အောက်တိုဘာ ၃ ရက် သတင်းများအနှစ်ချုပ် - ရသေ့တောင်မှာ လေကြောင်းဗုံးကြဲခံရ
ဓာတ်ပုံ ရင်းမြစ်, ရခိုင်မျိုးချစ်လူငယ်ဖောင်ဒေးရှင်း
ရခိုင်ပြည်နယ်က ရသေ့တောင်မြို့နယ်ကို ဒီမနက်ပိုင်းမှာ စစ်တပ်က လေကြောင်း ဗုံးကြဲသွားတယ်လို့ မြေပြင်အခြေအနေသိရှိသူက ဘီဘီစီကိုပြောပါတယ်။
အရပ်သားထိခိုက်သေဆုံးမှုကိုတော့ အတိအကျမသိရသေးဘူးလို့ဆိုပါတယ်။
အာရက္ခတပ်တော် အေအေရဲ့ထုတ်ပြန်ချက်အရ ရသေ့တောင်မြို့နယ်က ကူတောင်ရွာကို စက်တင်ဘာ ၃၀ ရက်လည်း ဂျက်ဖိုက်တာ ၂ စီးနဲ့ ဗုံးကြဲတာကြောင့် လင်မယားနှစ်ဦးမှာ အမျိုးသား သေဆုံးပြီး အမျိုးသမီးက ဒဏ်ရာရပါတယ်။
ဒီရက်ပိုင်းမှာ ဆက်တိုက်ဗုံးကြဲခံနေရတဲ့ ပုဏ္ဏားကျွန်းမြို့နယ်ထဲကို မနေ့ညတုန်းကလည်း လေကြောင်းဗုံးကြဲသွားတယ်လို့ စစ်တပ်ရဲ့လေကြောင်းတိုက်ခိုက်မှုကို စောင့်ကြည့်နေတဲ့ ဝေဟင်အဖွဲ့ကထုတ်ပြန်ပါတယ်။
ဒီတိုက်ခိုက်မှုရဲ့ ထိခိုက်မှုကိုတော့ ပုဏ္ဏားကျွန်းလူငယ်အဖွဲ့ကိုဘီဘီစီက ဆက်သွယ် မေးမြန်းထားပါတယ်။
အဲဒီနေ့ မနက်ပိုင်းကလည်း ပုဏ္ဏားကျွန်းမြို့နယ်၊ အောင်ဖြူပြင်ရွာက ကားပြင်ဆိုင်ကို လေကြောင်းဗုံးကြဲခံရလို့ ပိုင်ရှင်ရဲ့ဇနီးနဲ့ အလုပ်သမားတို့ ဒဏ်ရာရတယ်လို့ အေအေကထုတ်ပြန်ထားတာပါ။
ရခိုင်ပြည်နယ်ထဲမှာ ၆ ရက်အတွင်း မြို့နယ် ၅ ခုမှာ လေကြောင်းတိုက်ခိုက်မှုကြောင့် ၅၁ ဦးသေဆုံးပြီး ၆၉ ဦးထိခိုက်ဒဏ်ရာရတာကို အေအေရဲ့အချက်အလက်အရသိရပါတယ်။
ဒီထဲမှာ အရပ်သား ၅၀ အစုလိုက်သေဆုံးပြီး ၅၇ ဦးထိခိုက်ခဲ့တဲ့ ကျောက်တော်အိန္ဒိယဈေးနဲ့ ကစ္ဆပနဒီတံတားဝန်းကျင်တိုက်ခိုက်မှုဟာ အများဆုံးထိခိုက်သေဆုံးမှု ဖြစ်ပါတယ်။
