Igikombe cy'Isi 2026: Abakinnyi 10 bazakurikiranwa cyane

Bamwe mu bakinnyi babiri b'umupira w'amaguru bazwi cyane ku isi bashobora kuba ubu bagiye gukina igikombe cy'isi cyabo cya nyuma.

Abo ni Lionel Messi, Umunya-Argentine w'imyaka 38 akaba ari umukinnyi wa nter Miami muri Leta Zunze Ubumwe za Amerika, na Cristiano Ronaldo, Umunya-Portugal w'imyaka 41 ukinira Al-Nassr muri Arabiya Sawudite.

Abakinnyi bakiri bato nka Lamine Yamal wo muri Espagne na Kylian Mbappé wo mu Bufaransa bashobora gusimbura aba bakinnyi 'bakuze', ariko hari n'abandi bakinnyi bashobora kubaka amazina yabo mu bururyo buhanitse muri iki gikombe cy'Isi kizaba kigiye kubera muri Amerika, Canada na Mexique.

Muri iyi nkuru turabagezaho abakinnyi 10 bazakurikiranwa cyane mu gikombe cy'isi cy'uyu mwaka, kizakinirwa mu mijyi 16 kandi kirimo amakipe 48 azitabira.

Lionel Messi

Mu myaka ine ishize muri Qatar, Messi yayoboye Argentine itwara igikombe cy'isi ndetse anatera ikirenge mu cya Diego Maradona, icyamamare cy'igihugu.

Messi yagize intsinzi ikomeye mu mupira w'amaguru, atwara ibikombe bikomeye by'amakipe, cyane cyane ubwo yari muri Barcelona, ​​​​n'ibikombe bye bwite nk'umukinnyi.

Kuva yarangiza igikombe cy'isi muri Qatar, yagiye muri Amerika maze agira Inter Miami ikipe ikomeye muri Major League Soccer (MLS), yegukanye igikombe cya MLS umwaka ushize.

Cristiano Ronaldo

Uyu mukinnyi wa Portugal agiye kwerekeza mu gikombe cy'isi nyuma yo kuyobora ikipe ya Al Nassr yo muri Arabiya Sawudite ku gikombe cya shampiyona y'igihugu muri uyu mwaka w'imikino.

Yinjiye muri iyi kipe ku mugaragaro m'Ukuboza(12) 2023.

Iki gikombe cyongera ku rutonde rw'ibikombe bya shampiyona hamwe na Manchester United mu Bwongereza, Real Madrid muri Spain na Juventus mu Butaliyani, ndetse n'ibikombe bitanu bya Champions League (bine hamwe na Madrid, kimwe a United).

Yanatwaye igikombe cy'Uburayi ari kumwe na Portugal ndetse n'ibikombe bibiri bya UEFA Nations League.

Ku myaka 41, inyota ye yo kugaba ibikombe no gutsinda agahigo nta kimenyetso na kimwe kigaragaza ko azagabanuka.

Inyota ye izarushaho uyu mwaka mu gikombe cy'isi kuko kiri mu byo ataratwara ndetse Messi benshi bavuga ko abiri mu byo amurusha.

Ronaldo na Portugal bari mu itsinda ririmo na Les Léopards ya DR Congo. Umwe mu mikino yitezwe cyane mu karere ka Afurika y'iburasirazuba.

Kylian Mbappé

Mbappé amaze igihe kinini afatwa nk'umukinnyi mwiza ku isi nyuma ya Messi na Ronaldo.

Hari abazavuga ko uyu rutahizamu wa Real Madrid yamaze kugera ku bintu bikomeye nyuma yo gutwara igikombe cy'isi cya 2018 no gutwara ibikombe byinshi, ariko ntaratwara igikombe cya Champions League cyangwa Ballon d'Or.

Afite amahirwe menshi yo kwegukana Ballon d'Or y'uyu mwaka, igihembo gihabwa umukinnyi mwiza ku isi ngarukamwaka - niba ashobora kugeza Ubufaransa ku kindi gikombe cy'isi mu gihe azaba ari imbere mu gutsinda ibitego byinshi muri Espagne ndetse akanayobora mu gutsinda ibitego muri Champions League.

Ousmane Dembélé

Niwe wegukanye Ballon d'Or iheruka, ubu akaba n'umukinnyi wegukanye igikombe cya Champions League mbere y'igikombe cy'isi.

Ikipe ye ya PSG yatsinze Arsenal kuri penaliti maze yegukana icyo gikombe.

Uyu rutahizamu w'Umufaransa yamenyekanye cyane kuva yagera muri Paris Saint-Germain mu myaka itatu ishize, ayifasha kwegukana igikombe cya Champions League bwa mbere umwaka ushize ndetse no muri uyu mwaka w'imikino.

Barcelona yaguze Dembélé kuri miliyoni 173 z'amadolari mu 2017. Nubwo atitwaye neza muri iyo kipe, ubuhanga bwe bwaragaragaye ubwo yerekezaga muri PSG.

Erling Haaland

Uyu rutahizamu wa Manchester City agiye gukina irushanwa rye rya mbere rikomeye mpuzamahanga nyuma yo guca agahigo ku rwego rw'amakipe.

Haaland w'imyaka 25, azwiho gutsinda ibitego byinshi muri Champions League na Premier League, kandi yamaze kurenga agahigo ka Messi ko gutsinda ibitego mu buryo bwihuse cyane.

Norvege isa nkaho idahagaze neza mu gikombe cy'isi cy'uyu mwaka, ariko ifite Haaland nk'umukinnyi uteje akaga cyane imbere y'izamu.

Lamine Yamal

Uyu musore ukori muto w'umunya-Espagne yabaye icyamamare mu irushanwa ry'i Burayi rya 2024 nubwo yari afite imyaka 17 gusa mu ijoro rya nyuma.

Kubera umuino we uhambaye, yabaye umukinnyi muto kurusha abandi bose batsinze igitego mu irushanwa ry'i Burayi ry'abagabo.

Yamal yagereranyijwe na Messi, kandi akiri uruhunja yigeze gufotorwa ari kumwe n'uyu mukinnyi w'icyamamare wo muri Argentine.

Yamal ashobora guhangana na Mbappé nk'abakinnyi bashobora kuziba icyuho cyasizwe na Messi na Ronaldo igihe bazaba bagiye mu kiruhuko cy'izabukuru.

Kandi uko bazitwara muri iki gikombe cy'isi bishobora kongera impaka kuri iyo ngingo.

Jude Bellingham

Ni we mukinnyi wo hagati hafi ya buri kipe nini yifuzaga ubwo Real Madrid yasinyaga amasezerano ye mu 2023, avuye mu ikipe yo mu Budage ya Borussia Dortmund.

Yayoboye ikipe ye ku nshuro ya 15 mu gikombe cya Champions League ndetse n'igikombe cya Spanish League mu mwaka we wa mbere muri iyi kipe mbere yo kugeza Ubwongereza ku mukino wa nyuma w'igikombe cya Euro.

Bellingham ni umukinnyi mwiza nubwo ibihe bigoye muri Madrid.

Azaba ari umwe mu bakinnyi bakomeye mu Bwongereza mu gihe igihugu kigamije kwegukana igikombe gikomeye ku nshuro ya mbere kuva mu 1966.

Neymar

Niwe mukinnyi watsinze ibitego byinshi kurusha abandi bose muri Brezili.

Yatsindiye ibihembo bikomeye nk'umukinnyi, kandi yatsinze ibitego 79 mu gihugu cye, arusha amateka ya Pelé.

Ariko ntarageza Brazil ku gikombe cya gatandatu cy'isi.

Neymar, ubu ufite imyaka 34, yahamagawe n'umutoza wa Brazil Carlo Ancelotti mu gikombe cy'isi ku nshuro ya kane.

Ubu ari mu ikipe ya Santos FC y'umujyi yavukiyemo aho yasubiye muri iyo kipe yazamukiyemo mu 2025 nyuma y'uko amasezerano ye na Al Hilal yo muri Arabiya Sawudite asheshwe.

Mohamed Salah

Uyu mukinnyi wa Misiri azava muri Liverpool nyuma y'umwaka mubi muri iyi kipe, ariko aracyari umukinnyi uteje akaga ku gihugu cye.

Misiri ifite icyizere cy'uko uyu rutahizamu w'imyaka 33 azitwara neza mu gikombe cy'isi.

Salah yatsinze ibitego 257 mu mikino 442 ndetse atwara ibikombe byinshi ari kumwe na Liverpool, harimo igikombe cya Champions League n'ibikombe bibiri bya Premier League.

Ubwo yari kumwe na Misiri, yayoboye ikipe kugeza ku mukino wa nyuma w'igikombe cya Afurika inshuro ebyiri, adatwaye igikombe.

Christian Pulisic

Akiri muto, Pulisic yasaga n'aho afite ubushobozi bwo kuba icyamamare gikomeye mu mupira w'amaguru.

Yakiniye amwe mu makipe akomeye mu Burayi mu Budage, mu Bwongereza no mu Butaliyani, atwara ibikombe bikomeye kandi nta na kimwe cyaruta igikombe cya Champions League ari kumwe na Chelsea.

Ubu muri AC Milan, uyu rutahizamu yazamutse cyane kandi azaba umukinnyi ukomeye mu byiringiro by'umutoza wa Amerika Mauricio Pochettino byo kugeza ikipe y'igihugu y'abagabo kure mu gikombe cy'isi ku butaka bwayo.