Yaƙin Iran da sauran abubuwan da ke faruwa a Najeriya da sassan duniya

Rahoto kai-tsaye

Usman MINJIBIR

1. 20 Aprilu 2026Tawagar Amurka na shirin tafiya Pakistan domin tattaunawa da Iran

   

   Asalin hoton, Getty Images

   Rahotanni daga Washington na cewa wata tawagar Amurka na shirin tashi zuwa Pakistan domin gudanar da tattaunawar sulhu da Iran.

   An ruwaito Shugaban Amurka, Donald Trump na cewa yana zaton a wannan mataki babu wanda zai yi wasa da batun na shiga sulhu.

   Tehran ta ce har yanzu ba ta da wani shiri kan zagaye na gaba na tattaunawar, sai dai hakan ya bar kofar bude akan yiwuwar yanke shawara a minti na karshe domin halarta.

   Tsagaita wutar yakin da ake yi a yanzu tsakanin Amurka da Iran na shirin karewa a ranar Laraba.

   Wakiliyar BBC ta ce shugaban Amurka Donal Trump ya ce zai yi mutuƙar wuya ya amince a ƙara wa'adin tsagaita wutar, mutsawar ba a cimma matsaya a yarjejeniyar ba.

2. 20 Aprilu 2026Dole Najeriya ta samu tsaro - Babban hafsan tsaro

   

   Asalin hoton, Defence Headquarters Nigeria

   Babban hafsan tsaron Najeriya, Janar Olufemi Oluyede ya buƙaci dakarun tsaron ƙasar su ƙara ƙaimi wajen yaƙi da ƴanbindiga a jihohin arewa maso yamma, inda ya nanata cewa dole a tabbatar Najeriya da ƴan Najeriya sun samu tsaro "ta kowane hali."

   Janar Oluyede ya bayyana haka a ziyarar da ya kai wa sojojin da suke aiki na musamman na Fansan Yamma a garin Gusau da ke jihar Zamfara.

   "Saƙona a fayyace yake: dole dakaru su fita su bi ɓatagari har maɓoyarsu su kawo ƙarshensu. Dole mu tabbatar da tsaron Najeriya ta ko wane hali."

   Hafsan ya bayyana shirin rundunar tsaron Najeriya na kawo ƙarshen matsalolin ƴanbindiga a jihohin arewa ta yamma, inda ya ƙara da cewa idan aka cigaba da matsa wa ƴanbindigar lamba ne za a samu sauƙi da zaman lafiyar da ake buƙata.

   Janar ɗin ya kuma yaba da ƙoƙarin gwamnatin jihar Zamfara da ƴan jihar bisa irin gudunmuwar da suke ba jami'an tsaro.

3. 20 Aprilu 2026Hanyoyi uku da suka rage wa Arsenal na lashe kofin Premier

   

   Asalin hoton, Getty Images

   Har yanzu magoya bayan Arsenal na ci gaba da alhinin rashin nasarar da ƙungiyar ta yi a wasanta da Man City na ranar Lahadi.

   Rashin nasarar da ƙungiyar ta yi da ci 2-1 ya sake jefa ta cikin babbar barazanar gaza lashe Kofin Premier da ta shafe fiye da shekara 20 tana ƙishirwarsa.

   A shekarun baya-bayan nan ƙungiyar kan nuna alamun lashe kofin ta hanyar hawa teburin gasar tare da bayar da tazara mai yawa, amma ana zuwa ƙarshen kakar sai komai ya sukurkuce mata.

   Karanta cikakken labarin a nan

4. 20 Aprilu 2026An gano yara ƴan Ukraine 45 da aka yi safararsu zuwa Rasha

   Rundunar ƴansandan Turai, ta ce ta gano wasu yara ƴan Ukraine 45 da aka yi safarar su zuwa Rasha. Hukumar ta ce ta tara dimbin masu bincike da suka shafe kwana 2 suna nazarin bayanan jama’a domin gano wuraren da yaran suke.

   Haka kuma ta ce wasu daga cikin yaran an riga an bai wa wasu iyalai ‘yan Rasha su riƙa rainonsu, yayin da wasu kuma ke cikin sansanonin gyaran tarbiyya, da kuma asibitocin masu tabin hankali.

   An yi ƙiyasin cewa Rasha ta tafi da kusan yara 20,000 ‘yan Ukraine tun bayan mamayar da tayi shekaru huɗu da suka gabata, lamarin da ya sa Kotun Hukunta Manyan Laifuka ta Duniya ICC ke tuhumar Shugaba Vladimir Putin da kuma Kwamishiniya mai kula da haƙƙin yara ta Rasha, Maria Belova, kan tuhumar laifukan yaki.

5. 20 Aprilu 2026Abin da Kotun Ƙoli ta ce kan rikicin Masarautar Kano

   

   Asalin hoton, Mai Katanga/Facebook

   Kotun ƙoli ta dage sauraron shari'ar rikicin masarautar Kano da ya ƙi ci ya ƙi cinyewa tsakanin Sarkin Kano na 15 Aminu Ado Bayero da Sarki Muhammad Sanusi kan wane ne halastaccen Sarkin na Kano.

   A wani zaman da ta yi a Abuja, kotun ta ƙoli ta ɗage zaman sauraron shari'ar zuwa ranar 19 ga watan Afrilun 2027, wato kimanin shekara ɗaya daga yanzu.

   A watan Mayun 2024 ne dai Gwamna Abba Kabiru Yusuf ya rushe tsarin masarautar Kano na lokacin wanda ke da sarakuna biyar ciki har da Sarki Aminu na Kano, bayan sauya dokokin da suka kafa masarautun na jiha.

   Karanta cikakken labarin a nan

6. 20 Aprilu 2026China ta yi kiran tabbatar da zirga-zirgar jiragen fito a Hormuz

   

   Asalin hoton, Getty Images

   Shugaban ƙasar China Xi Jinping ya yi kiran ci gaba da tabbatar da zirga-zirgar jiragen fito a mashigar Hormuz.

   Mista Xi ya yi kiran ne lokacin tattaunawa ta waya da Yariman Saudiyya Mohammed bin Salman a ranar Litinin.

   Ya ce akwai buƙatar bai wa jiragen ruwan da ke maƙale a mashigar damar wucewa cikin aminci.

   Kamfanin dillancin labarai na Xinhua ya ambato Mista Xi na cewa China kiran gaggauta cimma yarjejeniyar tsagaita wuta tare da fatan magance rikicin ta hanyar amfani da hanyoyin diplomasiyya.

7. 20 Aprilu 2026Iran za ta halarci tattaunawar Pakistan - Anadolu

   Kamfanin dillancin labaran Turkiyya, Anadolu ya bayar da rahoton cewa wasu majiyoyi a Pakistan sun tabbatar masa cewa Iran za ta halarci tattaunawar kawo ƙarshen yaƙin ƙasar da za a yi a Islamabad.

   Sashen Fasha na BBC ya ambato kamfanin Anadolu na cewa majiyoyin sun shaida masa cewa wakilan na Iran za su isa Pakistan a gobe Talata.

   Tun da farko kakakin ma'aikatar harkokin wajen Iran, Esmail Baghai ya ce ƙasar ba ta yanke shawawar halartar tattaunawar ba.

   Tuni dai wakilan Amurka, ƙarƙashin jagorancin Mataimakin Shugaban ƙasar, JD Vance suka nufi birnin na Islamabad domin halartar tattaunawar.

   A makon da ya gabata ne wakilan ƙasashen biyu suka halarci zaman tattaunawar da ta gaza cimma matsaya.

8. 20 Aprilu 2026'Za mu yi amfani da duka hanyoyin diplomasiyya don magance rikicin - Shugaban Iran

   

   Asalin hoton, Getty Images

   Shugaban ƙasar Iran Masoud Pezeshkian ya ce "za a yi amfani da duka hanyoyin diplomasiyya don yayyafa wa rikicin da ake yi a yankin Gabas ta tsakiya wuta.

   Yayin da yake jawabi lokacin wata ziyara da ya kai ma'aikatar sharai'a ƙasar, Mista Pezeshkian ya ce babu abin da yaƙi ke amfanar da al'umma, amma ya ce ƙasarsa za ta turje wa duk wada barazana.

   Shugaba Pezeshkian ya ce ''dole ne a sanar wa Iraniyawa ainihin halin da ƙasar ke ciki''.

   ''Samar da bayanai marasa inganci da alƙawuran da ba za a iya cikawa ba iya gaza magance suke yi ba, har ma da rasa aminc ewa mutane suke haifarwa'', a cewar Pezeshkian.

   "Ya kamata a riƙa faɗa wa mutane irin nasarorin da aka samu da ma ƙalubalane da ake fuskanta,,'' kamar yadda ya yi ƙarin haske.

   Tun da farko kakakin ministan harkokin wajen Iran, ya ce ƙasar ta ba da ''shirin halartar tattaunawa ta biyu da za a a Pakistan yau Litinin.

9. 20 Aprilu 2026Yaran da aka haifa kusa da sansanin sojin Birtaniya a Kenya sun gano gaskiya kan mahaifansu

   

   "Edward", ɗan shekara tara daga Kenya, ya kasance yana da matsaniyar cewa mahaifinsa ya yi aiki da sojojin Birtaniya. Launin fatarsa da ya kasance fari sabanin sa'o'insa ya janyo masa tsangwama na tsawon shekaru.

   Mahaifin Edward (wanda ba asalin sunansa ba) ya ɓace tun kafin a haife shi, lamarin da ya bar mahaifiyarsa cikin tsananin talauci, inda wasu ƴan uwa suka mayar da ita saniyar ware.

   Yanzu dai wannan mutumin, wanda ya yi aiki a matsayin soja ɗan kwangila a sansanin sojojin Birtaniya da ke Kenya, tare da wasu 19 da suka yi aikin soja a can, an gano su ta hanyar gwajin kwayar haihuwa, kuma a matsayin iyayen yaran da aka haifa a kusa da sansanin.

   Ya zuwa yanzu dai an tabbatar da mutum 12 waɗanda suka haifi yara a kusa da sansanin wanda alkalin kotun kolin iyali na Birtaniya ya yi.

   Lamarin ya amsa tambayoyin ɗimbin yara waɗanda ba su san su waye ne iyayensu ba.

   Karanta cikakken labari a nan

10. 20 Aprilu 2026Kotun ƙoli ta ɗage zaman sauraron shari'ar rikicin masarautar Kano

    

    Asalin hoton, BBC Collage

    Kotun ƙoli ta dage sauraron shari'ar rikicin masarautar Kano da ya ƙi ci ya ƙi cinyewa tsakanin Sarkin Kano na 15 Aminu Ado Bayero da Sarki Muhammad Sanusi kan wane ne halastaccen Sarkin na Kano.

    A wani zaman da ta yi a Abuja, kotun ta ƙoli ta ɗage zaman sauraron shari'ar zuwa ranar 19 ga watan Afrilun 2027.

    A watan Mayun 2024 ne dai Gwamna Abba Kabiru Yusf ya rushe tsarin masarautar Kano na lokacin wanda ke da Sarakuna biyar ciki har da Sarki Aminu na Kano, bayan sauya dokokin da suka kafa masarautun na jiha.

    Tun lokacin ne Sarki Aminu Bayero ke ƙalubalantar sauye-sauyen inda suka je kotuna daban-daban kafin zuwa kotun ƙolin da ta ɗage zaman har na tsawon shekaru biyu.

11. 20 Aprilu 2026Da me Turkiyya za ta taimaka wa Najeriya ta fuskar tsaro?

    

    Asalin hoton, Getty Images

    A ƙarshen makon da ya gabata ne Najeriya da Turkiyya suka amince da ƙulla yarjejeniyar tsaro tsakaninsu da nufin ƙarfafa rundunar sojin Najeriya a yaƙin da take yi da ƙungiyoyin masu ɗauke da makamai.

    Cikin wata sanarwa da kakakin ma'aikatar tsaron Najeriya, Queeneth Iheoma-Hart ta fitar a ranar Lahadi ta ce yarjejeniyar ta ƙunshi cewa Turkiyya za ta kafa babbar cibiyar horon soji a Najeriya, a wani ɓangare na haɗin gwiwar tsaron tsakanin ƙasashen biyu.

    An cimma yarjejeniyar ce lokacin wata tattaunawar diplomasiyya tsakanin ministocin tsaron ƙasashen biyu a gefen taron diplomasiyya na 2026.

    Turkiyya na da ƙwarewar ƙera makaman yaƙi na zamani, musamman jirage marasa matuƙa.

    Karanta cikakken labarin a nan

12. 20 Aprilu 2026Benjamin Netanyahu ya ce za a hukunta sojan da ya rushe mutum-mutumin Yesu

    

    Asalin hoton, Getty Images

    Firaiministan Isra'ila, Benjamin Netanyahu ya yi alawadai da sojan ƙasar wanda aka samu da laifin wulaƙanta mutum-mutumin Yesu Almasihu.

    Wani hoto ne dai ya rinƙa karakaina da ke nuna sojan na Isra'ila yana rushe mutum-mutumin da guduma.

    A wata sanarwa da aka wallafa a shafinsa na X, Benjamin Netanyahu ya ce ilahirin al'ummar Isra'ila sun kaɗu da jin faruwar al'amarin.

    Ya ce hukumomin soji suna gudanar da bincike dangane da al'amarin kuma za su ɗauki dukkannin matakin da ya kamata domin hukunta sojan.

    

    Asalin hoton, ..

13. 20 Aprilu 2026Ba mu yanke zuwa tattaunawa a Pakistan ba - Iran

    

    Asalin hoton, Getty Images

    Har kawo yanzu ƙasar Iran ta ce ba ta kammala yanke shawara ba dangane da ko za ta aika wakilai zuwa tattaunawar da za a yi da Amurka a Pakistan ba.

    Mai magana da yawun ma'aikatar harkokin gida ta Iran ɗin, Esmail Baghei ya shaida cewa "ya zuwa yanzu...ba mu da wani shiri na zango na biyu na tattaunawa."

    ShugabaTrump dai ya ce zai aika tawagar Amurka zuwa Pakista inda kuma mataimakin shugaban ƙasar, JD Vance zai jagoranta.

    Bayanai sun nuna cewa tuni tawagar ta Amurka ta kama hanya zuwa Pakistan domin halartar tattaunawar.

14. 20 Aprilu 2026Amurka ba ta shirya wa hulɗar jakadanci ba - Iran

    We can bring you more now from Iran's foreign ministry on whether it will attend the second round of peace talks with the US in Pakistan.

    Mai magana da yawun ma'aikatar harkokin wajen Iran, Esmail Baghaei ya ce "A daidai lokacin da Amurka ke ikrarin son cimma huldar jakadanci da kuma shirinta na shiga tattaunawa da Iran, Amurka tana aiwatar da wasu halaye da suke ƙaryata ta, in shi.

    Ya ƙara da cewa Iran ba ta amincewa da wa'adi da wata ƙsa za ta ba ta idan dai har hakan ya keta muradun ƙasar tasu, kamar yadda Reauters ta faɗa, inda kuma ta ƙara da cewa cire batun nukiliya ba ma abin da za a iya tattaunawa ba ne.

    Batun dai abin da ya kamata a yi da sinadarin nukiliya na Iran na ɗaya daga cikin batutuwan da aka kasa amincewa da su yayin zaman tattaunawa tsakanin ƙasashen biyu a Pakistan wanda aka ƙare dutse a hannun riga ranar 12 ga watan Afrilu.

15. 20 Aprilu 2026Askarawan Zamfara sun kama mota ɗauke da ababan fashewa

    

    Asalin hoton, Getty Images

    Rundunar tsaro ta Asakarawan Zamfara ta ce ta kama wata mota da direbanta da ke ɗauke da wasu abubuwan fashewa da take zargin za a kai wa yanbindiga.

    Rundunar Askarawan ta ce ta kuma samu kuɗi sama da naira miliyan 13 a motar da ta kama a ƙauyen Bindin da ke ƙaramar hukumar Maru.

    Jihar Zamfara dai na fama da matsalar tsaro ta ƴanbindiga wadda ta ƙi ci ta ƙi cinyewa, inda rahotanni masu karo da juna ke nuna rasuwar dubban mutane da kuma ɗaiɗaita miliyoyi.

16. 20 Aprilu 2026Al'umma jihar Diffa a Nijar na fama da matsalar wutar lantarki

    

    Asalin hoton, Getty Images

    Al'ummar jjiar Diffa ta jamhuriyar Nijar na kokawa da matsalar ɗaukewar wuta lantarki, lamarin da ya haifar da babbar koma baya ga al’amuran yau da kullum na jama’a.

    Tuni dai al’umma da ƙungiyoyin kare haƙƙin masu saye suka fara nuna damuwarsu tare da kira ga hukumomi su shawo kan wannan matsalar.

    Jamhuriyar Nijar dai na samun kaso kusan 60 na wutarta daga Najeriya mai maƙwabtaka tun bayan da alaka tsakanin ƙasashen guda biyu ta samu tangarɗa bayan juyin mulkin 2023 da ya hambarar da shugaba Mohamed Bazoum.

    Kafin tsamin dangantakarar tsakanin ƙasashen guda biyu dai kusan za a iya cewa jamhuriyar na samun wutarta kaso 100 daga Najeriya.

17. 20 Aprilu 2026China ta yi kiran sake zaman tattaunawa tsakanin Amurka da Iran

    

    Asalin hoton, Getty Images

    Mai magana da yawun ma'aikatar harkokin wajen China ya yi kira ga sake zaman tattaunawa tsakanin Amurka da Iran sakamakon ƙwace jirgin dakon ƙasar Iran da Amurka ta yi mai suna Touska.

    Guo Jiakun ya shaida wa manema labarai cewa China ta bayyana damuwa kan "ƙwace da ƙarfi" na jirgin ruwan da sojojin ruwan Amurka suka yi, kamar yadda kamfanin dillancin labarai na AFP ya rawaito.

    A baya dai ma'aikatar harkokin wajen ta China ta bayyana toshe tashoshin ruwan Iran da "rashin sanin ya kamata".

    An ƙiyasta cewa China na sayen kusan kaso 90 na man Iran inda masu sharhi ke cewa toshe tashoshin na Iran da Amurka ta yi zai ƙara matsin lamba ga China domin ita ma ta matsa wa Iran lamba ta shiga tattaunawa da Amurka.

18. 20 Aprilu 2026Wane irin haɗari manhajar Claude Mythos ke da shi?

    

    Asalin hoton, Reuters

    A ƴan makonnin nan, duniyar manhajar AI ta cika da hayaniya bayan iƙirarin da babban kamfanin fasaha na Anthropic ya yi kan sabuwar manhajar Claude Mythos.

    Kamfanin yace ya samo wannan manhajar da za ta zarce ɗan adam a wasu sassa irin na kutse da kuma tsaron intanet, wannan ya janyo ce-ce-ku-ce tsakanin masu ruwa da tsaki, 'yan majalisa da kuma cibiyoyin kudade kan haɗarin da da za ta iya haifarwa a al'amuran intanet.

    An baiwa kamfanonin fasaha damar amfani da ita Mythos ta ƙarƙashin wani shiri da ake kira da Project Glasswing, wanda aka tsara domin baiwa Mythos damar juriya da kanta.

    Amma sauran abubuwan da kamfanin Anthropic ya zayyana cewa manhajar za ta iya ci waɗanda ba a taɓa gani ba ne a fanni AI ta yadda ba za a iya banbance aikinta ba da kuma na gaskiya ba.

    Karanta cikakken labarin a nan

19. 20 Aprilu 2026Shekarau ya ce buƙatar takara ce ta haɗa ƴan ADC wuri guda

    

    Asalin hoton, Shekaru/Facebook

    Tsohon gwamnan jihar Kano Ibrahim Shekarau, ya ce son yin takara ne a gaban jiga-jigan da ke jagorantar tafiyar ADC, ba wai bukatar ciyar da kasar gaba ba.

    Yayin wata hira da sashen Hausa na BBC jim kadan bayan sauya sheka daga jam'iyyar PDP zuwa APC a ranar Lahadi, tsohon gwamnan ya ce rashin yarda da akidun 'yan ADC din ne ya sa ya zabi rungumar tsohuwar jama'iyyarsa ta APC, wadda ke kan mulki a yanzu.

    A cewar Shekarau ''Na san da ADC tun wajen wata bakwai ko biyar da ake ta yin batunta, lokacin da su Atiku suka yi gangami har rubutu na yi na gaya musu cewa ni bana goyon bayan 'yan takara kadai su ce za su hadu wuri guda ba tare da jama'iyyunsu ba, idan ka kalle su dukkansu takara suke nema''

    Karanta cikakken labarin

20. 20 Aprilu 2026Jam'iyyar tsohon shugaban Bulgeria, Rumen Radev na kan gaba a zaɓen majalisar dokoki

    

    Asalin hoton, Getty Images

    Sakamakon farko na zaɓen yan majalisar dokokin Bulgaria, da aka gudanar ranar Lahadi ya nuna cewa jam’iyyar Progressive Bulgaria ta tsohon shugaban ƙasar Rumen Radev, na kan gaba da tazara mai yawa, kuma tana ma iya kafa gwamnati ita kaɗai.

    Mista Radev ya shugabanci Bulgaria daga shekarar 2017 har zuwa lokacin da ya sauka a watan Janairu.

    Ya yi kamfen ne kan kawar da cin hanci da rashawa. Ya soki mamayar da Rasha ta yi wa Ukraine, amma yana adawa da takunkumin da Tarayyar Turai ta kakabawa Moscow.

    Wani wakilin BBC ya ce masu jefa ƙuri’a sun ba Mista Radev damar kawo kwanciyar hankali bayan shafe shekaru na gwamnatocin gamin bambiza da suka rasa tabbas da kuma karfin gudanar da al'amura.

    Wannan shine zabe na takwas da aka yi cikin shekaru biyar kacal a kasar. dai.