ከሞሮኮ ወደ ስፔን ለማቋረጥ የሞከሩ 15 ስደተኞች መሞታቸውን ተከትሎ ወታደሮች ሊሰማሩ ነው

ሐሙስ ዕለት በሺህዎች የሚቆጠሩ ስደተኞች ከሞሮኮ የስፔን ግዛት ወደሆነችው ሴኡታ ለማቋረጥ በሞከሩበት ሰዓት በርካታ ሰዎች መሞታቸውን ተከትሎ ማድሪድ ወታደሮቿን ወደ ስፍራው ልትልክ ነው።

ቢያንስ 15 ስደተኞች ሴኡታ ለመድረስ ባሕሩን ሲያቋርጡ ሰጥመው መሞታቸው ተገልጿል።

የአካባቢው ባለሥልጣናት በመሬት አቀማመጧ የአፍሪቃ አህጉር ጫፍ ላይ ወደ ምትገኘው የስፔን ግዛት ሴኡታ የሚመጡ ስደተኞች ቁጥር ከቅርብ ጊዜ ወዲህ እየጨመረ መምጣቱን ተከትሎ ማድሪድ ድጋፍ እንድታደርግ መጠየቃቸው ተገልጿል።

ነገር ግን ሐሙስ ዕለት በርካታ ስደተኞች ባሕሩን ለማቋረጥ ሲሞክሩ በተፈጠረ ግርግር ሕይወት ማለፉ እና ሁኔታው ከድንበር ተቆጣጣሪዎች አቅም በላይ መሆኑ ተገልጿል።

የስፔን ከፍተኛ ፍርድ ቤት የአገሪቱ ግዛት ወደሆኑት ወደ ሴኡታ ወይንም ሜሊላ ለመድረስ የሚሞክሩ ስደተኞች ወደ ሞሮኮ እንዳይመለሱ ሲል ውሳኔ አሳልፏል።

የስፔን አገር ውስጥ ሚኒስቴር የሕገወጥ ሰው አዘዋዋሪዎች ይህንን የከፍተኛውን ፍርድ ቤት ውሳኔ በመጠቀም "ሰነድ አልባ ስደተኞች በብዛት እንዲፈልሱ ያበረታታሉ" ሲሉ ኮንኗል።

"ጦሩ የአካባቢው የሲቪል ዘብ አቅሙን እንዲጠቀም እንዲሁም በሴኡታ ከተማ ደኅንነት እንዲረጋገጥ አስፈላጊ የሆኑት [አካላትን] በሙሉ ያጠናክራል" ብሏል።

ለስፔን እና ሞሮኮ አዋሳኝ ወደሆነችው ሴኡታ የድንበር ቀጠና በሺህዎች የሚቆጠሩ ስደተኞች በባህርና በየብስ በብዛት እየገቡ መሆናቸው በአካባቢው ከፍተኛ ውጥረት እና ውዥንብር ተፈጥሯል።

ሁኔታው በአካባቢው ካሉ የስደተኞች መቀበያ ማዕከላት አቅም በላይ ሆኗል። የሴኡታ አስተዳደር ማዕከላዊው የስፔን መንግሥት ብሔራዊ የድንገተኛ ጊዜ አዋጅ እንዲያውጅ እና ድንበሩን ለመጠበቅ እንዲሁም ደኅንነትን ለማስከበር የሠራዊት ጣልቃ ገብነት እንዲደረግ ጥሪ አቅርቧል።

የሴኡታ አስተዳደር ሐሙስ ዕለት እንዳስታወቀው ባለፉት 10 ቀናት ከ1500 እስከ 2000 የሚሆኑ ስደተኞች ወደ ግዛቲቱ አቋርጠው ገብተዋል።

ከስደተኞቹ መካከል የተወሰኑት ወደ ስፔን ግዛት ሲገቡ "ስፔን ለዘላለም ትኑር" እያሉ ደስታቸውን ሲገልጹ ታይተዋል።

ሐሙስ ዕለት እንዲሁ በመቶዎች የሚቆጠሩ ወደ ከተማዋ መድረሳቸውን ተከትሎ የክልሉ ፕሬዚዳንት ሔሱስ ቪቫስ "[ስፔን] ሙሉ በሙሉ የሰብዓዊ እና የማኅበራዊ ሉዓላዊነት" ድጋፍ እንድታደርግ ጥያቄ አቅርበዋል።

የፕሬዚዳነቱ ጥሪ ማድሪድ ወታደሮቿን እንድትሰማራ እና ድንበሩን እንድትቆጣጠር ያደርጋል።

የስፔን አገር ውስጥ ጉዳይ ሚኒስቴር ብሔራዊ አስቸኳይ ጊዜ ማወጅ ያስፈልጋል የሚለውን ውድቅ ያደረጉ ሲሆን እንዲህ ዓይነቱ እርምጃ የስደተኞች ቀውስን አይገታም በማለት ተጨማሪ ድጋፎችን ለመላክ ቃል ገብተዋል።

ሚኒስቴሩ 60 ወታደሮች የድንበር ጥበቃውን ለማጠናከር እንደሚላኩ አስታውቋል።

ሴኡታ እና መሊያ የተባሉት የስፔይን ከተሞች የአውሮፓ ሕብረት ከአፍሪካ አህጉር ጋር የሚጋራቸው ብቸኛ የየብስ ድንበሮች ናቸው።

የስፔን አገር ውስጥ ሚኒስቴር ወደ ግዛቶቹ የሚፈልሱ ዜጎችን ለመቆጣጠር ከሞሮኮ ጋር እየሰራ መሆኑን አስታውቋል።