawan farkon kakar da yake yi.

   Manu Bueno ya rage gibin da wata kyakkyawar kwallo da ya zura wa Sevilla.

   Amma Yan Diomande ya ci wata gagarumar kwallo daga baya domin tabbatar da nasarar Real Madrid.

   Wannan maki uku na da matukar muhimmanci ga Real Madrid, musamman ganin cewa wasa na gaba da za ta buga a La Liga shi ne El Clasico da Barcelona a ranar 25 ga Oktoba.

2. 18 Oktoba 2026Arsenal ta yunkuro ta doke Nottingham Forest 1-0

   

   Asalin hoton, Getty Images

   Arsenal ta koma matsayinta na biyu a teburin Firimiya bayan da ta ci masu masaukinta Nottingham Forest 1-0, a karawar da suka yi ta mako na bakwai, ranar Lahadi.

   Dan wasan da aka shigo da shi bayan hutun rabin lokaci, Noni Madueke, ne ya kutsa daga bangaren hagu, inda ya yanke Daniel Munoz ya daddage ya shirga kwallon, wadda ta bugi Jair Cunha na Nottingham Forest ta kauce wa mai tsaron gida Matz Sels ta kwana a raga, a minti na tamanin.

   Da wannan nasara Gunners ta koma matsayinta na biyu a tebur a bayan Manchester City, yayin da Forest ta kasance a matsayi na 18, da maki biyar a teburin cikin matakin kungiyoyi uku masu faduwa daga gasar.

   Har yanzu Nottingham Forest ba ta ci ko da kwallo daya a gida ba a gasar Firimiya ta bana.

   Kungiyar ta ci gaba da fuskantar matsala wajen zura kwallo a filin wasanta, inda har yanzu ba ta samu nasarar cin kwallo a gida ba tun farkon kakar wasa ta Premier League.

   Wannan na kara nuna kalubalen da Forest ke fuskanta a bangaren kai hari, yayin da take kokarin samun sakamako mai kyau a gaban magoya bayanta.

   Duk da haka, kakar wasan tana da sauran lokaci mai tsawo, kuma kungiyar za ta yi fatan kawo karshen wannan mummunan tarihi a wasanninta na gaba a gida.

3. 18 Oktoba 2026Bayan da Dubois ya gwabje Wardley, me ya rage a damben mafiya nauyi?

   

   Asalin hoton, Getty Images

   Nasarar da Daniel Dubois ya samu a kan Fabio Wardley ta kara tabbatar da matsayinsa a cikin manyan 'yan damben boksin masu babban nauyi a duniya.

   A cikin turmi biyu kacal dan damben mai shekara 29 ya doke abokin hamayyarsa dan Birtaniya, Fabio Wardley, a damben da suka fafata a filin wasa na O2 Arena da ke Landan.

   Da wannan nasara, Dubois ya kare kambinsa cikin salon da ya fi karawarsu ta farko da ta kayatar a watan Mayu.

   Yanzu hankalinsa zai koma kan damben hada kambina da kuma fafatawa da wasu daga cikin manyan 'yan damben wannan aji na masu nauyi.

   Yayin da hakan ta kasance, shi kuwa zakaran duniya Oleksandr Usyk na dab da yin ritaya daga damben kwararru.

   Haka kuma an dade ana jiran karawar da za ta hada Tyson Fury da Anthony Joshua, wadda a yanzu alamu ke nuna cewa lalle za a iya yin wannan karon-batta tsakanin 'yan Birtaniyan biyu.

   Abin tambaya yanzu shi ne: Me ke gaban ajin damben masu nauyi?

   Dubois ya kara karfafa matsayinsa a cikin masu neman manyan damben hada kambina, yayin da makomar Usyk da yiwuwar karawar Fury da Joshua za su kasance daga cikin abubuwan da za su tsara alkiblar ajin masu nauyi a watanni masu zuwa.

4. 18 Oktoba 2026Bournemouth ta doke Sunderland 2-0

   

   Asalin hoton, Getty Images

   Bournemouth ta fice daga matakin faduwa daga Firmiya bayan da kwallayen Marcus Tavernier da Evanilson suka ba ta nasararta ta farko a gasar ta bana, yayin da Sunderland ke ci gaba da fama da matsaloli.

   Kungiyoyin biyu sun fara wasan ne suna cikin kasan teburin gasar, duk da cewa sun yi nasara a wasanninsu biyu na farko a gasar Turai ta Europa League.

   Sai dai kociyan Bournemouth, Marco Rose, ya samu nasararsa ta farko a matsayin kocin Firimiya, yayin da Sunderland ta ci gaba da kasa samun nasara a waje a bana.

   Haka kuma Sunderland ba ta yi nasara a gasar tun bayan doke Fulham a ranar 30 ga Agusta ba.

   Sunderland ta shiga matsala tun da wuri sakamakon kuskuren dan bayanta Kevin Danso, wanda ya kasa samun bakin zaren wasan tun a mintuna 17 na farko.

   A minti na shida, dan wasan gaba na Bournemouth Evanilson ya yanke Danso kafin ya aika kwallon da'irar Sunderland, inda Marcus Tavernier ya ci kwallo da kai babu mai tsaron gida.

   Wannan ita ce kwallonsa ta hudu a kakar wasa ta bana.

   Minti 11 bayan haka, Evanilson ya sake nuna bajinta inda ya zare kwallo ya bar Danso a baya.

   Yayin da Danso ya fadi, ya ja dan wasan Bournemouth, wanda hakan ke zaman hana wata kwakkwarar dama ta cin kwallo kasancewar shi ne dan wasa na karshe a gidansu.

   Wannan laifi ya sa alkalin wasa Craig Pawson ya ba shi jan kati kai tsaye saboda hana wata tabbatacciyar damar cin kwallo.

   Duk da kasancewa da gibin dan wasa daya mai tsaron gidan Sunderland Robin Roefs ya hana Bournemouth kara yawan kwallaye tsawon lokaci inda ya hana dan wasan gefe na Brazil Rayan cin kwallo sau biyu.

   Sai dai Bournemouth ta samu kwallo ta biyu minti uku kacal bayan an dawo daga hutun rabin lokaci ya hannun Robin Roefs.

5. 18 Oktoba 2026Man United ta ci gaba da kasa samun nasara bayan kunnen doki da Leeds

   

   Asalin hoton, Getty Images

   Manchester United ta kara tsawaita jerin wasannin da ba ta yi nasara ba zuwa shida bayan Leeds United ta hana ta samun maki uku a Elland Road.

   Tafiyar da Manchester United ta yi zuwa gidan abokiyar hamayyarta, Leeds United, ta kasance babban gwaji ga kociya Michael Carrick, musamman bayan mako mai cike da ce-ce-ku-ce, ciki har da tarar da aka ci dan baya Lisandro Martinez saboda sukar shugabannin kungiyar.

   A farkon wasan, yanayin ya kasance mai zafi, inda alkalin wasa ya rika bayar da katin gargadi.

   Kyaftin din United Bruno Fernandes da kuma Gabriel Gudmundsson na Leeds sun samu katin gargadi saboda mummunar keta.

   Bayan haka ne wasan ya fara daukar zafi a bangarorin biyu.

   Dan wasan Manchester United Bryan Mbeumo ya rasa wata babbar dama ta cin kwallo da kai bayan ya samu sarari a cikin da'irar bugun fanareti.

   Sai dai daga bisani ya gyara kuskurensa, inda ya ci wa United kwallo kafin hutun rabin lokaci bayan ya da Youri Tielemans ya ba shi wata kwallo.

   Leeds ta dawo da karfi bayan an dawo daga hutun rabin lokaci.

   Dominic Calvert-Lewin ne ya farke wa Leeds.

   An tashi wasan canjaras, sakamakon da ya sa Manchester United ta kai wasa shida a jere ba tare da nasara ba a dukkan gasa, karo na farko tun karshen kakar wasa ta 2018-19.

   Kungiyar tana matsayi na 13 a teburin gasar.

   A bangaren Leeds kuwa, kungiyar ta ci gaba da kasancewa ba a doke ta a gida ba tun watan Maris, kuma tana matsayi na bakwai da maki uku a gaban Manchester United.

6. 18 Oktoba 2026Brighton ta caskara Crystal Palace 5-0

   

   Asalin hoton, Getty Images

   Diego Gomez ya ci wata kwallo mai ban mamaki daga tsakiyar fili yayin da Brighton ta yi wa abokiyar hamayyarta Crystal Palace ruwan kwallaye.

   Brighton ta fara samun nasara tun da wuri bayan dan wasan Crystal Palace Jaydee Canvot ya ci kansu da kai a minti na hudu.

   Sai kuma bayan minti uku kacal, dan wasan tsakiya na Paraguay Diego Gomez, mai shekara 23, ya ci daya daga cikin fitattun kwallayen kakar wasan nan.

   Bayan Olivier Boscagli ya kwace kwallo daga Adam Wharton, Gomez ya hangi mai tsaron ragar Palace Walter Benitez ya yi nisa da raga, inda ya cilla kwallo kai tsaye daga kusa da tsakiyar fili.

   Kamfanin kididdiga na Opta ya ce an doka kwallon ne daga nisan mita 51, wanda ya sa ta zama daya daga cikin mafiya nisan kwallayen da aka ci a gasar Firimiya tun bayan kwallon da Wayne Rooney ya ci daga mita 58 a wasan Everton da West Ham a shekarar 2017.

   Matsalar ta kara tsananta wa Crystal Palace lokacin da Yasin Ayari ya ci kwallo ta uku bayan minti 10 kacal da fara wasa, bayan ya amfana da wata kwallo da Charalampos Kostoulas ya shimfida masa da diddige.

   Kostoulas da kansa ya ci kwallo ta hudu a minti na hudu bayan dawowa daga hutun rabin lokaci, bayan da kwallon da Ayari ya harba ta dawo gare shi.

   Duk da dawowar Jean-Philippe Mateta daga jinyar kusan watanni biyu saboda raunin tsoka, Crystal Palace ta kasa samun nasara. Mateta ya bugi sandar sama, yayin da Jefferson Lerma ya bugi daya daga cikin sandunan gefe da kai.

   Brighton ta ci kwallo ta biyar a minti na 84 lokacin da Jack Hinshelwood ya zura kwallo daga kusa bayan mai tsaron gida Benitez ya tare bugun kan da Luka Vuskovic ya yi.

   Nasarar ta kasance mafi girma da Brighton ta taba samu a kan Crystal Palace tun shekarar 1956.

   Haka kuma kungiyar ta ci gaba da kare ragarta ba a jefa mata kwallo ba karo na takwas a dukkan gasa a kakar 2026-27, tare da samun nasararta ta biyar a gasar Firimiya.

   Sakamakon ya daga Brighton zuwa matsayi na biyu a teburin gasar, to amma bayan da Arsenal ta doke NOttingham Forest a karawar da suka yi bayan wasan na Brighton, wasan da aka yi shi ma ranar Lahadi, Arselnal ta koma matsayinta na biyu yayin da Brighton din ta zama ta uku.

7. 16 Oktoba 2026Reece James zai yi jinyar wata uku, bayan tiyatar da aka yi masa, Chelsea

   

   Asalin hoton, Reece James

   Kyaftin din Chelsea, Reece James zai yi jinyar kusan watanni uku bayan an masa tiyatar gwiwa.

   Mai tsaron bayan mai shekara 26 ya ji rauni ne a wajen atisaye, kafin nasarar da Chelsea ta samu da ci 5-1 kan Bournemouth a ƙarshen makon da ya gabata, lamarin da ya sa aka yanke shawarar yi masa tiyata.

   Yanzu haka James yana karkashin shirin jinya tare da ma'aikatan lafiya na Chelsea, ko da yake ba a bayyana takamaiman ranar da zai dawo taka leda ba.

   A wasansu na gaba, Chelsea za ta baƙuncin Everton a Gasar Firimiya kafin daga bisani ta karɓi baƙuncin abokiyar hamayya Tottenham da kuma Manchester United a cikin jerin wasanni masu zafi.

   Tsakanin waɗannan wasannin gida guda biyu kuma, Chelsea za ta je Anfield domin karawa da Liverpool a wasan Carabao Cup.

   A cikin kakar wasannin da suka gabata, James ya sha fama da raunuka iri-iri, abin da ya sa ya rasa shiga gasa da dama tare da tawagar Ingila tun bayan gasar cin kofin duniya ta 2022 da aka gudanar a Qatar.

8. 16 Oktoba 2026Real Madrid ta nemi Tebas ya yi murabus bayan kwatanta ta da Goebbels, Real Madrid

   

   Asalin hoton, Getty Images

   Real Madrid ta bukaci shugaban La Liga, Javier Tebas, da ya yi murabus nan take bayan ya kwatanta jagorancin kungiyar da shugaban yaɗa farfagandar Nazi, Joseph Goebbels.

   Tebas ya ce salon sadarwar Real Madrid da kuma yadda take amfani da tashar talabijin ɗinta ta cikin gida yana "tunatar da hanyoyin yaɗa farfaganda da Goebbels ya yi amfani da su".

   Real Madrid ta bayyana kalaman a matsayin "abin ƙyama mai tsanani" da kuma "abin da ya saɓa wa ɗabi'a".

   Kungiyar ta kuma nemi Tebas ya sauka daga muƙaminsa na shugaban La Liga da kuma mataimakin shugaban Hukumar Ƙwallon Ƙafa ta Sifaniya (RFEF).

   "Real Madrid na kallon wannan batu a matsayin abin da ba za a amince da shi ba ko kaɗan kuma mai matuƙar muni, ganin cewa mutumin da ke riƙe da manyan muƙamai biyu masu muhimmanci a ƙwallon ƙafar Sifaniya ya yi amfani da kwatanci da dabarun yaɗa farfagandar gwamnatin Nazi domin ɓata sunan kungiyarmu," in ji kulob ɗin.

9. 16 Oktoba 2026An gaya wa Arteta rage ma'aikatan Arsenal zai samar da nasarori, Arsenal

   

   Asalin hoton, Getty Images

   Kociyan Arsenal, Mikel Arteta ya ce an sanar da shi cewa matakin da kungiyar ya ɗauka na rage ma'aikata 60, an yi shi ne domin "samun nasarar da muke son gina wa".

   Babban jami'in gudanarwa na Gunners, Richard Garlick ya sanar da ma'aikata a wannan makon cewa za a rage yawan ma'aikatan Arsenal a sassa daban-daban na kungiyar.

   Ana sa ran matakin zai shafi har zuwa kashi bakwai cikin ɗari na ma'aikatan dindindin 871 na Arsenal, amma ba zai shafi masu horarwa ko ma'aikatan da ke kula da ayyukan horar da yan wasa ba, domin rage ma'aikatan zai ta'allaka ne ga ayyukan da ba na filin wasa ba.

   Haka kuma, ma'aikatan Arsenal Foundation, Arsenal in the Community da kuma ma'aikatan tsaro ba za su fuskanci wannan mataki ba.

   An fara nazarin tsarin ma'aikatan kungiyar ta hannun wani kamfani mai zaman kansa tun kafin Arsenal ta lashe Gasar Firimiya.

   Matakin rage ma'aikatan ya zo ne mako guda bayan da aka sabunta yarjejeniyar Mikel Arteta da zai ci gaba da aikin kaka hudu nan gaba, bayan ya jagoranci Arsenal zuwa lashe kofin Gasar Firimiya na farko tun bayan shekarar 2004 a kakar da ta gabata.

   Sabuwar yarjejeniyar mai shekara 44 ɗin ta ƙunshi ƙarin albashi daga fam miliyan 10 a shekara da yake samu a baya, tare da ƙarin fam miliyan 5 na alawus-alawus na samun nasara.

10. 15 Oktoba 2026Hukumar Kwallon Kafa ta Faransa ta samu ribar Euro miliyan 4.1, Faransa

    

    Asalin hoton, Getty Images

    Hukumar Kwallon Kafa ta Faransa (FFF) ta sanar a ranar Alhamis cewa ta samu ribar Euro miliyan 4.1 (dala miliyan 4.60), tare da kara yawan kudin tallafi ga kwallon kafa daga tushe da tawagar ta mata zuwa sabon matsayi mafi girma na kusan Euro miliyan 120 a shekarar kudi ta 2025-26.

    Tallafin da aka ware wa kwallon kafa har da ta Kwararru da sauran shirye-shiryenta ya kai Euro miliyan 117.2, wanda ya zarce na kakar da ta gabata da sama da Euro miliyan 10.

    A karo na biyu a jere, FFF ta amince da yafewa Hukumar Gasar Kwallon Kafa ta Kwararru ta Faransa bashin Euro miliyan 10, inda ta ci gaba da bayar da tallafin kudi ga wasan kwallon kafa na ƙwararru.

    FFF ta ce kudin shigar da ta samu sun kai sabon matsayi mafi girma na kusan Euro miliyan 300 (dala miliyan 336.30), sakamakon sabunta yarjejeniyar daukar nauyi da Nike da kuma kara sababbin abokan hulɗar kasuwanci guda shida.

11. 15 Oktoba 2026An dage gasar tenis a Saudiya, saboda rikicin gabas ta Tsakiya, Wasan kwallon tennis

    An dage babbar gasar tennis ta Six Kings Slam da aka tsara gudanarwa a Riyadh a Saudiyya mai dan karen kudi mai tsoka.

    An sanar da hakan, sakamakon tashin hankalin da yake faruwa a wasu wurare a Gabas ta tsakiya, ciki har da kai hari ga fifin sauka da tashin jirgin sama a Riyadh.

    Tun farko an tsara gudanar da gasar mai 'yan wasa shida daga ranar 21 zuwa da 24 ga watan Oktoba,

12. 15 Oktoba 2026Southgate ba ya ganin zai koma koyar da kungiyar Premier League, Premier League

    

    Asalin hoton, Getty Images

    Wasan karshe da Gareth Southgate ya jagoranta a matsayin kocin Ingila shi ne karawar karshe a Euro 2024, inda suka sha kashi a hannun Sifaniya.

    Southgate, tsohon kocin Ingila ya ce ba ya ganin zai sake komawa horas da wata kungiyar kwallon kafa a gasar Premier League.

    Mai shekara 56 ya daina aikin horarwa tun bayan da ya yi murabus daga mukaminsa na kocin Three Lions bayan da ya kai su wasan karshe a Euro 2024, inda suka sha kashi a hannun Sifaniya.

    Southgate, wanda kuma ya kai Ingila wasan karshe a Euro 2020, bai taba horas da wata kungiyar kwallon kafa ba tun bayan shekara uku da ya shafe a Middlesbrough daga shekarar 2006.

    Tun bayan barin aikin kociyan Ingila, Southgate ya kuma yi aiki a kafafen yada labarai, sannan a farkon wannan shekarar ya jagoranci wani shirin BBC inda ya yi tattaki a fadin Birtaniya domin fahimtar kalubalen da matasa maza da yara maza ke fuskanta a fannin taka leda.

13. 15 Oktoba 2026Getafe ta yi tayin daukar Sancho wanda bai da kungiya, Getafe

    

    Asalin hoton, Getty Images

    Getafe ta gabatar da tayi a hukumance domin daukar tsohon dan wasan Manchester United, Jadon Sancho.

    Mai shekara 26 a duniya ba shi da kungiya, bayan kwantiraginsa ya kare a lokacin bazara.

    Kungiyar Getafe ta Sifaniya, wanda ke matsayi na 14 a La Liga kuma tana buga gasar Europa Conference League a wannan kakar, na da kwarin gwiwar samun daukar dan kwallon domin ya taimaka maka da gogewarsa.

    An ce Sancho, wanda ya koma Manchester United fam miliyan 73 daga Borussia Dortmund a 2021, ya fi son komawa wata kungiyar da ba a Ingila take ba, amma har yanzu yana jiran a gabatar masa da kwantiragi mai tsoka ko daga ina ne.

    Sancho ya shafe kakar wasan da ta gabata a matsayin aro a Aston Villa, inda ya buga wasa 39, yayin da kungiyar, Unai Emery ta samu gurbin shiga gasar Zakarun Turai tare da lashe Europa League. Ya shiga wasan a matsayin canji a karshen nasarar da suka samu kan Freiburg.

    Ya kuma buga wasannin aro a Dortmund da Chelsea a cikin shekaru biyar da ya shafe a Manchester United.

    Komawarsa Chelsea a kakar 2024-25 ta kunshi sharadin saye na dindindin. Sai dai Chelsea ta biya tarar fam miliyan biyar domin mayar da Sancho Old Trafford bayan ya buga mata wasa 41.

    Sancho na ci gaba da wallafa bidiyon atisayensa a shafinsa na Instagram yayin da yake neman sabuwar kungiya. Hakan ya hada da ziyararsa ga kungiyar Flixton da ke matakin da ba na kwararru ba.

14. 15 Oktoba 2026Infantino ya ba Majalisar Fifa hakuri amma an ce har yanzu bai cancanci, Fifa

    

    Asalin hoton, Getty Images

    Shugaban hukumar kwallon kafa ta duniya, Gianni Infantino ya bai wa Majalisar Fifa hakuri kan shirinsa na sayar da wasu hakkokin gasar Kofin Duniya, amma an shaida masa cewa bai cancanci ya ci gaba da jagoranci ba matukar bai fitar da dukkan takardun da suka shafi lamarin tare da amsa muhimman tambayoyi ba.

    Majalisar Fifa ta yi zama a Zurich ranar Alhamis karo na farko tun bayan janye shirin sirri na Fifa Forward Enterprise (FFE) daga Infantino, wanda zai bai wa wani kamfanin masu zaman kansu domin saka hannun jari wani kaso daga hakkokin kasuwancin a wasannin da take shiryawa.

    Infantino ya kuma fuskanci karin tambayoyi kan jan katin Folarin Balogun, wanda daga baya ya buga gasar kofin duniya, an kuma bukaci ya yi bayani kan Kyautar Zaman Lafiya ta Fifa da ya bai wa shugaban Amurka da kuma tallafin da ake bai mambobin Fifa.

    Shugabar Hukumar Kwallon Kafa ta Ingila, Debbie Hewitt, wadda kuma mataimakiyar shugabar Fifa ce, ta ce bayan taron har yanzu akwai tambayoyi da dama da ba a samu amsarsu ba.

15. 15 Oktoba 2026Man United ta koma kamar wajen wasan kwaikwayo - Keane, Manchester United

    

    Asalin hoton, Getty Images

    Tsohon kyaftin, Roy Keane ya ce Manchester United ta koma kamar wajen wasan kwaikwayo bayan mai tsaron bayanta, Lisandro Martinez ya soki shugabannin kungiyar.

    Da yake magana bayan shan kashin da United ta yi da ci 2-0 a hannun Atletico Madrid a gasar Zakarun Turai ranar Talata, Martinez ya ce ya yi tsammanin za a zuba jari fiye da kima a cikin kungiyar a lokacin kasuwar saye da sayar da 'yan wasa ta bazara.

    A sakon da ya wallafa a kafafen sada zumunta ranar Laraba, ya ce ya yi wadannan kalamai ne cikin "fushi da takaici".

    Wannan rashin nasara a Madrid ya sa United ta kai wasanni biyar a jere ba tare da samun nasara ba, sannan ta ci wasa daya kacal cikin shida da fara kakar Premier League ta bana.

    Keane, da yake magana a shirin tattaunawa na The Overlap, ya ce bayanin da Martinez ya yi yana nuna halin da kungiyar din ke ciki baki daya.

    "Za a samu wasu magoya baya da za su ce ya yi daidai, sannan wasu kuma su ce bai kamata ya yi wadannan kalaman ba, musamman daga dan wasan da shi kansa bai yi abin kirki ba a lokacin da kungiyar ke fama da matsaloli," in ji shi.

    "Ina ganin idan aka dubi yanayin United din gaba daya a bayyane take akwai rudani sosai, kamar wani wajen wasan kwaikwayo.

    "Lokacin da kuke cikin mawuyacin hali irin wanda United ke ciki, abin da nake gani matsala shi shi ne lokacin da wasu 'yan wasa ke yin irin wadannan kalamai. Ya kamata mutum ya fara duban kansa kafin ya fito yana yin duk wadannan tsokaci."

16. 15 Oktoba 2026Barcola ya ci kwallo uku rigis, bayan Liverpool ta caskara LASK, Champions League

    

    Asalin hoton, Getty Images

    Bradley Barcola ya zura ƙwallaye uku rigis, yayin da Liverpool ta lallasa LASK a wasan Champions League da aka ci ƙwallaye tara.

    Ƙungiyar Andoni Iraola ta fara samun cin kwallo a wasan da ta buga a Austria, bayan da Ronald Araujo ya ci kwallonsa ta farko a kungiyar.

    Mintuna biyu tsakani, Bradley Barcola ya ci kwallonsa ta farko shima a Liverpool tun bayan komawarsa daga PSG kan fam miliyan 123 a lokacin bazara.

    Barcola, wanda bai ci ƙwallo ko bayarwa a zura a raga ba a wasanninsa shida na farko, ya ƙara ta biyu daf da hutun rabin lokaci bayan da Florian Wirtz ya tsallake ya bar masa ƙwallon.

    Bayan an dawo daga hutun rabin lokaci, Jeremie Frimpong ya sa aka koma 4-1.

    LASK ta farke ɗaya ta hannun Robert Ljubicic, amma mintuna uku bayan haka Barcola ya kammala cin ta uku rigis a karawar.

    Daga baya Lewis Koumas shi ma ya shiga cikin masu cin ƙwallaye yayin da Frimpong ya sake yin hannu a cin ƙwallo.

    Sai dai masu gida sun zare karin biyu da karawar ta koma 6-3.

    Iraola, wanda ya yi sauye-sauye huɗu daga ƙungiyar da ta sha kashi a hannun Manchester City ranar Lahadi, ciki har da hutar da Virgil van Dijk, yanzu ya jagoranci ƙungiyarsa zuwa nasara biyu cikin wasanni biyu a gasar Champions League.

    Liverpool za ta je gidan Brentford a gasar Premier League ranar Asabar, kafin ta karɓi baƙuncin Villarreal a Anfield ranar Talata mai zuwa.

17. 14 Oktoba 2026PSG ta je Etihad ta doke City 4-2 a Champions League, Champions League

    

    Asalin hoton, Getty Images

    Manchester City ta sha kashi a hannun zakarun Champions League Paris St-Germain a Etihad, bayan da PSG ta doke ta 4-2.

    City, wadda tsohon kocinta Pep Guardiola ya halarci kallon karawar, shi ne karon farko da ya je Etihad tun bayan barin kungiyar a karshen kakar da ta wuce.

    Desire Doue ne ya bude tamaula a minti na 13, kafin daga bisani ya samar da kwallo ta biyu ga Ousmane Dembele, wanda ya kai kai cikin raga mintuna biyu bayan haka.

    PSG ta ci gaba da tarwatsa City, inda Vitinha ya ci ta uku a minti na 32.

    Maresca ya yi sauye-sauye uku a hutun rabin lokaci, kuma City ta sauya fasali gaba daya bayan an dawo wasa, inda ta samar da damammaki masu yawa kafin Erling Haaland ya zare kwallo daya.

    Sai dai burin City na dawowa cikin wasan ya fuskanci koma baya a minti na 62 lokacin da Donnarumma ya fara tare bugun Akliouche, amma daga baya kwallon ta fada raga.

    Duk da haka, City ba ta yi kasa a gwiwa ba. Haaland ya ci kwallonsa ta biyu a fafatawar.

    A karshen wasan kuma, Donnarumma ya ceci bugun fenaritin da Ferran Torres ya buga masa.

18. 14 Oktoba 2026Sakamakon wasannin da aka buga

    

    Asalin hoton, BBC Sport

19. 14 Oktoba 2026Wasannin da aka tashi, City 2-4 PSG

    Slovan Bratislava 0-3 Stuttgart

    Bodo/Glimt 1-0 Borussia Dortmund

    Shakhtar Donetsk 3-1 AEK Athens

    Roma 3-4 Real Madrid

    Real Betis 3-2 Porto

20. 14 Oktoba 2026An tashi wasan, Man City 2-4 PSG

    Wasa ne mai dan karen kalubale!

    PSG ta nuna dalilin da ya sa take zakarun Turai.

    Manchester City ta yi ƙoƙarin dawowa cikin wasan da jarumtaka, amma hakan bai wadatar ba a ƙarshe.