Ghana: Ukoresha TikTok yafunzwe kubera gutangaza amakuru y'ibinyoma kuri perezida

Umunya-Ghana-kazi ukoresha urubuga nkoranyambaga rwa TikTok yakatiwe gufungwa umwaka umwe nyuma yo kwemera ibirego by'imyitwarire ikomeretsa no gutangaza amakuru y'ibinyoma, bijyanye n'ubutumwa yatangaje kuri urwo rubuga buvuga kuri Perezida John Mahama.

Mu kwezi gushize no mu ntangiriro y'uku kwezi, Camilla Alhassan yatangaje urukurikirane rwa videwo aho yavuze, nta gihamya atanze, ko perezida yatuye igitambo cy'inka 32 nka kimwe mu byari bigize umuhango wo guterekera wo kumufasha gutsinda amatora rusange yo mu mwaka wa 2024.

Uwo Munya-Ghana-kazi w'imyaka 43 yanavuze ko gahunda ya leta yo gutanga ibikoresho abagore n'abakobwa bifashisha mu mihango (cyangwa ubutinyanka mu Kirundi) ku baherutse kugirwaho ingaruka n'imyuzure, yari igerageza ryo guhishira ibyo perezida yakoze.

Umucamanza yanze ubusabe bwamwingingiraga gutanga igihano cyoroheje, yanzura ko igifungo kizabera isomo n'abandi bafite imyitwarire nk'iyo.

Abashinjacyaha bari bavuze ko Alhassan, ufite abamukurikira kuri TikTok barenga 70,000, yashinje perezida ibirego by'ibinyoma kandi bimusebya abinyujije mu ruhererekane rw'ubutumwa yatangaje.

Videwo ze zahererekanyijwe cyane, zatumye Alhassan atabwa muri yombi mu ntangiriro y'uku kwezi, zongeye kubyutsa impaka muri Ghana zijyanye n'itangazwa ry'amakuru y'ibinyoma ku mbuga nkoranyambaga no kumenya aho kugarukiriza hagati y'aho umuntu ashobora guhanirwa nk'icyaha n'aho ubwisanzure bwo kuvuga icyo umuntu atekereza bugarukira.

Umucamanza yavuze ko icyo gihano ari ngombwa mu rwego rwo kugabanya ikwirakwira ry'amakuru y'ibinyoma, asigaye yeze ku mbuga nkoranyambaga.

Ubu si ubwa mbere umuntu uvuga rikumvikana ku mbuga nkoranyambaga afunzwe muri Ghana.