Ni bande bafite agahigo mu mateka y'igikombe cy'isi?

Iki gikombe cy'Isi cya 2026 kigiye kubera muri Leta Zunze Ubumwe za Amerika, Canada na Mexique nacyo ubwacyo gifite umuhigo.

Ku nshuro ya mbere kizitabirwa n'amakipe menshi, ni cyo kinini kurusha ibindi bikombe nk'ibi byakinwe mu mateka. Amakipe yavuye kuri 32 yagikinnye mu 1998 agera kuri 48 uyu mwaka.

Usibye ibi hari andi mateka menshi ashobora guhinduka muri uyu mwaka, harimo iminota myinshi y'umukino , ibitego byinshi ku mukinnyi ku giti cye n'ibitego byinshi by'ikipe.

Iyi ni imwe mu mihigo yaciwe mu mateka y'igikombe cy'isi kandi ishobora no guhinduka muri iki kigiye gukinwa.

Igihugu cyatwaye igikombe cy'isi kenshi

Mu mateka y'imyaka 96 y'igikombe cy'isi cy'abagabo cya FIFA, ibihugu umunani gusa ni byo byatwaye iri rushanwa. Muri ibyo umunani, bitandatu ni byo byaryitwayemo inshuro nyinshi.

Brazil ifite agahigo ko gutwara iki gikombe inshuro nyinshi, inshuro eshanu, yabikoze mu 1958, 1962, 1970, 1994 na 2002.

Ubudage n'Ubutaliyani ni byo bihugu bikurikiraho aho buri kimwe cyatwaye ibi bikombe bine.

Inshuro eshatu Ubudage bwagitwaye bwitwa Ubudage bw'Iburengerazuba, mbere y'uko igihugu gisubira guhuzwa nk'igihugu kimwe nyuma y'igikombe cy'isi cyo mu 1990.

Argentine yatwaye igikombe cy'isi inshuro eshatu, mu gihe Ubufaransa na Uruguay byatwaye iri rushanwa inshuro ebyiri buri kimwe.

Ubwongereza na Espagne ni byo byonyine byatwaye igikombe rimwe.

Ibihugu n'abakinnyi batsinze ibitego byinshi

Miroslav Klose wahoze ari rutahizamu w'Ubudage afite agahigo ko gutsinda ibitego byinshi mu mateka y'igikombe cy'isi. Yatsinze ibitego 16 mu mikino 24 yakinnye.

Ronaldo wahoze ari rutahizamu wa Brazil ni uwa kabiri n'ibitego 15 mu mikino 19.

Gerd Müller, wamaze igihe kinini akinira Ubudage bw'Iburengerazuba, ni uwa gatatu n'ibitego 14 mu mikino 14 mu gikombe cy'isi.

Lionel Messi w'ikipe ya Argentine anganya umwanya wa kane na Just Fontaine wahoze ari rutahizamu w'u Bufaransa, bombi bafite ibitego 13 buri umwe.

Rutahizamu wa Real Madrid n'Umufaransa Kylian Mbappé ni uwa gatandatu. We na Pelé watwaye igikombe cy'isi inshuro eshatu muri Brazil buri umwe yatsinze ibitego 12.

Messi na Mbappé ni bo bonyine bafite amahirwe yo kurusha Klose muri iyi mpeshyi.

Aba bombi nibo batsinze ibitego byinshi mu gikombe cy'isi cyabereye muri Qatar mu 2022, batsinze ibitego birindwi n'umunani (Mbappé).

Abandi bakinnyi bari mu 10 ba mbere ni Sandor Kocsis (Hungary) na Jurgen Klinsmann (Ubudage bw'Iburengerazuba/Ubudage) bafite ibitego 11 buri umwe.

Ku bijyanye n'ibitego byatsinzwe n'ibihugu muri iri rushanwa, Brazil iza ku mwanya wa mbere aho ifite ibitego 237 muri rusange.

Ubudage buri ku mwanya wa kabiri n'ibitego 232, ikurikirwa na Argentine imaze gutsinda ibitego 152 muri iri rushanwa.

Ibindi bihugu byatsinze ibitego byinshi ni;

Ibyo ni byo bihugu byonyine bifite ibitego birenga 100.

Ni byo bisoza uru rutonde rw'ibihugu 10 bya mbere muri iri rushanwa.

Agahigo ko gukina iminota myinshi

Nubwo agishakisha agahigo ko gutsinda ibitego byinshi mu gikombe cy'isi, Lionel Messi asanzwe afite agahigo ko gukina iminota myinshi mu gikombe cy'isi.

Mu mikino 26 uyu mukinnyi watsindiye Ballon d'Or inshuro umunani yakinnye iminota 2,314.

Akurikirwa na Paolo Maldini wahoze ari myugariro w'Ubutaliyani wakinnye iminota 2,217.

Lothar Matthaus wahoze ari umukinnyi wo hagati mu Budage no mu Budage bw'Iburengerazuba, watwaye igikombe cy'isi na Ballon d'Or mu 1990, aza ku mwanya wa gatatu n'iminota 2,045.

Rutahizamu w'Ubudage bw'Iburengerazuba hagati ya 1954 na 1970 Uwe Seeler, ni uwa kane kuri uru rutonde wamaze iminota 1,980 akina.

Wladyslaw Zmuda na Grzegorz Lato (bombi bo muri Poland) nibo basoza mu 10 ba mbere.