Elfyn Evans yn ennill Pencampwriaeth Ralïo y Byd am y tro cyntaf

Mae'r gyrrwr rali o Ddinas Mawddwy, Elfyn Evans, wedi ennill pencampwriaeth y byd yn dilyn ras olaf y tymor yn Sardinia ddydd Sul.

Evans, 37, ydy'r Cymro cyntaf erioed i ennill y tlws fel prif yrrwr, ac fe wnaeth hynny trwy drechu Oliver Solberg dan amgylchiadau annisgwyl o ddramatig.

Yn y cymal olaf un, roedd Solberg ddigon ar y blaen o ran amser, i orffen ar y brig.

Dim ond un pwynt oedd rhwng y ddau yn nhabl y bencampwriaeth wrth iddyn nhw fynd i'r 7.10 cilometr olaf.

Ond gyda thri chornel o'r cwrs i fynd, fe gafodd Solberg ddamwain ac fe aeth ei gerbyd Yaris oddi ar y ffordd.

Er iddo lwyddo i orffen - ac ennill Rali Sardinia - roedd yn ormod o dalcen caled i atal buddugoliaeth y Cymro a'i gyd-yrrwr Scott Martin.

"Dydy o heb suddo i mewn," dywedodd. "Ro'n i'n siŵr bod bob dim ar ben i mi."

Fe ddechreuodd Evans y cymal olaf cyn ei brif wrthwynebydd, ac felly roedd pwysau arno i geisio sicrhau'r amser mwyaf cyflym posib.

Yn syth ar ôl gorffen, roedd Evans yn "eitha' sicr na fydd o'n ddigon - mi dries i'n galed iawn, ond o'n i'n teimlo 'mod i wedi gwthio'n rhy galed.

"Roedd rhaid i ni roi cynnig arni, ond dwi wedi'n siomi. Dwi ddim yn rhoi'r ffidil yn y to, dwi m'ond yn bod yn onest."

Yr un oedd ei farn am ei berfformiad ei hun, hyd yn oed wedi i ddamwain Solberg roi'r teitl iddo.

"Wnes i ddim gyrru'r cymal ora' a wnes i daflu popeth i mewn ond doedd o ddim yn lân," dywedodd.

"Dwi'n teimlo dros Oliver. Mae o wedi ca'l penwythnos anhygoel."

Ychwanegodd: "Mae'n anodd gw'bod be' ydy fy ymateb. Mae'n swreal, sut wna'th o ddigwydd. Mae'n rhyddhad.

"Nid dyma fydda'r ffordd 'swn i fwya' balch o ennill ond job done."

Roedd y Cymro wedi gorffen yn ail yn y bencampwriaeth ar bum achlysur, gan gynnwys y llynedd pan oedd ar y brig cyn y rali olaf yn Saudi Arabia.

Daeth yn ail hefyd yn 2020, 2021, 2023 a 2024.

Roedd disgwyl i rali olaf eleni ddigwydd yn Saudi Arabia ym mis Tachwedd, ond cafodd ei ganslo yn sgil gwrthdaro yn y Dwyrain Canol.

Y rali yn Yr Eidal felly oedd ras olaf yn y bencampwriaeth, ac fe ddechreuodd Evans y penwythnos ar frig y tabl.

Roedd wedi arwain y bencampwriaeth am y rhan fwyaf o'r tymor ond fe fu'n anlwcus i gael tyllau yn ei deiars trwy'r ymgyrch, gan gynnwys yn y tair rali ddiwethaf.

Y Cymro yw'r trydydd pencampwr byd o wledydd Prydain, gan ddilyn Colin McRae a Richard Burns, a'r cyntaf i ennill ers 25 mlynedd. Burns oedd y diwethaf yn 2001.

Mae Solberg yn rhan o'r un tîm Toyota ag Evans ac mi enillodd ei dad, Petter Solberg, y tlws yn 2003.

Dywedodd Evans ddyddiau cyn y rali ei fod wedi "cael gyrfa hir yn y gêm 'ma, wrth gwrs mae o be' 'dan ni'n gweithio tuag ata' fo".

"Ond 'dio'm yn mynd i newid bywyd adre', 'dio'm yn mynd i newid bywyd day to day yn diwedd. Mae o'n fwy o nice to have i fi ar y pwynt yma yn hytrach na bod rhaid."

Roedd angen iddo dderbyn 19 pwynt o'r uchafswm o 35 oedd ar gael i unrhyw yrrwr yn y rali dros y penwythnos.

Roedd wedi ennill 19.2 pwynt ar gyfartaledd fesul digwyddiad y tymor yma, cyn Sardinia.

Y pwyntiau terfynol ar frig tabl y gyrwyr oedd:

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.